ລ້ຽງງົວສ້າງອາຊີບ ສ້າງລາຍໄດ້

    ການ​ລ້ຽງ​ງົວ​ເປັນ​ອາ­ຊີບໜຶ່ງ​ທີ່​ຕິດ​ພັນ​ກັບ​ການ​ດຳ­ລົງ​ຊີ­ວິດຂອງ​ປະ­ຊາ­ຊົນ​ມາ​ໂດຍ​ພື້ນ­ຖານຈາກ​ຈຸດ​ນີ້​ ທ່ານ ສີ​ສຸ­ພັນ ຈັນ­ທະລາດ ຈິ່ງ​ຫັນ​ເອົາ​ເປັນ​ທຸ­ລະ​ກິດ​ລົງທຶນ​ປູກ​ຫຍ້າ​ລ້ຽງ​ງົວ​ເປັນ​ສິນ­ຄ້າ ເພື່ອ​ສ້າງ​ລາຍ​ຮັບ​ຕົ້ນ­ຕໍ​ໃຫ້​ແກ່​ຕົນເອງ​ໄປ​ຄຽງ​ຄູ່​ກັນ​ນັ້ນ​ກໍ​ປຸກ­ລະ­ດົມ ປະ­ຊາ­ຊົນ​ເຂົ້າ​ມາ​ມີ​ສ່ວນ​ຮ່ວມ ແລະ​ລ້ຽງ​ເປັນ​ອາ­ຊີບ​ສ້າງ​ລາຍຮັບ​ຕາມ​ກັນ.

   ທ່ານ ສີ​ສຸ­ພັນ ຈັນ­ທະ​ລາດ ຜູ້ອຳ­ນວຍ​ການ​ບໍ­ລິ­ສັດ​ປາດ​ຖະ​ໜາ ສົ່ງ­ເສີມ​ກະ­ສິ­ກຳ​ອິນ​ຊີ​ຂາ​ອອກ-ຂາ​ເຂົ້າ ຈຳ­ກັດ​ຜູ້​ດຽວ ເຈົ້າ​ຂອງ ຟາມ​ລ້ຽງ​ງົວ​ປາດ​ຖະ​ໜາ​ບ້ານ​ນາ ປໍ ເມືອງ​ສັງ​ທອງ ນະ­ຄອນ­ຫຼວງວຽງ​ຈັນ ໃຫ້​ສຳ­ພາດ​ວ່າ: ດ້ວຍ ຄວາມ​ມັກ​ຮັກ​ທາງ​ດ້ານ​ການ​ລ້ຽງສັດ​ ຈຶ່ງ​ໄດ້​ສຶກ​ສາ​ຮຽນ​ຮູ້​ວິ­ທີ​ການລ້ຽງ​ພ້ອມ​ການ​ຕະ­ຫຼາດ ແລະ​ການໄລ່​ລຽງ​ທາງ​ດ້ານ​ເສດ­ຖະ­ກິດ​ທີ່ເຫັນ​ວ່າ​ມີ​ຄວາມ​ເປັນ​ໄປ​ໄດ້​ສູງ​ຈິ່ງ ຕັດ­ສິນ​ໃຈ​ລົງ­ທຶນ​ລ້ຽງ​ໂດຍ​ນຳ​ໃຊ້ເຕັກ­ນິກ​ວິ­ທະ­ຍາ­ສາດ​ເຂົ້າ​ຊ່ວຍ ໂດຍ​ສະ­ເພາະ​ການ​ປູກ​ຫຍ້າ​ເຊັ່ນ: ຫຍ້າ​ເນ​ເປຍ, ຫຍ້າ​ລູ​ຊີ, ຫຍ້າ​ກິ​ນີ ຊຶ່ງ​ເປັນ​ຫຍ້າ​ທີ່​ຊ່ວຍ​ເຮັດ​ໃຫ້​ສຸ​ຂະ ພາບ​ຂອງ​ງົວ​ແຂງ­ແຮງ ແລະ​ໃຫຍ່ ໄວ ນອກ­ຈາກ​ນັ້ນ ຍັງ​ໄດ້​ມີ​ການ ລ້ຽງ​ງົວ, ແບ້ ແລະ​ແກະ​ຕື່ມ​ອີກ ເພາະ​ສັດ​ຊະ­ນິດ​ດັ່ງ­ກ່າວ​ກໍ​ມີ​ຄວາມ ນິ­ຍົມ​ບໍ­ລິ­ໂພກ​ກັນ​ໃນ​ທົ່ວ​ສັງ­ຄົມ ຜ່ານ​ການ­ຈັດ­ຕັ້ງ​ປະ­ຕິ­ບັດ​ກໍ​ເຫັນ ວ່າ​ໄດ້​ຮັບ​ປະ​ສິດ­ທິ​ຜົນ​ດີ ແຕ່​ບໍ່​ທັນ ຕອບ​ສະ­ໜອງ​ໄດ້​ກັບ​ຄວາມ​ຕ້ອງ ການ​ໃນ​ການ​ບໍ­ລິ­ໂພກ​ຂອງ​ສັງ­ຄົມ ຈິ່ງ​ພະ­ຍາ­ຍາມ​ເປີດ​ໂອ­ກາດ​ໃຫ້​ປະຊາ​ຊົນ​ເຂົ້າ​ມາ​ມີ​ສ່ວນ​ຮ່ວມ​ໃນການ​ລ້ຽງ ຊຶ່ງ​ຟາມ​ເປັນ​ລັກ­ສະ­ນະທະ­ນາ­ຄານ​ສັດ, ສຳ­ລັບ​ປະ­ຊາ­ຊົນ ທີ່​ບໍ່​ມີ​ເງື່ອນ­ໄຂ​ກໍ​ສາ­ມາດ​ເອົາ​ສັດ ມາ​ຝາກ​ລ້ຽງ​ໂດຍ​ແບ່ງ​ຜົນ​ປະ ໂຫຍດ​ຮ່ວມ​ກັນ ໃນ​ທາງ​ກົງ​ກັນ ຂ້າມ ປະ­ຊາ­ຊົນ​ທ່ານ​ໃດ​ຢາກ​ຈະ ລ້ຽງ​ແຕ່​ບໍ່​ມີ​ທຶນ­ຮອນ​ທາງ​ບໍ­ລິ­ສັດ ກໍ​ຈະ​ສະ­ໜອງ​ແນວ​ພັນ​ສັດ, ຫຍ້າ, ເຕັກ­ນິກ​ວິ­ຊາ​ການ​ໃຫ້​ໃນ​ລັກ​ສະ ນະ​ແທນ​ຄືນ​ຕາມ​ຫຼັງ ເພື່ອ​ເປັນການ​ສົ່ງ­ເສີມ​ເຮັດ​ໃຫ້​ເຂົາ­ເຈົ້າ​ມີອາ­ຊີບ​ມີ​ລາຍ​ຮັບ​ນຳ​ກັນ.

ແນວ­ໃດ​ກໍ​ຕາມ ນີ້​ເປັນ​ແນວ​ຄິດ ໃໝ່​ຂອງ​ທ່ານ ສີ​ສຸ­ພັນ ຈັນ­ທະ​ລາດ ຊຶ່ງ​ທ່ານ​ກ່າວ​ອີ​ກວ່າ: ການ​ລົງ­ທຶນໃນ​ອາ­ຊີບ​ລ້ຽງ­ສັດ​ນີ້​ບໍ່​ພຽງ​ແຕ່ເປັນ​ການ​ຫາ​ຜົນ​ປະ­ໂຫຍດ​ຫາ​ກຳ ໄລ​ຢ່າງ​ດຽວ ແຕ່​ເນື້ອ​ໃນ​ຈິດ­ໃຈສຳ­ຄັນ​ແມ່ນ​ຢາກ​ຈະ​ຊ່ວຍ​ປະ­ຊາຊົນ​ຊາວ​ເມືອງ​ສັງ​ທອງ​ໃຫ້​ມີ​ຢູ່​ມີກິນ​ຫຼຸດ​ພົ້ນ​ອອກ​ຈາກ​ຄວາມ­ທຸກຍາກ​ມາ​ຮອດ​ດຽວ­ນີ້ ຈາກ​ການລົງ­ທຶນ 3-4 ປີ­ຜ່ານ­ມາ​ກໍ​ສາ­ມາດສ້າງ​ລາຍ​ຮັບ​ໄດ້​ແລ້ວ​ຕົ້ນ­ຕໍ​ກໍ​ໄດ້ມາ​ຈາກ​ການ​ຂາຍ​ສັດ ແລະ​ຈະເປັນ​ຊ່ອງ​ທາງ​ດ້ານ​ແຫຼ່ງ​ລາຍ​ຮັບ ເພື່ອ​ຕໍ່​ຍອດ​ເຮັດ​ໃຫ້​ຟາມ​ຂະ­ຫຍາຍ ຕົວ​ເຕີບ​ໃຫຍ່​ສົມ​ກັບ​ເປົ້າ​ໝາຍ ການ​ເປັນ​ທະ­ນາ­ຄານ​ສັດ​ຢູ່​ເມືອງ ສັງ​ທອງ ສ່ວນ​ທຸ­ລະ​ກິດ​ອື່ນ​ແມ່ນມີ​ແຜນ​ແຕ່​ຈະ​ເອົາ​ທຸ­ລະ​ກິດ​ນີ້​ເປັນຫຼັກ​ເພາະ​ແນວ​ໂນ້ມ​ໃນ​ອະ­ນາ­ຄົດທຸ­ລະ​ກິດ​ນີ້​ຈະ​ໄປ​ໄດ້​ດີ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.