ສະ­ເໝີ​ລັດ­ຖະ­ບານ​ເພີ່ມ​ທຶນ​ພັດ­ທະ­ນາການ­ທ່ອງ­ທ່ຽວ​ຫຼາຍ​ຂຶ້ນ​ກວ່າ​ເກົ່າ

ທ່ອງ​ທ່ຽວ​ແມ່ນ​ຂະ­ແໜງ­ການ​ສຳ­ຄັນ​ໜຶ່ງ​ທີ່​ສາ­ມາດ​ຂັບ​ເຄື່ອນ​ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດແຫ່ງ​ຊາດ ​ດ້ວຍ​ການ​ສ້າງ​ລາຍ​ຮັບ​ໃຫ້​ກັບ​ປະ­ຊາ­ຊົນ ກໍ​ຄື​ສ້າງ​ລາຍ​ຮັບ​ປະ­ກອບ­ສ່ວນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ປະ­ເທດ ຊຶ່ງ​ຂະ­ນະ​ນີ້​ທົ່ວ​ປະ­ເທດ​ມີ​ແຫຼ່ງ​ທ່ອງ​ທ່ຽວ​ແລ້ວ​ທັງ​ໝົດ 2 ພັນ​ກວ່າ​ແຫ່ງ ໃນ​ນັ້ນ ຫຼາຍກວ່າ​ໝູ່​ແມ່ນ​ເປັນ​ແຫຼ່ງ​ທ່ອງ​ທ່ຽວ​ທຳ​ມະ​ຊາດ ຂະ­ນະ​ທີ່​ໃນ​ກອງ​ປະ­ຊຸມ​ສະ­ພາ ສສຊ ສະ­ເໜີ​ໃຫ້​ລັດ­ຖະ­ບານ ຈົ່ງ​ເພີ່ມ​ທຶນ​ພັດ­ທະ­ນາ​ຂະ­ແໜງ­ການ​ນີ້​ໃຫ້​ຫຼາຍ​ຂຶ້ນ​ກວ່າ​ເກົ່າ.

ທ່ານ ຄຳ​ໄຕ ແກ້ວ​ດວງ​ດີ ສະ­ມາ­ຊິກ​ສະ­ພາ​ແຫ່ງ​ຊາດເຂດ​ເລືອກ​ຕັ້ງ​ທີ 15 ແຂວງ​ຈຳ­ປາ​ສັກ ໄດ້​ປະ­ກອບ​ຄຳ​ຄິດ​ເຫັນ ແລະ​ສະ­ເໜີ​ຕໍ່​ກອງ​ປະ­ຊຸມ​ເທື່ອ​ທີ 3 ຂອງ ສະ­ພາ​ແຫ່ງ​ຊາດ​ຊຸດ​ທີ VIII ເມື່ອ​ວັນ​ທີ 25 ເມ­ສາ​ຜ່ານ​ມາ​ວ່າ: ວຽກ​ງານ​ການທ່ອງ​ທ່ຽວ​ເປັນ​ຂະ­ແໜງ­ການ​ສຳ­ຄັນ​ເປັນອຸດ­ສາ­ຫະ­ກຳ​ທີ່​ບໍ່​ມີ​ຄວັນ ບໍ່​ມີ​ວັນ​ບົກ​ແຫ້ງ ແລະ​ເປັນ​ອົງ​ປະ­ກອບ​ທີ່​ສຳ­ຄັນ​ຂອງ​ການ ພັດ­ທະ­ນາ​ປະ­ເທດ​ຊາດ​ໃຫ້​ມີ​ຄວາມ​ຍືນຍົງ ທັງ​ຕິດ​ພັນ​ກັບ​ການ​ອະ­ນຸ​ຮັກ​ພັດ​ທະນາ​ສົ່ງ­ເສີມ​ວັດ­ທະ­ນະ­ທຳ ແລະ​ຮີດ­ຄອງປະ­ເພ­ນີ​ອັນ​ດີ­ງາມ​ຂອງ​ຊາດ.

ໃນ​ກອງ​ປະ­ຊຸມ​ໃຫຍ່​ຄັ້ງ​ທີ X ຂອງພັກ​ໄດ້​ກຳ­ນົດ​ວ່າ ຊຸກ­ຍູ້​ສົ່ງ­ເສີມ​ຂະ­ແໜງບໍ­ລິ­ການ​ທີ່​ເປັນ​ທ່າ­ແຮງ​ສ້າງ​ລາຍ​ຮັບ​ໃຫ້ປະ­ເທດ​ຊາດດັດ​ປັບ​ໂຄງ​ສ້າງ​ຂອງ​ຂະແໜງ​ບໍ­ລິ­ການ​ໄປ​ຕາມ​ທິດ​ຊຸກ­ຍູ້​ສົ່ງ­ເສີມພັດ­ທະ­ນາ​ຂະ­ແໜງ​ການ­ທ່ອງ­ທ່ຽວ​ໃຫ້ກາຍ­ເປັນ​ອຸດ­ສາ­ຫະ­ກຳ​ຄົບ​ຊຸດ​ດ້ວຍ​ການສົ່ງ­ເສີມ​ພັດ­ທະ­ນາ​ວຽກ​ງານ​ການ​ທ່ອງທ່ຽວ​ທາງ​ວັດ­ທະ­ນະ­ທຳ ທຳ​ມະ​ຊາດ ແລະ​ປະ­ຫວັດ­ສາດ.

ຂະ­ນະ​ທີ່​ໃນ​ໄລ­ຍະ​ຜ່ານ​ມາ​ພັກ-ລັດ ແລະ​ພາກ­ສ່ວນ​ທີ່​ກ່ຽວ­ຂ້ອງ​ໄດ້​ມີ​ຄວາມພະ­ຍາ­ຍາມ ພ້ອມ​ສຸມ​ທຶນ­ຮອນ​ເຂົ້າ​ໃນການ​ພັດ­ທະ­ນາ​ວຽກ​ງານ​ນີ້​ຫຼາຍ​ສົມ ຄວນ ແຕ່​ວຽກ​ງານ​ດັ່ງ­ກ່າວ​ຍັງ​ບໍ່​ມີ​ການ ຂະ­ຫຍາຍ­ຕົວ​ເທົ່າ​ທີ່​ຄວນ​ຖ້າ​ທຽບ­ໃສ່​ທ່າແຮງ​ບົ່ມ​ຊ້ອນ​ທີ່​ມີ​ໃນ​ທົ່ວ​ປະ­ເທດ ພາກລັດ ອົງ­ການ​ປົກ­ຄອງ​ທ້ອງ​ຖີ່ນ​ຍັງ​ບໍ່​ໄດ້ເອົາ­ໃຈ­ໃສ່​ຕໍ່​ວຽກ​ງານ​ນີ້​ເທົ່າ​ທີ່​ຄວນ​ຖ້າທຽບ​ກັບ​ປະ­ເທດ​ເພື່ອນ​ບ້ານ.

ແນວ­ໃດ​ກໍ​ດີ ເພື່ອ​ເຮັດ​ໃຫ້​ວຽກ​ງານການ­ທ່ອງ­ທ່ຽວ​ໄດ້​ຮັບ​ການ​ພັດ­ທະ­ນາ​ດີ​ຂຶ້ນ ແລະ​ສາ­ມາດ​ສ້າງ​ລາຍ​ຮັບ​ຢ່າງ​ມີ​ປະ​ສິດ­ທິ​ຜົນ​ຕາມ​ທ່າ­ແຮງ​ບົ່ມ​ຊ້ອນ​ທີ່​ມີ ທ່ານ ຄຳ​ໄຕ ແກ້ວ​ດວງ​ດີ ໄດ້​ສະ­ເໜີໃຫ້​ພາກ­ສ່ວນ​ລັດ​ຈົ່ງ​ໄດ້​ສ້າງ​ພື້ນ­ຖານໂຄງ​ລ່າງ​ຈຸດ​ທ່ອງ​ທ່ຽວ​ທຳ​ມະ​ຊາດ ໂດຍ​ມີ​ການ​ສຳ​ຫຼວດ​ແບບ­ແຜນ​ທີ່​ຈັດສັນ​ເຕັກ­ນິກ​ຖືກ​ລັກ­ສະ­ນະ​ຊາດ ແລະ​ຈັດຕັ້ງ​ແບບ​ມີ​ຈຸດ​ສຸມ​ການ​ຈັດ​ເກັບ​ຄ່າ​ທຳນຽມ​ການ​ບໍ­ລິ­ການ​ຕ້ອງ​ເປັນ​ເອ­ກະ​ພາບຜູ້​ໃຫ້​ບໍ­ລິ­ການ​ຕ້ອງ​ມີ​ຈັນ​ຍາ​ບັນ ແລະ​ຈິງ​ໃຈ​ໃຫ້​ບໍ­ລິ­ການ​ລະ­ບົບ​ການ­ຈັດ­ຕັ້ງ​ຂອງ ລັດ​ທີ່​ຄຸ້ມ​ຄອງ​ວຽກ​ງານ​ທ່ອງ​ທ່ຽວ​ຄວນ​ເປັນ​ອົງ​ກອນ​ເອ­ກະ­ລາດ.

ພ້ອມ​ກັນ​ນັ້ນ​ກໍ​ຈົ່ງ​ເພີ່ມ​ທຶນ­ຮອນເຂົ້າ​ໃນ​ການ​ປົກ​ປັກ​ຮັກ­ສາ ແລະ​ພັດ​ທະນາ​ວຽກ​ງານ​ການ­ທ່ອງ­ທ່ຽວ​ໃຫ້​ເປັນ​ບຸລິ​ມະ​ສິດ​ໜຶ່ງ​ຂອງ​ຊາດ ທັງ​ນີ້​ ກໍ​ເພື່ອ​ເຮັດໃຫ້​ວຽກ​ງານ​ນີ້​ມີ​ການ​ພັດ­ທະ­ນາ​ດີ​ຂຶ້ນ ສາ­ມາດ​ດຶງ​ດູດ​ເງິນ​ເຂົ້າ​ມາ​ພັດ­ທະ­ນາ​ປະເທດ​ຊາດ​ໃຫ້​ນັບ​ມື້​ນັບ​ຫຼາຍ​ຂຶ້ນ​ກາຍ­ເປັນພື້ນ­ຖານ​ລາຍ​ຮັບ​ອັນ​ໜັກ​ແໜ້ນ ພ້ອມທັງ​ສ້າງ​ວຽກ​ເຮັດ​ງານ​ທຳ ແລະ​ສ້າງລາຍ​ຮັບ​ປະ­ຊາ­ຊົນ​ຈາກ​ການ​ມີ​ສ່ວນຮ່ວມ​ໃນ​ການ​ບໍ­ລິ­ການ, ຜະ­ລິດ​ຕະ​ພັນກະ­ສິ­ກຳ​ຫັດ­ຖະ­ກຳ ຊຶ່ງ​ສາ­ມາດ​ສ້າງລາຍ​ຮັບ​ໄດ້​ກັບ​ທີ່.

ຕາມ​ຂໍ້​ມູນ​ປີ 2016 ແຫຼ່ງ​ທ່ອງ​ທ່ຽວທົ່ວ​ປະ­ເທດ​ມີ​ທັງ​ໝົດ 2.014 ແຫ່ງ ໃນ​ນີ້​ແຫຼ່ງ​ທ່ອງ​ທ່ຽວ​ທຳ​ມະ​ຊາດ 1.194 ແຫ່ງ, ວັດ­ທະ­ນະ­ທຳ 628 ແຫ່ງ ປະ­ຫວັດສາດ 282 ແຫ່ງ ແລະ​ມໍ­ລະ­ດົກ​ໂລກ 2 ແຫ່ງ​ໄດ້​ຈັດ​ສັນ​ແລ້ວ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.