ລັດຊີ້ແຈງກ່ຽວກັບໃບຕາດິນຊໍ້າຊ້ອນໂດຍມີ 7 ຕົ້ນເຫດ

  ທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທໍາມະຊາດ ແລະສິ່ງແວດລ້ອມໄດ້ລາຍງານກ່ຽວກັບການຄຸ້ມຄອງການອອກໃບຕາດິນ ແລະບັນຫາການອອກໃບຕາດິນຊໍ້າຊ້ອນຕໍ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ໃນວັນທີ 10 ມິຖຸນາ ຮູ້ວ່າ:  ຜ່ານການອອກໃບຕາ ດິນນັບແຕ່ປີ 1995 ມາປະຈຸບັນສາມາດ ອອກໃບຕາດິນຈຳນວນ 1,29 ລ້ານຕອນ ແລະຂຶ້ນສຳມະໂນຄົວທົ່ວປະເທດໄດ້ຈຳນວນ 3,06 ລ້ານຕອນໃນນັ້ນໄດ້ເອົາ ເຂົ້າລະບົບຖານຂໍ້ມູນທີ່ດິນຈຳນວນ 7,3 ແສນຕອນ ກວມເອົາ 56,90%.

   ຢ່າງໃດກໍຕາມໃນຜ່ານມາກະຊວງຊັບພະຍາກອນທໍາມະຊາດ ແລະສິ່ງແວດລ້ອມຍັງໄດ້ປະສານສົມທົບກັບສານປະຊາຊົນສູງສຸດ,ອົງການໄອຍະການປະຊາຊົນສູງສຸດ,ທະນາຄານແຫ່ງ ສປປ ລາວ ແລະພະແນກຊັບພະຍາກອນທໍາມະຊາດ ແລະສິ່ງແວດລ້ອມຂັ້ນແຂວງກວດກາຄືນໃບຕາດິນທີ່ຍັງຊ້ຳຊ້ອນກັນມີທັງໝົດ 86 ກໍລະນີ ໃນ 4 ແຂວງຄື: ແຂວງສະຫວັນນະເຂດ 44 ກໍລະນີ, ນະຄອນຫຼວງວຽງຈັນ 17 ກໍລະນີ, ຈຳປາສັກ 15 ກໍລະນີ ແລະໄຊຍະບູລີ 10 ກໍລະນີ.

 ສ່ວນສາເຫດທີ່ພາໃຫ້ມີການອອກໃບຕາດິນຊໍ້າຊ້ອນທ່ານລັດຖະມົນຕີເປີດເຜີຍວ່າ: ແມ່ນມີຢູ່ 7 ສາເຫດ (1) ການສຶກສາອົບຮົມແນວຄິດການເມືອງການກວດກາປະຕິບັດໜ້າທີ່ພະນັກງານຍັງບໍ່ທັນໄດ້ດີຈຶ່ງເຮັດໃຫ້ເກີດມີແນວຄິດໃຊ້ ສິດໜ້າທີ່ ແລະຕຳແໜ່ງແລ່ນນຳຜົນປະໂຫຍດສ່ວນຕົວ; (2) ຜ່ານເອກະ ສານຫຼາຍປະເພດທີ່ຢັ້ງຢືນກ່ຽວກັບສິດນຳໃຊ້ທີ່ດິນທີ່ສາມາດໃຊ້ເປັນຫຼັກຊັບຄໍ້າປະກັນເປັນຕົ້ນໃບຢັ້ງຢືນນຳໃຊ້ສິດທີ່ດິນ, ໃບ ແຜນທີ່, ໃບແຈ້ງທີ່ດິນ ແລະໃບເສຍພາສີທີ່ດິນ ຈຶ່ງເຮັດໃຫ້ປະ ຊາຊົນເຂົ້າໃຈວ່າ ບໍ່ຈຳເປັນຕ້ອງມີໃບ ຕາດິນກໍໄດ້; (3) ນາຍບ້ານຈຳນວນໜຶ່ງຍັງຂາດຄວາມຮັບຜິດຊອບບໍ່ເປັນເຈົ້າການຈຶ່ງເຊັນຢັ້ງຢືນຊະຊາຍ; (4) ຜູ້ທີ່ເປັນເຈົ້າຂອງສິດນໍາໃຊ້ທີ່ດິນມີເຈດຕະນາລະເມີດກົດໝາຍດ້ວຍສົມຮູ້ຮ່ວມຄິດກັບພະນັກງານທີ່ດິນເພື່ອອອກໃບຕາດິນ; (5) ມີພະນັກງານທີ່ກ່ຽວຂ້ອງຈຳນວນໜຶ່ງຂາດຄວາມຮັບຜິດຊອບ ຫຼື ມີເຈດຕະ ນາລະເມີດກົດໝາຍສົມຮູ້ຮ່ວມຄິດກັບລູກ ໜີ້ດຳເນີນເອກະສານທີ່ບໍ່ສອດຄ່ອງກັບກົດໝາຍ; (6) ໃນເວລາມີການຄ້ຳປະກັນການກູ້ຢືມໄດ້ທີ່ການສ້າງເອກະສານຢັ້ງຢືນການມອບໂອນໃບຕາດິນໃຫ້ເຈົ້າໜີ້ (ການໂອນລອຍ) ໄປພ້ອມກັນເລີຍຊຶ່ງເປັນການລະເມີດກົດໝາຍ; (7) ໃນເວລາທີ່ທະນາຄານຮັບຄ້ຳປະກັນທີ່ດິນເພື່ອປ່ອຍເງິນກູ້ນັ້ນມີຫຼາຍກໍລະນີບໍ່ໄດ້ໄປຈົດທະບຽນທີ່ດິນນຳຂະແໜງທີ່ດິນຈຶ່ງເຮັດໃຫ້ບໍ່ສາມາດຕິດຕາມກ່ຽວກັບການເຄື່ອນໄຫວ ຫຼືປ່ຽນແປງໃບຕາດິນໄດ້.

 ຕໍ່ກັບບັນຫາດັ່ງກ່າວ, ໃນຕໍ່ໜ້າກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມໄດ້ມີມາດຕະການແກ້ໄຂໂດຍຈະສົມທົບກັບອົງການປົກຄອງທ້ອງຖິ່ນແຕ່ລະຂັ້ນກວດກາຄືນການຈັດຕັ້ງປະຕິບັດຂອງພະນັກງານພ້ອມທັງພັດທະນາລະບົບການຄຸ້ມຄອງບໍລິຫານທີ່ດິນໃຫ້ເປັນທັນສະໄໝໃນທົ່ວປະເທດໂດຍໄວ, ປັບປຸງຂັ້ນຕອນການບໍລິການ ແລະສິ່ງອຸດຕັນຕ່າງໆທີ່ເປັນອຸປະສັກໃຫ້ແກ່ປະຊາຊົນ ແລະເພີ່ມມາດຕະການວິທີການເຂົ້າເຖິງຂອງປະຊາຊົນສະດວກສະບາຍຂຶ້ນໂດຍສະເພາະສ້າງສູນບໍລິການທີ່ດິນຂຶ້ນເພື່ອໃຫ້ສາມາດໂອນທີ່ດິນ ຫຼືເຮັດທຸລະກຳທາງດ້ານທີ່ດິນໃຫ້ສຳເລັດໜຶ່ງວັນ.

ພາບ ແລະ ຂ່າວໂດຍ: ໜັງສືພິມເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.