ສະ­ຫວັນຢູ​ໄນ​ເຕັດ​ຄວ້າ​ລາ­ງວັນ​ຄູ​ຝຶກ​ດີ­ເດັ່ນລາວ​ພຣີ​ເມຍ​ລີກ 2016

ທ່ານ ເອ­ກະ​ພົບ ໂພ­ທິ​ໄສ ຫົວ­ໜ້າ​ຄູ​ຝຶກ​ຂອງ​ສະ­ໂມ­ສອນ ສະ­ຫວັນ ຢູ​ໄນ​ເຕັດ ຄວ້າ​ລາ­ງວັນ​ຄູ​ຝຶກ​ດີ­ເດັ່ນ​ປະ­ຈຳ­ການ​ແຂ່ງ­ຂັນ​ບານ­ເຕະ ລາວ​ພຣີ​ເມຍ​ລີກ 2016 ຫຼັງ​ຈາກ​ທີ່​ພາ ສະ­ຫວັນ ຢູ​ໄນ​ເຕັດ ສ້າງ​ຜົນ­ງານ​ຢ່າງ​ໂດດ​ເດັ່ນ​ດ້ວຍ​ການ​ຈົບ​ອັນ​ດັບ​ທີ 7 ໃນ​ການ​ແຂ່ງ­ຂັນ​ບານ­ເຕະ ລາວ​ພຣີ​ເມຍ​ລີກ 2016 ແລະ ໄດ້​ຮັບ​ການ​ໂຫວດ​ຄະ­ແນນ​ຫຼາຍ​ທີ່​ສຸດ.

ເມື່ອ​ວັນ​ທີ 29 ມີ­ນາ ທີ່​ຜ່ານ​ມາ ທີ່​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ ( ສຕລ ) ໄດ້​ມີ​ພິ­ທີ​ມອບ​ໃບ­ຢັ້ງ­ຢືນ​ຄູ​ຝຶກ​ດີ­ເດັ່ນ​ປະ­ຈຳ­ການ​ແຂ່ງ­ຂັນ​ບານ­ເຕະ ລາວ​ພຣີ​ເມຍ​ລີກ 2016 ແລະ ໃຫ້​ກຽດ​ມອບ​ໃບ​ຍ້ອງ­ຍໍ​ໂດຍ ທ່ານ ປອ. ໄຊ​ບັນ­ດິດ ຣາ​ຊະ​ພົນ ເລ­ຂາ­ທິ­ການ​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ ແລະ ກ່າວ​ຮັບ​ໂດຍ ທ່ານ ເອ­ກະ​ພົບ ໂພ­ທິ​ໄສ ຫົວ­ໜ້າ​ຄູ​ຝຶກ​ຂອງ ສະ­ຫວັນ ຢູ​ໄນ​ເຕັດ ເຊິ່ງ​ມີ​ບັນ­ດາ​ຄະ­ນະ ສຕລ ພ້ອມ​ດ້ວຍ​ສື່​ມວນ​ຊົນ​ເຂົ້າ​ຮ່ວມ​ເປັນ​ສັກ­ຂີ​ພິ­ຍານ.

ການ​ວັດ​ຄວາມ​ສາ­ມາດ​ຂອງ​ຄູ​ຝຶກ​ດີ­ເດັ່ນ​ຂອງ ລາວ​ພຣີ​ເມຍ​ລີກ 2016 ແມ່ນ​ວັດ​ຈາກ​ຜົນ­ງານ​ທຸກ​ນັດ ໂດຍ​ສະ­ເພາະ​ນັດ​ໃຫຍ່ໆ​ທີ່​ຈະ​ເວົ້າ​ເຖິງ​ຄວາມ​ຍາກ – ງ່າຍ, ການ​ວາງ​ເກມ ແລະ ການ​ຄວບ​ຄຸມ​ນັກ​ເຕະ ໂດຍ​ສະ­ເພາະ​ການ​ໄລ່​ຈາກ​ໃບ​ເຫຼືອງ, ໃບ​ແດງ ແລະ ອື່ນໆ ໂດຍ ທ່ານ ສົມ​ສະ­ນຸກ ຕົວ​ແທນ​ຈາກ ສຕລ ໄດ້​ກ່າວ​ວ່າ: ຄະ­ນະ ສຕລ ເປັນ​ຜູ້​ໂຫວດ​ຄະ­ແນນ​ໃຫ້​ກັບ​ຫົວ­ໜ້າ​ຄູ​ຝຶກ​ທັງ 14 ສະ­ໂມ­ສອນ​ທີ່​ເຂົ້າ​ຮ່ວມ ລາວ​ພຣີ​ເມຍ​ລີກ 2016 ຈາກ​ຜົນ­ງານ, ການ​ປະ­ພຶດ ແລະ ອື່ນ​ທີ່​ສົ່ງ​ຜົນ​ຕໍ່​ທີມ ແລະ ປະ­ກົດ​ວ່າ ທ່ານ ເອ­ກະ​ພົບ ໄດ້​ຮັບ​ຄະ­ແນນ​ສຽງ​ສູງ​ສຸດ​ໃນ​ການ​ເປັນ​ຄູ​ຝຶກ​ດີ­ເດັ່ນ​ປະ­ຈຳ­ການ​ແຂ່ງ­ຂັນ​ບານ­ເຕະ​ລີກ​ສູງ​ສຸດ​ຂອງ ສປປ ລາວ 2016 ໄປ​ຄອງ.

ສຳ­ລັບ ທ່ານ ເອ­ກະ​ພົບ ໂພ­ທິ​ໄສ ເຂົ້າ​ມາ​ເປັນ​ຫົວ­ໜ້າ​ຄູ​ຝຶກ​ຂອງ ສະ­ຫວັນ ຢູ​ໄນ​ເຕັດ ເປັນ​ປີ​ທຳ​ອິດ​ລຸຍ ລາວ​ພຣີ​ເມຍ​ລີກ 2016 ສາ­ມາດ​ພາ​ທີມ​ເກັບ​ໄຊ­ຊະ­ນະ​ໄດ້ 11 ນັດ, ສະ­ເໝີ 8 ແລະ ເສຍ 7 ນັດ ຈາກ​ທັງ​ໝົດ 26 ນັດ ຢູ່​ອັນ​ດັບ​ທີ 7 ຂອງ​ຕາ­ຕະ­ລາງ​ຄະ­ແນນ​ລວມ ເຊິ່ງ​ຜົນ­ງານ​ທີ່​ໂດດ​ເດັ່ນ​ຂອງ ສະ­ຫວັນ ຢູ​ໄນ​ເຕັດ ເຄີຍ​ເປີດ​ບ້ານ​ຖະ​ຫຼົ່ມ ໄຊ​ທາ­ນີ ຊິ​ຕີ້ 8 – 0 ແລະ ເຄີຍ​ບຸກ​ສະ­ເໝີ ລ້ານ​ຊ້າງ ຢູ​ໄນ​ເຕັດ ແຊັມ​ເກົ່າ 1 – 1 ມາ​ແລ້ວ, ເຮັດ​ໃຫ້ ລາວ​ພຣີ​ເມຍ​ລີກ 2017 ສະ­ຫວັນ ຢູ​ໄນ​ເຕັດ ຖືກ​ຍົກ​ໃຫ້​ເປັນ​ອີກ​ໜຶ່ງ​ຕົວ​ເຕັງ ແລະ ເປັນ​ຄູ່​ແຂ່ງ​ຂອງ ລາວ​ໂຕ​ໂຢ​ຕ້າ ຫຼັງ​ຈາກ​ທີ່ ລ້ານ​ຊ້າງ ແຊັມ​ເກົ່າ​ຖອນ​ຕົວ.

ຂ່າວ: ເສດຖະກິດ-ການຄ້າ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.