ອະ­ນຸ­ຍາດ​ໃຫ້​ເອ­ກະ​ຊົນ​ສຳ​ຫຼວດ-ຂຸດ​ຄົ້ນ​ແຮ່​ຄຳ ທີ່​ເມືອງ​ດາກ​ຈຶງ

ອຳ­ນາດ​ການ​ປົກ­ຄອງ​ຂອງ​ແຂວງ​ເຊ​ກອງ ໄດ້​ເຊັນ​ສັນ­ຍາ​ອະ­ນຸ­ຍາດ​ໃຫ້​ບໍລິ​ສັດ ພັດ­ທະ­ນາ​ເຊ​ກອງ ຈຳ­ກັດ ​ດຳ­ເນີນການ​ສຳ​ຫຼວດ-ຂຸດ​ຄົ້ນ​ແຮ່​ຄຳ ໃນ​ເນື້ອ­ທີ່ 21 ເຮັກ­ຕາ​ຢູ່​ເຂດ​ບ້ານ​ດາກ​ປອງ, ດາກສາ ແລະ​ບ້ານ​ຕັງ​ລູເມືອງ​ດາກ​ຈຶງໃນໄລ­ຍະ​ເວ­ລາ 2 ປີ.

ການ​ອະ­ນຸ­ຍາດ​ດັ່ງ­ກ່າວ​ມີ​ຂຶ້ນ​ໃນ​ວັນທີ 7 ເມ­ສາ 2017 ທີ່​ຫ້ອງ​ປະ­ຊຸມ​ພະ ແນກ​ແຜນ­ການ ແລະ​ການ​ລົງ­ທຶນ​ແຂວງ ຊຶ່ງ​ຮ່ວມ​ກັນ​ລົງ​ນາມ​ມີ​ທ່ານ ທອງ­ຄຳ ມະ­ນີ​ວົງ ຫົວ­ໜ້າ​ພະ​ແນກ​ແຜນ­ການ ແລະ​ການ​ລົງ­ທຶນ, ທ່ານ ເພັດ​ສະ­ໝອນ ຄອນ​ປະ­ສິດ ຫົວ­ໜ້າ​ພະ​ແນກ​ພະ­ລັງ­ງານ ແລະ​ບໍ່​ແຮ່, ທ່ານ ບຸນ​ຫຼາຍ ບຸດ​ທິ ຫົວ­ໜ້າ​ພະ​ແນກ​ຊັບ­ພະ­ຍາ­ກອນ​ທຳ​ມະ​ຊາດ ແລະ​ສິ່ງ­ແວ­ດລ້ອມ, ທ່ານ ບຸນ​ຮອນ ລຽບ​ເຊ​ກອງ ຮອງ​ຫົວ­ໜ້າ​ພະ­ແນກ­ການ ເງິນ​ແຂວງ ແລະ​ທ່ານ ເຈິນ ກົງ​ຮວ່ານ ອຳ­ນວຍ​ການ​ບໍ­ລິ­ສັດພັດ­ທະ­ນາ​ເຊ​ກອງ ຈຳ­ກັດ ໂດຍ​ຊ້ອງ​ໜ້າ​ທ່ານ ສີ­ດາ ສຸ­ວັນນະ​ສາຍ ຮອງ​ເຈົ້າ­ແຂວງ​ເຊ​ກອງ, ທ່ານ ເຈົ້າ­ເມືອງໆ​ດາກ​ຈຶງ ແລະ​ພະ­ນັກ­ງານກ່ຽວ­ຂ້ອງ​ເຂົ້າ​ຮ່ວມ.

ທ່ານ ເພັດ​ສະ­ໝອນ ຄອນ​ປະ­ສິດ ກ່າວ​ວ່າ: ສັນ­ຍາ​ສະ­ບັບ​ນີ້ມີ​ກຳ­ນົດ​ເວລາ​ພາຍ​ໃນ 2 ປີ ໂດຍ​ເລີ່ມ​ແຕ່​ວັນ​ທີ 7 ເມ­ສາ 2017 ຫາ​ວັນ​ທີ 7 ເມ­ສາ 2019 ໃນ​ເນື້ອ­ທີ່​ສຳ​ປະ­ທານ​ຊອກ​ຄົ້ນ ແລະ​ສຳຫຼວດ ຈຳ­ນວນ 21 ເຮັກ­ຕາ, ໃນ​ນີ້ ເນື້ອທີ່​ເຮັດ​ການ​ຂຸດ​ຄົ້ນ​ແຮ່​ຄຳ​ແມ່ນ 11 ເຮັກ­ຕາ ແລະ​ເຂດ​ຊອກ​ຄົ້ນ-ສຳ​ຫຼວດ 10 ເຮັກ­ຕາ ແລະ​ເຂດ​ໂຮງ­ງານ​ປຸງ​ແຕ່ງ​ແຮ່ 6,74 ເຮັກ­ຕາ ຊຶ່ງ​ບໍ່​ໄດ້​ກວມ​ໃນ​ເຂດ​ຊອກຄົ້ນ, ສຳ​ຫຼວດ ແລະ​ຂຸດ​ຄົ້ນ​ແຮ່​ຄຳ.

ໃນ​ໄລ­ຍະ​ການ​ຊອກ​ຄົ້ນ-ສຳ​ຫຼວດ ແລະ​ຂຸດ​ຄົ້ນ​ບໍ­ລິ­ສັດ​ຮັບ­ຜິດ­ຊອບ​ຈ່າຍ​ເງິນ ພັນ­ທະ​ໃຫ້​ແຂວງ​ເຊ​ກອງ​ແບບ​ມອບເໝົາ​ຂາດ​ຕົວ​ໃນ​ຈຳ­ນວນ 580.000 ໂດ ລາ​ສະ­ຫະ­ລັດ​ຕໍ່​ປີ ໃນ​ນີ້​ປະ­ກອບ​ມີ​ກອງ ທຶນ​ພັດ­ທະ­ນາ ແຂວງ 216.000 ໂດ​ລາ, ກອງ​ທຶນ​ພັດ­ທະ­ນາ​ເມືອງ 160.000 ໂດລາ, ກອງ​ທຶນ​ພັດ­ທະ­ນາ ບ້ານ 180.000 ໂດ​ລາ, ຄະ­ນະ​ກຳ­ມະ­ການ​ຄຸ້ມ​ຄອງ 24.000 ໂດ​ລາ ໂດຍ​ແບ່ງ​ອອກ​ເປັນ 2 ງວດ​ຄື: ງວດ​ທີ 1 ໃຫ້​ຖອກ​ພາຍ­ຫຼັງເຊັນ​ສັນ­ຍາ​ແລ້ວ​ກຳ­ນົດ 7 ວັນ ແລະ ງວດ​ທີ 2 ໃຫ້​ຖອກ​ພາຍ​ໃນ​ກຳ­ນົດ 3 ເດືອນ (90 ວັນ) ນັບ​ແຕ່​ມື້​ເຊັນ​ສັນ­ຍາເປັນ­ຕົ້ນ​ໄປ.

ແນວ­ໃດ​ກໍ​ດີ ການ​ດຳ­ເນີນ​ງານ​ຂອງ​ບໍ­ລິ­ສັດ​ໃນ​ໄລ­ຍະ​ເວ­ລາ 2 ປີ ເຊື່ອ​ແນ່​ວ່າ ຈະ​ເປັນ​ການ​ສ້າງ​ເງື່ອນ­ໄຂ​ທ່າ­ແຮງ​ສຳຄັນ​ປະ­ກອບ­ສ່ວນ​ເຂົ້າ​ໃນ​ການ​ພັດ­ທະ­ນາ​ເສດຖະ​ກິດ-ສັງ­ຄົມ​ຂອງ​ແຂວງ, ເມືອງ ແລະ ບ້ານ​ໃນ​ຂອບ​ເຂດ​ດັ່ງ­ກ່າວ ໂດຍ​ສະ­ເພາະແມ່ນ​ການ​ແກ້​ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ​ຕາມ​ແນວ­ທາງ​ນະ­ໂຍ­ບາຍຂອງ​ພັກ ແລະ​ລັດ​ວາງ​ອອກ.

ໂດຍ: ສັນ­ຍາ ແກ້ວ​ໄຊ​ຍະ​ວົງ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.