ສະ­ຫະ­ລັດ​ຊ່ວຍ​ລາວ​ສ້າງ​ຄວາມ​ເຂັ້ມ­ແຂງ​ລະ­ບົບ​ວິ­ເຄາະ​ການ​ແພດ

ສູນ​ວິ­ເຄາະ ແລະ​ລະ­ບາດ​ວິ­ທະ­ຍາ (ສວ­ລ) ກະ­ຊວງ​ສາ­ທາ­ລະ­ນະ​ສຸກ ໂດຍ​ການ​ສະ­ໜັບ­ສະ­ໜູນ​ຈາກ​ລັດ­ຖະ­ບານ​ສະ­ຫະ­ລັດ​ໄດ້​ເປີດ​ກອງ​ປະ­ຊຸມ​ເປີດ​ໂຄງ­ການ​ໃໝ່: ສ້າງ​ຄວາມ​ເຂັ້ມ­ແຂງ​ລະ­ບົບ​ວິ­ເຄາະ​ການ​ແພດ ແລະ​ລະ­ບາດ​ວິ­ທະ­ຍາ​ໃນ​ລາວ​ທີ່​ໂຮງ­ແຮມ​ລາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ໃນ ວັນ​ທີ 21 ມີ­ນາ 2017 ຜ່ານ​ມາ ເຂົ້າ​ຮ່ວມ​ເປັນ​ປະ­ທານ​ພິ­ທີ​ມີ​ທ່ານ ບຸນ​ຫຼາຍ ພົມ​ມະ​ສັກ ຫົວ­ໜ້າ​ກົມ​ຄວບ​ຄຸມ­ພະ​ຍາດ​ຕິດ­ຕໍ່, ກະ­ຊວງ​ສາ­ທາ­ລະ­ນະ​ສຸກ, ທ່ານ ໄມ​ເຄິນ ຄລາຍ ຮອງ​ເອກ​ອັກ​ຄະ​ລັດ​ຖະ​ທູດ​ສະ­ຫະ­ລັດ​ອາ­ເມ­ລິ­ກາ​ປະ­ຈຳ ສປປ ລາວ, ທ່ານ Dr. Luo Dapeng ຫົວ­ໜ້າ​ຝ່າຍ​ເຝົ້າ​ລະ­ວັງ ແລະ​ໂຕ້​ຕອບ​ຕໍ່​ການ​ລະ­ບາດ​ຂອງ​ພະ­ຍາດ, ອົງ­ການ​ອະ­ນາ­ໄມ​ໂລກ​ປະ­ຈຳ​ລາວ.

ໂຄງ­ການ​ນີ້​ຈະ​ສ້າງ​ຄວາມ​ເຂັ້ມ­ແຂງ​ລະ­ບົບ​ຫ້ອງ​ວິ­ເຄາະ​ການ​ແພດ​ແຫ່ງ​ຊາດ​ໃນ​ລາວ ໂດຍ​ການ​ສະ­ໜັບ­ສະ­ໜູນ​ງົບ­ປະ­ມານ 3 ລ້ານ​ໂດ​ລາ​ສະ­ຫະ­ລັດ​ຈາກ​ລັດ­ຖະ­ບານ​ສະ­ຫະ­ລັດ​ໃນ​ລະ­ຍະ​ເວ­ລາ​ສາມ​ປີ, ແຕ່ 2017 ຫາ 2020  ໂດຍ​ອົງ­ການ​ອະ­ນາ­ໄມ​ໂລກ (WHO)ຈະ​ເປັນ​ຜູ້​ຈັດ​ຕັ້ງ​ປະ­ຕິ­ບັດ ຊຶ່ງ​ຈະ​ປະ­ສານ​ງານ​ໃນ​ການ​ຄຸ້ມ​ຄອງ ແລະ​ຊ່ວຍ­ເຫຼືອ​ດ້ານ​ວິ­ຊາ​ການ​ແກ່​ສູນ​ວິ­ເຄາະ ແລະ​ລະ­ບາດ​ວິ​ທະ ຍາ​ໃນ​ການ​ສ້າງ​ຄວາມ​ເຂັ້ມ­ແຂງ​ຄວາມ ອາດ​ສາ­ມາດ​ແຫ່ງ​ຊາດ​ຂອງ​ລະ­ບົບ​ຫ້ອງ​ວິ­ເຄາະ ແລະ​ການ​ບົງ​ມະ­ຕິ ເຊັ່ນ ການ​ຄຸ້ມ​ຄອງ​ຄຸນ​ນະ​ພາບ, ຄວາມ​ປອດ​ໄພ ແລະ​ຄວາມ​ໝັ້ນ­ຄົງ​ດ້ານ​ຊີ­ວະ​ພາບ​ໃນ​ຫ້ອງ​ວິ­ເຄາະ, ເຮັດ​ວຽກ​ຮ່ວມ​ກັບ​ຫ້ອງ​ວິ­ເຄາະ​ເຄືອ​ຂ່າຍ​ຂອງ​ສູນ​ກາງ ແລະ ແຂວງ.

ພ້ອມ​ດຽວ​ກັນ​ນີ້ ຍັງ​ຊ່ວຍ​ສະ­ໜັບ­ສະ­ໜູນ​ການ​ຝຶກ​ອົບ­ຮົມ​ລະ­ບາດ​ວິ­ທະ­ຍາ​ພາກ​ສະ­ໜາມ (FET) ໃນ​ການ​ສ້າງ​ຄວາມ​ອາດ​ສາ­ມາດ​ລະ­ດັບ​ຊາດ ແລະ​ທ້ອງ­ຖິ່ນ​ໃນ​ການ​ຕອບ​ໂຕ້​ຕໍ່​ໄພ​ຂົ່ມ­ຂູ່​ຂອງ​ພະ­ຍາດ​ຕິດ­ຕໍ່, ລວມ​ທັງ​ພະ­ຍາດ​ໄຂ້​ຫວັດ​ສັດ​ປີກ ແລະ​ການ​ລະ­ບາດ​ໃຫຍ່.

ໂຄງ­ການ​ນີ້ ຈະ​ສະ­ໜັບ­ສະ­ໜູນ​ລາວ​ໃນ​ການ​ປະ­ຕິ­ບັດ​ຕາມ​ກົດ​ລະ­ບຽບ​ສາ­ກົນ​ດ້ານ​ສາ­ທາ­ລະ­ນະ​ສຸກ ໂດຍ​ຜ່ານ​ແຜນ​ຄວາມ​ໝັ້ນ­ຄົງ​ດ້ານ​ສາ­ທາ­ລະ­ນະ​ສຸກ​ຂອງ​ໂລກ.

ຂ່າວ: ເສດ­ຖະ­ກິດ-ສັງ­ຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.