ລາວກຽມສະຫຼອງວັນໂອທິສຕິກໂລກ

ເພື່ອສະແດງໃຫ້ເຫັນເຖິງຄວາມສາມາດຂອງບຸກຄົນໂອທິສຕິກ ແລະເປັນການຊຸກຍູ້ສົ່ງເສີມໃຫ້ສັງຄົມ ໂດຍສະເພາະແມ່ນອົງການຈັດຕັ້ງຂອງລັດ, ຫົວໜ່ວຍທຸລະກິດ, ສະຖານທູດ, ອົງການຈັດຕັ້ງສາກົນ, ນັກຮຽນນັກສຶກສາ ແລະປະຊາຊົນໃຫ້ເຫັນ ໄດ້ຄວາມໝາຍຄວາມສໍາຄັນເຂົ້າໃຈ ແລະໃຫ້ການຊ່ວຍເຫຼືອແກ່ບຸກຄົນດັ່ງກ່າວ ສປປ ລາວ ກຽມສະຫຼອງວັນໂອທິສຕິກໂລກ.

ໃນວັນທີ 27 ມີນາຜ່ານມາ ສະມາຄົມເພື່ອຄົນໂອທິສຕິກຮ່ວມກັບສະມາຄົມນັກຂ່າວໄດ້ຈັດພິທີຖະແຫຼງຂ່າວວັນໂອທິສຕິກໂລກ 2 ເມສາ 2017 ໂດຍເຂົ້າຮ່ວມມີທ່ານ ສົມສະໜຸກ ມີໄຊ ຮອງປະທານສະມາຄົມນັກຂ່າວແຫ່ງ ສປປ ລາວ ທັງເປັນຜູ້ສະໜັບສະໜູນໄລຍະຍາວຂອງສະມາຄົມເພື່ອຄົນໂອທິສຕິກ, ທ່ານນາງ ໂພຄໍາ ດວງດາລາ ສະມາຄົມເພື່ອຄົນໂອທິສຕິກ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານນາງ ໂພຄໍາ ດວງດາລາ ກ່າວວ່າ: ການຈັດງານຖະແຫຼງຂ່າວຄັ້ງນີ້ ກໍເພື່ອເປັນການເຜີຍແຜ່ຂໍ້ມູນກ່ຽວກັບ ກິດຈະກໍາສະຫຼອງວັນໂອທິສຕິກໂລກ ໃຫ້ສັງຄົມໄດ້ຮັບຮູ້ເຂົ້າໃຈກ່ຽວກັບໂອທິສຕິກ ໂດຍຜ່ານກິດຈະກໍາ ແລະສື່ມວນຊົນ, ທັງເປັນການເປີດໂອກາດໃຫ້ສະມາຄົມລະດົມທຶນເຂົ້າໃສ່ກອງທຶນສົ່ງເສີມການສຶກສາແກ່ບຸກຄົນໂອທິສຕິກນໍາອີກ.

ສໍາລັບກິດຈະກໍາສະຫຼອງວັນໂອທິສຕິກໂລກ 2017 ແມ່ນຈະຈັດຂຶ້ນໃນວັນທີ 31 ມີນາ ຫາ 12 ເມສາ 2017 ຊຶ່ງເປັນ ງານວາງສະແດງຮູບພາບເພື່ອການກຸສົນຢູ່ທີ່ຮ້ານ Eastern Art Gallery ສີເມືອງ, ສ່ວນຮູບພາບທີ່ນໍາມາວາງສະແດງຄັ້ງນີ້ກໍແມ່ນຜົນງານຂອງເດັກດັ່ງກ່າວ, ໃນນັ້ນ ວັນທີ 2 ເມສາ 2017 ເວລາ 17:00-21:00 ໂມງ ແມ່ນຈັດງານສະແດງສິລະປະດົນຕີຂອງເດັກໂອທິສຕິກ ຢູ່ຖະໜົນຄົນຢ່າງແຄມຂອງສະຖານທີ່ຕິດກັບຮ້ານອາຫານຊັນທາລາ ແລະໃນວັນທີ 8 ເມສາ ເວລາ 10:00 ໂມງ ກໍຈະມີພິທີເປີດຫ້ອງອາຫານສາຂາສະມາຄົມເພື່ອຄົນໂອທິສຕິກແຂວງຈໍາປາ ສັກຢູ່ທີ່ເມືອງປາກເຊ.

ທັງໝົດນີ້ກໍເພື່ອສົ່ງເສີມສັກກະຍະພາບຂອງບຸກຄົນໂອທິສຕິກ ໂດຍສະເພາະໃນວຽກງານການບົງມະຕິ, ການຄົ້ນຄວ້າ, ການສຶກສາ ແລະການບູລະນະທີ່ກ່ຽວຂ້ອງ ເພື່ອໃຫ້ສັງຄົມໄດ້ຮັບຮູ້ເຖິງຄວາມສາມາດຂອງເດັກໂອທິສຕິກ ແລະໃຫ້ການສະໜັບສະໜູນຫຼາຍຂຶ້ນ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.