ລັດເປີດທາງການຄ້າສະດວກຂື້ນ ຈາກນີ້ສິນຄ້າສົ່ງເສີມບໍ່ຕ້ອງຂໍອະນຸຍາດສົ່ງອອກ

  ນັບວ່າເປັນເລື່ອງທີ່ດີສຳລັບຜູ້ປະກອບກິດຈະການທັງພາຍໃນ ແລະຕ່າງປະເທດທີ່ດຳເນີນທຸລະກິດສົ່ງອອກສິນຄ້າຢູ່ພາຍໃນລາວ ແລະກຳລັງຈະມາລົງທຶນເພື່ອຜະລິດສົ່ງອອກ, ພາຍຫຼັງທີ່ກະຊວງອຸດສາຫະກຳ ແລະການຄ້າໄດ້ອອກແຈ້ງການສະບັບເລກທີ 1051/ຫອຄ.ກທຄວ ວັນທີ 27 ພຶດສະພາ 2019, ເພື່ອເປັນການສົ່ງເສີມ ແລະອຳນວຍຄວາມສະດວກຢ່າງເຕັມສ່ວນແກ່ການສົ່ງອອກຜະລິດຕະພັນສິນຄ້າຂອງລາວໂດຍຜູ້ປະກອບການໃນຂະແໜງຜະລິດເພື່ອສົ່ງອອກແມ່ນຈະບໍ່ໄດ້ຂໍອະນຸ ຍາດຊຶ່ງສາມາດລົງທຶນໄດ້ເລີຍ.

  ໂດຍແຈ້ງການຂອງກະຊວງອຸດສາຫະກຳ ແລະ ການຄ້າສະບັບເລກທີ 1051/ຫອຄ.ກທຄວ ນະຄອນຫຼວງວຽງຈັນ ວັນທີ 27 ພຶດສະພາ 2019 ທີ່ແຈ້ງ ເຖິງເຈົ້າໜ້າທີ່ທະບຽນວິສາຫະກິດພະແນກອຸດສາຫະກຳ ແລະ ການຄ້າຂັ້ນແຂວງ,ຫ້ອງການອຸດສາຫະກຳ ແລະການຄ້າຂັ້ນເມືອງກ່ຽວກັບກິດຈະການສົ່ງອອກສິນຄ້າທີ່ບໍ່ຈຳເປັນຂໍອະນຸຍາດດຳເນີນທຸລະກິດ,ທັງນີ້ກໍເພື່ອເປັນການສົ່ງເສີມ ແລະອຳນວຍຄວາມສະດວກຢ່າງເຕັມສ່ວນແກ່ການສົ່ງອອກຜະລິດຕະພັນສິນ ຄ້າຂອງປະເທດເຮົາ, ໂດຍສະເພາະແມ່ນການສົ່ງອອກສິນຄ້າເປັນກິດຈະການທີ່ລັດສົ່ງເສີມ ແລະບໍ່ຈຳເປັນຕ້ອງຂໍອະນຸຍາດດຳເນີນທຸລະກິດໂດຍໃຫ້ເຈົ້າໜ້າທີ່ທະບຽນວິສາຫະກິດລະບຸກິດຈະການດັ່ງກ່າວລົງດ້ານຫຼັງໃບທະບຽນວິສາຫະກິດເລີຍເວັ້ນເສຍແຕ່ກິດຈະການສົ່ງອອກສິນຄ້າທີ່ລັດເກືອດຫ້າມ ຫຼື ຜະລິດຕະພັນສິນຄ້າທີ່ຂະແໜງການທີ່ກ່ຽວຂ້ອງມີກົດໝາຍ ຫຼື ລະບຽບການກຳນົດເປັນຢ່າງອື່ນ ແລະການລະບຸກິດຈະການສົ່ງອອກສິນຄ້າໃສ່ດ້ານຫຼັງໃບທະບຽນວິສາຫະ ກິດນັ້ນຕ້ອງຂຽນໃຫ້ຈະແຈ້ງວ່າສົ່ງອອກສິນຄ້າໃດຕົ້ນຕໍແມ່ນສົ່ງອອກເຂົ້າ, ກາເຟເຫຼົ່ານີ້ເປັນຕົ້ນໂດຍຫ້າມບໍ່ໃຫ້ລະບຸແບບລວມໆ.

  ຕໍ່ກັບແຈ້ງການດັ່ງກ່າວທ່ານ ນາງ ວົງປະດິດ ວົງສະຫວາດ ຫົວໜ້າພະແນກທະບຽນ ແລະຄຸ້ມຄອງວິສາຫະກິດກໍໄດ້ໃຫ້ສຳພາດກັບທີມຂ່າວໜັງສືເສດຖະ ກິດ-ສັງຄົມ ຜ່ານໂທລະສັບໃນວັນທີ 28 ພຶດສະພາ 2019 ຮູ້ວ່າ: ສຳລັບແຈ້ງການສະບັບດັ່ງກ່າວແມ່ນເນັ້ນໃສ່ການອຳນວຍຄວາມສະດວກໃຫ້ກັບຜູ້ປະ ກອບກິດຈະການທີ່ເປັນນັກລົງທຶນຂອງຕ່າງປະເທດ, ເນື່ອງຈາກວ່າໄລຍະທີ່ຜ່ານມາພາກລັດເຮົາຈະອະນຸຍາດໃຫ້ສະເພາະແຕ່ນັກລົງທຶນພາຍໃນທີ່ດຳເນີນທຸ ລະກິດ ເພື່ອສົ່ງອອກຜະລິດຕະພັນເທົ່ານັ້ນ ແລະ ກັບຜູ້ປະກອບການທີ່ເປັນຊາວຕ່າງປະ ເທດຈຳເປັນຕ້ອງໄດ້ຂໍອະນຸຍາດດຳເນີນທຸລະກິດ, ສະນັ້ນແຈ້ງການສະບັບນີ້ແມ່ນເປັນການອຳນວຍຄວາມສະດວກໃຫ້ໝົດທຸກຝ່າຍ ແລະ ທຸກສິນຄ້າທີ່ຂະແໜງການອະນຸຍາດໃຫ້ມີການຜະລິດເພື່ອສົ່ງອອກ ແລະ ນອນຢູ່ໃນກິດຈະການທີ່ພາກລັດເຮົາສົ່ງເສີມໃຫ້ມີການລົງທຶນ, ຍົກເວັ້ນແຕ່ສິນຄ້າທີ່ບໍ່ກ່ຽວຂ້ອງກັບຂະແໜງການ, ແຕ່ທັງນີ້ທັງນັ້ນໃນກິດຈະການສົ່ງອອກສິນຄ້າທີ່ລັດອະນຸຍາດໃຫ້ດຳເນີນທຸລະກິດສົ່ງອອກກໍຕ້ອງປະຕິບັດຕາມກົດໝາຍຂອງການສົ່ງອອກນຳ.

ພາບ ແລະ ຂ່າວໂດຍ: ໜັງສືພິມເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.