ລົດ­ເມ​ນະ­ຄອນ­ຫຼວງ​ຈະ​ປັບ­ປຸງ​ຫຼາຍ​ບັນ­ຫາການ​ຂົນ­ສົ່ງ​ຜູ້­ໂດຍ­ສານ

ຈາກ​ສະ­ພາບ​ພາ­ຫະ­ນະ​ທີ່​ເພີ່ມ​ຂຶ້ນທຸກ​ປີ​ເຮັດ​ໃຫ້­ການ​ສັນ­ຈອນ​ພົບ​ຄວາມ​ຫຍຸ້ງ­ຍາກ ໂດຍ​ສະ­ເພາະ​ເວ­ລາ​ເລັ່ງ​ດ່ວນ​ໃນ​ຕອນ​ເຊົ້າ ແລະ​ຕອນ​ແລງ​ຂອງ​ທຸກໆ​ມື້ ສະ­ນັ້ນ ​ເພື່ອ​ຫຼຸດ­ຜ່ອນ​ຄວາມ​ແອ​ອັດ ແລະ​ຫຼີກ​ລ່ຽງ​ບັນ­ຫາ​ອຸ­ບັດ­ເຫດ​ບົນ​ທ້ອງ​ຖະ­ໜົນ​ທາງ​ລັດ​ວິ​ສາ​ຫະ​ກິດ​ລົດ­ເມ​ນະ­ຄອນ ຫຼວງ​ວຽງ​ຈັນ​ຈະ​ເອົາ​ລົດ­ເມ​ເຂົ້າ​ມາ​ເພີ່ມ 30 ກວ່າ​ຄັນ ພ້ອມ​ທັງ​ເພີ່ມ​ເສັ້ນ­ທາງແລ່ນ​ໃນ​ນະ­ຄອນ­ຫຼວງ​ວຽງ​ຈັນ.

ໂດຍ​ລົດ­ເມ​ໃໝ່​ທີ່​ຈະ​ນຳ​ມາ​ບໍ­ລິ­ການ​ເພີ່ມ​ດັ່ງ­ກ່າວ​ນີ້​ ເປັນ​ການ​ຊ່ວຍ­ເຫຼືອ​ຈາກ​ລັດ­ຖະ­ບານ ແລະ​ປະ­ຊາ­ຊົນ​ຍີ່­ປຸ່ນ ໂດຍ​ຜ່ານ​ອົງ­ການ​ໃຈ​ກາ ຊຶ່ງ​ພິ­ທີ​ຖະ­ແຫຼງ​ຂ່າວ​ໂຄງ­ການ​ປັບປຸງ​ຂົນ­ສົ່ງ​ສາ­ທາ­ລະ­ນະ​ໃນ​ນະ­ຄອນຫຼວງ​ວຽງ​ຈັນ ​ໄລ­ຍະ 2 ລະ­ຫວ່າງ​ລັດວິ​ສາ​ຫະ​ກິດ​ລົດ­ເມ ແລະ JlCA ໄດ້​ຈັດຂຶ້ນ​ໃນ​ວັນ​ທີ 17 ມີ­ນາ ຜ່ານ​ມາ​ໂດຍໃຫ້​ກຽດ​ເຂົ້າ​ຮ່ວມ​ຂອງ​ທ່ານ ຄຳ​ພູນ ເຕ​ເມ​ລາດ ຜູ້­ອຳ­ນວຍ­ການ​ລັດ​ວິ​ສາ​ຫະ​ກິດ​ລົດ­ເມ​ນະ­ຄອນ­ຫຼວງ​ວຽງ​ຈັນ, ພ້ອມ​ດ້ວຍ ທ່ານ​ຫົວ­ໜ້າ​ທີມ​ໂຄງ­ການ​ປັບ­ປຸງ​ລັດ​ວິສາ​ຫະ​ກິດ​ລົດ­ເມ​ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ແລະ​ສື່ມວນ​ຊົນ​ເຂົ້າ​ຮ່ວມ.

ທ່ານ ຄຳ​ພູນ ເຕ​ເມ​ລາດ ກ່າວ​ວ່າ: ການ​ຖະ​ເເຫຼງ​ຂ່າວ​ມື້­ນີ້​ໄດ້​ຮ່ວມ​ກັບ 3 ພາກ­ສ່ວນ​ທີ່​ເຮັດ​ວຽກ​ຮ່ວມ​ກັນ​ຄື​ລັດ​ວິສາ​ຫະ​ກິດ​ລົດ­ເມ, ພະ​ແນກ​ຈະ­ລາ­ຈອນ ປກສ ນະ­ຄອນ­ຫຼວງ​ວຽງ​ຈັນ ແລະ​ອົງການ JlCA ປະ­ເທດ​ຍີ່​ປຸນ​ເພື່ອ​ຮ່ວມ​ກັນປະ­ຊາ­ສຳ­ພັນ​ໃຫ້​ມວນ​ຊົນ​ປະ­ຕິ­ບັດ​ກົດ​ລະບຽບ​ການ​ຈະ­ລາ­ຈອນ, ການ​ຂັບ​ຂີ່​ປອດໄພ ແລະ​ການ​ນຳ​ໃຊ້​ລົດ­ເມ​ສາ­ທາ­ລະ­ນະ​ແນ­ໃສ່​ຫຼຸດ­ຜ່ອນ​ຄວາມ​ແອ​ອັດ ແລະ​ອຸ­ບັດ­ເຫດ​ບົນ​ທ້ອງ​ຖະ­ໜົນ​ໃຫ້​ຫຼຸດ​ລົງ​ເທື່ອ​ລະກ້າວ.

ໂຄງ­ການ​ປັບ­ປຸງ​ຂົ່ນ​ສົ່ງ​ສາ­ທາ­ລະ­ນະຂອງ​ລັດ​ວິ​ສາ​ຫະ​ກິດ​ລົດ­ເມ​ໄລ­ຍະ 2 ຊຶ່ງ​ໄດ້​ຮັບ​ການ​ຊ່ວຍ­ເຫຼືອ​ຈາກ​ອົງ­ການ JlCA ປະ­ເທດ​ຍີ່​ປຸນ​ແຕ່​ປີ 2016-2018 ເປັນ​ໂຄງ­ການ​ສືບ­ຕໍ່​ຈາກ​ໄລ­ຍະ​ທີ 1 ຊຶ່ງ ເລີ່ມ​ແຕ່​ປີ 2012 ເຖິງ 2015 ທັງ 2 ໂຄງ­ການ​ແມ່ນ​ການ​ຊ່ວຍ­ເຫຼືອ​ທາງ​ດ້ານເຕັກ­ນິກ​ວິ­ຊາ​ການ​ເປັນ​ການ​ຜັນ​ຂະຫຍາຍ​ແຜນ​ແມ່​ບົດ​ການ​ຂົນ­ສົ່ງ​ໃນ​ຕົວເມືອງ​ນະ­ຄອນ­ຫຼວງ​ວຽງ​ຈັນ​ສະ­ບັບ​ປີ 2008 ທີ່​ອົງ­ການ​ໃຈ​ກາ​ຊ່ວຍ​ສ້າງ​ໃຫ້.

ສຳ­ລັບ​ການ​ປັບ­ປຸງ​ໂຄງ­ການ​ໄລ­ຍະ 2 ແມ່ນ​ສືບ­ຕໍ່​ປະ­ຕິ­ບັດ​ບັນ­ດາ​ໜ້າ​ວຽກ​ໄລ­ຍະ 1 ໃຫ້​ມີ​ປະ​ສິດ­ທິ​ຜົນ​ດີ​ຂຶ້ນ​ໂດຍ​ການຮ່ວມ​ມື​ກັນ​ລະ­ຫວ່າງ​ນະ­ຄອນ­ຫຼວງວຽງ​ຈັນ, ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ, ອົງ­ການ JlCA ເພື່ອ​ຄົ້ນ­ຄວ້າຮ່າງ​ນະ­ໂຍ­ບາຍ​ຕໍ່​ການ​ຂົນ­ສົ່ງ​ສາ​ທາ​ລະນະສະ­ເໜີ​ໃຫ້​ລັດ­ຖະ­ບານ​ຮ່ວມ​ກັບ​ບໍ­ລິ­ສັດ Eajle Bun ຕິດ­ຕາມ​ຂໍ້​ມູນ​ຈາກ​ເຄື່ອງນັບ​ຜູ້­ໂດຍ­ສານ 42 ຄັນ​ພ້ອມ​ທັງ​ປັບ­ປຸງລະ­ບົບ​ການ​ຄຸ້ມ​ຄອງ​ຂອງ​ລັດ​ວິ​ສາ​ຫະກິດ​ລົດ­ເມ​ຄືນ­ໃໝ່ ແລະ​ຂະ­ຫຍາຍ​ເສັ້ນທາງ​ໃຫ້​ຫຼາຍ​ຂຶ້ນ​ຕື່ມ​ໃນ​ນະ­ຄອນ­ຫຼວງວຽງ​ຈັນ ເພື່ອ​ເຮັດ​ໃຫ້­ການ​ບໍ­ລິ­ການ ມວນ​ຊົນ​ດີ​ຂຶ້ນ ສາ­ມາດ​ດຶງ​ດູດ​ປະ­ຊາ­ຊົນ​ໃຫ້​ມາ​ໃຊ້​ບໍ­ລິ­ການ​ເປັນ​ການ​ຫຼຸດ​ຈຳ­ນວນ​ພາ­ຫະ­ນະ​ເທິງ​ທ້ອງ​ຖະ­ໜົນ​ລົງ.

ການ​ຊ່ວຍ​ເຫຼື່ອ​ຄັ້ງ​ນີ້ ​ທາງ​ອົງ­ການໄຈ​ກາ​ເພີ່ມ​ລົດ 34 ຄັນ​ເພື່ອ​ເພີ່ມ​ເສັ້ນ­ທາງ​ບໍ­ລິ­ການ​ເບື້ອງ​ຕົ້ນ​ຈະ​ທົດ​ລອງ​ແລ່ນ​ຈາກ​ສະ­ຖາ­ນີ​ຫາ​ສູນ​ການ​ຄ້າ​ລາວ-ໄອ​ເຕັກ ແລະ​ສະ­ໜາມ​ບິນ​ວັດ​ໄຕ 7 ຄັນ ໂດຍ​ເອົາ​ສະ­ຖາ­ນີ​ຈອດ​ລົດ​ໃໝ່​ທີ່​ເດີ່ນ​ໄອເຕັກ​ເລີ່ມ​ແຕ່ 5:30 ເຊົ້າ​ຫາ 22:00 ໂມງ.

ສຳ­ລັບ​ຜົນ­ສຳ­ເລັດ​ໄລ­ຍະ 1 ຈາກ​ອົງ­ການ​ໃຈ​ກາ​ໄດ້​ຊື້​ລົດ​ສີ­ຂຽວ 45 ບ່ອນ ນັ່ງ​ຈຳ­ນວນ 42 ຄັນ ພ້ອມ​ອາ​ໄລ່​ອຸ­ປະ­ກອນ​ຕ່າງໆ ແລະ​ໄດ້​ສົ່ງ​ພະ­ນັກ­ງານ​ໄປ​ຝຶກ​ອົບ­ຮົມ 4 ຄັ້ງ​ຈຳ­ນວນ 23 ທ່ານ ທັງ​ໄດ້​ຕິດ​ຕັ້ງ​ກ່ອງ​ດຳ​ເພື່ອ​ຕິດ­ຕາມ​ພຶດ­ຕິ​ກຳ​ການ​ຂັບ​ຂີ່​ຂອງ​ພະ­ນັກ­ງານ​ຂັບ​ລົດ ເມ​ເພື່ອ​ໃຫ້​ໃຊ້​ຄວາມ​ໄວ​ທີ່​ເໝາະ ສົມ ແລະ​ເກັບ​ກຳ​ຂໍ້​ມູນ​ການ​ໃຊ້​ນ້ຳ­ມັນ​ເຊື້ອ​ໄຟ, ທົດ​ລອງ​ນຳ​ໃຊ້​ບັດ​ຂີ່​ລົດ­ເມ​ລາ­ຄາ​ຖືກ​ດ້ວຍ​ລະ­ບົບ ICT ຊຶ່ງ​ສາ­ມາດ​ຂາຍ​ບັດ​ໃຫ້​ນັກ​ສຶກ​ສາ​ໄດ້ 1827 ບັດ, ປັບ­ປຸງ​ປ່ຽນ​ຕາ­ຕະ­ລາງ​ເດີນ­ທາງ​ເພີ່ມ​ຄວາມ​ຖີ່​ຂອງ​ຖ້ຽວ​ລົດ​ໃຫ້​ມີ​ຄວາມ​ເໝາະ​ສົມ ແລະ​ເຮັດ​ໃຫ້​ຜູ້­ໂດຍ­ສານ​ບໍ່​ລໍ­ຖ້າ​ດົນ, ໂຄງ­ການ​ນີ້​ເຮັດ​ໃຫ້​ຜູ້​ຊົມ­ໃຊ້​ລົດ­ເມ​ເພີ່ມ ຂຶ້ນ 46% ຖ້າ​ທຽບ­ໃສ່​ກ່ອນ​ໜ້າ​ນັ້ນ.

ຂ່າວ: ບຸນ​ນິກ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.