ສຳເລັດແລ້ວ 80% ກິດຈະກຳກຽມງານປີໃໝ່ທີ່ຫລວງພະບາງ

ເປັນປະຈຳທຸກປີທີ່ບັນດາແຂກນັກທ່ອງທ່ຽວຄອງຄອຍກັບການເຂົ້າຮ່ວມງານບຸນປີໃໝ່ລາວທີ່ຫຼວງພະບາງ ເນື່ອງຈາກເມືອງມໍລະດົກໂລກແຫ່ງນີ້ຍັງຄົງຮັກສາໄດ້ເອກະລັກຄວາມເປັນລາວໄວ້ຢ່າງໝັ້ນຄົງ ທັງມີຫຼາຍກິດຈະກຳທີ່ໜ້າດຶງດູດໃຈ ຊຶ່ງປີນີ້ງານບຸນຄາດວ່າຍັງຈະຟົດຟື້ນຂຶ້ນກວ່າເກົ່າອີກ ໂດຍມາຮອດຂະນະນີ້ຂັ້ນຕອນການກະກຽມສຳເລັດແລ້ວ 80% ຂອງໜ້າວຽກທັງໝົດ.

ຈາກຂ່າວທ້ອງຖິ່ນລາຍງານວ່າ: ເພື່ອເປັນການກະກຽມໃຫ້ແກ່ພິທີແຫ່ຫວໍ່ ແລະໃນບຸນປີໃໝ່ລາວ ພສ 2560 ທີ່ຈະມາເຖິງໃນລະຫວ່າງວັນທີ 10-20 ເມສາ 2017 ເມືອງຫຼວງພະບາງ ໄດ້ຫ້າງຫາກະກຽມ ແລະສ້າງກິດຈະກໍາເຂົ້າໃນງານບຸນທີ່ໜ້າສົນໃຈໃຫ້ທ່ານໄດ້ຮ່ວມ ມ່ວນຊື່ນຕະຫຼອດ 10 ວັນເຕັມ ດັ່ງທີ່ໜັງສືພິມເສດຖະກິດ-ສັງຄົມພວກເຮົາໄດ້ນຳສະເໜີຂ່າວໄປກ່ອນໜ້ານີ້ ໃນນັ້ນ ທີ່ສັງຄົມຄອງຄອຍ ແລະເປັນກິດຈະກຳໄດ້ຮັບຄວາມສົນໃຈທີ່ສຸດຄືພິທີການແຫ່ຫວໍ່ແຫ່ນາງສັງຂານຕາມຮີດຄອງປະເພນີທີ່ປະກອບດ້ວຍຫຼາຍກ້ອນກຳລັງ ແລະຕ້ອງໄດ້ປະກອບວັດຖຸອຸປະກອນຫຼາຍຢ່າງ ຂະນະນີ້ກຳລັງຢູ່ໃນໄລຍະກະກຽມເກືອບສຳເລັດແລ້ວໂດຍປີນີ້ສັດທີ່ຈະເປັນພາຫະນະຂອງນາງສັງຂານແມ່ນຄວາຍ.

ສະເພາະການສ້າງຮຸ່ນຈຳລອງຄວາຍ ຫຼື ມະຫິງສາ ປະກອບການແຫ່ຫວໍ່ປີໃໝ່ ລາວ ຄສ 2560 ຄສ 2017 ແມ່ນໄດ້ມອບໃຫ້ວິທະຍາໄລວິຈິດສິນຮັບຜິດຊອບ ຊຶ່ງປີນີ້ຖືກກັບລູກສາວພະຍາກະບິນລະພົມຜູ້ທີ 6 ມີຊື່ວ່ານາງກິມິທາເທວີ ເພື່ອໃຊ້ເປັນພາຫະນະປະກອບໃນພິທີຂະບວນແຫ່ຫວໍ່ນໍາເອົາສີສະ (ຫົວ) ຂອງທ້າວກະບິນລະພົມຜູ້ເປັນພໍ່ໄປກາບໄຫວ້ຕາມນິທານກໍຄືຕຳນານທີ່ໄດ້ກ່າວຂານກັນມາ ໂດຍລູກສາວຜູ້ທີ 6 ຂອງພະຍາກະບິນລະພົມແມ່ນຂີ່ໂຕຄວາຍມືເບື້ອງຂວາຖືດາບ, ມືເບື້ອງຊ້າຍຖືພິນທຸກຢ່າງນີ້ກຳລັງຢູ່ໃນໄລຍະຂອງການກະກຽມຮຸ່ນຈຳລອງຄວາຍຂະໜາດລວງ ຍາວ 2 ແມັດ, ລວງສູງ 2 ແມັດ ແລະໂຄງຮ່າງເຮັດດ້ວຍໄມ້-ເຫຼັກ ແລະຕາໜ່າງເຫຼັກ, ຕິດດ້ວຍເຈ້ຍສາ-ໂຟມ ຫຼື ຟອງສະໂນ, ກາວ ແລະສີ.

ທ່ານ ບຸນຍະ ລິດຊະວົງ ຮອງອໍາ ນວຍການວິທະຍາໄລວິຈິດສິນແຂວງຫຼວງພະບາງ ໄດ້ໃຫ້ສຳພາດວ່າ: ງານບຸນປະເພນີປີໃໝ່ລາວບໍ່ສະເພາະແຕ່ສ້າງຮຸ່ນຈໍາລອງໂຕຄວາຍເທົ່ານັ້ນ ແຕ່ຍັງໄດ້ປະດັບລົດແຫ່ເຂົ້າກັບໂຕຄວາຍ ຈໍາລອງຂອງນາງສັງຂານຂີ່ ຊຶ່ງປະກອບມີການສ້າງປ້າຍຄໍາຂວັນສະບາຍດີປີໃໝ່ ຫຼື ສາກໜ້າລົດ, ຕິດຮູບໂຕນາກ ສອງຂ້າງລົດ, ຜ້າສີປະດັບປະດາລົດ, ພະຂັນ ຫຼື ດາບ, ຊົງພິນ ຫຼື ຂັດຕະປີ ແລະສົບພະທົນຫຼືຄັນຮົ່ມ. ການສ້າງຮຸ່ນຈໍາລອງຄວາຍນີ້ແມ່ນໄດ້ລົງມືຕັ້ງແຕ່ວັນທີ 10 ມີນາ 2017 ເປັນຕົ້ນມາ, ປະຈຸບັນແມ່ນສຳເລັດໄປແລ້ວ 80%. ແລະຄາດວ່າການປະດັບປະດາ ພ້ອມທັງລົງສີ ແລະລວດລາຍໃນສ່ວນຕ່າງໆຈະໃຫ້ສຳເລັດພາຍໃນອາທິດນີ້ີ້.ໃນການສ້າງຮຸ່ນຈຳລອງ ແລະການປະດັບປະດາລົດແຫ່ນາງສັງຂານໃນປີນີ້ແມ່ນເມືອງຫຼວງພະບາງເປັນຜູ້ສະໜອງທຶນ.

ສ່ວນຂັ້ນຕອນ ແລະຄວາມຄືບໜ້າ ໃນການລົງມືເຮັດຮຸ່ນຈຳລອງໂຕຄວາຍ ເພຶ່ອປະກອບເຂົ້າໃນງານແຫ່ຫວໍ່ໃນຄັ້ງນີ້ ອາຈານ ອາລຸນເດດ ປານຟອງເພັດ ໃຫ້ຮູ້ວ່າ: ເພື່ອໃຫ້ຮຸ່ນຈຳລອງພາຫະນະຂອງນາງສັງຂານສຳເລັດໄວບັນດາຄູອາຈານແມ່ນໄດ້ທຸ່ມເທເຫື່ອແຮງຢ່າງເຕັມທີ່ ໂດຍໄດ້ຍາດເວລາໃນຊ່ວງຊົ່ວໂມງວ່າງຈາກການສອນພັດປ່ຽນກັນເຮັດ ແລະເອົາໃຈໃສ່ຢ່າງເປັນຂະບວນ ເພື່ອເຮັດໃຫ້ຜົນງານໃນຄັ້ງນີ້ສໍາເລັດໄປດ້ວຍດີ, ທ່ານຍັງກ່າວຕື່ມວ່າ: ການສ້າງຮຸ່ນຈໍາລອງ ດັ່ງກ່າວນີ້ ມີຄວາມສະດວກດີ ເພາະວ່າໄດ້ມີທາງຂັ້ນເທິງໃຫ້ການສະໜັບສະໜູນດ້ານທຶນບວກກັບອຸປະກອນອັນໜຶ່ງກໍ ແມ່ນສອດຄ່ອງກັບວິຊາການດ້ານສິລະປະຂອງຂະແໜງວິຈິດສິນ ຊຶ່ງຄູ-ອານຈານທັງໝົດໄດ້ສຸມໃສ່ເຮັດໃຫ້ຜົນງານອອກມາເປັນໜ້າເພິ່ງພໍໃຈ ແລະເປັນເອກະລັກຂອງຊາວຫຼວງພະບາງໂດຍແທ້.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.