ລັດຈະ​ນຳ​ໃຊ້​ລະ­ບົບ​ໂປຣ​ແກຣມ​ຄຸ້ມ​ຄອງ ຕິດ­ຕາມ​ການ​ກໍ່­ສ້າງ ແລະ​ ສ້ອມ­ແປງ​ຂົວ-ທາງ

   ເນື່ອງ​ຈາກ​ໄລ­ຍະ​ຜ່ານ​ມາ​ການ​ກໍ່ສ້າງ ແລະ​ສ້ອມ­ແປງ​ຂົວ​ທາງ​ໃນ​ທົ່ວ​ປະເທດ​ຍັງ​ບໍ່​ທັນ​ໄດ້​ຕາມ​ລະ­ດັບ​ມາດ­ຖານ ຊຶ່ງ​ເມື່ອ​ກໍ່­ສ້າງ​ສຳ­ເລັດ​ໄດ້​ບໍ່​ພໍ​ເທົ່າ­ໃດ​ປີ​ກໍ​ເປ່​ເພ ເຮັດ​ໃຫ້­ການ​ສັນ­ຈອນ​ໄປ-ມາ ຫຍຸ້ງ­ຍາກ​ສັບ­ສົນ​ຈາກ​ສະ­ພາບ​ຄື​ດັ່ງ­ກ່າວ ເພື່ອ​ເປັນ​ການ​ແກ້​ໄຂ​ບັນ­ຫາ​ໃຫ້​ຖືກ​ຈຸດ​ທັງ​ໄລ­ຍະ​ຍາວ ຂະ­ນະ​ນີ້​ລັດ​ກຽມ​ຈະ​ນຳໃຊ້​ລະ­ບົບ​ໂປຣ​ແກຣມ ເພື່ອ​ຄຸ້ມ​ຄອງ, ຕິດຕາມ​ການ​ກໍ່­ສ້າງ ແລະ​ສ້ອມ­ແປງ​ຂົວ-ທາງ​ໃນ​ຂອບ​ເຂດ​ທົ່ວ​ປະ­ເທດ ໂດຍ​ປະ­ຈຸບັນ​ຢູ່​ໃນ​ຂັ້ນ​ຕອນ​ທົດ​ລອງ​ປະ­ຕິ­ບັດ​ຫາກ​ໄດ້­ຜົນ​ທາງ​ບວກ​ກໍ​ຈະ​ປະ­ກາດ​ໃຊ້​ຢ່າງເປັນ​ທາງ​ການ.

   ທ່ານ ປໍ​ທອງ ໂງ່ນ​ພະ­ຈັນ ຮອງ​ຫົວໜ້າ​ກົມ​ຂົວ​ທາງ​ກະ­ຊວງ​ໂຍ­ທາ​ທິ​ການ ແລະ​ຂົນ­ສົ່ງ​ເປີດ­ເຜີຍ​ຕໍ່​ທີມ​ຂ່າວ​ເສດ​ຖະກິດ-ສັງ­ຄົມ ເມື່ອ​ວັນ​ທີ 9 ມີ­ນາ​ນີ້​ວ່າ: ໂປຣ​ແກຣມ​ຕິດ­ຕາມ​ການ​ກໍ່­ສ້າງ ແລະ ສ້ອມ­ແປງ​ຂົວ​ທາງ​ເວ­ລາ​ນີ້​ແມ່ນ​ຢູ່​ໃນ​ຂັ້ນຕອນ​ການ​ທົດ​ລອງ​ນຳ​ໃຊ້​ໃນ​ທົ່ວ​ປະ­ເທດ ຫຼັງ​ຈາກ​ນັ້ນ​ຈະ​ໄດ້​ມີ​ການ​ປະ​ເມີນ​ຜົນຄວາມ​ເປັນ​ໄປ​ໄດ້​ໃນ​ການ​ນຳ​ໃຊ້ ຖ້າຫາກ​ໄດ້​ຮັບ​ຜົນ​ຕາມ​ຄາດ­ໝາຍ​ກໍ​ຈະ​ປະກາດ​ໃຫ້​ບັນ­ດາ​ແຂວງ​ໃນ​ທົ່ວ​ປະ­ເທດ​ນຳໃຊ້​ລະ­ບົບ​ໂປຣ​ແກຣມ​ດັ່ງ­ກ່າວ​ຢ່າງ​ເປັນທາງ​ການ.

ຊຶ່ງ​ໂປຣ​ແກຣມ​ຕິດ­ຕາມ​ການ​ກໍ່­ສ້າງ ແລະ​ສ້ອງ​ແປງ​ຂົວ​ທາງ (IRAM) ແມ່ນ ໄດ້​ເລີ່ມ​ອອກ​ແບບ​ພັດ­ທະ­ນາ​ມາ​ແຕ່​ຕົ້ນ​ປີ 2014 ດ້ວຍ​ການ​ຮ່ວມ​ມື​ຂອງ​ພະ​ແນກການ​ຂ່າວ ແລະ​ເຕັກ​ໂນ​ໂລ​ຊີ​ການ​ສື່­ສານກັບ​ບໍ­ລິ­ສັດ​ທີ່​ປຶກ­ສາ​ລາວ​ຟິ​ນິກ​ຈຳ­ກັດ ຊຶ່ງ​ຈະ​ເປັນ​ເຄື່ອງ­ມື​ທີ່​ດີໃນ​ການ​ຄຸ້ມ​ຄອງ ແລະ​ຕິດ­ຕາມ​ປະ­ຫວັດການ​ກໍ່­ສ້າງ ແລະ​ສ້ອມ­ແປງ​ຂົວ​ທາງ​ສຳລັບ​ທາງ​ຫຼວງ​ແຫ່ງ​ຊາດ, ທາງ​ຫຼວງ​ທ້ອງຖິ່ນ ນັບ​ແຕ່​ການ​ລົງ​ເກັບ​ກຳ​ຂໍ້​ມູນ​ມາ​ສ້າງບໍ​ລິ​ມາດ​ວຽກ​ໄປ​ຈົນ​ຮອດ​ເວ­ລາ​ສຳ­ເລັດ ໂຄງ­ການ.

ໝາຍ​ຄວາມ​ວ່າ​ໂປຣ​ແກຣມ​ນີ້​ສາມາດ​ບັນ­ທຶກ​ປະ­ຫວັດ​ການ​ກໍ່­ສ້າງ ຫຼື ສ້ອມແປງ​ຂົວ​ທາງ, ບັນ­ທຶກ​ຄວາມ​ຄືບ​ໜ້າ ການ­ຈັດ­ຕັ້ງ​ປະ­ຕິ­ບັດ​ໂຄງ­ການ ແລະ​ນຳໃຊ້​ງົບ­ປະ­ມານ​ແຕ່​ລະ​ໄລ­ຍະ, ບັນ­ທຶກ​ປະຫວັດ​ຜູ້​ຮັບ​ເໝົາ, ບັນ­ທຶກ​ສະ­ຖິ­ຕິ​ຕາ​ໜ່າງເສັ້ນ­ທາງ, ສະ­ຖິ­ຕິ​ການ​ຈະ­ລາ­ຈອນ ແລະ ອື່ນໆ.

ໂດຍ​ໃນ​ໄລ­ຍະ​ຜ່ານ​ມາ­ຄະ​ນະ​ນຳ​ກະຊວງ​ໂຍ­ທາ​ທິ​ການ ແລະ​ຂົນ­ສົ່ງ (ຍທຂ) ໄດ້​ຖື​ສຳ­ຄັນ​ໃນ​ການ​ຫັນ​ທິດ​ເປັນ​ທັນ​ສະໄໝ ແລະ​ສົ່ງ­ເສີມ​ການ​ຄຸ້ມ​ຄອງ​ບໍ­ລິ­ຫານວຽກ​ງານ​ລັດ ໃນ​ຂະ­ແໜງ ຍທຂ ໃຫ້​ເປັນລະ­ບົບ​ລວມ​ສູນ, ຍທຂ ໄດ້​ເອົາ­ໃຈ­ໃສ່ວາງ​ແຜນ​ພັດ­ທະ­ນາ​ລະ­ບົບ ໄອ​ຊີ​ທີ​ໃນ​ຂະແໜງ​ການ​ຢ່າງ​ເປັນ​ລະ­ບົບ​ໃນ​ນີ້​ໂປຣແກຣມ​ຕິດ­ຕາມ​ການ​ກໍ່­ສ້າງ ແລະ​ສ້ອມແປງ​ຂົວ​ທາງ (IRAM) ກໍ​ແມ່ນ​ໜຶ່ງ​ໃນ ບັນ­ດາ​ໂປຣ​ແກຣມ​ທີ່​ຫ້ອງ­ການ​ກະ­ຊວງ ຍທຂ ໄດ້​ສ້າງ​ຂຶ້ນ ເພື່ອ​ນຳ​ໃຊ້​ເຂົ້າ​ໃນວຽກ​ງານ​ຄຸ້ມ​ຄອງ​ບໍ­ລິ­ຫານ​ລັດ​ໃນ​ຂະແໜງ​ຂອງ​ຕົນ​ໃຫ້​ມີ​ຄວາມ​ທັນ​ສະ­ໄໝ ເປັນ­ຕົ້ນ​ໂປຣ​ແກຣມ​ຕິດ­ຕາມ​ການ​ລົງທະ­ບຽນ​ເອ­ກະ­ສານ, ໂປຣ​ແກຣມ​ຄຸ້ມຄອງ​ຕິດ­ຕາມ​ປະ­ຫວັດ​ພະ­ນັກ­ງານ​ລັດ​ຖະກອນ ແລະ​ໂປ​ຮ​ແກຣມ​ຄຸ້ມ​ຄອງ​ຊັບ​ສິນ.

ແນວ­ໃດ​ກໍ​ດີ ຂໍ້​ມູນ​ຈາກ​ກົມ​ຂົວ​ທາງຍັງ​ໃຫ້​ຮູ້​ອີ​ກວ່າ: ສະ­ຖິ­ຕິ​ຂົວ​ທາງ​ໃນ​ທົ່ວປະ­ເທດ​ປີ 2013 ເສັ້ນ­ທາງ​ມີ​ຄວາມ​ຍາວທັງ​ໝົດ 45.825 ກິ­ໂລ­ແມັດ ໃນ​ນັ້ນ ທາງ ຫຼວງ​ແຫ່ງ​ຊາດ​ຍາວ 7.377 ກິ­ໂລ­ແມັດ, ທາງ​ຫຼວງ​ແຂວງ 8.209 ກິ​ໂລ, ທາງ​ຫຼວງເມືອງ 5.624 ກິ​ໂລ, ທາງ​ເທ­ສະ​ບານ 2.215 ກິ​ໂລ, ທາງ​ຊົນ­ນະ­ບົດ 20.257 ກິ​ໂລ ແລະ​ທາງ​ສະ­ເພາະ 2.122 ກິ​ໂລ ແມັດ, ສ່ວນ​ຂົວ​ມີ​ທັງ​ໝົດ 1.907 ແຫ່ງຍາວ 120 ກວ່າ​ກິ­ໂລ­ແມັດ ປະ­ກອບ​ມີ​ຂົວຕາມ​ທາງ​ຫຼວງ​ແຫ່ງ​ຊາດ 997 ແຫ່ງ ຍາວ 66,22 ກິ­ໂລ­ແມັດ, ຂົວ​ຕາມ​ທາງຫຼວງ​ແຂວງ 558 ແຫ່ງ ຍາວ 46,62 ກິໂລ​ແມັດ, ຂົວ​ຕາມ​ທາງ​ຫຼວງ​ເມືອງ 188 ແຫ່ງ​ຍາວ 3,46 ກິ​ໂລ, ຂົວ​ຕາມ​ທາງ​ຊົນນະ​ບົດ 142 ແຫ່ງ​ຍາວ 3,85 ກິ­ໂລ­ແມັດ, ຂົວ​ຕາມ​ທາງ​ເທ­ສະ​ບານ 20 ແຫ່ງ ຍາວ 360 ແມັດ ແລະ​ຂົວ​ຕາມ​ທາງ​ສະ­ເພາະ​ມີ 2 ແຫ່ງ ຍາວ 75 ແມັດ ໂດຍ​ມາ​ຮອດ ຂະນະ​ນີ້​ຄາດ​ວ່າ​ບັນ­ດາ​ຂົວ ແລະ​ເສັ້ນ­ທາງ​ກໍ​ຈະ​ມີ​ຕົວ​ເລກ​ເພີ່ມ​ຂຶ້ນ​ຢ່າງ​ແນ່­ນອນ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.