ສຳເລັດງານສຳມະນາ CLMV ຂອງກຳມາທິການແຜນການ ການເງິນ ແລະ ກວດສອບ

ໃນລະຫວ່າງວັນທີ 12-15 ມີນາ 2017, ຄະນະຜູ້ແທນສະພາແຫ່ງຊາດລາວ ນຳໂດຍທ່ານ  ວິໄລວົງ ບຸດດາຄຳ ກຳມະການຄະນະປະຈຳສະພາແຫ່ງຊາດ, ປະທານກຳມາທິການແຜນການ, ການເງິນ ແລະການກວດສອບພ້ອມດ້ວຍຄະນະ ຊຶ່ງປະກອບມີຕາງໜ້າອົງການກວດກາລັດ, ຕາງໜ້າກະຊວງການເງິນ ແລະວິຊາການທັງສາມພາກສ່ວນຈໍານວນ 15 ທ່ານ ໄດ້ເດີນທາງໄປນະຄອນຫຼວງພະນົມເປັນແຫ່ງຣາຊະອານາຈັກກຳປູເຈຍ ເພື່ອເຂົ້າຮ່ວມກອງປະຊຸມສຳ ມະນາຮ່ວມລະຫວ່າງຄະນະກຳມາທິການເສດຖະກິດ, ການເງິນ, ທະນາຄານ ແລະການກວດສອບຂອງສະພາແຫ່ງຊາດ 4 ປະເທດ CLMV (ຣາຊະອານາຈັກ ກຳປູເຈຍ, ສປປ ລາວ, ສສ ມຽນມາ ແລະ ສສ ຫວຽດນາມ).

ກອງປະຊຸມສຳມະນາຮ່ວມລະຫວ່າງ 4 ປະເທດ CLMV ໃນຄັ້ງນີ້ແມ່ນ ໄດ້ຈັດຂຶ້ນເປັນຄັ້ງທີ 7 ພາຍໃຕ້ຫົວຂໍ້: “ປະສົບການໃນການຄຸ້ມຄອງການລົງທຶນຂອງລັດ ແລະການຕິດຕາມກວດກາ”, ຊຶ່ງໄດ້ຮັບກຽດເປີດກອງປະຊຸມ ໂດຍສົມເດັດອັກຄະມະຫາໂປເຢຍຈັກກຣີເຮັງຊຳຣິນ, ປະທານສະພາແຫ່ງຊາດແຫ່ງຣາຊະອານາຈັກກຳປູເຈຍ.

ກອງປະຊຸມໄດ້ຮັບຟັງການນຳສະເໜີບົດຮຽນ ແລະປະສົບການທີ່ໄດ້ຈັດຕັ້ງປະຕິບັດຜ່ານມາຈາກບັນດາປະເທດທີ່ເຂົ້າຮ່ວມທັງ 4 ປະເທດ ແລະໄດ້ຮ່ວມກັນປຶກສາຫາລື ເພື່ອແລກປ່ຽນບົດຮຽນກ່ຽວກັບການເສີມຂະຫຍາຍບົດບາດການຕິດຕາມກວດກາຂອງສະມາຊິກລັດຖະສະພາຕໍ່ວຽກງານ

ການບໍລິຫານການລົງທຶນຂອງລັດ; ການຄຸ້ມຄອງການບໍລິຫານງົບປະມານແຫ່ງຊາດ ແລະການລົງທຶນຂອງລັດ; ການແບ່ງປັນປະສົບການ ແລະບົດຮຽນທີ່ຖອດຖອນໄດ້ກ່ຽວກັບພາລະບົດບາດຂອງອົງການກວດສອບແຫ່ງລັດຕໍ່ກັບວຽກງານການບໍລິຫານງົບປະມານແຫ່ງລັດ.

ກອງປະຊຸມໄດ້ເຊັນບົດບັນທຶກຮ່ວມຕົກລົງເຫັນດີເພີ່ມທະວີກົນໄກການປະ ສານງານ ແລະການຮ່ວມມືໃນລະດັບ ສູນກາງ ແລະທ້ອງຖິ່ນຂອງທັງ 3 ພາກສ່ວນຄື: ສະພາແຫ່ງຊາດ, ອົງການກວດສອບແຫ່ງລັດ ແລະກະຊວງການເງິນລະຫວ່າງ 4 ປະເທດ CLMV; ແນໃສ່ການສ້າງຄວາມອາດສາມາດໃຫ້ແກ່ບຸກຄະລາກອນຂະແໜງການລັດທີ່ປະຕິບັດວຽກງານຕິດພັນກັບການບໍລິຫານການລົງທຶນຂອງລັດຢ່າງມີຄຸນນະພາບ ແລະໂປ່ງໃສ; ພ້ອມທັງເອົາໃຈໃສ່ວຽກງານສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະສະມາຊິກສະພາປະຊາຊົນແຂວງໃນການຕິດຕາມກວດກາງົບປະມານແຫ່ງຊາດ ແລະການກວດສອບ.

ພາຍຫຼັງສຳເລັດກອງປະຊຸມຄະນະຜູ້ແທນລາວຈຳນວນໜຶ່ງໄດ້ມີໂອກາດເຂົ້າຢ້ຽມຂ່ຳນັບ ທ່ານ ຫງວນ ເຢັລ (Nguon Nhel) ຮອງປະທານສະພາແຫ່ງຊາດອັນດັບທີສອງຂອງສະພາແຫ່ງຊາດກຳປູເຈຍ ໃນໂອກາດທີ່ຄະນະຜູ້ແທນສະພາແຫ່ງຊາດລາວເດີນທາງມາຢ້ຽມຢາມ ຣາຊະອານາຈັກກຳປູເຈຍ ໃນຄັ້ງນີ້.

ກອງປະຊຸມສຳມະນາຮ່ວມລະຫວ່າງ 4 ປະເທດ CLMV ໃນລັກສະນະນີ້ຈັດຂຶ້ນທຸກໆ 2 ປີ, ກອງປະຊຸມຄັ້ງຕໍ່ໄປໃນປີ 2019 ແມ່ນ ສປປ ລາວ ຈະເປັນເຈົ້າພາບ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.