ລາວຢືນຢັນສົ່ງນັກກີລາ 20 ກວ່າປະເພດຊີງໄຊໃນຊີເກມປີນີ້

ລາວຕັ້ງເປົ້າສ້າງຜົນງານໃຫ້ດີກວ່າ ຊີເກມ 2015 ຜ່ານມາ ແລະ ພ້ອມສົ່ງນັກກີລາເຂົ້າຊີງໄຊ 20 ກວ່າປະເພດກີລາ ໃນງານມະຫະກໍາ ຊີເກມ ຄັ້ງທີ 29 ທີ່ປະເທດມາເລເຊຍ ໃນເດືອນສິງຫານີ້ ແລະ ມີຄວາມຫວັງຈະເປັນເຈົ້າພາບ ຊີເກມ  2025, ສ່ວນເຈົ້າພາບມາເລເຊຍ ຕັ້ງເປົ້າເປັນແຊັມ ຊີເກມ ປີນີ້.

ທ່ານ ກະເສມ ອິນທະລາ ຮອງເລຂາທິການຄະນະກໍາມະການໂອແລັມປິກແຫ່ງຊາດລາວ ກ່າວໃນພິທີຖະແຫຼງຂ່າວຫຼັງສໍາເລັດກິດຈະກໍາແລ່ນສົ່ງຕໍ່ໄມ້ທີ່ສະໜາມເຈົ້າອານຸວົງ ເມື່ອທ້າຍອາທິດທີ່ຜ່ານມາ ວ່າ: ການແຂ່ງຂັນກີລາ ຊີເກມ ຄັ້ງທີ 29 ທີ່ມາເລເຊຍ ໃນປີນີ້ໄດ້ບັນຈຸ 38 ປະເພດກີລາ; ແຕ່ລາວເຮົາຈະສົ່ງເຂົ້າຮ່ວມຊີງໄຊທັງໝົດ 20 ກວ່າປະເພດ ເຊິ່ງປັດຈຸບັນແມ່ນກໍາລັງຢູ່ໃນໄລຍະຄັດເລືອກນັກກີລາ ແລະ ພະຍາຍາມທໍາລາຍສະຖິຕິໃຫ້ດີກວ່າໃນງານມະຫະກຳກີລາ ຊີເກມ ຄັ້ງທີ 28 ທີ່ປະເທດສິງກະໂປ ເມື່ອປີ 2015 ທີ່ຜ່ານມາໃຫ້ໄດ້.

ຂະນະດຽວກັນ ທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການ ແລະ ກີລາ ກ່າວວ່າ: ການແລ່ນສົ່ງຕໍ່ໄມ້ທີ່ ສປປ ລາວ ແມ່ນໄດ້ຮັບຜົນສໍາເລັດອັນຈົບງາມ ແລະ ເປັນບັນຍາກາດໃໝ່ໃນ ຊີເກມ ກ່ອນສົ່ງຕໍ່ໃຫ້ກັບປະເທດມຽນມາ ເພື່ອສືບຕໍ່ໃນວັນທີ 25 ມີນາ ນີ້ ເຊິ່ງກໍ່ຫວັງວ່າໃນອະນາຄົດທາງອາຊຽນ ​ຈະມີຄວາມໄວ້ວາງໃຈໃຫ້ ສປປ ລາວ ເປັນເຈົ້າພາບຈັດການແຂ່ງຂັນຫຼັງຈາກຈົບວາລະໃນປະເທດອື່ນໆຫຼັງປີ 2025 ພວກເຮົາກໍ່ພ້ອມຮັບໜ້າທີ່ດັ່ງກ່າວ.

ດ້ານ ທ່ານ ດາຕຸກ ແອັມ ສາຣະວະນັນ ຮອງລັດຖະມົນຕີກະຊວງຊາວໜຸ່ມ ແລະ ກີລາ ແຫ່ງປະເທດມາເລເຊຍ ກ່າວໃນພິທີຖະແຫຼງການເນື່ອງໃນໂອກາດມາຮ່ວມກິດຈະກໍາສົ່ງຕໍ່ໄມ້ທີ່ ສປປ ລາວ ວ່າ: ສໍາລັບງານມະຫະກໍາ ຊີເກມ ຄັ້ງທີ 29 ນີ້ ພວກເຮົາກໍານົດເອົາ 38 ປະເທດກີລາ ແລະ ພວກເຮົາພ້ອມສົ່ງເຂົ້າຮ່ວມ 38 ປະເພດກີລາ ເຊິ່ງພວກເຮົາຕ້ອງການເປັນເຈົ້າຫຼຽນຄໍາໃນງານຄັ້ງນີ້ ໂດຍກີລາທີ່ເນັ້ນແມ່ນກີລາທາງນໍ້າ ເປັນຕົ້ນແມ່ນ: ລອຍນໍ້າ ແລະ ກະໂດດນໍ້າ ລວມເຖິງກີລາປະເພດລົດຖີບທີ່ເປັນເປົ້າໝາຍຫຼັກ.

ສໍາລັບ ສປປ ລາວ ສ້າງຜົນງານໄດ້ຢ່າງໂດດເດັ່ນໃນ ຊີເກມ ຄັ້ງທີ 27 ທີ່ປະເທດມຽນມາ ຍາດໄດ້ 13 ຫຼຽນຄໍາ, 17 ຫຼຽນເງິນ ແລະ 49 ຫຼຽນທອງ ຈັດຢູ່ອັນດັບທີ 8 ຂອງຕາຕະລາງ, ແຕ່ ຊີເກມ ຄັ້ງທີ 28 ທີ່ສິງກະໂປ ຜົນງານກັບຖອຍຫຼັງຫາຫຼຽນຄໍາບໍ່ເຫັນ ແລະ ສາມາດເຮັດໄດ້ພຽງ 4 ຫຼຽນເງິນ ແລະ 25 ຫຼຽນທອງ ຈັດຢູ່ອັນດັບທີ 9 ຂອງຕາຕະລາງ ເຊິ່ງຜົນງານດັ່ງກ່າວເປັນຜົນງານທີ່ຕົກຕໍ່າທີ່ສຸດກໍ່ວ່າໄດ້ ແລະ ເປັນບົດຮຽນອັນລໍ້າຄ່າເພື່ອໃຫ້ນໍາມາໃຊ້ໃນ ຊີເກມ ຄັ້ງທີ 29 ທີ່ປະເທດມາເລເຊຍ ເຊິ່ງ​ຈະເປີດສາກຂຶ້ນລະຫວ່າງວັນທີ 19 – 31 ສິງຫາ ນີ້.

ສ່ວນມາເລເຊຍ ໃນຖານະເຈົ້າພາບ ຊີເກມ 2017 ເຄີຍເປັນເຈົ້າຄອງຫຼຽນຄໍາຂອງ ຊີເກມ ເມື່ອປີ 2001 ຫຼື 16 ປີກ່ອນທີ່ພວກເຂົາເປັນເຈົ້າພາບໃນຕອນນັ້ນ ໂດຍສາມາດຍາດໄດ້ 111 ຫຼຽນຄໍາ, 75 ຫຼຽນເງິນ ແລະ 85 ຫຼຽນທອງ ກາຍເປັນເຈົ້າຄອງຫຼຽນຄໍາດ້ວຍການບຽດຊະນະໄທ ທີ່ໄດ້ 103 ຫຼຽນຄໍາ, 86 ຫຼຽນເງິນ ແລະ 89 ຫຼຽນທອງ. ແຕ່ຫຼັງຈາກນັ້ນມາເລເຊຍ ກໍ່ບໍ່ໄດ້ສໍາຜັດຫຼຽນຄໍາອີກ. ຢ່າງໃດກໍ່ຕາມ, ຊີເກມ 2017 ນີ້ ມາເລເຊຍ ໃນຖານະເຈົ້າພາບກໍ່ມີໂອກາດສູງອີກຄັ້ງ.

ຂ່າວ: ເສດຖະກິດ-ການຄ້າ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.