ລາວ ເປັນເຈົ້າພາບຈັດກອງປະຊຸມສະຫະພັນນັກຂ່າວອາຊຽນ

ສປປ ລາວ ເປັນເຈົ້າພາບເທື່ອທໍາອິດຈັດກອງປະຊຸມຄະນະບໍລິຫານງານສະຫະພັນນັກຂ່າວອາຊຽນ ໃນວັນທີ 28 ມີນາ 2019 ທີ່ຫ້ອງປະຊຸມສໍານັກງານໜັງສືພິມວຽງຈັນທາມ ນະຄອນຫຼວງວຽງຈັນ ເຊິ່ງເປັນໄລຍະເວລາທີ່ເໝາະສົມສໍາລັບບັນດາປະເທດສະມາຊິກໃນການຈັບມືກັນຢ່າງໃກ້ຊິດ ເພື່ອຈັດຕັ້ງປະຕິບັດແຜນງານປີ 2018 – 2020 ແລະ ແຜນວິໄສທັດອາຊຽນຮອດປີ 2025 ໃຫ້ສໍາເລັດຜົນ.

ຮ່ວມເປັນປະທານກອງປະຊຸມ ໂດຍ ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ( ຖວທ ) ພ້ອມທັງເປັນປະທານສະມາຄົມນັກຂ່າວແຫ່ງປະເທດລາວ ແລະ ທ່ານ ເພບພະໄຊ ຢ໋ອງ ປະທານສະຫະພັນນັກຂ່າວອາຊຽນ ພ້ອມດ້ວຍບັນດາສື່ມວນຊົນທັງພາຍໃນ ແລະ ຕ່າງປະເທດເຂົ້າຮ່ວມ.

ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງ ຖວທ ໄດ້ກ່າວວ່າ: ກອງປະຊຸມດັ່ງກ່າວມີຄວາມສໍາຄັນຫຼາຍ ແລະ ເປັນການແລກປ່ຽນຄວາມຄິດເຫັນກ່ຽວກັບການຈັດຕັ້ງປະຕິບັດແຜນງານປີ 2018 – 2020 ໄດ້ຖືກຮັບຮອງໃນກອງປະຊຸມໃຫຍ່ ຄັ້ງທີ 19 ຂອງສະຫະພັນນັກຂ່າວອາຊຽນ ໃນຕົ້ນປີຜ່ານມາທີ່ປະເທດໄທ ເຊິ່ງບັນດາປະເທດສະມາຊິກຈະຍົກໃຫ້ເຫັນຫຼາຍບັນຫາຂຶ້ນມາສົນທະນາເພື່ອບັນລຸເປົ້າໝາຍທີ່ວາງໄວ້, ຮັດແໜ້ນຄວາມສາມັກຄີ, ການເຊື່ອມຈອດລະຫວ່າງບັນດາສະມາຄົມນັກຂ່າວ ແລະ ອົງການສື່ຕ່າງໆພາຍໃນປະຊາຄົມອາຊຽນ. ນອກຈາກນີ້, ຍັງຊຸກຍູ້ສົ່ງເສີມວຽກງານການຝຶກອົບຮົມ, ການແລກປ່ຽນບົດຮຽນ – ປະສົບການນັກຂ່າວດ້ວຍກັນ, ຍົກສູງບົດບາດຂອງສະຫະພັນນັກຂ່າວອາຊຽນ ໃນພາກພື້ນ ແລະ ທົ່ວໂລກ.

ທ່ານ ເພບພະໄຊ ຢ໋ອງ ປະທານສະຫະພັນນັກຂ່າວອາຊຽນ ໄດ້ສະແດງຄໍາເຫັນວ່າ: ໃນຖານະນັກຄຸ້ມຄອງບໍລິຫານສື່ ຄວນຊຸກຍູ້ສົ່ງເສີມບຸກຄະລາກອນສື່ຂອງຕົນໃຫ້ລາຍງານຂ່າວກ່ຽວກັບບັນດາແຜນບຸລິມະສິດ ແລະ ແຜນການເຄື່ອນໄຫວຕ່າງໆຂອງສະຫະພັນນັກຂ່າວອາຊຽນ. ທັງນີ້, ກໍເພື່ອເຜີຍແຜ່ໂຄສະນາໃຫ້ແກ່ແຜນວິໄສທັດອາຊຽນ ແຕ່ນີ້ຮອດປີ 2025 ເປັນການຍົກລະດັບຄວາມຮູ້, ຄວາມເຂົ້າໃຈ, ເສີມຂະຫຍາຍຄວາມເຂົ້າອົກເຂົ້າໃຈລະຫວ່າງປະຊາຊົນອາຊຽນ ແລະ ທົ່ວໂລກ. ການຜະລິດເນື້ອຫາສາລະທີ່ສົນໃຈ, ສ້າງສັນຜ່ານຊ່ອງທາງຕ່າງໆບໍ່ວ່າຈະເປັນສື່ສິ່ງພິມ, ວິທະຍຸ, ໂທລະພາບ ແລະ ສື່ໃໝ່ ເພື່ອຕ້ານກັບການເຜີຍແຜ່ຂ່າວປອມ – ຂ່າວລວງໃນທຸກມື້ນີ້.

ບົດບາດຂອງສື່ນັບມື້ມີຄວາມສໍາຄັນຫຼາຍໃນຍຸກແຫ່ງໂລກາພິວັດ ເພາະກໍາລັງປະເຊີນກັບຄວາມທ້າທາຍຕ່າງໆແບບບໍ່ເຄີຍມີມາກ່ອນ ແລະ ສື່ໃນພາກພື້ນຕ້ອງໄດ້ພົວພັນລະຫວ່າງກັນໃຫ້ໃກ້ຊິດຫຼາຍຂຶ້ນ. ນັບແຕ່ວັນທີ 28 – 30 ມີນາ 2019 ບັນດາຜູ້ແທນສະຫະພັນນັກຂ່າວອາຊຽນ ຈະໄດ້ເຂົ້າຢ້ຽມຢາມ ທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງ ຖວທ ພ້ອມທັງໄດ້ຢ້ຽມຊົມສະຖານທີ່ທ່ອງທ່ຽວສໍາຄັນໃນ ສປປ ລາວ ຫຼາຍແຫ່ງ ແລະ ທ່ຽວຊົມສະຖານີລົດໄຟຄວາມໄວສູງ.

ຂ່າວ: ເສດຖະກິດ-ການຄ້າ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.