ສາຍໃຕ້ຮັບປະກັນລົດພຽງພໍ ແລະ ບໍ່ຂຶ້ນລາຄາໄລຍະປີໃໝ່

ສະຖານີລົດຂົນສົ່ງສາຍໃຕ້ນະຄອນຫຼວງວຽງຈັນ ຢືນຢັນໃນໄລຍະປີໃໝ່ລາວ ບໍ່ມີການຂຶ້ນຄ່າປີ້ໂດຍສານພ້ອມທັງເພີ່ມຈຳນວນລົດທັງໃຫ້ແຕ່ລະບໍລິສັດກວດກາສະພາບເຕັກນິກຂອງລົດ, ສຸຂະພາບຂອງຄົນຂັບລົດເພື່ອຮອງຮັບການເດີນທາງຂອງຜູ້ໂດຍສານທີ່ມີຈຸດປະສົງເດີນທາງໄປພາກກາງ ແລະພາກໃຕ້ໃຫ້ມີຄວາມປອດໄພ ແລະບໍ່ໃຫ້ມີການຕົກຄ້າງຢູ່ສະຖານີເດັດຂາດ.

ທ່ານ ວັນເພັນ ສີສຸກ ອຳນວຍການສະຖານີລົດຂົນສົ່ງໂດຍສານສາຍໃຕ້ໃຫ້ສຳພາດໃນວັນທີ 7 ເມສາຜ່ານມາວ່າ: ໃນໂອກາດບຸນປີໃໝ່ລາວທີ່ຈະມາເຖິງນີ້ ທາງສະຖານີພວກເຮົາໄດ້ມີການກະ ກຽມລົດໂດຍສານໄວ້ຮອງຮັບຜູ້ໂດຍ ສານເປັນຈຳນວນຫຼາຍ ຊຶ່ງໃນວັນທຳມະດາມີລົດແລ່ນປະມານ 50 ຄັນຕໍ່ມື້, ແຕ່ສໍາລັບໃນໄລຍະບຸນປີໃໝ່ລາວ ພສ 2560 ທີ່ພັກຍາວນັບແຕ່ວັນທີ 13-17 ເມສາ 2017 ນີ້ທາງສະຖານີໄດ້ເພີ່ມຈຳ ນວນລົດອີກ 30 ກວ່າຄັນຕໍ່ມື້, ທັງນີ້ ກໍ່ເພື່ອຕອບສະໜອງໃຫ້ຜູ້ໂດຍສານທີ່ມີຈຸດປະສົງເດີນທາງໄປຢ້ຽມຢາມເຮືອນຊານບ້ານຊ່ອງ ແລະ ຍາດຕິພີ່ນ້ອງທີ່ຢູ່ທາງພາກກາງ ແລະ ພາກໃຕ້ໃຫ້ພຽງພໍກັບຄວາມຮຽກຮ້ອງຕ້ອງການ, ພ້ອມທັງຮັບປະກັນບໍ່ມີການ ຂຶ້ນລາຄາປີ້ໂດຍສານຢ່າງແນ່ນອນ.ຄຽງຄູ່ກັນນີ້ ທາງສະຖານີພວກເຮົາ ຍັງໄດ້ຮ່ວມກັບກະຊວງໂຍທາ ແລະ ຂົນສົ່ງແຈ້ງການໃຫ້ແຕ່ລະບໍລິສັດທີ່ເຂົ້າຮ່ວມແລ່ນລົດຂົນສົ່ງສາຍໃຕ້ ຊຶ່ງມີທັງໝົດ 10 ກວ່າບໍລິສັດ ພ້ອມກັນເອົາໃຈໃສ່ກວດກາເຕັກນິກສະພາບລົດຂອງຕົນໃຫ້ດີທີ່ສຸດ ເພື່ອຄວາມປອດໄພໃນການຂົນສົ່ງຜູ້ໂດຍສານໃຫ້ເຖິງຈຸດໝາຍປາຍທາງ, ພ້ອມກັນນັ້ນ ກ່ໍໃຫ້ແຕ່ລະບໍລິສັດສຶກສາອົບຮົມພະນັກງານຂັບລົດແຕ່ລະສາຍທາງຂອງຕົນໃຫ້ມີຄວາມພ້ອມໃນທຸກດ້ານເພື່ອຮັບປະກັນການຂັບຂີ່ໃຫ້ຖືກຕ້ອງຕາມລະບຽບກົດຈະລາຈອນທາງບົກທີ່ໄດ້ກຳນົດໄວ້, ທີ່ສໍາຄັນກໍເພື່ອໃຫ້ການເດີນທາງຂອງຜູ້ໂດຍສານມີ ຄວາມປອດໄພ.

ສຳລັບການປ່ອຍລົດອອກຈາກຄິວທາງສະຖານີແມ່ນຈະປ່ອຍລົດທີ່ມີຖ້ຽວປົກກະຕິອອກໄປກ່ອນ ຊຶ່ງເລີ່ມແຕ່ເວລາ 4:00 ໂມງເຊົ້າ ຫາ 21:00 ໂມງ, ແຕ່ໃນໄລຍະປີໃໝ່ແມ່ນຮອດເວລາ 22:00 ໂມງ, ເນື່ອງຈາກວ່າຜູ້ໂດຍສານ ຫຼາຍກວ່າປົກກະຕິ ແລະລົດທຸກຄັນທີ່ ໄດ້ເຂົ້າມາທຽບຄິວແມ່ນຮັບປະກັນບໍ່ ໃຫ້ມີຕັ່ງເສີມເດັດຂາດ ຍົກເວັ້ນຜູ້ໂດຍ ສານທີ່ລັດຂຶ້ນລົດຢູ່ນອກຄິວ. ກໍລະນີນີ້ ທາງສະຖານີພວກເຮົາແມ່ນບໍ່ມີການຮັບປະກັນດ້ານລາຄາທີ່ແນ່ນອນ ແລະການບໍລິການທີ່ເປັນເລີດ ໂດຍສະເພາະຕັ່ງນັ່ງແມ່ນຈະໄດ້ນັ່ງຕັ່ງເສີມເນື່ອງຈາກວ່າຜູ້ກ່ຽວໄດ້ລັດຂຶ້ນຢູ່ນອກຄິວ.

ທ່ານຜູ້ອຳນວຍການສະຖານີລົດຂົນສົ່ງໂດຍສານສາຍໃຕ້ກ່າວຕື່ມວ່າ: ເນື່ອງໃນໂອກາດປີໃໝ່ລາວ ພສ 2560 ນີ້ ຂໍຮຽກຮ້ອງເຖິງຜູ້ທີ່ມີຈຸດປະສົງຈະເດີນທາງໄປພາກກາງ ແລະພາກໃຕ້ຂອງລາວໃຫ້ມາຂຶ້ນລົດ ຫຼື ຈັບຈອງປີ້ສາຍທາງຢູ່ທີ່ສະຖານີ ແລະໃຫ້ກະກຽມເຄື່ອງຂອງຕ່າງໆຂອງຕົນໃຫ້ຄົບຖ້ວນຂຶ້ນລົດໃຫ້ຖືກຕາມສາຍທາງ ເນື່ອງຈາກການອອກລົດແມ່ນບໍ່ມີກຳນົດເວລາຕາຍໂຕຫາກມີຜູ້ໂດຍສານເຕັມຍາມໃດກໍຈະປ່ອຍລົດອອກທັນທີ, ສ່ວນທ່ານໃດທີ່ຕ້ອງການຝາກລົດຈັກ ຫຼື ລົດໃຫຍ່ເປັນເວລາຫຼາຍວັນ ກໍສາມາດຝາກໄດ້ທາງສະຖານີພວກເຮົາມີບ່ອນຮອງຮັບໃຫ້.

ຂ່າວ: ເສດຖະກິດ-ສັງຄົມ

 

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.