ລາວຈະສົ່ງອອກເຂົ້າໄປຈີນປີນີ້ 20 ພັນໂຕນ

ລາວ ແລະ ຈີນ ເປັນປະເທດເພື່ອນບ້ານທີ່ມີມູນເຊື້ອໄມຕິຈິດມິດຕະພາບຮ່ວມກັນອັນຍາວນານ ໂດຍອີງຕາມການຕົກລົງເຫັນດີຂອງລັດຖະບານ 2 ປະເທດໃນການຮັດແໜ້ນສາຍພົວພັນການຮ່ວມມື ເພື່ອເປັນການສົົ່ງເສີມເສດຖະກິດ ແລະການຄ້າສອງຝ່າຍ ລັດຖະບານ ແຫ່ງ ສປ ຈີນ ໄດ້ມອບໂກຕ້ານຳເຂົ້າເຂົ້າສານໄປ ສປ ຈີນ ໃຫ້ ສປປ ລາວ ຈຳນວນ 20 ພັນໂຕນ ໃນປີ 2017 ນີ້.

ທ່ານ ສົມຫວັງ ນິນທະວົງ ຫົວໜ້າກົມສ່ົງເສີມການຄ້າກະຊວງອຸດສາຫະກຳ ແລະການຄ້າໄດ້ກ່າວໃນກອງປະຊຸມເຜີຍແຜ່ເນື້ອໃນບົດບັນທຶກຊ່ວຍຈຳເພື່ອສົ່ງເຂົ້າໄປຈີນວ່າ: ລັດຖະບານ ສປປ ລາວ ຍາມໃດກໍ່ໄດ້ເອົາໃຈໃສ່ຊຸກຍູ້ສົ່ງເສີມການຜະລິດເປັນສິນຄ້າຢ່າງກ້ວາງຂວາງໂດຍໄດ້ກຳນົົດນະໂຍບາຍຕ່າງໆເພື່ອກະຕຸ້ນການຜະລິດເຂົ້າໃສ່ຜູ້ປະກອບການລວມທັງຂະໜາດໃຫຍ່, ຂະໜາດກາງ ແລະຂະໜາດນ້ອຍເພື່ອສະໜອງຕອບຄວາມຕ້ອງການຂອງຜູ້ຊົມໃຊ້ພາຍໃນ ແລະສົ່ງອອກໄປຍັງຕ່າງປະເທດເພື່ອບັນລຸເປົ້າໝາຍຫຼຸດພົ້ນອອກຈາກຄວາມທຸກຍາກໃນປີ 2020 ແລະການຂະຫຍາຍຕົວທີ່ຍືນຍົງເປັນຕົ້ນແມ່ນນະໂຍບາຍ ແລະກົນໄກການຄ້ຳປະກັນສະບຽງອາຫານ ແລະການຜະລິດເຂົ້າເປັນສິນຄ້າສົ່ງອອກ ພ້ອມນັ້ນລັດຖະບານແມ່ນຍັງໄດ້ເອົາໃຈໃສ່ເປັນພິເສດຍາດແຍ່ງການສະໜັບສະໜູນຈາກບັນດາປະເທດຕ່າງໆໃນໂລກຫຼາຍລະດັບຊອກໂອກາດເວທີ ແລະກິດຈະກຳຕ່າງໆ ເພື່ອໄດ້ໂຄສະນາໝາກຜົນຂອງການພັດທະນາເສດຖະກິດສັງຄົມຂອງ ສປປ ລາວ ເພື່ອດຶງດູດການຄ້າການລົງທຶນ ແລະການທ່ອງທ່ຽວໃຫ້ນັບມື້ກວ້າງອອກກວ່າເກົ່າ.

ທ່ານຫົວໜ້າກົມກ່າວຕື່ມວ່າ: ກົມສົົ່ງເສີມການຄ້າກະຊວງອຸດສາຫະກຳ ແລະການຄ້າໄດ້ຮັບການມອບໝາຍຈາກລັດ ຖະບານ ເພື່ອເປັນຜູ້ປະສານງານ ແລະນຳພາຄະນະ ຊຶ່ງປະກອບດ້ວຍຕ່າງໜ້າ ຈາກກະຊວງກະສິກຳ ແລະປ່າໄມ້, ພັດທະນາຊົນນະບົດ, ຫ້ອງວ່າການສຳນັກ ງານນາຍົກລັດຖະມົນຕີໄປລົງນາມໃນບົດບັນທຶກຊ່ວຍຈຳ ເພື່ອສົ່ງເຂົ້າສານຈຳ ນວນດັ່ງກ່າວໄປ ສປ ຈີນ ກັບລັດວິສາຫະກິດສະບຽງອາຫານ ສປ ຈີນ ເປັນຜູ້ຊື້ ຊຶ່ງໂຄງຮ່າງ ແລະເນື້ອໃນບົດທຶກຊ່ວຍຈຳດັ່ງກ່າວແມ່ນໄດ້ຜ່ານການຂໍຄຳເຫັນຈາກກະຊວງທີ່ກ່ຽວຂ້ອງເພື່ອເຮັດໃຫ້ການນະໂຍບາຍໃນນີ້ສາມາດຈັດຕັ້ງປະຕິບັດຢ່າງຮູບປະທຳລັດຖະບານແຫ່ງ ສປ ຈີນ ໄດ້ມອບໃຫ້ລັດ ວິສາຫະກິດສະບຽງອາຫານ ສປ ຈີນ ເປັນຜູ້ຊື້ນຳເຂົ້າ ແລະຈຳໜ່າຍເຂົ້າສານຈາກ ສປປ ລາວ ໂດຍນຳໃຊ້ກົົນໄກການຕະຫຼາດ ແລະກົນໄກການຄ້າສາກົນໃນການຈັດຕັ້ງປະຕິບັດໂຄງການດັ່ງກ່າວ.

ກອງປະຊຸມເຜີຍແຜ່ເນື້ອໃນບົດບັນທຶກຊ່ວຍຈຳເພື່ອສົົ່ງເຂົ້າ 20 ພັນໂຕນໄປ ສປ ຈີນໄດ້ຈັດຂຶ້ນໃນວັນທີ 20 ມີນາ 2017 ທີ່ກະຊວງອຸດສາຫະກຳ ແລະການຄ້ານະຄອນຫຼວງວຽງຈັນ ໂດຍການເປັນປະທານຂອງ ທ່ານ ສົມຫວັງ ນິນທະວົງ ຫົວໜ້າກົມສົ່ງເສີມ ການຄ້າ ທ່ານນາງ ມະນີຈັນ ສອນຄຳໄຊ ຮອງຫົວໜ້າພະແນກສົ່ງເສີມການຕະຫຼາດຂອງກົມສົ່ງເສີມການຄ້າ ພ້ອມດ້ວຍພາກສ່ວນທີ່ກ່ຽວຂ້ອງຕ່າງໆເຂົ້າຮ່ວມ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.