ສຳ​ມະ​ນາ​ການ​ນຳ​ໃຊ້​ພາ­ສາ​ລາວ​ໃຫ້​ແກ່​ບັນ­ດາ​ສື່

ແນ­ໃສ່​ສ້າງ​ຄວາມ​ເອ­ກະ​ພາບ​ໃນ​ການ​ນຳ​ໃຊ້​ພາ­ສາ​ລາວ​ໃນ​ວົງ​ການ​ສື່​ມວນ​ຊົນ ໂດຍ​ສະ­ເພາະ​ສື່​ສິ່ງ​ພິມ, ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ໄດ້​ຈັດ​ເວ­ທີ​ແລກ­ປ່ຽນ​ຄວາມ​ຄິດ​ເຫັນ​ກ່ຽວ​ກັບ​ການ​ນຳ​ໃຊ້​ພາ­ສາ​ລາວ​ໃນ​ສື່​ສິ່ງ​ພິມ​ຂຶ້ນ​ໃນ​ວັນ​ທີ 17 ມີ­ນາ 2017 ນີ້ ໂດຍການ​ເປັນ​ປະ­ທານ​ຂອງ​ທ່ານ ຈະ­ເລີນ ເຍຍ​ປາວ​ເຮີ ລັດ­ຖະ­ມົນ­ຕີ​ປະ­ຈຳ​ສຳ­ນັກງານ​ນາ­ຍົກ­ລັດ­ຖະ­ມົນ­ຕີ, ໂຄ­ສົກ​ລັດ​ຖະບານ.

ໃນ​ການ​ສຳ​ມະ​ນາ​ຄັ້ງ​ນີ້ ໄດ້​ລວມເອົາ​ບັນ­ດາ​ຕົວ​ແທນ​ສື່​ທີ່​ມີ­ໜ້າ​ທີ່​ກ່ຽວກັບ​ການ​ນຳ​ໃຊ້​ພາ­ສາ​ລາວ​ໃນ​ສື່​ສິ່ງ​ພິມ, ຜູ້​ທີ່​ເຮັດ​ວຽກ​ດ້ານ​ການ​ຂ່າວ, ເລ­ຂາ​ການນຳ, ໂຄ­ສົກ, ບັນ­ນາ­ທິ­ການ​ໜັງ­ສື­ພິມ, ປື້ມ ແລະ​ວາ­ລະ­ສານ​ຕ່າງໆ​ເຂົ້າ​ຮ່ວມ ໂດຍ​ຖື​ເປັນ​ກອງ​ປະ­ຊຸມ​ຄັ້ງ​ທຳ​ອິດ​ກ່ຽວກັບ​ການ​ນຳ​ໃຊ້​ພາ­ສາ​ລາວ​ໃນ​ສື່​ສິ່ງ​ພິມແນ­ໃສ່​ເຮັດ​ໃຫ້­ການ​ນຳໃຊ້​ພາ­ສາ​ລາວ ໂດຍ​ສະ­ເພາະ​ພາ­ສາ​ຂຽນໃຫ້​ຖືກ​ໄວ­ຍະ­ກອນ, ໃຊ້​ຄຳ, ສຳ­ນວນ ແລະ​ປະ­ໂຫຍກ​ທີ່​ຖືກ­ຕ້ອງ​ຊັດ​ເຈນ​ທາງຄວາມ​ໝາຍ ແລະ​ສາ­ມາດ​ເປັນ​ແບບ­ຢ່າງ​ແກ່​ສັງ­ຄົມ​ໄດ້.

ທ່ານ ຈະ­ເລີນ ເຍຍ​ປາວ​ເຮີ ກ່າວ​ວ່າ: ການ​ທີ່​ຈັດ​ງານ​ສຳ​ມະ​ນາ​ຄັ້ງ​ນີ້​ຂຶ້ນ​ເນື່ອງ​ຈາກ​ສະ­ພາບ​ການ​ນຳ​ໃຊ້​ພາ­ສາລາວ​ໃນ​ປະ­ຈຸ​ບັນ​ຍັງ​ມີ​ຫຼາຍ​ສິ່ງ​ທີ່​ຍັງ​ເຮັດ​ບໍ່​ທັນ​ໄດ້​ດີ, ມີ​ບາງ​ສິ່ງ​ບໍ່​ເອ­ກະ​ພາບ, ການໃຊ້​ຜິດ, ຂຽນ​ຜິດ ຫຼື ນຳ​ໃຊ້​ຄຳ​ໃນ​ພາ­ສາອື່ນ​ທີ່​ໃກ້​ຄຽງ​ມາ​ນຳ​ໃຊ້​ປົນ​ເປ​ພາ­ສາລາວ​ຢ່າງ​ບໍ່​ເໝາະ​ສົມ ຊຶ່ງ​ຖື​ເປັນ​ບັນ­ຫາຕໍ່​ການ​ນຳ​ໃຊ້​ພາ­ສາ​ລາວ​ຈິ່ງ​ຈຳ­ເປັນຕ້ອງ​ຮີບ​ຮ້ອນ​ແກ້​ໄຂ ເພື່ອ​ຄວາມ​ເປັນ​ເອ­ກະ​ພາບ​ດ້ານ​ພາ­ສາ​ໃນ​ສື່​ສິ່ງ​ພິມ ແລະ​ບັນດາ​ໂຄ­ສົກ​ໃຫ້​ບັນ­ລຸ​ບົດ­ບາດ​ຄວາມ​ເປັນ​ສື່​ກາງ­ຂອງ​ຊາດ​ຢ່າງ​ແທ້​ຈິງ.

ທ່ານ ສົມ​ແສງ ໄຊ​ຍະ​ວົງ ຮອງ​ຫົວໜ້າ​ສະ​ຖາ​ບັນ​ຄົ້ນ­ຄວ້າ​ວັດ­ທະ­ນະ­ທຳ, ສະ​ຖາ​ບັນ​ຄົ້ນ­ຄວ້າ​ວິ­ທະ­ຍາ­ສາດ​ສັງ­ຄົມ​ແຫ່ງ​ຊາດ ໄດ້​ໃຫ້​ຄວາມ​ຮູ້​ບາງ​ປະ­ການ ແລະ​ຂໍ້­ຄວາມ​ທີ່​ຄວນ​ເອົາ­ໃຈ­ໃສ່​ເພື່ອການ​ນຳ​ໃຊ້​ພາ­ສາ​ລາວ​ໃຫ້​ຖືກ­ຕ້ອງ​ໃນສື່​ສິ່ງ​ພິມ​ໂດຍ​ທ່ານ​ກ່າວ​ວ່າ: ການ​ທີ່​ເຮົາຈະ​ນຳ​ໃຊ້​ພາ­ສາ​ລາວ​ໃຫ້​ຖືກ­ຕ້ອງ​ໃນ​ສິ່ງພິມ​ນີ້​ແມ່ນ​ເລີ່ມ​ຈາກ​ຄວາມ​ຮັບ​ຮູ້, ເຂົ້າໃຈ​ຕໍ່​ນະ­ໂຍ­ບາຍ​ການ​ປົກ​ປັກ​ຮັກ­ສາ ແລະ ນຳ​ໃຊ້​ພາ­ສາ​ຄື​ໃຫ້​ມີ​ລັກ­ສະ­ນະ​ຊາດ, ວິທະ​ຍາ​ສາດ ແລະ​ມະ­ຫາ­ຊົນ, ໄຈ້​ແຍກ​ໃຫ້ໄດ້​ຄວາມ​ໝາຍ​ຂອງ​ຄຳ​ທີ່​ໃກ້​ກັນ ທັງ​ນີ້ ກໍ​ເພື່ອ​ຮັບ­ປະ­ກັນ​ບໍ່​ໃຫ້​ສັງ­ຄົມ​ຜູ້​ບໍ­ລິ­ໂພກ​ສື່​ມີ​ຄວາມ​ສັບ­ສົນ.

ທ່ານ ສົມ​ແສງ ໄຊ​ຍະ​ວົງ ອະ­ທິ­ບາຍວ່າ: ພາ­ສາ​ທີ່​ໃຊ້​ໃນ​ສື່​ສິ່ງ​ພິມ​ແມ່ນ​ການເລືອກ­ເຟັ້ນ​ນັບ​ແຕ່​ລະ­ດັບ​ຄຳ, ການ​ນຳ​ຄຳມາ​ປະ­ກອບ​ເຂົ້າ​ເປັນ​ວະ­ລີ, ປະ­ໂຫຍກ, ເປັນ​ປະ­ໂຫຍກ​ດ່ຽວ, ປະ­ໂຫຍກ​ຕໍ່​ທີ່​ມີການ​ຮຽບ​ຮຽງ​ດ້ວຍ​ຫຼັກ​ໄວ­ຍະ­ກອນຂອງ​ພາ­ສາ​ຕົນ​ໃຫ້​ສາ­ມາດ​ສື່​ຄວາມ​ໝາຍ ໄດ້​ຊັດ​ເຈນ​ເກີດ​ຄວາມ​ເຂົ້າ­ໃຈ​ກົງ​ກັນລະ­ຫວ່າງ​ຜູ້​ໃຊ້​ພາ­ສາ​ກັບ​ຜູ້​ຮັບ ຊຶ່ງ​ເປັນຜູ້​ອ່ານ, ພາ­ສາ​ທີ່​ໃຊ້​ໃນ​ສື່​ສິ່ງ​ພິມ​ຕ້ອງ​ມີການ​ກຳ­ກັບ​ຕໍ່​ສອງ​ດ້ານ​ຄື: ດ້ານ​ໄວ​ຍະກອນ​ຂອງ​ພາ­ສາ ແລະ​ດ້ານ​ການ​ສະ­ກົດຄຳ​ໃຫ້​ສາ­ມາດ​ສື່​ຄວາມ​ນຶກ​ຄິດ​ທີ່​ເປັນຂໍ້­ຄວາມ, ເປັນ​ເລື່ອງ​ໃດ​ໜຶ່ງ​ອອກ​ໂດຍ​ໃຊ້​ຕົວ​ອັກ­ສອນ​ຂຽນ​ຢ່າງ​ຊັດ​ເຈນ, ຍິ່ງເປັນ​ຍຸກ​ແຫ່ງ​ການ​ເຊື່ອມ​ໂຍງ​ຄື​ປະ­ຈຸ​ບັນປະ­ເທດ​ເຮົາ​ແມ່ນ​ປັດ​ສະ​ຈາກ​ບໍ່​ໄດ້​ຄຳສັບ​ວິ­ທະ­ຍາ­ສາດ, ພາ­ສາ​ຕ່າງ­ປະ­ເທດຕ່າງໆ​ທີ່​ພາ­ສາ​ລາວ​ບໍ່​ສາ­ມາດ​ອອກ­ສຽງໄດ້​ຊັດ​ເຈນ ສະ­ນັ້ນ ຈິ່ງ​ໄດ້​ກຳ­ນົດ​ເອົາການ​ໃຊ້​ຕົວ​ອັກ­ສອນ “ຣ” ພ້ອມ​ດ້ວຍຕົວ​ສະ­ກົດ 3 ໂຕ​ຄື ຟ, ລ, ສ ເພີ່ມ​ເຂົ້າ​ໃສ່ 8 ຕົວ​ສະ­ກົດ​ທີ່​ມີ​ໃນ​ພາ­ສາ​ລາວ ສຳ­ລັບສະ­ກົດ​ຄຳ​ທີ່​ເປັນ​ຄຳ​ວິ­ຊາ​ການ​ກ່ຽວ​ກັບວິ­ທະ­ຍາ­ສາດ, ຊື່​ສະ­ເພາະ​ສະ­ຖານ­ທີ່ ແລະ​ບຸກ­ຄົນ​ທີ່​ໃຊ້​ໃນ​ສາ­ກົນ ແລະ​ຄຳ​ຊົນເຜົ່າ.

ໃນ​ກອງ​ປະ­ຊຸມ​ສຳ​ມາ​ເທື່ອ​ນີ້​ແມ່ນໄດ້​ຮັບ​ຄວາມ​ສົນ­ໃຈ​ພໍ​ສົມ­ຄວນ​ຈາກ​ບັນດາ​ຜູ້​ເຂົ້າ​ຮ່ວມ ໂດຍ​ສະ­ເພາະຄະ­ນະ​ບັນນາ​ທິ​ການ, ໂຄ­ສົກ​ຕ່າງ​ກໍ​ໄດ້​ປະ­ກອບ​ຄຳ​ຄິດ​ເຫັນ​ຕໍ່​ການ​ການ​ນຳ​ໃຊ້​ພາ­ສາ​ລາວ ຊຶ່ງ​ສ່ວນ​ໃຫຍ່​ສະ­ເໜີ​ວ່າ​ໃນ​ໄວໆ​ນີ້​ໃຫ້​ມີການ​ສັງ​ລວມ​ຄຳ​ສັບ​ທີ່​ຖືກ­ຕ້ອງ, ຈຳ­ເປັນ ແລະ​ໄດ້​ນຳ​ໃຊ້​ຫຼາຍ​ໃນ​ວົງ​ການ​ສື່ ເພື່ອ​ແຈກ​ຢາຍ​ໃຫ້​ຜູ້­ນຳ​ໃຊ້​ຕົວ​ຈິງ ແລະ​ໄລ­ຍະຍາວ​ຕ້ອງ​ກຳ­ນົດ​ວັດ­ຈະ­ນາ­ນຸ­ກົມ​ສະ­ບັບໃດ​ໜຶ່ງ​ໃຫ້​ສື່​ມວນ​ຊົນ​ໃຊ້​ໃຫ້​ມີ​ຄວາມ​ເປັນ​ເອ­ກະ​ພາບ.

ກອງ​ປະ­ຊຸມ​ນອກ­ຈາກໄດ້​ສົນ­ທະ­ນາຫາ­ລື​ກ່ຽວ​ກັບ​ການ​ນຳ​ໃຊ້​ພາ­ສາ​ລາວ​ໃນສື່​ສິ່ງ​ພິມ​ແລ້ວ ຜູ້​ເຂົ້າ​ຮ່ວມ​ຍັງ​ໄດ້​ຮັບ​ຟັງກ່ຽວ​ກັບ​ໂຄງ​ປະ­ກອບ​ລະ­ບົບ​ການ­ເມືອງຂອງ​ປະ­ເທດ​ເຮົາ​ຈາກ​ທ່ານ ອຸ­ບົນ ມະ­ຫາ​ໄຊ ຮອງ​ຫົວ­ໜ້າ​ສະ​ຖາ​ບັນ​ການ­ເມືອງ-ການ​ປົກ­ຄອງ​ແຫ່ງ​ຊາດ ເພື່ອ​ຮັບ­ປະ­ກັນການ​ນຳ​ສະ­ເໜີ​ຂ່າວ​ໃຫ້​ຖືກ­ຕ້ອງ​ຕາມຄວາມ​ເປັນ​ຈິງ​ອີກ​ດ້ວຍ.

ຂ່າວ: ພິມ​ພອນ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.