ລັດ​ຈະ​ດຶງ​ດູດ​ການ​ລົງ­ທຶນ​ເຂົ້າ​ເຂດ​ເສດ­ຖະ­ກິດ​ໃຫ້​ມີ​ມູນ​ຄ່າ​ກວ່າ 5 ຮ້ອຍ​ຕື້​ກີບ

ເພື່ອ​ເປັນ​ການ​ປະ­ກອບ­ສ່ວນ​ໃນ​ການ​ສົ່ງ­ເສີມ​ການ​ລົງ­ທຶນ​ທັງ​ພາຍ​ໃນ ແລະ​ຕ່າງ­ປະ­ເທດ​ເພື່ອ​ເຮັດ​ໃຫ້ການ​ພັດ­ທະ­ນາ​ເສດ­ຖະ­ກິດ-ສັງ­ຄົມແຫ່ງ​ຊາດ​ສືບ­ຕໍ່​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ແລະ​ເປັນ​ປົກ­ກະ­ຕິ, ເຊື່ອມ​ໂຍງ​ເຂົ້າ​ກັບ​ເສດ­ຖະ­ກິດ​ພາກ​ພື້ນ ແລະ​ສາ­ກົນ​ຕ້ອງ​ໄດ້​ສຸມ​ໃສ່​ບັນ­ດາ​ຄາດ­ໝາຍ​ສູ້​ຊົນ​ເພື່ອ​ເຮັດ​ໃຫ້​ບັນ­ລຸ​ຕາມ​ແຜນ­ການ​ປີ 2017 ດັ່ງ­ນັ້ນ ລັດ​ຈິ່ງ​ຈະ​ສູ້​ຊົນ​ດຶງ​ດູດ​ເອົາ​ການ​ລົງທຶນ​ເຂົ້າ​ໃນ​ເຂດ​ເສດ­ຖະ­ກິດ​ໃຫ້​ມີ​ມູນ ຄ່າ 576 ຕື້​ກີບ ຫຼື ປະ­ມານ 72 ລ້ານ​ໂດ​ລາ.

ອີງ​ຕາມ​ແຜນ​ພັດ­ທະ­ນາ​ເສດ​ຖະກິດ-ສັງ­ຄົມ​ປີ 2017 ໃຫ້​ຮູ້​ວ່າ: ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແມ່ນ​ຈະ​ສູ້​ຊົນ​ໃຫ້​ມູນ​ຄ່າ​ການ​ກໍ່­ສ້າງ​ພື້ນ­ຖານ​ໂຄງ​ລ່າງ​ພາຍ​ໃນ​ເຂດ​ເສດ­ຖະ­ກິດ​ໃຫ້​ໄດ້​ທັງ​ໝົດ 576 ຕື້​ກີບ ຫຼື ປະ­ມານ 72 ລ້ານ​ໂດ​ລາ, ດຶງດູດ​ເອົາ​ບໍ­ລິ­ສັດ​ເຂົ້າ​ມາ​ລົງ­ທຶນ​ໃນ​ເຂດ​ໃຫ້​ໄດ້ 32 ບໍ­ລິ­ສັດ​ໃນ​ປີ 2017 ລວມ​ທັງ​ໝົດ​ເປັນ 326 ບໍ­ລິ­ສັດ​ຢູ່ໃນ​ບັນ­ດາ​ເຂດ​ເສດ­ຖະ­ກິດ​ທົ່ວ​ປະ­ເທດ, ມອບ​ພັນ­ທະ​ເຂົ້າ​ງົບ­ປະ­ມານຂອງ​ລັດ​ໃຫ້​ໄດ້ 58,72 ຕື້​ກີບ ຫຼື ປະ­ມານ 7,34 ລ້ານ​ໂດ​ລາ ໃນ​ນັ້ນ ອາ­ກອນ​ມອບ​ເໝົາ​ຈາກ​ກິດ­ຈະ­ການ​ກາ​ຊີ​ໂນ 12 ຕື້​ກີບ ປະ­ມານ 1,5 ລ້ານ​ໂດ​ລາ, ລາຍ​ຮັບ​ຈາກ​ການ​ຖື​ຮຸ້ນ 28,8 ຕື້​ກີບ ປະ­ມານ 3,6 ລ້ານ​ໂດ​ລາ, ຄ່າ​ສຳ​ປະ­ທານ​ທີ່​ດິນ 7,6 ຕື້​ກີບ ຫຼື ປະ­ມານ 9,5 ແສນ​ໂດ​ລາ, ສ້າງ​ວຽກ​ເຮັດ​ງານ​ທຳ​ໃຫ້​ໄດ້ 17.800 ຄົນ ທຽບ­ໃສ່​ປີ­ຜ່ານ­ມາ​ເພີ່ມ​ຂຶ້ນ 2.186 ຄົນ, ສົ່ງ​ອອກ​ສິນ­ຄ້າ​ຂອງ​ບໍ­ລິ­ສັດ​ທີ່​ລົງ­ທຶນ​ໃນ​ເຂດ​ເສດ­ຖະ­ກິດ 3 ພັນ​ຕື້​ກີບ ຫຼື ປະ­ມານ 375 ລ້ານ​ໂດ​ລາ ແລະ​ນຳ​ເຂົ້າ 5,6 ພັນ​ຕື້​ກີບ ປະ­ມານ 700 ລ້ານ​ໂດ​ລາ.

ເພື່ອ​ບັນ­ລຸ​ໄດ້​ຕາມ​ແຜນ­ການ​ດັ່ງ­ກ່າວ​ຕ້ອງ​ໄດ້​ສຸມ​ໃສ່​ສ້າງ​ສະ­ພາບ​ແວດ​ລ້ອມ​ທີ່​ເອື້ອ​ອຳ­ນວຍ​ເພື່ອ​ດຶງ​ດູດ​ເອົາ​ການ​ລົງ­ທຶນ​ຂອງ​ເອ­ກະ​ຊົນ​ພາຍ​ໃນ ແລະ​ຕ່າງ­ປະ­ເທດ​ເປັນ­ຕົ້ນ ການ​ປັບ­ປຸງ​ການ​ບໍ­ລິ­ການ​ຜ່ານ​ປະ­ຕູ​ດຽວ​ໃຫ້​ມີ​ຄວາມ​ສະ­ດວກ, ວ່ອງໄວ​ຂຶ້ນ​ກວ່າ​ເກົ່າ, ຫຼຸດ­ຜ່ອນ​ໄລ­ຍະ​ເວ­ລາ​ໃນ​ການ​ຂໍ​ອະ­ນຸ­ມັດ​ລົງ­ທຶນ ໂດຍ​ເລັ່ງ​ໃສ່​ຊຸກ­ຍູ້​ບັນ­ດາ​ໂຄງ­ການ​ທີ່​ເປັນ​ຫົວ​ຈັກ​ແກ່​ດຶງ​ດູດ​ການ​ເຕີບ​ໂຕ ແລະ​ການ​ພັດ­ທະ­ນາ​ເສດ­ຖະ­ກິດ, ເພີ່ມ​ທະ­ວີ​ການ​ດຶງ​ການ​ລົງ­ທຶນ​ຈາກ​ຜູ້​ພັດ­ທະ­ນາ, ຜູ້​ລົງ­ທຶນ​ພາຍ​ໃນ ແລະ​ຕ່າງ­ປະ­ເທດ​ເຂົ້າ​ໃນ​ການ​ພັດ­ທະ­ນາ​ພື້ນ­ຖານ​ໂຄງ​ລ່າງ​ເຂດ​ເສດ­ຖະ­ກິດ​ທີ່​ໄດ້​ຮັບ​ການ​ສ້າງ­ຕັ້ງ​ແລ້ວ​ໃຫ້​ນັບ​ມື້​ນັບ​ຫຼາຍ​ຂຶ້ນ, ຍາດ​ແຍ່ງ​ເອົາ​ບົດ­ຮຽນ, ປະ­ສົບ​ການ, ທຶນ­ຮອນ​ຈາກ​ຕ່າງ­ປະ­ເທດ ແລະ​ອົງ​ການ­ຈັດ­ຕັ້ງ​ສາ­ກົນ ເພື່ອ​ສະ­ໜັບ­ສະ­ໜູນ​ການ­ຈັດ­ຕັ້ງ​ປະ­ຕິ­ບັດ​ແຜນ​ຍຸດ​ທະ​ສາດ ແລະ​ແຜນ​ງານ​ທີ່​ໄດ​ກຳ­ນົດ​ໄວ້.

ພ້ອມ​ດຽວ​ກັນ​ນີ້​ສູ້​ຊົນ​ໃຫ້​ແຕ່​ລະ​ເຂດ​ຈັດ​ຕັ້ງ​ປະ­ຕິ­ບັດ​ໃຫ້​ໄດ້​ຕາມ​ເປົ້າ​ໝາຍ​ເປັນ­ຕົ້ນ​ເຂດ​ເສດ­ຖະ­ກິດ​ພິ­ເສດ​ສະ­ຫວັນ-ເຊ​ໂນ, ເຂດ​ເສດ­ຖະ­ກິດ​ພິ­ເສດ​ສາມ­ຫຼ່ຽມ​ຄຳ, ເຂດ​ເສດ­ຖະ­ກິດ​ສະ­ເພາະ​ບໍ່​ແຕນ​ແດນ​ງາມ, ເຂດ​ນິ­ຄົມ​ອຸດ­ສາ­ຫະ­ກຳ ແລະ​ການ​ຄ້າ​ວຽງ​ຈັນ-ໂນນ​ທອງ, ເຂດ​ເສດ­ຖະ­ກິດ​ສະ­ເພາະ​ພູ​ຂຽວ, ເຂດ​ພັດ­ທະ­ນາ​ກວມ​ລວມ​ໄຊ​ເຊດ​ຖາ, ເຂດ​ເສດ­ຖະ­ກິດ​ສະ­ເພາະ​ບຶງ​ທາດ­ຫຼວງ, ເຂດ​ເສດ­ຖະ­ກິດ​ສະ­ເພາະ​ດົງ​ໂພ​ສີ, ເຂດ​ເສດ­ຖະ­ກິດ​ສະ­ເພາະ​ລ່ອງ​ແທ່ງ-ວຽງ​ຈັນ, ເຂດ​ເສດ­ຖະ­ກິດ​ສະ­ເພາະ​ທ່າ​ແຂກ, ເຂດ​ເສດ­ຖະ­ກິດ​ພິ­ເສດ ແລະ​ເຂດ​ເສດ­ຖະ­ກິດ​ສະ­ເພາະ​ຈຳ­ປາ​ສັກ ແລະ​ເຂດ​ເສດ­ຖະ­ກິດ​ພິ­ເສດ​ຫຼວງ​ພະ​ບາງ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.