ສຳເລັດໂຄງການປັບປຸງລະບົບພື້ນຖານໂຄງລ່າງໃນ ນວ

ຫຼັງ​ຈາກ​ທີ່​ໄດ້​ລົງ­ມື​ຈັດ​ຕັ້ງ​ປະ­ຕິບັດ​ໂຄງ­ການ​ປັບ­ປຸງ​ພື້ນ­ຖານ​ໂຄງ​ລ່າງໃນ​ນະ­ຄອນ­ຫຼວງ​ວຽງ​ຈັນ (ນວ) ມາແຕ່​ຕົ້ນ​ປີ 2016 ໂຄງ­ການ​ດັ່ງ­ກ່າວ​ໄດ້ ສຳ­ເລັດ 100% ແລະ​ຈັດ​ພິ­ທີ​ມອບ-ຮັບ​ລະ­ຫວ່າງ​ນະ­ຄອນ­ຫຼວງ​ວຽງ​ຈັນ ແລະ​ຜູ້​ຮັບ​ເໝົາ​ໃນ​ວັນ​ທີ 24 ມີ­ນາ 2017 ເຂົ້າ​ຮ່ວມ​ຂອງ ທ່ານ ແກ້ວ​ພິ­ລາ ວັນອາ​ໄພ​ລາດ ຮອງ​ເຈົ້າ​ຄອງ ນວ; ທ່ານ ເນ​ວິນ ຊິນ​ສິ​ຣິ ຜູ້­ອຳ­ນວຍ­ການ​ອົງການ​ຮ່ວມ​ມື​ພັດ­ທະ­ນາ​ເສດ­ຖະ­ກິດ​ປະ ເທດ​ເພື່ອນ​ບ້ານ​ນີ​ດາ (NEDA); ທ່ານນາງ ວິ­ໄລ​ຄຳ ໂພ​ສາ​ລາດ ຮອງ​ລັດ​ຖະມົນ­ຕີ​ກະ­ຊວງ​ໂຍ­ທາ​ທິ​ການ ແລະ​ຂົນ­ສົ່ງ (ຍທຂ); ທ່ານ ນາງ ທິບ​ພະ​ກອນ ຈັນ ທະ​ວົງ­ສາ ຮອງ​ລັດ­ຖະ­ມົນ­ຕີ​ກະ­ຊວງການ​ເງິນ ພ້ອມ​ດ້ວຍ​ບັນ­ດາ​ຫົວ­ໜ້າ​ກົມ, ຮອງ​ພະ​ແນກ, ບັນ­ດາ​ເຈົ້າ­ເມືອງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ທ່ານ ອຸ່ນ​ເນື້ອ ສີ​ລາ​ວົງ ຮອງ​ຫົວ­ໜ້າພະ​ແນກ​ໂຍ­ທາ​ທິ​ການ ແລະ​ຂົນ­ສົ່ງ​ນະຄອນ​ຫຼວງ​ກ່າວ​ວ່າ: ໂຄງ­ການ​ປັບ­ປຸງລະ­ບົບ​ພື້ນ­ຖານ​ໂຄງ​ລ່າງ ນວ ເປັນ​ໂຄງການ​ບູ​ລິ​ມະ​ສິດ​ໜຶ່ງ​ທີ່​ນອນ​ໃນ​ແຜນ​ຍຸດທະ​ສາດ 5 ປີ​ຄັ້ງ​ທີ 8 (2016-2020) ຂອງ​ນະ­ຄອນ­ຫຼວງ​ວຽງ​ຈັນ ທີ່​ຖືກ​ຈັດຕັ້ງ​ປະ­ຕິ­ບັດ ເພື່ອ​ຮັບ​ໃຊ້​ເນື່ອງ​ໃນ​ໂອ­ກາດ ສປປ ລາວ ໄດ້​ຮັບ​ກຽດ​ເປັນ​ເຈົ້າ­ພາບ​ຈັດ​ກອງ​ປະ­ຊຸມ​ສຸດ​ຍອດ​ອາ​ຊຽນ​ຄັ້ງ​ທີ 28-29 ໃນ​ເດືອນ​ກັນ­ຍາ 2016 ຜ່ານ​ມາ, ແນ່​ໃສ່​ປັບ­ປຸງ​ສ້ອມ­ແປງ​ສະ­ພາບ​ເສັ້ນ­ທາງ​ທີ່ເປ່​ເພ, ບູ­ລະ­ນະ​ຮັກ­ສາ​ສະ­ພາບ​ເສັ້ນ­ທາງ​ທີ່​ໄດ້​ຮັບ​ການ​ກໍ​ສ້າງ​ມາ​ເປັນ​ໄລ­ຍະ​ເວ­ລາ  ຫຼາຍ​ປີ​ໃຫ້​ສາ­ມາດ​ຮັບ​ໃຊ້​ໄດ້​ຍາວ​ນານ ຂຶ້ນ​ກວ່າ​ເກົ່າ. ຊຶ່ງ​ໂຄງ­ການ​ດັ່ງ­ກ່າວ​ນີ້ ແມ່ນ​ໄດ້​ລົງ­ມື​ຈັດ​ຕັ້ງ​ປະ­ຕິ­ບັດ​ມາ​ແຕ່​ວັນທີ 28 ມັງ­ກອນ 2016 ໃຫ້​ສຳ­ເລັດ​ໃນວັນ​ທີ 27 ເມ­ສາ 2017.

ໂຄງ­ການ​ດັ່ງ­ກ່າວ​ນີ້​ແມ່ນ​ມີ​ມູນ​ຄ່າ 313 ລ້ານ​ກວ່າ​ບາດ ຊຶ່ງ​ໄດ້​ນຳ​ປັບ­ປຸງ ແລະ​ສ້ອມ­ແປງ​ເສັ້ນ­ທາງ​ສາຍ​ຫຼັກ​ຄື: 1: ຖະ­ໜົນ​ກຳ­ແພງ​ເມືອງ​ຊ່ວງ​ທີ 1 ແຕ່ 4 ແຍກ​ໄຟ​ແດງ​ທາດ­ຫຼວງຫາ 3 ແຍກ ໄຟ​ແດງ​ໂພນ​ປ່າ​ເປົ້າ ມີ​ຄວາມ​ຍາວ 3.200 ແມັດ, ກວ້າງ 14,5 ແມັດ. 2: ຖະ­ໜົນ​ກຳ­ແພງ​ເມືອງ ຊ່ວງ​ທີ 2 ແຕ່ 3 ແຍກ​ໄຟ​ແດງ​ໂພນ​ປ່າ​ເປົ່າ ຫາ ບ້ານ ໜອງ​ໄຮ (ຮ້ານ​ອາ­ຫານ​ມຸກ​ມິວ) ຍາວ 2.900 ແມັດ, ກວ້າງ 14,5 ແມັດ. 3: ເສັ້ນ­ທາງ​ແຕ່ 3 ແຍກ​ຖະ­ໜົນ 23 ສິງ­ຫາ (ຂ້າງ​ກະ­ຊວງ​ການ​ຕ່າງ­ປະ­ເທດ) ຜ່ານ ໄຟ​ແດງ​ນາ​ໄຊ, ຜ່ານ 3 ແຍກ​ກົງ​ສູນ​ໄທ ຫາ 3 ແຍກ​ໄຟ​ແດງ​ໂພນ​ສີ​ນວນ ມີ​ຄວາມຍາວ 1.620 ແມັດ, ກວ້າງ 11,4 ແມັດ ແລະ​ເສັ້ນ­ທາງ​ທີ 4 ແມ່ນ ແຕ່​ວົງ ວຽນ​ທາດ­ຫຼວງ ຜ່ານ 4 ແຍກ​ໄຟ​ແດງທາດ­ຫຼວງຫາສົ້ນ​ຂົວ​ບຶງ​ທາດ­ຫຼວງ ຍາວ 1.830 ແມັດ ແລະ​ກວ້າງ 11,4 ແມັດ.

ທ່ານ ເນ​ວິນ ຊິນ​ສິ​ຣິ ຜູ້­ອຳ­ນວຍ­ການອົງ­ການນີ​ດາ (NEDA) ກ່າວ​ວ່າ: ຕະຫຼອດ 10 ກວ່າ​ປີ­ຜ່ານ­ມາ ອົງ­ການ​ນີ​ດາໄດ້​ເຂົ້າ​ມາ​ມີ​ສ່ວນ​ຮ່ວມ​ໃນ​ການ​ພັດ​ທະນາ​ເສດ­ຖະ­ກິດ​ກັບ ສປປ ລາວ, ນີ​ດາ ໄດ້​ເຫັນ​ຄວາມ​ຈະ­ເລີນ​ເຕີບ​ໂຕ​ຂອງ​ນະຄອນ​ຫຼວງ​ວຽງ​ຈັນ ໂດຍ​ສະ­ເພາະ​ແມ່ນການ​ຂະ­ຫຍາຍ­ຕົວ​ຂອງ​ຕົວ​ເມືອງທີ່​ໄດ້ມີ​ການ​ພັດ­ທະ­ນາ​ທາງ​ດ້ານ​ການ​ຄ້າ, ການ​ລົງ­ທຶນ​ຕ່າງໆ​ດັ່ງ­ນັ້ນ; ປະ­ເທດ​ລາວ ໂດຍ​ສະ­ເພາະ​ແມ່ນ​ນະ­ຄອນ­ຫຼວງ​ວຽງຈັນ ແລະ​ອົງ­ການ​ນີ​ດາ ຈິ່ງ​ເຫັນ​ໄດ້​ເຖິງຄວາມ​ສຳ­ຄັນ​ຂອງ​ການ​ພັດ­ທະ­ນາ​ພື້ນ­ຖານ​ໂຄງ​ລ່າງ ແລະ​ພິ­ທີ​ມອບ-ຮັບ​ໂຄງການ​ປັບ­ປຸງ​ລະ­ບົບ​ພື້ນ­ຖານ​ໂຄງ​ລ່າງ​ໃນ ນະ­ຄອນ­ຫຼວງ​ວຽງ​ຈັນ​ຄັ້ງ​ນີ້ ກໍ​ຈະ​ເຮັດໃຫ້­ການ​ຄົມ­ມະ­ນາ­ຄົມ​ຂົນ­ສົ່ງ​ພາຍ​ໃນ​ນະ­ຄອນ­ຫຼວງ​ວຽງ​ຈັນ​ດີ​ຂຶ້ນ​ອີກ​ລະ­ດັບ​ໜຶ່ງ.

ທ່ານ ແກ້ວ​ພິ­ລາ​ວັນ ອາ​ໄພ​ລາດ ຮອງເຈົ້າ​ຄອງ ນວ ກ່າວ​ວ່າ: ໂຄງ­ການ​ປັບ­ປຸງລະ­ບົບ​ພື້ນ­ຖານ​ໂຄງ​ລ່າງ ນວ ນີ້​ແມ່ນ​ເປັນໂຄງ­ການ​ໜຶ່ງ​ທີ່​ໄດ້​ຮ່ວມ​ມື​ກັບ​ອົງ­ການນີ​ດາປະ­ເທດ​ໄທ ໂດຍ​ໄດ້​ຮັບ​ການ​ສະໜັບ​ສະ​ໜູນ​ເງິນ​ກູ້​ດອກ​ເບ້ຍ​ຕ່ຳ ເພື່ອ​ພັດທະ​ນາ​ລະ­ບົບ​ພື້ນ­ຖານ​ໂຄງ​ລ່າງ; ແນວໃດ​ກໍ​ດີ ພາຍ­ຫຼັງ​ສຳ­ເລັດ​ການ​ປັບ­ປຸງ  ແລະ​ເປີດ​ນຳ​ໃຊ້​ພວກ​ເຮົາ​ຕ້ອງ​ເປັນ​ເຈົ້າການ​ຮ່ວມ​ກັນ​ປົກ​ປັກ​ຮັກ­ສາ​ນຳ​ໃຊ້​ເສັ້ນທາງ​ດັ່ງ­ກ່າວ​ໃຫ້​ມີ​ຄວາມ​ຍືນ​ຍົງ ແລະ ເກີດ​ປະ​ສິດ­ທິ​ຜົນ​ຫຼາຍ​ທີ່​ສຸດ.

ໂດຍ: ພິມ​ພອນ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.