ລັດ­ຖະ­ບານ​ອອກ​ກົດ​ຫ້າມ 10 ຂໍ້ ໃສ່​ພະ­ນັກ­ງານການ​ເງິນ

ວຽກ​ງານ​ຂະ­ແໜງ­ການ​ເງິນ​ເປັນ​ວຽກ​ງານທີ່​ຫຼໍ່​ແຫຼມ​ຕິດ​ພັນ​ກັບ​ເສດ­ຖະ­ກິດ, ປະ­ຈຸ​ບັນ​ພັກ-ລັດ ກໍ່​ຄື​ກະ­ຊວງ​ການ​ເງິນ​ກຳ­ລັງ​ສຸມ​ໃສ່​ຈັດ​ຕັ້ງ​ປະ­ຕິ­ບັດການ​ຈັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ ສະ­ເພາະໃນ​ປີ 2017 ໄດ້​ຕັ້ງ​ເປົ້າ​ໃຫ້​ໄດ້​ທັງ​ໝົດ​ປະ­ມານ 23.941 ຕື້​ກີບ, ໃນ​ນີ້​ລາຍ​ຮັບ​ພາຍ​ໃນ 21.463 ຕື້​ກີບ ແລະ​ແຜນ​ລາຍ​ຈ່າຍ​ງົບ­ປະ­ມານ​ທັງ​ໝົດ 32.402 ຕື້​ກີບ, ຄາດ​ຄະ­ເນ​ເງິນ​ຂາດ​ດຸນ​ທັງ​ໝົດ 8.461 ຕື້​ກີບ.

ສະ­ນັ້ນ ເພື່ອ​ບັນ­ລຸ​ເປົ້າ​ໝາຍ​ດັ່ງ­ກ່າວ​ທັງ​ເປັນການ​ສະ­ກັດ​ກັ້ນ​ຕ້ານ​ການ​ສໍ້​ລາດ​ບັງ​ຫຼວງ ທັງ​ຫຼີກເວັ້ນ​ຫາງ​ສຽງ​ສັງ­ຄົມ​ໃນ​ຂະ­ແໜງ­ການ​ເງິນ​ນັບ ແຕ່​ສູນ​ການ​ຮອດ​ທ້ອງ­ຖິ່ນ, ກະ­ຊວງ​ການ​ເງິນ​ຈິ່ງໄດ້​ອອກ​ຂໍ້​ຕົກ­ລົງ​ສະ­ບັບ​ເລກ​ທີ 1124/ກງ ລົງ​ວັນທີ 10 ເມ­ສາ 2017 ເຊັນ​ໂດຍ ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ, ລັດ­ຖະ­ມົນ­ຕີ​ກະ­ຊວງ​ການເງິນ ວ່າ​ດ້ວຍ​ຂໍ້​ຫ້າມ ແລະ​ວິ­ໄນ​ຂອງ​ພະ­ນັກ­ງານ-ລັດ­ຖະ­ກອນ​ຂະ­ແໜງ­ການ​ເງິນ.

ຊຶ່ງ​ເນື້ອ​ໃນ​ສຳ­ຄັນ​ຂອງ​ຂໍ້​ຕົກ­ລົງ​ສະ­ບັບ​ດັ່ງ­ກ່າວ ປະ­ກອບ​ດ້ວຍ 10 ຂໍ້​ຫ້າມ​ດັ່ງ­ນີ້:

  1. ຫ້າມ​ສ້າງ ແລະ​ລາຍ​ງານ​ຂໍ້​ມູນ​ທີ່​ບໍ່​ຖືກ­ຕ້ອງ ແລະ​ບໍ່​ມີ​ມູນ​ຄວາມ​ຈິງ, ສ້າງ​ກຸ່ມ​ກ້ອນ, ປັ່ນ​ປ່ວນແບ່ງ​ແຍກ​ຄວາມ​ສາ­ມັກ­ຄີ​ພາຍ​ໃນ​ກໍ່­ໃຫ້­ເກີດ​ຄວາມ ເສຍ​ຫາຍ​ຕໍ່​ການ­ຈັດ­ຕັ້ງ ຫຼື ບຸກ­ຄົນ​ອື່ນ.
  2. ຫ້າມ​ສົມ­ຮູ້​ຮ່ວມ​ຄິດເຊຶ່ອງ​ອຳ​ການ​ກະ­ທຳ​ຜິດ​ຂອງ​ຜູ້​ລະ­ເມີດ​ກົດ­ໝາຍ ແລະ​ລະ­ບຽບ​ການ​ກ່ຽວ​ກັບ​ພາ­ສີ, ສ່ວຍ​ສາ​ອາ­ກອນ, ຊັບ​ສິນ​ຂອງ​ລັດ, ທີ່​ດິນ, ງົບ­ປະ­ມານ​ຂອງ​ລັດ ແລະ​ກົດ­ໝາຍ​ລະ­ບຽບ​ການ​ອື່ນ​ຂອງ​ຂະ­ແໜງ­ການ​ເງິນ.
  3. ຫ້າມ​ສ້າງ​ຄວາມ​ຫຍຸ້ງ­ຍາກ, ຖ່ວງ​ດຶງ, ແກ່­ຍາວ​ເວ­ລາ​ໃນ​ການ​ຄົ້ນ­ຄວ້າ​ແກ້​ໄຂ​ເອ­ກະ­ສານ​ຕ່າງໆ​ເພື່ອ​ທວງ​ເອົາ, ຂໍ​ເອົາ​ສ່ວນ​ແບ່ງ ໂດຍ​ທາງ​ກົງ ຫຼື ທາງ​ອ້ອມ, ເພື່ອ​ຫາ​ຜົນ​ປະ­ໂຫຍດ​ສ່ວນ​ຕົວ, ຄອບ­ຄົວ, ຍາດ​ພີ່­ນ້ອງ, ຈຸ້ມ​ເຈື້ອ, ພັກ​ພວກ ຫຼື ໝູ່​ຄະ­ນະ.
  4. ຫ້າມ​ເປັນ​ນາຍ​ໜ້າ, ເປັນ​ທີ່​ປຶກສາ​ບັນ­ຊີ, ຫົວ­ໜ້າ​ບັນ­ຊີ​ໃຫ້​ແກ່​ການ​ເຄື່ອນໄຫວ​ທຸ­ລະ​ກິດ, ການ​ດຳ­ເນີນ​ຄະ­ດີ, ສ້າງຄວາມ​ເຄື່ອນ​ໄຫວ​ອຳ­ນວຍ​ຄວາມ​ສະດວກ​ໃຫ້​ແກ່​ບຸກ­ຄົນ, ນິ­ຕິ­ບຸກ­ຄົນ​ເພື່ອເຄື່ອນ​ໄຫວ​ຄ້າ­ຂາຍ​ເຖື່ອນ, ຫຼົບ​ຫຼີກ​ເຊື່ອງອຳ​ຄ່າ​ພາ­ສີ-ອາ­ກອນ-ອາ­ກອນ, ຊັບ​ສິນຂອງ​ລັດ ແລະ​ອື່ນໆ​ທີ່​ຜິດ​ກົດ­ໝາຍ ແລະ ລະ­ບຽບ​ການ
  5. ຫ້າມ​ປອມ​ແປງ​ເອ­ກະ­ສານ, ຖານຂໍ້​ມູນ, ໃບ­ຮັບ (ເກັບ) ເງິນ​ອາ­ກອນ, ພາສີ, ຊັບ​ສິນ, ຄັງ​ເງິນ ແລະ​ອື່ນໆ, ນຳ​ໃຊ້ເອ­ກະ­ສານ​ປອມ​ແປງ​ເພື່ອ​ຫາ​ຜົນ​ປະໂຫຍດ​ສ່ວນ​ຕົວ, ຄອບ­ຄົວ, ຍາດ​ພີ່­ນ້ອງ, ຈຸ້ມ​ເຈື້ອ ຫຼື ໝູ່​ຄະ­ນະ.
  6. ຫ້າມ​ປົກ​ປິດສົມ­ຮູ້​ຮ່ວມ​ຄິດ​ເຊື່ອງອຳ​ຂໍ້​ມູນ, ຫຼັກ​ຖານ ຫຼື ບົດ​ລາຍ​ງານການ​ເງິນ, ດ້ານ​ຈຳ­ນວນ, ປະ­ເພດ, ຊະນິດ, ບໍ​ລິ​ມາດ, ຈັດ​ເລກ​ລະ­ຫັດ, ແຫຼ່ງ ກຳ­ເນີດ, ມູນ​ຄ່າ​ແຈ້ງ​ສິນ­ຄ້າ​ເຄື່ອງ​ຂອງ, ເກັບ​ລາຍ​ຮັບ​ແລ້ວ​ບໍ່​ມອບ, ມອບ​ບໍ່​ຄົບຖ້ວນ ຫຼື ມອບ​ບໍ່​ທັນ​ກຳ­ນົດ​ເວ­ລາ​ເພື່ອ​ອຳນວຍ​ໃຫ້​ນັກ­ທຸ­ລະ­ກິດ​ແບ່ງ​ຜົນ​ປະ­ໂຫຍດສ່ວນ​ຕົວ, ບຸກ­ຄົນ ຫຼື ນິ­ຕິ­ບຸກ­ຄົນ, ຄອບຄົວ, ຍາດ​ພີ່­ນ້ອງ, ຈຸ້ມ​ເຈື້ອ, ພັກ​ພວກ ຫຼື ໝູ່​ຄະ­ນະ.
  7. ຫ້າມ​ໃຫ້​ສິນ​ບົນ​ຜູ້​ອື່ນ, ຮັບ​ສິນ​ບົນ, ທວງ​ເອົາ, ຂໍ​ເອົາ​ສ່ວນ​ແບ່ງ (ເປີ­ເຊັນ) ເປັນ​ວັດ­ຖຸ, ເງິນ​ຄຳ​ຕ່າງໆ​ໃນ​ທຸກ​ຮູບ​ແບບຈາກ​ນັກ­ທຸ­ລະ­ກິດ ແລະ​ຜູ້​ປະ­ກອບ​ການອື່ນໆ, ເພື່ອ​ຜົນ​ປະ­ໂຫຍດ​ສ່ວນ​ຕົວ, ຄອບຄົວ, ຍາດ​ພີ່­ນ້ອງ, ຈຸ້ມ​ເຈື້ອ, ພັກ​ພວກ ຫຼື ໝູ່​ຄະ­ນະ.
  8. ຫ້າມ​ຍັກ​ຍອກ, ສໍ້​ໂກງ​ເອົາ​ຊັບສິນ, ເງິນ​ຄຳ​ຂອງ​ລັດ, ລວມ​ໝູ່, ຂອງປະ­ຊາ­ຊົນ ແລະ​ນຳ​ໃຊ້​ງົບ­ປະ­ມານ​ຊັບ, ສິນ​ຂອງ​ລັດ​ລວມ​ໝູ່ ຫຼື ປຸກ­ລະ­ດົມ​ການອຸ­ປະ­ຖຳ​ໃນ​ຮູບ​ແບບ​ຕ່າງໆ ເພື່ອ​ເອົາ​ໄປ ເຮັດ​ຂອງ­ຂວັນ​ຂອງ­ຕ້ອນ​ເພື່ອ​ຮັບ​ໃຊ້ ຜົນ​ປະ­ໂຫຍດ​ສ່ວນ​ຕົວ, ຄອບ­ຄົວ, ຍາດ​ພີ່ນ້ອງ, ຈຸ້ມ​ເຈື້ອ, ພັກ​ພວກ ຫຼື ໝູ່​ຄະ­ນະ.
  9. ຫ້າມ​ສວຍ​ໃຊ້​ໜ້າ­ທີ່​ໃນ​ການຕົກ­ລົງ, ປອມ​ແປງ​ມາດ­ຖານ​ເຕັກ­ນິກ, ບໍ​ລິ​ມາດ, ລາ­ຄາ​ຫົວ­ໜ່ວຍ, ການ​ປະ­ມູນ, ການ​ຈັດ​ຊື້-ຈັດ​ຈ້າງ, ສັນ­ຍາ​ສຳ​ປະ­ທານ, ສັນ­ຍາ​ຮ່ວມ​ທຶນ, ສັນ­ຍາ​ປ່ອຍ​ກູ້, ໜັງ­ສືຄ້ຳ­ປະ­ກັນ, ສັນ­ຍາ​ເຊົ່າ​ກິດ­ຈະ­ການ, ຊັບສິນ, ລົງ​ລາຍ​ເຊັນ​ຢັ້ງ­ຢືນ​ເອ­ກະ­ສານ​ທີ່ບໍ່​ມີ​ຕົວ​ຕົນ ແລະ​ເອ­ກະ­ສານ​ທາງ​ລັດ​ຖະການ​ອື່ນໆ​ທີ່​ບໍ່​ຖືກ­ຕ້ອງ​ຕາມ​ກົດ­ໝາຍ, ລະ­ບຽບ​ການ​ເພື່ອ​ຜົນ​ປະ­ໂຫຍດ​ສ່ວນຕົວ, ຄອບ­ຄົວ, ຍາດ​ພີ່­ນ້ອງ, ຈຸ້ມ​ເຈື້ອ, ພັກ​ພວກ ຫຼື ໝູ່​ຄະ­ນະ.
  10. ຫ້າມ​ປະ­ຕິ­ເສດ​ຕໍ່​ຂໍ້​ຕົກ­ລົງ​ກ່ຽວກັບ​ການ​ມອບ​ໝາຍ​ໜ້າ­ທີ່, ສັບ​ຊ້ອນ​ວຽກງານ, ຫ້າມ​ເລືອກ​ວຽກ.

ນອກ­ຈາກ​ບັນ­ດາ​ຂໍ້​ຫ້າມ​ທີ່​ໄດ້​ລະ­ບຸ​ໄວ້​ຂ້າງ​ເທິງ​ນີ້ ຕ້ອງ​ໄດ້​ປະ­ຕິ­ບັດ​ຕາມ​ຂໍ້​ຫ້າມ​ທີ່​ກຳ­ນົດ​ໄວ້​ໃນ​ກົດ­ໝາຍ ແລະ​ລະບຽບ​ການ​ອື່ນໆ.

ໂດຍ​ພະ­ນັກ­ງານ-ລັດ­ຖະ­ກອນ​ຂອງຂະ­ແໜງ­ການ​ເງິນທີ່​ໄດ້​ເປັນ​ແບບ­ຢ່າງໃນ​ການ­ຈັດ­ຕັ້ງ​ປະ­ຕິ­ບັດ​ຂໍ້​ຕົກ­ລົງ​ສະ­ບັບນີ້ ຈະ​ໄດ້​ຮັບ​ການ​ຍ້ອງ­ຍໍ​ສັນ­ລະ­ເສີນ​ຕາມ ນະ­ໂຍ­ບາຍ​ລວມ​ທີ່​ພັກ-ລັດໄດ້​ວາງ​ອອກ ແລະ​ຖ້າ​ມີ​ພະ­ນັກ­ງານ-ລັດ­ຖະ­ກອນ​ຂອງຂະ­ແໜງ­ການ​ເງິນ ຫາກ​ມີ​ພຶດ­ຕິ​ກຳ​ຂັດ ຫຼື ລະ­ເມີດ​ຂໍ້​ຕົກ­ລົງ​ສະ­ບັບ​ນີ້ ຈະ​ຖືກ​ສຶກສາ​ອົບ­ຮົມ, ສຳ​ຫຼວດ​ກວດ­ກາ ຫຼື ປະ­ຕິ­ບັດວິ­ໄນ ຫຼື ລົງ­ໂທດ​ຕາມ​ກົດ­ໝາຍ ແລະ​ລະບຽບ​ການ​ຕາມ​ແຕ່​ລະ​ກໍ­ລະ­ນີ​ເບົາ ຫຼື ໜັກ.

ຂ່າວ: ນສພ ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.