ວຽງ​ພູ​ຄາ ຈັດ­ການ​ພະ­ນັກ­ງານ​ລັດຝືນ​ລະ­ບຽບ 11 ຄົນ

ເມືອງ​ວຽງ​ພູ​ຄາ ແຂວງ​ຫຼວງ​ນ້ຳ​ທາ ແມ່ນ​ອີກ​ໜຶ່ງ​ເມືອງ​ທີ່​ຫຼາຍ​ເມືອງ​ໃນຂອບ​ເຂດ​ທົ່ວ​ປະ­ເທດ​ຄວນ​ເອົາ​ເປັນ​ແບບ­ຢ່າງ ໂດຍ​ມີ​ການ​ລົງ​ວິ­ໄນ​ຖອນ ແລະ ​ໄລ່ອອກ​ພະ­ນັກ­ງານ​ລັດ ແລະ​ສະ­ມາ­ຊິກ​ພັກ​ທີ່​ມີ​ການ​ກະ­ທຳ​ທີ່​ເປັນ​ການ​ລະ­ເມີດ​ຕໍ່​ລະ­ບຽບ​ກົດ­ໝາຍ​ເຖິງ 11 ຄົນ ທັງ​ນີ້ ກໍ​ເພື່ອ​ເປັນ​ການ​ເຕືອນ​ສະ­ຕິ​ພະ­ນັກ­ງານ​ໃຫ້​ເຮັດວຽກ​ຮັບ​ໃຊ້​ຊາດ​ກໍ​ຄື ປະ­ຊາ­ຊົນ​ຢ່າງ​ມັ​ວາມ​ບໍ­ລິ­ສຸດ​ຊື່­ສັດສ້າງ​ໃຫ້​ສັງ­ຄົມ​ມີ​ຄວາມ​ສະ­ຫງົບ​ຮຽບ​ຮ້ອຍ, ຍຸ­ຕິ​ທຳ ພ້ອມ​ມີ​ຄວາມ​ໂປ່ງ​ໃສ.

ພິ­ທີ​ປະ­ກາດ​ວິ­ໄນ​ຕໍ່​ພະ­ນັກ­ງານ-ລັດ­ຖະ­ກອນ, ສະ­ມາ­ຊິກ​ພັກ​ທີ່​ກະ­ທຳ​ຜິດ​ຕໍ່​ລະບຽບ​ຂອງ​ພັກ ແລະ​ກົດ­ໝາຍ​ວ່າ​ດ້ວຍ​ລັດ­ຖະ­ກອນ​ຈຳ­ນວນ​ດັ່ງ­ກ່າວ ໄດ້​ຈັດ​ຂຶ້ນ​ໃນວັນ​ທີ 24 ມັງ­ກອນ 2017 ນິ້ ທີ່​ສະ­ໂມ­ສອນ​ເມືອງ​ວຽງ​ພູ​ຄາ ໂດຍ​ເປັນ​ປະ­ທານຂອງ ທ່ານ ວົງ​ເພັດ ເສັດ​ຈຽມ​ແສງ ກຳ­ມະ­ການ​ພັກ​ແຂວງ  ເລ­ຂາ​ພັກ​ເມືອງ​ເຈົ້າເມືອງໆ​ວຽງ​ພູ​ຄາ, ມີ​ບັນ­ດາ​ຫົວ­ໜ້າ-ຮອງ​ຫົວ­ໜ້າ​ຫ້ອງ­ການ, ສອງ​ກອງ​ບັນ­ຊາການເລ­ຂາ​ຄະ­ນະ​ພັກ​ຮາກ​ຖານ​ກຸ່ມ​ບ້ານ​ທ້ຽວ​ເຂົ້າ​ຮ່ວມ.

ທ່ານ ນາງ ເຮືອຍ ສົມ​ຫວັງ ກຳ­ມະ­ການ​ພັກ​ເມືອງ ຫົວ­ໜ້າ​ຫ້ອງ­ການ​ພາຍ​ໃນເມືອງ​ໄດ້​ຂຶ້ນ​ຜ່ານ​ມະ­ຕິ​ຕົກ­ລົງ​ຂອງ​ຄະ­ນະ​ປະ­ຈຳ​ພັກ​ເມືອງ​ຕໍ່​ພະ­ນັກ­ງານ-ລັດ​ຖະກອນ, ສະ­ມາ­ຊິກ​ພັກ ຜູ້​ທີ່​ກະ­ທຳ​ຜິດຕໍ່​ລະ­ບຽບ​ກົດ­ໝາຍໄປ​ຕາມ​ແຕ່​ລະ​ຂັ້ນ​ມີ​ທັງ​ໝົດ 11 ຄົນ ໃນ​ນັ້ນ​ປະ­ກອບ​ມີ​ການ​ປະ­ຕິ­ບັດ​ວິ­ໄນ​ວ່າ​ດ້ວຍ​ການ​ລຶບ​ຊື່​ອອກ​ຈາກ​ພັກ​ຖານ​ຄວາມ​ຜິດ​ຄືການ​ລະ­ເມີດ​ຕໍ່​ລະ­ບຽບ​ຂອງ​ພັກ ຈຳ­ນວນ 1 ຄົນ ຄື: ທ້າວ  ວຽງ​ທອງ  ໂດຍ​ປະ­ຕິ­ບັດ​ຕາມ​ກົດ​ລະ­ບຽບ​ຂອງ​ພັກ​ປະ­ຊາ­ຊົນ​ປະ­ຕິ­ວັດ​ລາວສະ­ໄໝທີ X ໝວດ ທີ XI  ໃນ​ມາດ­ຕາ 48 ວ່າ​ດ້ວຍ​ການ​ປະ­ຕິ­ບັດ​ວິ­ໄນ​ຂອງ​ພັກ​ຕໍ່​ສະ­ມາ­ຊິກ​ພັກ.

ປະ­ຕິ­ບັດ​ວິ­ໄນ​ໃຫ້​ອອກ​ຈາກ​ລັດ​ຖະ​ການ​ມີ 2 ຄົນ ຄື:  ທ້າວ ແກ້ວ ຖານ​ຄວາມ​ຜິດລະ­ເມີດ​ດ້ວຍ​ການ​ທຳ​ມິດ​ສະ​ຈານ ແລະ​ທ້າວ ແສງ​ລີ  ກະ­ທຳ​ຜິດ​ຕໍ່​ຂໍ້​ຫ້າມ​ຂອງ​ພະນັກ​ງານ-ລັດ­ຖະ­ກອນ​ໂດຍ​ປະ­ຕິ­ບັດ​ຕາມ​ກົດ­ໝາຍ​ວ່າ​ດ້ວຍ​ພະ­ນັກ­ງານ-ລັດ­ຖະ­ກອນສະ­ບັບ​ເລກ​ທີ 74/ສພຊ, ນະ­ຄອນ­ຫຼວງ​ວຽງ​ຈັນ ວັນ​ທີ 18 ທັນ­ວາ  2015 ມາດ­ຕາ 73 ຂັ້ນ4, ໃຫ້​ອອກ​ຈາກ​ລັດ​ຖະ​ການ​ໂດຍ​ບໍ່​ໄດ້​ຮັບ​ນະ­ໂຍ­ບາຍ​ໃດໆ.

ປະ­ຕິ­ບັດ​ວິ­ໄນ​ ວ່າ​ດ້ວຍ​ການ​ໂຈະ​ການຮ່ວມ​ຊີ­ວິດ​ພັກ​ພາຍ​ໃນ 6 ເດືອນ ຈຳ­ນວນ 1 ຄົນ ຄື: ພັນ​ຕີ ພອນ​ສະ​ຫວັດ ໃນ​ຖານຄວາມ​ຜິດ​ດ້ວຍ​ການ​ລະ­ເມີດ​ກ່ຽວ​ກັບ​ລະບຽບ​ພັກ  ໂດຍ​ປະ­ຕິ­ບັດ​ຕາມ​ກົດ​ລະ­ບຽບ​ຂອງ​ພັກ​ປະ­ຊາ­ຊົນ ປະ­ຕິ­ວັດ​ລາວ ສະ­ໄໝ ທີ X ໝວດ​ທີ XI ໃນ​ມາດ­ຕາ 48 ວ່າ​ດ້ວຍ​ການ​ປະ­ຕິ­ບັດ​ວິ­ໄນ​ຂອງ​ພັກ​ຕໍ່​ສະ­ມາ­ຊິກ​ພັກ.

ປະ­ຕິ­ບັດ​ວິ­ໄນ​ຕໍ່​ຜູ້​ທີ່​ກະ­ທຳ​ຜິດ​ໃນ ການ​ນຳ​ໃຊ້​ງົບ­ປະ­ມານ ຈຳ­ນວນ 7 ຄົນ,  ຄຶ: ທ້າວ ສີ​ທອງ, ທ້າວ ຫົງ​ທອງ, ທ້າວ ອາ​ລຸນ, ທ້າວ  ລຳ​ມາ, ທ້າວ ບຸນ​ເພງ,  ທ້າວ ກຳ​ເງິນ , ທ້າວ ຈັນ​ທີ, ໃນ​ຖານຄວາມ​ຜິດ​ໃນ​ການ​ນຳ​ໃຊ້​ຮ່ວງ​ເງິນ​ທີ່​ບໍ່ຖືກ­ຕ້ອງ​ຕາມ​ລະ­ບຽບ​ກົດ­ໝາຍ ວ່າ​ດ້ວຍ ງົບ­ປະ­ມານ​ຮູບ​ການ​ປະ­ຕິ­ບັດ​ວິ­ໄນ​ແມ່ນປະ­ຕິ­ບັດ​ຕາມ​ກົດ­ໝາຍ​ວ່າ​ດ້ວຍ​ພະ­ນັກ ງານ-ລັດ­ຖະ­ກອນ ມາດ­ຕາ 73 ຂັ້ນ 2 ແລະ ຂັ້ນ 3, ໃນ​ນັ້ນ​ປະ­ຕິ­ບັດ​ຂັ້ນ 2 ມີ 3 ຄົນ, ຄື: ທ້າວ  ບຸນ​ເພງ ,ທ້າວ ກຳ​ເງິນ ແລະ​ທ້າວ ຈັນ​ທີ.

ທ່ານ ວົງ​ເພັດ ເສັດ​ຈຽມ​ແສງ ໄດ້​ມີຄຳ​ເຫັນ​ວ່າການ​ປະ­ຕິ­ບັດ​ວິ­ໄນ​ຕໍ່​ພະ­ນັກງານ​ຄັ້ງ​ນີ້​ ກໍ​ເພື່ອ​ເປັນ​ການ​ປະ­ຕິ­ບັດ​ຕາມລະ­ບຽບ​ກົດ­ໝາຍ​ຂອງ​ພະ­ນັກ­ງານ-ລັດຖະ​ກອນ, ສະ­ມາ­ຊິກ​ພັກ​ຜູ້​ທີ່​ກະ­ທຳ​ຜິດ, ຕໍ່​ລະ­ບຽບ​ກົດ­ໝາຍ , ພ້ອມ​ນັ້ນ ທ່ານຍັງໄດ້​ເນັ້ນ​ໜັກ​ມາ​ຍັງ​ບັນ­ດາ​ພະ­ນັກ­ງານ-ລັດ­ຖະ­ກອນ, ສາ​ມາ​ຊິກ​ພັກ​ທຸກ​ສະ­ຫາຍ ຈົ່ງ​ກຳ​ແໜ້ນ​ຕໍ່​ດ້ານ​ການ­ເມືອງ​ແນວ​ຄິດ, ປະ­ຕິ­ບັດ​ຕໍ່​ລະ­ບຽບ​ກົດ­ໝາຍ​ຂອງ​ພັກ-ຂອງ​ລັດ, ເຮັດ​ວຽກ​ດ້ວຍ​ຄວາມ​ໂປ່ງ​ໃສ ຊື່­ສັດ​ບໍ­ລິ­ສຸດ​ຕໍ່​ພັກ-ຕໍ່​ລັດ ແລະ​ປະ­ເທດຊາດ, ພ້ອມ​ກັນ​ພັດ­ທະ­ນາ​ບ້ານ, ເມືອງ ແລະ​ປະ­ເທດ​ຊາດ​ໃຫ້​ຮຸ່ງ­ເຮືອງ​ສີ­ວິ­ໄລ ເຮັດ​ໃຫ້​ອົງ​ການ­ຈັດ­ຕັ້ງ​ພັກ-ລັດ​ມີ​ຄວາມສະ­ຫງົບ​ເປັນ​ລະ­ບຽບ​ຮຽບ​ຮ້ອຍ​ໂດຍ​ພຶ້ນຖານ.

ທີ່ມາ: ນສພ ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.