ສສງ ຫົວ​ແຊ ມີ​ເງິນ​ຝາກ​ເກືອບ 10 ຕື້​ກີບ

ສະ­ຫະ­ກອນ​ສິນ​ເຊື່ອ ແລະ​ເງິນ​ຝາກ​ປະ­ຢັດ​ຫົວ​ແຊ​ຈະ­ເລີນ (ສສງ) ໄດ້​ຈັດ​ຕັ້ງ​ກອງ​ປະ­ຊຸມ​ສະ­ຫຼຸບ​ຜົນ­ງານການ­ເຄື່ອນ­ໄຫວ​ປະ­ຈຳ​ປີ 2016 ໃນ​ວັນ​ທີ 24 ມີ­ນາ 2017 ທີ່​ຫ້ອງ­ການ​ຕັ້ງ​ຢູ່​ບ້ານ​ພັດ­ທະ­ນາ​ໜອງ​ນ້ຳ​ຂາວ ເມືອງ​ບາ​ຈຽງ​ຈະ­ເລີນ​ສຸກ ແຂວງ​ຈຳ­ປາ​ສັກ ໂດຍ​ການ​ເຂົ້າ​ຮ່ວມ​ຂອງ​ທ່ານ ໂສມ ບຸດ​ສະ­ກຸນ ເຈົ້າ­ເມືອງໆ​ບາ​ຈຽງ​ຈະ­ເລີນ​ສຸກ, ຜູ້­ຕາງ­ໜ້າ​ທະ­ນາ­ຄານ​ແຫ່ງ ສປປ ລາວ (ທຫລ) ພາກ​ໃຕ້ ທີ່​ແຂວງ​ຈຳ­ປາ​ສັກ, ຄະ­ນະ​ສະ­ພາ​ບໍ­ລິ­ຫານ, ຄະ­ນະ​ອຳ­ນວຍ​ການ ແລະ​ພະ­ນັກ­ງານ-ສະ­ມາ­ຊິກ ສສງ ຫົວ​ແຊ​ຈະ­ເລີນ ເຂົ້າ​ຮ່ວມ​ຢ່າງ​ຫຼວງ­ຫຼາຍ.

ທ່ານ ຫຸມ­ພັນ ອິນ​ທະ​ວົງ ປະ­ທານ​ສະ­ພາ​ບໍ­ລິ­ຫານ ສສງ ຫົວ​ແຊ​ຈະ­ເລີນ ລາຍ ງານ​ວ່າ: ສສງ ຫົວ​ແຊ​ຈະ­ເລີນ ໄດ້​ສ້າງ­ຕັ້ງ​ຂຶ້ນ​ຢ່າງ​ເປັນ​ທາງ​ການ​ໃນ​ວັນ​ທີ 27 ກຸມ­ພາ 2009 ໂດຍ​ມີ​ເປົ້າ​ໝາຍ​ໃຫ້​ຢຸດ­ຕິ​ການ​ຢືມ​ເງິນ​ນອກ​ລະ­ບົບ​ທີ່​ມີ​ດອກ​ເບ້ຍ​ສູງ ທັງ​ເປັນ​ການ​ຫຼຸດ­ຜ່ອນ​ຄວາມ­ທຸກ​ຍາກ​ຂອງ​ສະ­ມາ­ຊິກ​ດ້ວຍ​ການ​ສ້າງ​ໂອ­ກາດ​ໃຫ້​ເຂົາ­ເຈົ້າ​ສາ­ມາດ​ເຂົ້າ​ເຖິງ​ແຫຼ່ງ​ທຶນ ເພື່ອ​ຊຸກ­ຍູ້​ກິດ­ຈະ­ກຳ​ສ້າງ​ລາຍ​ຮັບ​ໃຫ້​ແກ່​ຄອບ­ຄົວ ເຮັດ​ໃຫ້​ສະ­ຫະ­ກອນ​ມີ​ຄວາມ​ຍືນ​ຍົງ​ດ້ວຍ​ການ​ໄລ່​ລຽງ​ທຸ­ລະ​ກິດ ທີ່​ມີ​ຜົນ​ກຳ­ໄລ-ສາ­ມາດ​ກຸ້ມ​ຕົນ​ເອງ​ໄດ້.

ທ່ານ​ປະ­ທານ​ສະ­ພາ​ບໍ­ລິ­ຫານ ສສງ ຫົວ​ແຊ​ຈະ­ເລີນ​ໃຫ້​ຮູ້​ອີ​ກວ່າ: ແຫຼ່ງ​ທຶນ​ຂອງ ສສງ ມາ​ຈາກ 2 ແຫຼ່ງ​ທຶນ​ຕົ້ນ­ຕໍ​ຄື: ຫຸ້ນ​ຂອງ​ສະ­ມາ­ຊິກ ແລະ​ເງິນ​ຝາກ​ຂອງ​ສະ­ມາ­ຊິກ​ໃນ​ທ້າຍ​ປີ 2016 ຫຸ້ນ​ຂອງ​ສະ­ມາ­ຊິກ​ມີ​ທັງ​ໝົດ​ຈຳ­ນວນ 2.144 ລ້ານ​ກີບ ເພີ່ມ​ຂຶ້ນ 53% ທຽບ­ໃສ່​ປີ 2015 ແລະ​ເງິນ​ຝາກ​ຂອງ​ສະ­ມາ­ຊິກ​ມີ​ທັງ​ໝົດ 7.100 ລ້ານ​ກີບ ເພີ່ມ​ຂຶ້ນ 42% ທຽບ­ໃສ່​ປີ 2015 ທັງ 2 ແຫຼ່ງ​ທຶນ ລ້ວນ​ແລ້ວ­ແຕ່​ລື່ນ​ຄາດ­ໝາຍ​ທີ່​ກຳ­ນົດ​ໄວ້​ເຖິງ 40%; ນອກ­ຈາກ​ນີ້ ສາ­ມາດ​ປ່ອຍ​ກູ້​ໄດ້​ເຖິງ 8.300 ລ້ານ​ກີບ​ເພີ່ມ​ຂຶ້ນ 63% ທຽບ­ໃສ່​ປີ​ທີ່​ຜ່ານ​ມາ ແລະ​ພິ­ເສດ​ສາ­ມາດ​ເກັບ ຄືນ ໄດ້​ເກືອບ​ທັງ​ຫມົດ ຊຶ່ງ​ສະ­ແດງ​ອອກ ໃນ​ລາຍ​ງານ​ໜີ້​ຊັກ​ຊ້າ​ມີ​ພຽງ​ແຕ່ 1% (ທຫລ ໄດ້​ກຳ­ນົດ​ໄວ້​ແມ່ນ​ບໍ່​ໃຫ້​ເກີນ 5%).

ທ່ານ ໂສມ ບຸດ​ສະ­ກຸນ ເຈົ້າ­ເມືອງໆ​ບາ​ຈຽງ​ຈະ­ເລີນ​ສຸກ ໄດ້​ຕີ​ລາ­ຄາ​ສູງ​ຕໍ່​ການ​ບໍ­ລິ­ຫານ ແລະ​ການ​ຄຸ້ມ​ຄອງ​ຂອງ​ສະ­ຫະ­ກອນ​ສິນ​ເຊື່ອ ແລະ​ເງິນ​ຝາກ​ປະ­ຢັດ​ຫົວ ແຊ​ຈະ­ເລີນ ຊຶ່ງ​ໄດ້​ສະ­ໜອງ​ທຶນ​ໃຫ້​ແກ່​ປະ­ຊາ­ຊົນ​ບັນ­ດາ­ເຜົ່າ​ໃນ​ຂອບ​ເຂດ​ເມືອງ​ບາ​ຈຽງ​ຈະ­ເລີນ​ສຸກ ເພື່ອ​ແກ້​ໄຂ​ຊີ­ວິດ​ການ​ເປັນ​ຢູ່ ແລະ​ເປັນ​ທຶນ­ຮອນ​ໃນ​ການ​ປະ­ກອບ​ກິດ­ຈະ­ການ​ຂອງ​ເຂົາ­ເຈົ້າ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.