ຫົວ​ແຊ​ຈະ­ເລີນ ພັດ­ທະ­ນາຕໍ່​ເນື່ອງ​ກາງ​ປີ​ມີ​ກຳ­ໄລ 600 ລ້ານ​ກີບ

ຫົວແຊຈະ­ເລີນ ພັດ­ທະ­ນາຕໍ່ເນື໋ອງກາງປີມີກຳ­ໄລ 600 ລ້ານກີບ

ຈາກການບໍລິຫານທີ່ຍອດຢ້ຽມບວກ ກັບຄວາມສາ­ມາດທີ່ເປັນມືອາ­ຊີບຂອງພະນັກງານ-ວິ­ຊາການ ເຮັດໃຫ້ສະ­ຫະ­ກອນສິນເຊື່ອ ແລະເງິນຝາກປະ­ຢັດຫົວແຊຈະ­ເລີນມີການພັດ­ທະ­ນາຢ່າງ ງອກງາມ; ໃນເຄິ່ງປີນີ້ມີຜົນກຳ­ໄລແລ້ວ 600 ລ້ານກີບ ແລະ ຄາດວ່າໝົດປີອາດເພີ່ມຂຶ້ນ 40% ຖ້າທຽບ­ໃສ່ປີກ່ອນພ້ອມວາງແຜນຈະຂະຫຍາຍໜ່ວຍບໍ­ລິ­ການ ເພື່ອອຳ­ນວຍຄວາມສະ­ດວກໃຫ້ລູກຄ້າໃນອີກບໍ່ຊ້ານີ້.

ສະ­ຫະ­ກອນສິນເຊື່ອ ແລະເງິນຝາກປະ­ຢັດຫົວແຊຈະ­ເລີນ (ສສງ) ເມື່ອ 10 ປີ ຫຼັງເປັນພຽງກອງທຶນນ້ອຍໆຂອງບ້ານຫົວແຊຈະ­ເລີນ ເມືອງບາຈຽງຈະ­ເລີນສຸກ ແຂວງຈຳ­ປາສັກ, ຕອນນັ້ນມີພະ­ນັກ­ງານບໍ່ພໍເທົ່າ­ໃດຄົນ ແລະມີສະ­ມາ­ຊິກພຽງ 200 ກວ່າຄົນ, ທີ່ບໍ­ລິ­ຫານຈັດ­ການກ່ຽວກັບເງິນເພື່ອປະ­ຕິ­ບັດນະ­ໂຍ­ບາຍຂອງລັດໃນການໃຫ້ເງິນກູຢຶມ ແລະຮັບເງິນຝາກແກ່ປະ­ຊາ­ຊົນ, ເພື່ອເຮັດໃຫ້ເຂົາ­ເຈົ້າມີການເປັນຢູ່ທີ່ດີຂຶ້ນເທື່ອລະກ້າວ, ແຕ່ເຖີງວ່າ ການດຳ­ເນີນງານໃນເບື້ອງຕົ້ນຈະພົບຄວາມຫຍຸ້ງ­ຍາກ ແຕ່ດ້ວຍຄວາມພະ­ຍາ­ຍາມຂອງຜູ້ບໍ­ລິ­ຫານ, ຂອງພະ­ນັກ­ງານ ແລະວິ­ຊາການພາຍໃນ ສສງ ຫົວແຊຈະ­ເລີນໄດ້ພາ­ກັນເຮັດໃຫ້ກອງທຶນດັ່ງ­ກ່າວ ມີການພັດ­ທະ­ນານັບມື້ເຕີບໃຫຍ່ເຂັ້ມ­ແຂງ ແລະສາ­ມາດຍົກລະ­ດັບຕົນໃຫ້ກາຍ­ເປັນສະ­ຫະ­ກອນແຫ່ງທຳອິດໃນແຂວງຈຳ­ປາ ສັກໃນປີ 2009, ໂດຍພາຍໃຕ້ການບໍລິ ຫານຈັດ­ການຂອງທ່ານ ຫຸມ­ພັນ ອິນທະວົງ, ປະ­ຈຸບັນ ສສງ ແຫ່ງນີ້ມີພະ­ນັກ­ງານທັງໝົດ 12 ຄົນ ແລະ ມີຄະ­ນະສະ­ພາຮ່ວມກັນເຖີງ 9 ທ່ານ, ມີສະ­ມາ­ຊິກຫຼາຍ ກວ່າ 1.400 ຄົນ ແລະ ມີຍອດຊັບສິນທັງໝົດ 10 ຕື້ກວ່າກີບ.

ທ່ານ ຫຸມ­ພັນ ອິນທະວົງ ປະ­ທານສະ­ພາບໍ­ລິ­ຫານສະ­ຫະ­ກອນສິນເຊື່ອ ແລະ ເງິນຝາກປະ­ຢັດຫົວແຊຈະ­ເລີນໄດ້ໃຫ້ສຳພາດຕໍ່ນັກຂ່າວໜັງ­ສື­ພິມເສດ­ຖະ­ກິດ-ສັງຄົມເມື່ອບໍ່ດົນມານີ້ວ່າ: ບັນ­ຍາ­ກາດຂອງ ການເຂົ້າມາໃຊ້ບໍ­ລິ­ການຂອງພໍ່ແມ່ປະຊົນພາຍໃນສະ­ຫະ­ກອນເຮົາປະ­ຈຸບັນແມ່ນຍັງຄຶກ­ຄື້ນຄື­ເກົ່າ ປະ­ຊາ­ຊົນມີຄວາມເຊື່ອໝັ້ນເຂົ້າມາໃຊ້ບໍ­ລິ­ການຢ່າງບໍ່ຂາດ, ທີ່ສຳ­ຄັນໄດ້ເປີດຫ້ອງ­ການໃໝ່ຢູ່ທີ່ບ້ານໜອງນ້ຳຂາວຫຼັກ 11 ເມືອງບາຈຽງ ຈະ­ເລີນສຸກ ເຮັດໃຫ້ປະ­ຊາ­ຊົນກໍຄືລູກຄ້າມີຄວາມສະ­ດວກຂຶ້ນສະ­ບາຍໃນການເຂົ້າມາໃຊ້ບໍ­ລິ­ການ, ເຮັດໃຫ້ໃນ 7 ເດືອນ
ຂອງປີ 2016 ຜ່ານມາມີຍອດເງິນຝາກ ບັນ­ລຸ 7 ຕື້ກວ່າກີບ, ຊຶ່ງປະ­ຕິ­ບັດໄດ້ເກີນ ແຜນ­ທີ່ວາງໄວ້, ສ່ວນທາງດ້ານການໃຫ້ກູ້ຢືມໃນເຄິ່ງປີ­ຜ່ານ­ມາແມ່ນປະ­ຕິ­ບັດເກີນແຜນເຊັ່ນກັນ, ສ່ວນທາງດ້ານຜົນກຳໄລສະ­ຫະ­ກອນຕັ້ງເປົ້າໝົດປີໃຫ້ມີຜົນກຳ­ໄລ 600 ລ້ານກີບ, ຕົກມາຮອດທ້າຍເດືອນກໍ­ລະ­ກົດ (6 . 2016 ) ສະ­ຫະກອນມີຜົນກຳ­ໄລແລ້ວ 600 ກວ່າລ້ານ ກີບ ແລະຄາດວ່າໝົດປີນີ້ທາງສະ­ຫະ ກອນຈະຜົນກຳ­ໄລເພີ່ມຂຶ້ນຈາກປີກາຍ 40% (ປີ 2015 ມີກຳ­ໄລ 600 ລ້ານກີບ).

ທ່ານປະ­ທານສະ­ພາຜູ້ບໍ­ລິ­ຫານໃຫ້ຮູ້ຕື່ມວ່າ: ຜົນປະ­ກອບການທີ່ອອກມາດີໄດ້ເນື່ອງຈາກວ່າພະ­ນັກ­ງານ, ວິ­ຊາການ ແລະ ຄະ­ນະສາພາຜູ້ບໍ­ລິ­ຫານພວກເຮົາໄດ້ມີຄວາມພະ­ຍາ­ຍາມໃນການບໍ­ລິ­ຫານ ຈັດ­ການຢ່າງຕັ້ງ­ໜ້າໃຫ້ບໍ­ລິ­ການປະ­ຊາ­ຊົນ ດ້ວຍຄວາມເຕັມໃຈ ແລະມີຄວາມສຸດ­ຈະ­ລິດຍຸດ­ຕິທຳຕໍ່ສະ­ມາ­ຊິກ, ພະ­ນັກງານມີລະ­ບຽບວິ­ໄນການໃຫ້ບໍ­ລິ­ການ ແລະມີຄວາມຮູ້ຄວາມສາ­ມາດທີ່ຊຳ­ນານງານສູງ ແລະ ເພື່ອອຳ­ນວຍຄວາມສະດວກຍີ່ງຂື້ນໃນໄວໆນີ້ ສສງ ຫົວແຊຈະເລີນຈະໄດ້ຂະ­ຫຍາຍໜ່ວຍບໍ­ລິ­ການໃນເມືອງປາກເຊຕື່ມອີກ ເພື່ອເປີດທາງເລືອກ ແລະສ້າງຄວາມເອື້ອອຳ­ນວຍໃຫ້ກັບລູກຄ້າ.

ທີ່ມາ: ນສພ ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.