ຫຼວງນໍ້າທາ ໄດ້ຮັບທຶນຊ່ວຍເຫຼືອລ້າ 40 ກວ່າໂຄງການ

ການພົວພັນຮ່ວມມືສາກົນຖືວ່າເປັນວຽກງານໜຶ່ງທີ່ສໍາຄັນສໍາລັບແຂວງຫຼວງນໍ້າທາ ເນື່ອງຈາກວ່າໃນການເປັນປະທານກອງປະຊຸມສຸດຍອດອາຊຽນຄັ້ງທີ 28-29 ໄດ້ສ້າງເງື່ອນໄຂໃຫ້ ສປປ ລາວ ເວົ້າລວມເວົ້າສະເພາະກໍຄືແຂວງຫຼວງນໍ້າທາໄດ້ເຂົ້າເຖິງແຫຼ່ງທຶນແຫ່ງການພົວພັນຮ່ວມມືກັບສາກົນຫຼາຍຂຶ້ນໂດຍສະເພາະການພົວພັນຮ່ວມມືກັບປະເທດ ເພື່ອນບ້ານ ຊຶ່ງໃນສົກປີ 2015-2016 ແຂວງດັ່ງກ່າວຍາດແຍ່ງ ເອົາທຶນຊ່ວຍເຫຼືອລ້າຈາກອົງການຈັດຕັ້ງສາກົນໄດ້ເຖິງ 41 ໂຄງການ ມູນຄ່າ 54,84 ຕື້ກີບ ຫຼື ປະມານ 6,85 ລ້ານໂດລາສະຫະລັດ.

ອີງຕາມຂໍ້ມູນຂອງພະແນກແຜນ ແລະການລົງທຶນແຂວງຫຼວງນ້ຳທາ ເປີດເຜີຍວ່າ: ແຂວງຫຼວງນໍ້າທາ ໄດ້ຮັບທຶນຊ່ວຍເຫຼືອລ້າຈາກອົງການຈັດຕັ້ງສາກົນທັງໝົດ 41 ໂຄງການ ມູນຄ່າ 54,84 ຕື້ກີບ ຫຼື ປະມານ 6,85 ລ້ານໂດລາ ໃນນັ້ນທຶນຊ່ວຍເຫຼືອເພື່ອການພັດທະນາ 33 ໂຄງການມູນຄ່າ 44 ຕື້ກວ່າກີບ ປະມານ 5,56 ລ້ານໂດລາ, ການຊ່ວຍເຫຼືອຈາກອົງການຈັດຕັ້ງສາກົນທີ່ບໍ່ ຂຶ້ນກັບລັດຖະບານ (INGO) 7  ໂຄງການ ມູນຄ່າ 10 ຕື້ກວ່າກີບ ຫຼື ປະມານ 1,28 ລ້ານໂດລາ, ໄດ້ຮັບຈາກ ສສ ຫວຽດນາມ ທັງໝົດ 90 ຕື້ກວ່າກີບ ເທົ່າກັບ 11,36 ລ້ານໂດລາ ໃນນັ້ນກໍ່ສ້າງໂຮງໝໍກອງທັບບັນຊາການຕໍາຫຼວດພ້ອມທັງອຸປະກອນຈໍານວນ 452.815 ໂດລາ, ກໍ່ສ້າງໂຮງຮຽນປະຖົມສົມບູນເທສະບານແຂວງ, ໂຮງຮຽນມັດທະຍົມສົມບູນເທສະບານແຂວງ ແລະໂຮງຮຽນມັດເທສະບານເມືອງວຽງພູຄາ 10,10 ລ້ານໂດລາ ແລະທຶນຊ່ວຍເຫຼືອ ເຂົ້າໃນການພັດທະນາເສດຖະກິດ-ສັງຄົມ 8 ແສນໂດລາ.

ນອກນີ້ ຍັງໄດ້ຮັບທຶນຊ່ວຍເຫຼືອລ້າຈາກ ສປ ຈີນ ຈໍານວນ 662.166 ໂດລາ ເຂົ້າໃນການພັດທະນາຂະແໜງພາຍໃນເປັນຕົ້ນແມ່ນໂຄງການຄວບຄຸມພະຍາດສັດຂ້າມຊາຍແດນ 15.875 ໂດລາ, ໂຄງການລ້ຽງສັດເພື່ອຜະລິດເປັນສິນຄ້າເຂດພາກເໜືອຂອງລາວ 31 ພັນໂດລາ, ການຮ່ວມມືປ້ອງກັນປ່າສະຫງວນນໍ້າຫ້າ, ເຕົາແກ໊ສຊີວະພາບ 567.750 ໂດລາ, ສະໜອງພາຫະນະໃຫ້ ກອງບັນຊາການຕໍາຫຼວດແຂວງ 25 ພັນໂດລາ, ໂຄງການທົດລອງ ເພື່ອໃຊ້ແຮງລົມເພື່ອຜະລິດເປັນພະລັງງານໄຟຟ້າ 6.916 ໂດລາ, ສະໜອງຄອມພິວເຕີໃຫ້ພະແນກວິທະຍາສາດ ແລະເຕັກໂນໂລຊີ ເປັນມູນຄ່າ 7.500 ໂດລາ, ສະໜອງແນວພັນປາໃຫ້ພະແນກຊັບພະຍາກອນທໍາມະຊາດ ແລະສິ່ງແວດລ້ອມ 8.125 ໂດລາພ້ອມດຽວກັນນັ້ນ ທາງແຂວງຍັງສາມາດດຶງດູດເອົາການລົງທຶນເອກະຊົນພາຍໃນ ແລະຕ່າງປະເທດ ໂດຍໃນໄລຍະ 9 ເດືອນມານີ້ມີນັກລົງທຶນເອກະຊົນພາຍໃນ ແລະຕ່າງປະເທດສະເໜີຂໍລົງ ທຶນທັງໝົດ 32 ໂຄງການ ມູນຄ່າ 536 ຕື້ກວ່າກີບ ຫຼື ປະມານ 67 ລ້ານກວ່າໂດລາ, ທຶນຈົດທະບຽນ 391 ຕື້ກວ່າກີບ ຫຼື ປະມານ 48,89 ລ້ານໂດລາ ໃນນີ້ໂຄງການສະເໜີຂໍລົງທຶນທີ່ໄດ້ຜ່ານການຄົ້ນຄວ້າໃນກອງປະຊຸມ ຄລທ ຂັ້ນແຂວງມີທັງໝົດ 17 ໂຄງການ ເປັນນັກລົງທຶນພາຍໃນ 9 ໂຄງການມູນຄ່າ 24 ຕື້ກວ່າ ກີບ ຫຼື ປະມານ 3,10 ລ້ານໂດລາ, ທຶນຈົດທະບຽນ 2,44 ລ້ານ ໂດລາ ແລະເປັນນັກລົງທຶນຂອງຕ່າງປະເທດ 8 ໂຄງການ ມູນຄ່າ 280 ຕື້ກວ່າກີບ ຫຼື ປະມານ 35 ລ້ານກວ່າໂດລາ, ທຶນຈົດທະບຽນ 12 ລ້ານກວ່າໂດລາ ໃນນັ້ນໄດ້ຜ່ານການຄົ້ນຄວ້າພິຈາລະນາອະນຸມັດແລ້ວ 9 ໂຄງການເປັນນັກລົງທຶນພາຍໃນ 4  ໂຄງການມູນຄ່າ 2,78 ລ້ານໂດລາ ແລະນັກລົງທຶນຕ່າງປະເທດ 4 ໂຄງການ ມູນຄ່າການລົງທຶນ 26,75 ລ້ານໂດລາ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.