ຫົວ­ໜ້າ​ຄູ​ຝຶກ ປກສ ເລັ່ງ​ປັບ 3 ຢ່າງ​​ຮັບ​ມື​ລາວ​ໂຕ​ໂຢ​ຕ້າ

ຫຼັງ​ຈາກ​ທີ່​ພາ ປກສ ເອ​ັຟ​ຊີ ສ້າງ​ຄວາມ​ໝັ້ນ​ໃຈ​ໄດ້​ໃນ​ນັດ​ທຳ​ອິດ​ຫຼັງ​ເກັບ​ໄຊ­ຊະ­ນະ​ເໜືອ ໄອ​ດີ​ຊີ ຈຳ­ປາ​ສັກ ໄປ​ແບບ​ບໍ່​ມີ​ທີ່​ຕິ    7 – 1 ເມື່ອ​ວັນ​ອາ­ທິດ​ທີ່​ຜ່ານ​ມາ, ແຕ່ ທ່ານ ບຸນ​ມາ ປະ​ຖ້ຳ​ມະ​ວົງ ຄູ​ຝຶກ​ຈອມ​ປະ­ສົບ​ການ​ຂອງ ປກສ ເອ​ັຟ​ຊີ ຊີ້​ວ່າ​ຍັງ​ຕ້ອງ​ເລັ່ງ​ປັບ­ປຸງ 3 ຢ່າງ​ຈາກ​ນັດ​ທຳ​ອິດ​ໃຫ້​ໄດ້​ກ່ອນ​ຈະ​ຮັບ​ມື​ກັບ​ຄູ່​ແຂ່ງ​ສຳ­ຄັນ​ຢ່າງ ລາວ​ໂຕ​ໂຢ​ຕ້າ ເອ​ັຟ​ຊີ ທີ່​ຖືກ​ຍົກ​ໃຫ້​ເປັນ​ເຕັງ​ແຊັມ ລາວ​ພຣີ​ເມຍ​ລີກ ປີ​ນີ້ ໃນ​ວັນ​ທີ 8 ເມ­ສາ ນີ້ ຂະ­ນະ​ທີ່ ລາວ​ໂຕ​ໂຢ​ຕ້າ ງານ​ເຂົ້າ​ຕໍ່​ເນື່ອງ​ເມື່ອ ສຕລ ສັ່ງ​ຫ້າມ​ລົງ​ຄຸມ​ທີມ​ຈຳ­ນວນ 2 ນັດ ຈາກ​ການ­ສະ­ແດງ​ທ່າ​ທີ​ບໍ່​ເໝາະ​ສົມ​ຕໍ່​ກຳ­ມະ­ການ​ໃນ​ນັດ​ທຳ​ອິດ.

ອີງ​ຕາມ​ການ​ເປີດ­ເຜີຍ​ຂອງ ທ່ານ ບຸນ​ມາ ປະ​ຖ້ຳ​ມະ​ວົງ ຫົວ­ໜ້າ​ຄູ​ຝຶກ ປກສ ເອ​ັຟ​ຊີ ກ່າວ​ວ່າ: ຈາກ​ຜົນ­ງານ​ນັດ​ທຳ​ອິດ​ນັ້ນ​ກ່ອນ​ອື່ນ​ໝົດ​ກໍ່​ຕ້ອງ​ຂໍ​ຂອບ­ໃຈ​ກັບ​ອ້າຍ​ນ້ອງ​ນັກ­ກີ­ລາ​ທຸກໆ​ຄົນ​ທີ່​ຫຼິ້ນ​ໄດ້​ດີ​ຕາມ​ແຜນ­ການ​ທີ່​ວາງ​ໄວ້ ແລະ ໄດ້​ເອົາ­ໃຈ­ໃສ່​ໃນ​ການ​ຝຶກ​ຊ້ອມ ລວມ​ເຖິງ​ຊ່ວຍ​ກັນ​ຫຼິ້ນ​ຢ່າງ​ເຕັມ­ທີ່​ຈົນ​ສາ­ມາດ​ຍິງ​ປະ­ຕູ​ຢ່າງ​ເດັດ­ຂາດ ເຊິ່ງ​ທີ່​ສຳ­ຄັນ​ຄື​ທຸກໆ​ຄົນ​ໄດ້​ມີ​ຄວາມ​ອົດ­ທົນ​ຕໍ່​ການ​ຫຼິ້ນ​ໃນ​ຄັ້ງ​ນີ້ ເຊິ່ງ​ຜົນ​ທີ່​ໄດ້​ມາ​ຄື​ໄຊ­ຊະ­ນະ, ສ່ວນ​ຈຸດ​ທີ່​ຈະ​ຕ້ອງ​ປັບ­ປຸງ​ເລັ່ງ​ດ່ວນ​ມີ 3 ຢ່າງ​ຫຼັກໆ ຄື: ການ​ອອກ​ບານ​ຂອງ​ນັກ​ເຕະ​ຕ້ອງ​ໃຫ້​ໄວ​ຂຶ້ນ ( ຄິດ​ໄວ ເຮັດ​ໄວ ), ຈັງ­ຫວະ​ການ​ເຂົ້າ​ບານ​ຂອງ​ນັກ​ເຕະ ແລະ ການ​ແລ່ນ​ອອກ​ຕົວ​ຂອງ​ນັກ​ເຕະ.

“ ນັດ​ຕໍ່​ໄປ​ພວກ​ເຮົາ​ຈະ​ຮັບ​ການ​ມາ​ຢາມ​ຂອງ ລາວ​ໂຕ​ໂຢ​ຕ້າ ເອ​ັຟ​ຊີ ເຊິ່ງ​ຈາກ​ເກມ​ການ​ຫຼິ້ນ ແລະ ຜົນ­ງານ​ຂອງ ລາວ​ໂຕ​ໂຢ​ຕ້າ ນັດ​ທຳ​ອິດ​ເຖິງ​ຈະ​ເສຍ​ໃຫ້​ກັບ​ທີມ ມຊ ເອ​ັຟ​ຊີ ແຕ່​ທາງ​ພວກ​ເຮົາ​ກໍ່​ປະ­ໝາດ​ບໍ່​ໄດ້​ແນ່­ນອນ ເພາະ ລາວ​ໂຕ​ໂຢ​ຕ້າ ເປັນ​ທີມ​ທີ່​ແຂງ​ແກ່ນ​ທີ່​ສຸດ ເຊັ່ນ​ດຽວ​ກັບ​ທຸກໆທີມ​ທີ່​ເຂົ້າ​ຮວມ​ແຂ່ງ­ຂັນ​ໃນ​ລາຍ­ການ​ນີ້​ທີ່​ລ້ວນ​ແຕ່​ມີ​ນັກ​ເຕາະ​ສີ­ຕີນ​ດີ​ທັງ​ນັ້ນ. ຢ່າງ­ໃດ​ກໍ່​ຕາມ, ຜ່ານ​ການ​ແຂ່ງ­ຂັນ​ນັດ​ທຳ​ອິດ​ພວກ​ເຮົາ​ລົງ​ແຂ່ງ­ຂັນ​ມາ​ກໍ່​ເຫັນ​ວ່າ​ປະ­ສົບ​ຜົນ­ສຳ­ເລັດ​ຕາມ​ຄາດ ແລະ ນັດ​ຕໍ່​ໄປ​ຈະ​ພະ­ຍາ­ຍາມ​ເຮັດ​ເຕັມ­ທີ່, ສ່ວນ​ນັກ­ກີ­ລາ​ກໍ່​ໄດ້​ຮັບ​ບາດ­ເຈັບ​ຈຳ­ນວນ​ໜຶ່ງ ເຊິ່ງ​ອາ­ການ​ກໍ່​ບໍ່​ໜັກ​ປານ­ໃດ ແລະ ພ້ອມ​ຈະ​ລົງ​ແຂ່ງ​ໃນ​ນັດ​ຕໍ່​ໄປ​ໄດ້​ອີກ ” ຫົວ­ໜ້າ​ຄູ​ຝຶກ ປກສ ກ່າວ.

ສຳ­ລັບ ທ່ານ ບຸນ​ມາ ປະ​ຖ້ຳ​ມະ​ວົງ ເຄີຍ​ພາ ປກສ ເອ​ັຟ​ຊີ ເປີດ​ບ້ານ​ເອົາ​ຊະ­ນະ ລາວ​ໂຕ​ໂຢ​ຕ້າ ເອ​ັຟ​ຊີ 3 – 0 ໃນ​ການ​ແຂ່ງ­ຂັນ​ບານ­ເຕະ ລາວ​ພຣີ​ເມຍ​ລີກ 2014 ຮອບ​ຂາ​ໄປ​ໄດ້​ຄັ້ງ​ດຽວ​ຈາກ​ການ​ພົບ​ກັນ 6 ຄັ້ງ, ສ່ວນ​ທີ່​ເຫຼືອ​ແມ່ນ​ສະ­ເໝີ 1 ນັດ ແລະ ເສຍ 4 ນັດ ເຊິ່ງ​ນັດ​ວັນ​ເສົາ​ນີ້​ເປັນ​ໂອ­ກາດ​ດີ​ທີ່​ຄູ​ຝຶກ​ຄົນ​ດັ່ງ­ກ່າວ​ຈະ​ພາ​ທີມ​ລ້າງ​ຕາ​ຫຼັງ​ຈາກ​ທີ່​ສ້າງ​ຄວາມ​ໝັ້ນ​ໃຈ​ຈາກ​ນັດ​ຫຼ້າ​ສຸດ​ທີ່​ຊະ­ນະ ໄອ​ດີ​ຊີ ຈຳ­ປາ​ສັກ ຂາດ​ລອຍ 7 – 1 ແລະ ຈະ​ສວາຍ​ໂອ­ກາດ​ຕອນ​ທີ່ ລາວ​ໂຕ​ໂຢ​ຕ້າ ເອ​ັຟ​ຊີ ຍັງ​ບໍ່​ຟື້ນ​ຕົວ ລວມ​ເຖິງ​ນັກ​ເຕະ​ຍັງ​ບໍ່​ພ້ອມ​ເຕັມ­ທີ່​ເນື່ອງ​ຈາກ​ທີມ​ດັ່ງ­ກ່າວ​ປີ​ນີ້​ໃຊ້​ນັກ​ເຕະ​ໃໝ່​ຫຼາຍ​ຄົນ ແລະ ນັກ​ເຕະ​ເກົ່າ​ຍັງ​ໄດ້​ຮັບ​ບາດ­ເຈັບ​ຢູ່.

ຂະ­ນະ​ທີ່ ລາວ​ໂຕ​ໂຢ​ຕ້າ ເອ​ັຟ​ຊີ ງານ​ເຂົ້າ​ຕໍ່​ເນື່ອງ​ເມື່ອ​ຄະ­ນະ​ກຳ­ມະ­ການ​ລະ­ບຽບ​ວິ­ໄນ ຂອງ​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ ( ສຕລ ) ປະ­ກາດ​ເມື່ອ​ວັນ​ທີ 4 ເມ­ສາ ທີ່​ຜ່ານ​ມາ ວ່າ: ຕົກ­ລົງ​ໃສ່​ວິ­ໄນ ທ່ານ ບຸນ​ລັບ ເຄນ​ກິ​ຕິ​ສັກ ຫົວ­ໜ້າ​ຄູ​ຝຶກ ລາວ​ໂຕ​ໂຢ​ຕ້າ ເອ​ັຟ​ຊີ ດ້ວຍ​ການ​ບໍ່​ໃຫ້​ລົງ​ຄຸມ​ທີມ​ໃນ​ເວ­ລາ​ແຂ່ງ­ຂັນ​ເປັນ​ຈຳ­ນວນ 2 ນັດ ເນື່ອງ​ຈາກ​ຜູ້­ກ່ຽວ​ໄດ້​ສະ­ແດງ​ທ່າ​ທີ ແລະ ໃຊ້​ຄຳ​ເວົ້າ​ທີ່​ບໍ່​ເໝາະ​ສົມ​ຕໍ່​ກຳ­ມະ­ການ​ຕັດ­ສິນ​ໃນ​ນັດ​ທີ່​ພາ​ທີມ​ເສຍ​ໃຫ້ ມຊ ເອ​ັຟ​ຊີ 0 – 2 ເຮັດ​ໃຫ້ ລາວ​ໂຕ​ໂຢ​ຕ້າ ຈະ​ຂາດ​ຫົວ­ໜ້າ​ຄູ​ຝຶກ​ຄົນ​ດັ່ງ­ກ່າວ​ທີ່​ຢືນ​ປະ­ຈຳ​ຢູ່​ຂ້າງ​ສະ­ໜາມ​ແນ່­ນອນ​ໃນ​ນັດ​ທີ່​ບຸກ​ໄປ​ຢາມ ປກສ.

ສະ­ຖາ­ນະ​ການ​ປັດ­ຈຸ­ບັນ​ຂອງ ລາວ​ພຣີ​ເມຍ​ລີກ 2017 ຜ່ານ​ໄປ​ອາ­ທິດ​ທຳ​ອິດ ປກສ ເອ​ັຟ​ຊີ ມີ 3 ຄະ­ແນນ​ເທົ່າ​ກັບ ມຊ ເອ​ັຟ​ຊີ ແລະ ສະ­ຫວັນ ຢູ​ໄນ​ເຕັດ ແຕ່ ປກສ ເອ​ັຟ​ຊີ ມີ​ປະ­ຕູ​ໄດ້​ເສຍ​ດີ​ກວ່າ ແລະ ຢຶດ​ທີມ​ນຳ​ໃນ​ຕາ­ຕະ­ລາງ​ຄະ­ແນນ​ລວມ ເຊິ່ງ​ມີ​ລາຍ­ການ​ແຂ່ງ­ຂັນ​ຕ້ອນ­ຮັບ​ການ​ມາ​ຢາມ​ຂອງ ລາວ​ໂຕ​ໂຢ​ຕ້າ ເອ​ັຟ​ຊີ ທີ່​ຍັງ​ບໍ່​ມີ​ຈັກ​ຄະ­ແນນ​ຈາກ​ການ​ເສຍ​ໃນ​ນັດ​ທຳ​ອິດ​ໃນ​ວັນ​ທີ 8 ເມ­ສາ ນີ້ ເວ­ລາ 17:00 ໂມງ ທີ່​ສະ­ໜາມ​ກີ­ລາ​ແຫ່ງ​ຊາດ ຫຼັກ 16, ສ່ວນ​ອີກ​ຄູ່​ໜຶ່ງ​ໃນ​ວັນ​ດຽວ​ກັນ ສະ­ຫວັນ ຢູ​ໄນ​ເຕັດ ເປີດ​ບ້ານ​ຮັບ​ການ​ມາ​ຢາມ​ຂອງ ໄອ​ດີ​ຊີ ຈຳ­ປາ​ສັກ ເວ­ລາ 16:00 ໂມງ ທີ່​ສະ­ໜາມ​ກາງ​ແຂວງ​ສະ­ຫວັນ​ນະ​ເຂດ.

 

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.