ສູນການຄ້າ ແລະ ບໍລິການໃນເຂດເສດຖະກິດພິເສດທ່າແຂກຈະລົງມືສ້າງໄວໆນີ້

ສູນການຄ້າ ແລະບໍລິການໃນເຂດເສດຖະກິດພິເສດທ່່າແຂກ ແຂວງຄຳມ່ວນຄາດວ່າຈະໄດ້ເລີ່ມລົງມືກໍ່ສ້າງໃນມໍ່ໆນີ້ ພາຍຫຼັງທີ່ບໍລິສັດອາຄະເນພັດທະນາລາວ ແລະ 3 ບໍລິສັດຮຸ້ນສ່ວນໄດ້ເຊັນບົດບັນທຶກການຕົກລົງ MOA ເພື່ອລົງທຶນຮັບເໝົາກໍ່ສ້າງໂຊນ B ແລະ C ໂດຍມີກຳນົດໃຫ້ສຳເລັດພາຍໃນເວລາ 4 ປີ.

ພິທີເຊັນບົດບັນທຶກລະຫວ່າງບໍລິສັດອາຄະເນພັດທະນາລາວ ກັບ ບໍລິສັດ  Dau Tu Xay Dung Cong Nghe Modunlar Block Container, ບໍລິສັດ ABT Survey-Design, Construction and Promote Agriculture Co.Ltd ແລະ ບໍລິສັດ Phu Hung Tin ແມ່ນໄດ້ຈັດຂຶ້ນໃນວັນທີ 12 ເມສາຜ່ານມາທີ່ເມືອງທ່າແຂກ ແຂວງຄຳມ່ວນ ໂດຍມີທ່ານ ສົມຈິດ ອາລິຍະພາພອນ ປະທານບໍລິສັດອາຄະເນພັດທະນາລາວ ຈຳກັດ ແລະຜູ້ຕາງໜ້າຈາກ 3 ບໍລິສັດຮັບເໝົາກໍ່ສ້າງ ເປັນຜູ້ຮ່ວມລົງນາມ ຊຶ່ງເຂົ້າຮ່ວມເປັນ ສັກຂີພິຍານມີ ທ່ານ ນົງສະຫວັນ ທຳມະວົງ ຮອງປະທານສະພາບໍລິຫານເຂດເສດຖະກິດສະເພາະທ່າແຂກ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ໂຊນ B ປະກອບມີ ຕຶກການເງິນ 65 ຊັ້ນ 1 ຫຼັງ, ໂຮງແຮມ 5 ດາວ 1 ຫຼັງ ສູງ 40 ຊັ້ນ, ຊັ້ນໃຕ້ດິນ, ໂຄງລ່າງພື້ນຖານ ແລະໂຄງສ້າງເພີ່ມເຕີມອື່ນໆ ຊຶ່ງມີມູນ ຄ່າສັນຍາ 250 ລ້ານໂດລາສະຫະລັດ, ໄລຍະເວລາໃນການກໍ່ສ້າງໃຫ້ສຳເລັດ 4 ປີ ສ່ວນໂຊນ C ປະກອບມີ ໂຮງແຮມ 4 ດາວ 1 ຫຼັງ ສູງ 35 ຊັ້ນ, ຮ້ານສັບພະ ສິນຄ້າ 5 ຊັ້ນ 1 ຫຼັງ, ໂຄງລ່າງພື້ນຖານ ແລະໂຄງສ້າງເພີ່ມເຕີມ ມີມູນຄ່າສັນຍາ 120 ລ້ານໂດລາສະຫະລັດ, ໄລຍະການ ກໍ່ສ້າງ 4 ປີ.

ສຳລັບໂຄງການກໍ່ສ້າງພັດທະນາ ເຂດເສດຖະກິດສະເພາະທ່າແຂກແມ່ນໜຶ່ງໃນບັນດາໂຄງການບູລິມະສິດຂອງແຂວງຄຳມ່ວນທີ່ມີເປົ້າໝາຍເລັ່ງໃສ່ພັດທະນາທີ່ດິນໃນຂອບເຂດຫົວຂົວມິດຕະພາບລາວ-ໄທ ແຫ່ງທີ 3 ແຂວງຄຳ ມ່ວນ-ນະຄອນພະນົມມີເນື້ອທີ່ຕອນດິນເພື່ອພັດທະນາທັງໝົດ 1.035 ເຮັກຕາ ໃຫ້ກາຍເປັນເຂດເສດຖະກິດພິເສດ ເພື່ອພັດທະນາໃຫ້ເປັນຕົວເມືອງໃໝ່ທີ່ທັນສະໄໝ, ເປັນບ່ອນດຶງດູດການລົງທຶນພາຍໃນ ແລະຕ່າງປະເທດ, ມີນະໂຍບາຍສົ່ງເສີມພິເສດ, ມີລະບົບເສດຖະກິດ-ການເງິນ, ເປັນຫົວໜ່ວຍບໍລິການສັງຄົມກວ້າງ, ມີລະບົບຮັບປະກັນຄວາມສະຫງົບປອດໄພ ແລະປົກປັກຮັກສາສິ່ງແວດລ້ອມໃຫ້ຍືນຍົງ.

ຂະນະທີ່ບໍລິສັດອາຄະເນພັດທະນາລາວ ເອສອີແຊັດ (SEZ) ຈໍາກັດກໍ່ເປັນໜຶ່ງໃນບັນດາ 21 ບໍລິສັດທີ່ໄດ້ລົງທຶນ ໃນເຂດດັ່ງກ່າວ ຊຶ່ງບໍລິສັດໄດ້ຮັບການສຳປະທານເນື້ອທີ່ດິນຈຳນວນ 7 ເຮັກຕາ, ມີອາຍຸສຳປະທານ 75 ປີ, ມີແຜນການລົງທຶນທັງໝົດ 5 ຕື້ໂດລາສະຫະລັດ ໂດຍມີຈຸດປະສົງເພື່ອການລົງທຶນພັດທະນາ ໃນຕອນດິນດັ່ງກ່າວໃຫ້ກາຍເປັນເຂດການຄ້າ ແລະບໍລິການ ຊຶ່ງປະກອບດ້ວຍຕຶກສະຖາບັນການເງິນ 65 ຊັ້ນ ຈຳນວນ 1 ຫຼັງ, ໂຮງແຮມລະດັບ 5 ດາວ ສູງ 40 ຊັ້ນ, ລະດັບ 4 ດາວ ສູງ 35 ຊັ້ນ, ຮ້ານສັບພະສິນຄ້າ, ຊັ້ນໃຕ້ດິນ, ໂຄງລ່າງພື້ນຖານ, ສວນສາທາລະນະ ແລະໂຄງສ້າງອື່ນໆ ໂດຍແບ່ງອອກເປັນ 3 ໂຊນ ຄື ໂຊນ A, B ແລະ C ໃນນີ້ໂຊນ A ບໍລິສັດອາຄະເນພັດທະນາລາວໄດ້ລົງນາມເຊັນສັນຍາກັບບໍລິສັດ Hubei Haoyi Construction Group Co.Ltd ສປ ຈີນ ໃນວັນທີ 29 ຕຸລາ 2016 ຜ່ານມາ ທີ່ນະຄອນຫຼວງວຽງຈັນ ມີມູນຄ່າ 200 ລ້ານໂດລາສະຫະລັດ ໃນໄລຍະເວລາ ການກໍ່ສ້າງ 3 ປີ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.