ລັດ​ເລັ່ງ​ປັບ­ປຸງ​ຄຸນ​ນະ​ພາບ​ອິນ​ເຕີ​ເນັດ

ວັນ​ທີ 5 ເມ­ສາ​ຜ່ານ​ມາ ທີ່​ກະ­ຊວງ​ໄປ­ສະ­ນີ, ໂທລະ​ຄົມ­ມະ­ນາ­ຄົມ ແລະ​ການ​ສື່­ສານ (ປທສ), ໄດ້​ມີ​ກອງ​ປະ­ຊຸມ ເພື່ອ​ຊີ້​ນຳ​ກ່ຽວ​ກັບ​ການ​ປັບ­ປຸງ​ຄຸນ​ນະ​ພາບ ແລະ​ລາ­ຄາ​ການ​ນຳ​ໃຊ້​ອິນ​ເຕີ​ເນັດ ໂດຍ​ການ​ເປັນ​ປະ­ທານ​ຂອງ​ທ່ານ ບຸນ​ສະ­ເຫຼີມ​ໄຊ ເຄນ​ນະ​ວົງ ຮອງ​ລັດ­ຖະ­ມົນ­ຕີ​ກະ­ຊວງ ປທສ ຊຶ່ງ​ມີ​ບັນ­ດາ​ກົມ ແລະ​ບໍ­ລິ­ສັດ​ຜູ້​ໃຫ້​ບໍ­ລິ­ການ​ດ້ານ​ໂທລະ​ຄົມ­ມະ­ນາ­ຄົມ ແລະ​ອິນ​ເຕີ​ເນັດ​ເຂົ້າ​ຮ່ວມ​ຢ່າງ​ພ້ອມ­ພຽງ.

ໃນ​ກອງ​ປະ­ຊຸມ​ຄັ້ງ​ນີ້​ບັນ­ດາ​ບໍ­ລິ­ສັດ​ກໍ​ໄດ້​ລາຍ​ງານ​ແຜນ­ການ​ຂອງ​ຕົນ​ໃນ​ການ​ປັບ­ປຸງ​ຄຸນ​ນະ​ພາບ​ບໍ­ລິ­ການ ໂດຍ​ສະ ເພາະ​ອິນ​ເຕີ​ເນັດ​ຄວາມ​ໄວ​ສູງ​ເຊັ່ນ​ແຜນ­ການ​ຂະ­ຫຍາຍ​ເຄືອ​ຂ່າຍ 4G ທົ່ວ​ປະ­ເທດ ໃນ​ປີ 2017, ພ້ອມ​ນັ້ນ ກໍ​ໄດ້​ລາຍ​ງານ​ກ່ຽວ​ກັບ​ບັນ­ດາ​ອຸ­ປະ­ສັກ​ໃນ​ການ​ປັບ­ປຸງ​ຄຸນ​ນະ​ພາບ​ບໍ­ລິ­ການ​ເປັນ­ຕົ້ນ​ອຸ­ປະ­ກອນ​ສາຍ​ສົ່ງ​ທີ່​ເກົ່າ​ແກ່, ຄື້ນ​ຄວາມ ຖີ່​ບໍ່​ພຽງ­ພໍ​ກັບ​ຄວາມ​ຕ້ອງ­ການ ແລະ​ການ​ຊື້​ສັນ­ຍານ​ອິນ​ເຕີ​ເນັດ​ຈາກ​ຕ່າງ­ປະ­ເທດ​ທີ່​ມີ​ລາ­ຄາ​ແພງ ເຮັດ​ໃຫ້​ບໍ່​ສາ­ມາດ​ຫຼຸດ​ລາ­ຄາ​ອິນ​ເຕີ​ເນັດ​ໄດ້.

ຕໍ່​ການ​ລາຍ​ງານ​ສະ­ພາບ​ບັນ­ຫາ​ອິນ ເຕີ​ເນັດ​ດັ່ງ­ກ່າວ ກະ­ຊວງ ປທສ ໄດ້​ແຈ້ງ ໂຈະ​ຂໍ້​ຕົກ­ລົງ ເລກ​ທີ 1075/ປທສ ລົງ​ວັນ​ທີ 13 ມີ­ນາ 2017 ແລະ​ໃຫ້​ທຸກ​ບໍ­ລິ­ສັດ​ປະ­ຕິ­ບັດ​ລາ­ຄາ​ອິນ​ເຕີ​ເນັດ​ແບບ​ເກົ່າ​ໄປ​ກ່ອນ ຈົນ​ກວ່າ​ຈະ​ມີ​ການ​ປັບ­ປຸງ​ຄຸນ​ນະ​ພາບ​ບໍ­ລິ­ການ​ອິນ​ເຕີ​ເນັດ ແລະ​ຈະ​ມີ​ການ​ຄົ້ນ­ຄວ້າ​ລາ­ຄາ​ອິນ​ເຕີ​ເນັດ​ໃໝ່​ໃຫ້​ຖືກ​ລົງ​ຄຽງ​ຄູ່​ກັນ​ນັ້ນ, ກະ­ຊວງ ປທສ ໄດ້​ສະ­ເໜີ​ໃຫ້​ແຕ່​ລະ​ບໍ­ລິ­ສັດ ໄດ້​ຄົ້ນ­ຄວ້າ ຄືນ​ຄື້ນ​ຄວາມ​ຖີ່​ທີ່​ຕ້ອງ­ການ ແລ້ວ​ສະ­ເໜີ ກະ­ຊວງ ເພື່ອ​ພິ­ຈາ­ລະ­ນາ ແນ­ໃສ່​ປັບ­ປຸງ​ເຄືອ​ຂ່າຍ​ອິນ​ເຕີ​ເນັດ​ໃຫ້​ທົ່ວ​ເຖິງ ແລະ​ມີ​ຄຸນ​ນະ​ພາບ.

ໃນ​ໂອ­ກາດ​ນີ້ ທ່ານ ບຸນ​ສະ­ເຫຼີມ​ໄຊ ເຄນ​ນະ​ວົງ ໄດ້​ກ່າວ​ເນັ້ນ​ໃຫ້​ທຸກ​ບໍ­ລິ­ສັດເລັ່ງ​ເອົາ­ໃຈ­ໃສ່​ປັບ­ປຸງ​ຄຸນ​ນະ​ພາບ​ການ​ບໍ­ລິ­ການ​ອິນ​ເຕີ​ເນັດ​ໃຫ້​ໄດ້​ຕາມ​ມາດ­ຕະ­ຖານ ເພື່ອ​ແກ້​ໄຂ​ຫາງ​ສຽງ​ຈົ່ມ​ວ່າ​ຈາກ​ຜູ້ ຊົມ­ໃຊ້ ຊຶ່ງ​ກະ­ຊວງ ປທສ ກໍ​ໄດ້​ແຕ່ງ­ຕັ້ງ ທີມ​ງານ​ເພື່ອ​ຕິດ­ຕາມ​ກວດ­ກາ, ຖ້າ​ເຫັນ​ວ່າ​ຍັງ​ບໍ່​ມີ​ການ​ປັບ­ປຸງ, ກະ­ຊວງ​ຈະ​ໃຊ້​ມາດ​ຕະ­ການ​ທີ່​ເໝາະ​ສົມ ເພື່ອ​ຮັບ­ປະ­ກັນ ໃຫ້​ຜູ້​ຊົມ­ໃຊ້​ໄດ້​ຮັບ​ບໍ­ລິ­ການ​ທີ່​ມີ​ຄຸນ​ນະ ພາບ ແລະ​ລາ­ຄາ​ທີ່​ສົມ​ເຫດ​ສົມ​ຜົນ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.