ລັດຝາກຄວາມຫວັງນໍ້າເທີນ 2 ສ້າງອາຊີບແກ່ປະຊາຊົນ

ນ້ຳເທິນ 2 ໂຄງການລົງທຶນຂະໜາດໃຫຍ່ໃນລາວພາຍຫຼັງສ້າງສຳເລັດສາມາດສ້າງລາຍໄດ້ມະຫາສານແກ່ປະເທດຊາດຢ່າງຕໍ່ເນື່ອງມາທັງໄດ້ສ້າງວຽກເຮັດງານທຳແກ່ປະຊາຊົນຈຳນວນຫຼາຍ ແລະລັດຖະບານຍັງຫວັງວ່ານ້ຳເທີນ 2 ຈະປະກອບສ່ວນສ້າງອາຊີບທີ່ໝັ້ນຄົງແກ່ຜູ້ຖືກຜົນກະທົບຕໍ່ໆໄປ.

ໃນໂອກາດທີ່ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງທ່ານ ເດວິດ ແມ໋ກໂດແວນ ຊ່ຽວຊານສາກົນດ້ານສັງຄົມ ແລະສິ່ງແວດລ້ອມ ສຳລັບໂຄງການນ້ຳເທີນ 2 ຢູ່ ສປປ ລາວ ພ້ອມດ້ວຍຄະນະ ເມື່ອຕອນເຊົ້າຂອງວັນທີ 4 ເມສາ 2017 ທີ່ສຳນັກງານນາຍົກລັດຖະມົນຕີຄະນະຊ່ຽວຊານສາກົນດ້ານສັງຄົມ ແລະສິ່ງແວດລ້ອມ ສຳລັບໂຄງການນ້ຳເທີນ 2 ໄດ້ລາຍງານໃຫ້ຊາບເຖິງວຽກງານ ການຍົກຍ້າຍຈັດສັນ ແລະການພັດທະນາອາຊີບຖາວອນຂອງຜູ້ຖືກຜົນກະທົບຢູ່ພູພຽງນາກາຍ, ຄວາມຄືບໜ້າໃນການປັບປຸງອົງການຄຸ້ມຄອງ ແລະປົກປັກຮັກສາອ່າງໂຕ່ງນ້ຳເທີນ 2 ຊຶ່ງທັງໝົດນັ້ນ ເຫັນວ່າມີຄວາມຄືບໜ້າຫຼາຍດ້ານ ແລະຍັງມີບາງບັນຫາທີ່ໜ້າເປັນຫ່ວງ ເປັນຕົ້ນການຈັດສັນອາຊີບຄົງທີ່, ວິຊາການທີ່ຍັງບໍ່ໄດ້ຄຸນນະພາບ ແລະອື່ນໆ.

ພ້ອມນີ້, ທ່ານຮອງນາຍົກລັດຖະມົນ ຕີ ກໍໄດ້ຕີລາຄາສູງຕໍ່ຄະນະຊ່ຽວຊານທີ່ໄດ້ເອົາໃຈໃສ່ເປັນຢ່າງດີປະກອບສ່ວນ ຢ່າງຕັ້ງໜ້າເຂົ້າໃນໂຄງການນ້ຳເທີນ 2 ເພື່ອຊ່ວຍເຫຼືອບັນດາຜູ້ທີ່ຖືກຜົນກະທົບຈາກການຈັດຕັ້ງປະຕິບັດໂຄງການໃນໄລຍະຜ່ານມາ. ທ່ານ ສອນໄຊ ສີພັນດອນ ຍັງໄດ້ສະແດງຄວາມຫວັງວ່າການສຶກສາຄົ້ນຄວ້າ ແລະວາງແຜນໃນຕໍ່ໜ້າສຳລັບໂຄງການນ້ຳເທີນ 2 ນັ້ນ ຈະປະກອບສ່ວນຫຼາຍຂຶ້ນ ເພື່ອເປັນສ່ວນໜຶ່ງໃນການຈັດຕັ້ງປະຕິບັດເປົ້າໝາຍການ ພັດທະນາແບບຍືນຍົງ (SDGs), ສົ່ງເສີມໃຫ້ປະຊາຊົນທີ່ຖືກຜົນກະທົບສາມາດມີອາຊີບຄົງທີ່ ແລະຍືນຍົງສືບທອດກັນຕໍ່ໄປໄດ້ໃນຮຸ່ນລູກ-ຮຸ່ນຫຼານ ທັງການປູກ-ການລ້ຽງ, ແປຮູບເປັນສິນຄ້າ, ການເຮັດຫັດຖະກຳ, ສົ່ງເສີມການທ່ອງທ່ຽວທັງທາງດ້ານທຳມະຊາດ ແລະບຸນປະເພນີຕ່າງໆ.

ຂ່າວ: ເສດຖະກິດ-ສັງຄົມ

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.