ລາວ ແລະ ​ສ.ເກົາ­ຫຼີ ບັນ­ລຸ​ການ​ລົງ​ນາມຮ່ວມ​ມື 8 ສະ­ບັບ

ລາວ ແລະສ.ເກົາ­ຫຼີ ບັນ­ລຸການລົງນາມຮ່ວມມື 8 ສະ­ບັບ

ຕອບສະ­ໜອງຕາມຄຳເຊີນຂອງທ່ານ ບຸນຍັງ ວໍ­ລະຈິດ ປະ­ທານປະ­ເທດແຫ່ງ ສປປ ລາວ ທ່ານ ນາງ ປັກ ກຶນ ເຮ, ປະ­ທາ­ນາ­ທິ­ບໍ­ດີ ແຫ່ງ ສ.ເກົາ­ຫຼີ ພ້ອມດ້ວຍຄະ­ນະຜູ້ແທນຂັ້ນສູງໄດ້ເດີນ­ທາງມາຢ້ຽມ­ຢາມທາງການທີ່ ສປປ ລາວ ໃນວັນທີ 9 ກັນ­ຍາ 2016 ໃນໂອ­ກາດເຂົ້າຮ່ວມກອງປະ­ຊຸມສຸດຍອດອາຊຽນຄັ້ງທີ 28-29 ແລະກອງປະ­ຊຸມສຸດຍອດອື່ນໆທີ່ກ່ຽວ­ຂ້ອງທີ່ ສປປ ລາວ ການເດີນທາງຢ້ຽມ­ຢາມທາງການ ສປປ ລາວ ຄັ້ງນີ້ ໄດ້ກາຍ­ເປັນເຫດ­ການປະ­ຫວັດ­ສາດໜຶ່ງທີ່ສຳ­ຄັນໃນການປະ­ກອບ­ສ່ວນເຂົ້າໃນການເສີມຂະ­ຫຍາຍສາຍພົວ­ພັນມິດຕະພາບ ແລະການຮ່ວມມືທີ່ດີລະ­ຫວ່າງສອງປະ­ເທດລາວ ແລະ ສ.ເກົາ­ຫຼີ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນໄປ.

ໃນວັນທີ 9 ກັນ­ຍາ 2016 ທີ່ທຳນຽບປະ­ທານປະ­ເທດ ທ່ານ ບຸນຍັງ ວໍ­ລະ ຈິດ ໄດ້ຕ້ອນ­ຮັບ ທ່ານ ນາງ ປັກ ກຶນ ເຮ ຢ່າງສົມກຽດ ຫຼັງຈາກນັ້ນກໍໄດ້ມີການພົບປະສອງຝ່າຍຂຶ້ນໃນການພົບປະຄັ້ງນີ້ ສອງຝ່າຍໄດ້ສະ­ແດງຄວາມຍິນດີ ແລະ ຕີລາ­ຄາສູງຕໍ່ການພົວ­ພັນຮ່ວມມືສອງຝ່າຍໃນໄລ­ຍະຜ່ານມາເຫັນວ່າ­ການພົວພັນຮ່ວມມືຂອງສອງປະ­ເທດມີຫຼາຍດ້ານທີ່ພົ້ນເດັ່ນ ຊຶ່ງສະ­ແດງອອກໃນການແລກປ່ຽນຢ້ຽມ­ຢາມເຊິ່ງກັນ ແລະກັນຂອງຄະນະຜູ້ແທນລະ­ດັບສູງຂອງສອງປະ­ເທດເປັນ­ຕົ້ນແມ່ນການຢ້ຽມ­ຢາມ ສ.ເກົາ­ຫຼີ ຢ່າງເປັນທາງການຂອງທ່ານປະ­ທານປະ­ເທດແຫ່ງ ສປປ ລາວ ໃນປີ 2013, ການຢ້ຽມຢາມ ສປປ ລາວ ຢ່າງເປັນທາງການຂອງທ່ານນາ­ຍົກ­ລັດ­ຖະ­ມົນ­ຕີແຫ່ງ ສ.ເກົາ­ຫຼີ ໃນປີ 2015.

ການຮ່ວມມືດ້ານເສດ­ຖະ­ກິດ-ການຄ້າ ກໍນັບມື້ນັບໄດ້ຮັບການຂະ­ຫຍາຍ­ຕົວອັນພົ້ນເດັ່ນແມ່ນການລົງ­ທຶນຂອງ ສ.ເກົາ­ຫຼີ ຢູ່ ສປປ ລາວ ທີ່ຈັດຢູ່ໃນອັນດັບ 5 ຂອງການລົງ­ທຶນຕ່າງ­ປະ­ເທດ ລວມມູນຄ່າ 700 ກວ່າລ້ານໂດລາສະ­ຫະ­ລັດ; ການຄ້າສອງຝ່າຍສາ­ມາດບັນ­ລຸໄດ້ 197 ລ້ານໂດລາສະ­ຫະ­ລັດ ໃນປີ 2015.

ສອງຝ່າຍຍິນດີສືບ­ຕໍ່ປຶກ­ສາຫາ­ລື ແລະ ຊຸກ­ຍູ້ການຮ່ວມມືດ້ານເສດ­ຖະ­ກິດ-ການຄ້າ, ການສຶກສາລວມທັງບັນ­ດາວຽກງານຂະ­ແໜງ­ການຕ່າງໆເຊັ່ນ: ດ້ານກະ­ສິ­ກຳ, ສາ­ທາ­ລະ­ນະສຸກ, ການພັດທະ ນາຊັບ­ພະ­ຍາ­ກອນມະ­ນຸດ, ວັດ­ທະ­ນະທຳ-ສັງ­ຄົມ ແລະ ຂະ­ແໜງ­ການທ່ອງທ່ຽວ ຊຶ່ງມີນັກ­ທຸ­ລະ­ກິດ-ນັກທ່ອງທ່ຽວຈາກ ສ.ເກົາ­ຫຼີ ເດີນ­ທາງເຂົ້າມາ ສປປ ລາວ ເປັນຈຳ­ນວນ 1,60 ແສນເທື່ອຄົນໃນປີ 2015, ພາຍ­ຫຼັງທີ່ ສປປ ລາວ ແລະ ສ.ເກົາ­ຫຼີ ໄດ້ເປີດສາຍການ­ບິນ ໂດຍກົງ ຮ່ວມກັນຕັ້ງ­ແຕ່ປີ 2012 ເປັນຕົ້ນມາ ສ.ເກົາ­ຫຼີ ໄດ້ໃຫ້­ການຊ່ວຍ­ເຫຼືອທາງການເພື່ອການພັດ­ທະ­ນາ (ODA) ແກ່ ສປປ ລາວ ໃນຫຼາຍຂະ­ແໜງ­ການເປັນ­ຕົ້ນແມ່ນການພັດ­ທະ­ນາຊົນ­ນະ­ບົດ, ການພັດທະນາການສຶກສາ ແລະສາ­ທາ­ລະ­ນະສຸກ ຊຶ່ງເປັນການປະ­ກອບ­ສ່ວນອັນສຳ­ຄັນເຂົ້າໃນການປະ­ຕິ­ບັດແຜນພັດ­ທະ­ນາເສດຖະກິດ-ສັງ­ຄົມຂອງ ສປປ ລາວ ນອກ­ຈາກນີ້ ສອງຝ່າຍຍັງໄດ້ແລກ­ປ່ຽນຄຳຄິດຄຳເຫັນການຮ່ວມມືໃນຂອບການຮ່ວມມື ພາກພື້ນ ແລະສາ­ກົນ ຊຶ່ງສອງຝ່າຍຈະສືບ­ຕໍ່ໃຫ້­ການຊ່ວຍ­ເຫຼືອ, ປຶກ­ສາຫາ­ລື ແລະສະ­ໜັບ­ສະ­ໜູນເຊິ່ງກັນ ແລະກັນ ໃຫ້ ຫຼາຍຂຶ້ນກວ່າເກົ່າ.

ໃນໂອ­ກາດດັ່ງ­ກ່າວ ທ່ານປະ­ທານປະ­ເທດ ບຸນຍັງ ວໍ­ລະຈິດ ໄດ້ສະ­ແດງຄວາມຂອບ­ໃຈຢ່າງຈິງໃຈຕໍ່ທ່ານ ນາງ ປັກ ກຶນ ເຮ ພ້ອມດ້ວຍຄະ­ນະທີ່ໄດ້ຢ້ຽມຢາມ ສປປ ລາວ ຢ່າງເປັນທາງການເທື່ອທຳອິດ ແລະສະ­ແດງຄວາມຂອບ­ໃຈຜ່ານ ທ່ານໄປຍັງລັດ­ຖະ­ບານ ແລະ ປະ­ຊາ­ຊົນແຫ່ງ ສ.ເກົາ­ຫຼີ  ທີ່ໄດ້ໃຫ້­ການສະ­ໜັບສະໜູນຊ່ວຍ­ເຫຼືອ ສປປ ລາວ ໄລ­ຍະຜ່ານມາ, ອວຍ­ພອນໄຊອັນປະ­ເສີດມາຍັງພະ­ນະທ່ານຈົ່ງປະ­ສົບຜົນ­ສຳ­ເລັດໃໝ່ອັນໃຫຍ່ຫຼວງກວ່າເກົ່າໃນພາ­ລະ­ກິດແຫ່ງການພັດ­ທະ­ນາ ແລະສ້າງ­ສາປະ­ເທດຊາດ ແລະຫວັງຢ່າງຍິ່ງວ່າພະ­ນະທ່ານຈະສືບຕໍ່ໃຫ້­ການຮ່ວມມື ແລະເພີ່ມການສະ­ໜັບສະໜູນຊ່ວຍ­ເຫຼືອລ້າແກ່ ສປປ ລາວໃຫ້ຫຼາຍຂຶ້ນ.

ພາຍ­ຫຼັງການພົບປະສອງຝ່າຍຍັງໄດ້ຮ່ວມກັນເປັນສັກ­ຂີພິ­ຍານໃນການລົງນາມບົດບັນ­ທຶກຄວາມເຂົ້າ­ໃຈການຮ່ວມມືດ້ານຕ່າງໆຈຳ­ນວນ 8 ສະ­ບັບ.

ໃນຕອນບ່າຍຂອງວັນດຽວກັນທ່ານປະ­ທານປະ­ເທດ ບຸນຍັງ ວໍ­ລະຈິດ ໄດ້ຈັດງານລ້ຽງອາ­ຫານທ່ຽງ ເພື່ອເປັນກຽດ ແກ່ພະ­ນະທ່ານປະ­ທາ­ນາ­ທິ­ບໍ­ດີແຫ່ງ ສ.ເກົາ­ຫຼີ ທີ່ທຳນຽບປະ­ທານປະ­ເທດແຫ່ງ ສປປ ລາວ ຫຼັງຈາກນັ້ນ ປະ­ທາ­ນາ­ທິ­ບໍ­ດີ ສ.ເກົາ­ຫຼີ ກໍໄດ້ເດີນ­ທາງກັບຄືນປະ­ເທດ.

ທີ່ມາ: ນສພ ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.