ສາລະວັນ ແຂ່ງຂັນປຸງແຕ່ງອາຫານພື້ນເມືອງລາວ

ເພື່ອເປັນການສະເຫຼີມສະຫຼອງວັນແມ່ຍິງສາກົນ 8 ມີນາ ຄົບຮອບ 107 ປີ ໃຫ້ມີຄວາມຄືກຄື້ນ ທັງເປັນການອະນຸລັກຮັກສາອາຫານພື້ນບ້ານໃຫ້ໄດ້ຮັບການສົ່ງເສີມເປັນທີ່ຮູ້ຈັກກັນດີໃນສັງຄົມເມືອງສາລະວັນ ໄດ້ຈັດການແຂ່ງຂັນປຸງແຕ່ງອາຫານພື້ນເມືອງລາວຂຶ້ນ ເມື່ອອາທິດຜ່ານມາຢູ່ສວນອະນຸສອນສະຖານອົງແກ້ວ ແຂວງສາລະວັນ, ໂດຍເປັນປະທານຂອງ ທ່ານນາງ ແພງຈັນ ລັດດາວົງ ປະທານສະຫະພັນແມ່ຍິງເມືອງ, ໃຫ້ກຽດເຂົ້າຮ່ວມຂອງ ທ່ານ ນວນໃສ ແກ້ວເມກ ຮອງເຈົ້າເມືອງ ທັງເປັນຜູ້ຊີ້ນຳການຈັດງານປະກວດອາຫານພື້ນເມືອງ ພ້ອມນີ້ ກໍມີປະຊາຊົນໃນບ້ານເທສະບານ, ໂຮງຮຽນ, ນັກທຸລກິດ ແລະສະຫະພັນແມ່ຍິງ ອ້ອມຂ້າງເຂົ້າຮ່ວມຢ່າງຫຼວງຫຼາຍ.

ງານປະກວດອາຫານຄັ້ງນີ້ມີ 12 ຄະນະເຂົ້າຮ່ວມຄື: ກຸ່ມແມ່ຍິງເສດຖະກິດ, ກຸ່ມພັກພະນັກງານ, ກຸ່ມຈັດຕັ້ງມະຫາຊົນ, ກຸ່ມປົກປ້ອງກົດໝາຍ, ກຸ່ມໂຮງຮຽນອ້ອມຂ້າງເທສະບານ, ກຸ່ມນັກທຸລະກິດ, ກຸ່ມບ້ານນາເຫຼັກ, ກຸ່ມບ້ານຫຼັກສອງ, ບ້ານໂພນແກ້ວ, ບ້ານນາກົກໂພ, ບ້ານວັດກາງ ແລະກຸ່ມແມ່ຍິງເມືອງສະໝ້ວຍ ຊຶ່ງໃນແຕ່ລະກຸ່ມແມ່ນໄດ້ປຸງແຕ່ງອາຫານແຕ່ລະປະເພດຄື: ເຂົ້າປຸ້ນນ້ຳປົ່ນ, ກ້ອຍໄກ່-ຕົ້ມໄກ່, ລວກຜັກ-ແຈ່ວ, ແກະສະຫຼັກໝາກໄມ້, ຕຳໝາກຫຸ່ງ ແລະ ທອດປາ.

ອາຫານແຕ່ລະປະເພດນີ້ລ້ວນແລ້ວ ແຕ່ຖືກປຸງແຕ່ງຕາມມາດຖານເງື່ອນໄຂ ຂອງຄະນະກຳມະການກຳນົດເປັນຕົ້ນ: ຕ້ອງນຸ່ງຖືສຸພາບຮຽບຮ້ອຍເປັນລະບຽບໃນຊຸດແຕ່ງກິນ, ພາຊະນະບັນຈຸໃນການຕົກແຕ່ງສະອາດຈົບງາມ, ລົດຊາດແຊບນົວດີ, ການຕົບແຕ່ງໜ້າຕາອາຫານໃຫ້ມີສີສັນງາມດີ ແລະການແກະສະຫຼັກໝາກໄມ້ໃຫ້ລະອຽດ ແລະສວຍງາມມາດຖານເຫຼົ່ານີ້ຜູ້ເຂົ້າຮ່ວມຕ້ອງໄດ້ປະຕິບັດຕາມເງື່ອນໄຂໃຫ້ໄດ້ຮັບຜົນດີທີ່ສຸດ.

ຂະບວນການດັ່ງກ່າວໄດ້ສ້າງຄວາມມ່ວນຊື່ນ ແລະຄືກຄື້ນ ທ່າມກາງສຽງຊົມສຽງເຊຍຂອງແຕ່ລະທິມ ແລະແຂກ ທີ່ເຂົ້າຊິມລົດຊາດອາຫານ ນັບວ່າສ້າງຄວາມປະທັບໃຈໃຫ້ກັບແມ່ຄົວໃນງານແຫ່ງນີ້ກໍວ່າໄດ້ ແລະຜູ້ເຂົ້າຮ່ວມກໍ່ໄດ້ສຸມຈິດໃຈ, ສະຕິເຫື່ອແຮງເຂົ້າໃສ່ໃນປຸງແຕ່ງອາຫານໃຫ້ສຸດຄວາມສາມາດ ແລະຄວາມສາມັກຄີພາຍໃນຄະນະເພື່ອ ດຶງດູດຈິດໃຈຄະນະກຳມະການ ແລະຜູ້ເຂົ້າຮ່ວມໃຫ້ໄດ້.

ຜ່ານການປະກວດ, ການຊິມລົດຊາດອາຫານ, ອີງຕາມມາດຖານຕ່າງໆ ແລະການລວບລວມຄະແນນຂອງຄະ ນະກຳມະການຜົນປາກົດວ່າ: ກຸ່ມໂຮງຮຽນ ມສ ອ້ອມຂ້າງເມືອງສາລະວັນຍາດໄດ້ລາງວັນຊະນະເລີດດ້ວຍ 64 ຄະແນນ ແລະຮອງຊະນະເລີດໄດ້ແກ່ ບ້ານນາກົກໂພ ດ້ວຍຄະແນນ 59,5 ແລະກຸ່ມແມ່ຍິງເມືອງສະໝ້ວຍຍາດຄະ ແນນໄດ້ 59 ຄະແນນ, ສ່ວນອີກ 10 ກຸ່ມ ໄດ້ຮັບລາງວັນຊົມເຊີຍ.

ສຳລັບເງິນລາງວັນຊະນະເລີດໄດ້ຮັບຂັນ 1 ໜ່ວຍ ແລະເງິນສົດ 2 ລ້ານກີບ, ຮອງຊະນະເລີດໄດ້ຮັບເງິນສົດ 1,50 ແສນກີບ, ລາງວັນທີ 3 ໄດ້ຮັບເງິນສົດ 1 ລ້ານກີບ  ແລະລາງວັນຊົມເຊີຍຮັບເງິນສົດໄປກຸ່ມລະ 3 ແສນກີບ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.