ສະຫວັນນະເຂດ ປະຕິບັດໂຄງການພັດທະນາຊົນນະບົດແບບໃໝ່

ວັນທີ 13 ມີນາຜ່ານມານີ້, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມດ້ວຍຫົວໜ້າພະແນກ ກະສິກຳ-ປ່າໄມ້ແຂວງ ແລະຄະນະວິຊາການທີ່ກ່ຽວຂ້ອງຂັ້ນຕ່າງໆໄດ້ລົງຕິດຕາມ ແລະຢ້ຽມຢາມເບິ່ງການຈັດຕັ້ງປະຕິບັດໂຄງການພັດທະນາຊົນນະບົດແບບໃໝ່ (ໂຄງການແຊມາອຸດົງ) ທີ່ເມືອງຈຳພອນ ແລະສອງຄອນ ໂດຍໄດ້ຮັບການຕ້ອນຮັບຢ່າງອົບອຸ່ນຈາກການນຳຂອງເມືອງ ພ້ອມດ້ວຍອຳນາດການປົກຄອງ ແລະພໍ່ແມ່ປະຊາຊົນຂອງສອງເມືອງດັ່ງກ່າວ.

ໂອກາດນີ້ ທ່ານ ສັນຕິພາບ ພົມວິຫານ ກໍໄດ້ລົງເບິ່ງການຈັດຕັ້ງປະຕິບັດກິດຈະກຳຕ່າງໆຂອງໂຄງການແຊມາອຸ ດົງ ຊຶ່ງເປັນໂຄງການທີ່ໄດ້ຮັບການສະໜັບສະໜູນຈາກລັດຖະບານເກົາຫຼີ ໂດຍຜ່ານອົງການຮ່ວມມືສາກົນເກົາຫຼີ (KOICA) ໂດຍຈັດຕັ້ງຢູ່ໃນ 2 ເມືອງເປົ້າໝາຍຄື: ເມືອງສອງຄອນ ແລະຈຳພອນ, ປະກອບມີ 13 ບ້ານ (ເມືອງຈຳພອນ 5 ບ້ານ ແລະສອງຄອນ 8 ບ້ານ), ລວມມີງົບປະມານໃນການຈັດຕັ້ງໂຄງການແມ່ນ 3,9 ລ້ານໂດລາສະຫະລັດ, ຊຶ່ງລວມມີສອງກິດຈະກຳໃຫຍ່ໆຄື: ກິດຈະກຳການພັດທະນາກິດຈະກຳສ້າງລາຍຮັບຂອງປະຊາຊົນຂອງຄອບຄົວເປັນຕົ້ນ: ປູກຫຍ້າລ້ຽງສັດ, ປູກເຫັດ, ປູກໄມ້ໃຫ້ໝາກ, ປູກພືດຜັກໃນເຮືອນຮົ່ມ, ປູກພືດໃນຄົວເຮືອນ ແລະອື່ນໆ ຈາກນີ້ກໍ່ຍັງມີກິດຈະກຳການສ້າງພື້ນຖານໂຄງລ່າງຂອງຊຸມຊົນ ຊຶ່ງປະກອບມີ: ການກໍ່ສ້າງຫ້ອງການບ້ານ, ກໍ່ສ້າງເສັ້ນທາງພາຍໃນບ້ານ, ຫ້ອງການປະຊຸມຂັ້ນບ້ານ, ກໍ່ສ້າງ ແລະປັບປຸງໂຮງຮຽນ, ກໍ່ສ້າງບ່ອນຄັດແຍກ ຂີ້ເຫຍື້ອ, ຕະຫຼາດຂອງບ້ານ, ສະໜັບສະໜູນການເຂົ້ານ້ຳປະປາ ແລະກິດຈະກຳອື່ນໆ ໂດຍອີງຕາມຄວາມຮຽກຮ້ອງ ຕ້ອງການຂອງບ້ານນັ້ນໆ ອັນສຳຄັນໃນແຕ່ລະກິດຈະກຳຂອງໂຄງການຕ້ອງໄດ້ມີການປະກອບສ່ວນຂອງຊຸມຊົນ.

ຈາກການຈັດ ຕັ້ງເຄື່ອນໄຫວຜ່ານມາເຫັນໄດ້ວ່າໂຄງການແມ່ນມີຄວາມຄືບໜ້າຫຼາຍສົມຄວນ ໂດຍປະຊາຊົນໃນ ບ້ານເປົ້າໝາຍໂຄງການກໍ່ໄດ້ມີຄວາມຕື່ນຕົວປະກອບສ່ວນ ແລະເຂົ້າຮ່ວມໃນໂຄງການເປັນຢ່າງດີ ໃນນີ້ ໄດ້ກໍ່ສ້າງ ຫ້ອງການບ້ານໄດ້ 13 ບ້ານ (ໂຄງການ 70%, ປະຊາຊົນ 30%), ສ້າງເສັ້ນທາງພາຍໃນບ້ານໄດ້ 12 ບ້ານ (ໂຄງການ 70%, ປະຊາຊົນ 30%), ສະໜັບສະໜູນການເຂົ້ານ້ຳປະປາແກ່ປະຊາຊົນໄດ້ແລ້ວກວ່າ 400 ຄອບຄົວ (ໂຄງການ 50%, ປະຊາຊົນ 50%) ແລະກິດຈະກຳອື່ນໆອີກ ຊຶ່ງໃນປີ 2017 ນີ້, ທາງໂຄງການແຊມາອຸດົງກໍ່ຍັງຈະສືບຕໍ່ຈັັດຕັ້ງໂຄງການໃນຫຼາຍໆກິດຈະກຳ ຊຶ່ງລ້ວນແລ້ວແຕ່ເປັນການສົ່ງເສີມການພັດທະນາຊຸມຊົນ ແລະຊຸກຍູ້ລາຍຮັບຂອງປະຊາຊົນ ແນໃສ່ເພື່ອໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວຕາມແນວທາງນະໂຍບາຍຂອງພັກ ແລະລັດຖະບານ.

ໂອກາດດັ່ງກ່າວ ຄະນະຂອງທ່ານເຈົ້າແຂວງກໍ່ຍັງໄດ້ລົງຢ້ຽມຢາມເບິ່ງໂຄງການອ່າງເກັບນ້ຳຫ້ວຍບົງບ້ານເຫຼົ່າສຸລິຍະຂອງເມືອງຈຳພອນນຳອີກ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.