ສະຫວັນນະເຂດ ກຽມຮັບມືພະຍາດໄຂ້ຍຸງລາຍ

ແຂວງສະຫວັນນະເຂດກຽມພ້ອມທຸກເງື່ອນໄຂເພື່ອປ້ອງກັນ ແລະຕ້ານການລະບາດຂອງພະຍາດໄຂ້ຍຸງລາຍທີ່ອາດເກີດຂຶ້ນຫຼາຍໃນລະດູຝົນ, ຂະນະທີ່ລາຍງານຫຼ້າສຸດທົ່ວແຂວງພົບແລ້ວ 16 ກໍລະນີ.

ໃນອາທິດຜ່ານມານີ້, ແຂວງສະຫວັນນະເຂດໄດ້ຈັດກອງປະຊຸມສະຫລຸບຖອດຖອນບົດຮຽນກ່ຽວກັບວຽກງານການຄວບຄຸມໄຂ້ຍຸງລາຍ ປີ 2016 ແລະປຶກສາຫາລືແນວທາງຕ້ານການລະບາດໃນປີ 2017 ທີ່ສະໂມສອນຫ້ອງວ່າການປົກຄອງແຂວງ ໂດຍການເຂົ້າຮ່ວມເປັນປະທານຂອງທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດຈາກນີ້ກໍ່ມີທ່ານ ບົງສຸວັນ ພັນທະວົງສາ ຫົວໜ້າພະແນກສາທາລະນະສຸກແຂວງ,ມີຜູ້ຕາງໜ້າຈາກເມືອງຕ່າງໆເຂົ້າຮ່ວມ

ທ່ານ ຄຳພູນ ຕຸໄພທູນ ມີຄຳເຫັນຕໍ່ກອງປະຊຸມວ່າ: ປີນີ້ການນຳຂອງແຂວງກໍ່ຄືພາກສ່ວນທີ່ກ່ຽວຂ້ອງ ແລະອຳນາດການປົກຄອງທ້ອງຖິ່ນຕ່າງໆກໍ່ໄດ້ເອົາໃຈໃສ່ປ້ອງກັນ, ສະກັດກັ້ນ ແລະຄວບຄຸມພະຍາດໄຂ້ຍຸງລາຍ ໂດຍເລີ່ມຈາກຫົວທີສິ່ງສຳຄັນແມ່ນຈຳກັດແຫຼ່ງເພາະພັນຂອງຍຸງລາຍຕາມບໍລິເວນເຮືອນ, ຫ້າງຮ້ານ, ສະຖາບັນການສຶກ ແລະສຳນັກງານໃຫ້ເປັນປະຈຳຮັບປະກັນບໍ່ໃຫ້ມີແຫຼ່ງເພາະພັນຍຸງລາຍຕະຫຼອດຊ່ວງລະດູຝົນນີ້, ພ້ອມນີ້ກໍ່ໃຫ້ພ້ອມກັນສ້າງຂະບວນການກຳຈັດແຫຼ່ງເພາະພັນຍຸງລາຍເປັນປະຈຳໃນທຸກໆວັນເສົາຕະຫຼອດປີ 2017, ສ້າງຂະບວນການເຮັດອະນາໄມ ແລະກຳຈັດແຫຼ່ງເພາະພັນຂອງຍຸງລາຍຕ້ອງເລັ່ງໃສ່ການອະນາໄມພາຊະ ນະທີ່ສາມາດເປັນບ່ອນເພາະພັນຍຸງລາຍ ເຊັ່ນວ່າ: ພາຊະນະທີ່ເປັນອຸ, ແອ່ງ, ຊາມ, ປະໂປະກະປ໋ອງ… ເກັບນ້ຳໃຊ້ທຸກຊະນິດ ໃນນີ້ກໍ່ຕ້ອງໄດ້ປັດກວດ ແລະຈຳກັດໜອນນ້ຳຍຸງລາຍໃນທຸກໆຄັ້ງທີ່ພົບເຫັນທຸກໆພາຊະນະ ແລະສິ່ງເສດເຫຼືອຕ່າງໆ ທີ່ສາມາດກັກຂັງນ້ຳຝົນໄດ້ຕາມບໍລິເວນເດີ່ນບ້ານຕ້ອງໄດ້ທຳລາຍຖິ້ມ ຫຼື ບໍ່ກໍເກັບມ້ຽນໃຫ້ດີໂດຍບໍ່ໃຫ້ຖືກນ້ຳຝົນໃນເວລາທີ່ຝົນຕົກ.

ທ່ານ ຕຽງຄຳ ປ້ອງວົງສາ ຫົວໜ້າສະຖານີໄຂ້ຍຸງ, ແມ່ກາຝາກ ແລະແມງໄມ້ກ່າວວ່າ: ໃນປີ 2016 ທີ່ຜ່ານມາ, ສະພາບການຄວບຄຸມພະຍາດໄຂ້ຍຸງລາຍ ແມ່ນເຮັດໄດ້ດີພໍສົມຄວນ ທັງນີ້ ກໍ່ຍ້ອນວ່າອຳນາດການປົກຄອງທຸກຂັ້ນໄດ້ໃຫ້ ການສະໜັບສະໜູນຊ່ວຍເຫຼືອເປັນຢ່າງ ດີ, ສຳຄັນແມ່ນໄດ້ມີການຊ່ວຍເຫຼືອດ້ານ ເຄມີ,ອຸປະກອນຂ້າຍຸງ, ສ່ວນທາງພາກສ່ວນກ່ຽວຂ້ອງກໍ່ໄດ້ກະກຽມທາງດ້ານກຳລັງຄົນ, ງົບປະມານ, ສະຖານທີ່ປິນປົວ, ອຸປະກອນຮັບໃຊ້ພຽງພໍ, ມີການເຝົ້າລະວັງ ແລະຕອບໂຕ້ທີ່ດີ, ມີການປິ່ນປົວທີ່ເອົາໃຈໃສ່ ແລະບໍ່ມີກໍລະນີເສຍຊີວິດ ຊຶ່ງມີ 180 ບ້ານທີ່ມີຜົນກະທົບຈາກໄຂ້ເລືອດອອກໃນປີ 2016, ລວມມີ 662 ຄົນເຈັບທີ່ເປັນພະຍາດໄຂ້ເລືອດອອກ ໃນນີ້ 80 ຄົນແມ່ນໄຂ້ມີອາການເຕືອນ, ມີ 3 ຄົນແມ່ນໄຂ້ມີເລືອດອອກຮຸນແຮງ ແລະມີ 579 ຄົນ ແມ່ນເປັນໄຂ້ບໍ່ມີອາການເຕືອນ

ສຳລັບໃນປີ 2017 ເລີ່ມແຕ່ເດືອນມັງກອນ ເປັນຕົ້ນມາແຂວງສະຫວັນນະ ເຂດມີການລາຍງານກໍລະນີໄຂ້ຍຸງລາຍ ຈຳນວນ 16 ກໍລະນີ ໃນ 6 ເມືອງໃນນີ້ ເມືອງໄກສອນ ພົມວິຫານ ພົບ 3 ກໍລະນີ, ອຸທຸມພອນ 4 ກໍລະນີ, ພະລານໄຊ ຊົນນະບູລີເມືອງລະ 3 ກໍລະນີ, ອາດສະພັງທອງ 2 ກໍລະນີ ແລະເມືອງໄຊບູລີ 1 ກໍ ລະນີ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.