ອັນຕະລາຍ! ສາລະວັນລົງກວດສິນຄ້າພົບວ່າແຊ່ຢາດອງສົບ

ສານປົນເປື້ອນສານຟໍມາລິນ ເປັນທີ່ຮູ້ຈັກກັນດີວ່າເປັນນ້ຳຢາດອງສົບທີ່ອັນຕະລາຍ ຜູ້ບໍລິໂພກທັງຫຼາຍປະປົນຢູ່ນຳຜັກ, ໝາກໄມ້ ແລະ ຊີ້ນສັດ, ອາຫານທະເລຕ່າງໆ, ຜູ້ທີ່ໄດ້ຮັບສານດັ່ງກ່າວນັ້ນຈະເກີດອາຫານຕັ້ງແຕ່ເຈັບທ້ອງ, ຖອກທ້ອງ, ຍ່ຽວບໍ່ອອກໄປ ຫຼື ອາດເສຍຊີວິດ ແລະ ຍັງເປັນຕົ້ນເຫດຂອງການເປັນພະຍາດມະເຮັງອີກດ້ວຍ.

ສານຟໍມາລິນຫາກຜູ້ໃດໄດ້ຮັບໃນປະລິມານ 60-90 ຊີຊີ ຈະເຮັດໃຫ້ການເຮັດວຽກຂອງຕັບໄຕຫົວໃຈ ແລະ ສະໝອງເສື່ອມ ແລະ ກໍ່ໃຫ້ເກີດການປວດແສບຮ້ອນຄໍ ຮູ້ສຶກປວດຮາກ ຫຼື ອາດຮຸນແຮງໄປເຖິງໝົດສະຕິ. ຖ້າຫາກສຳຜັດທາງນອກຈະເກີດການລະຄາຍເຄືອງ ຕໍ່ຜິວໜັງເຮັດໃຫ້ເກີດຜືນແດງຈົນເຖິງຜີວໜັງໄໝ້ປ່ຽນເປັນສີຂາວ.

ທີ່ໜ້າຄິດພໍ່ຄ້າແມ່ຄ້າຫົວໃສມັກນຳເອົາສານຟໍມາລິນມາໃສ່ອາຫານການກິນໃຫ້ໄດ້ຂາຍຍາວນານທີ່ສຸດ ເພື່ອຜົນໄດ້ຮັບໃນກະເປົາຂອງເຂົາແຕ່ເຮົາຜູ້ບໍລິໂພກມີຄວາມສ່ຽງ ດັ່ງກໍລະນີໃນວັນທີ 19 ມີນາ 2019 ຜ່ານມາ, ເຈົ້າໜ້າທີ່ແຂວງສາລະວັນ ລົງເຄື່ອນໄຫວກວດສານພິດເຈືອປົນໃນອາຫານຄື: ປະເພດອາຫານທະເລ, ພືດ, ຜັກ ແລະ ຊີ້ນສ່ວນສັດ ທີ່ນໍາເຂົ້າຈາກປະເທດເພື່ອນບ້ານ ມາວາງຂາຍຢູ່ຕະຫຼາດເມືອງ ແລະ ແຂວງສາລະວັນ. ນໍາພາໂດຍ ທ່ານ ນາງ ຄໍາພຽນ ພັນທະບູລີ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງ ພ້ອມດ້ວຍຂະແໜງການທີ່ກ່ຽວຂ້ອງ ແລະ ວິຊາການ ເຂົ້າຮ່ວມ.

ການລົງກວດກາສານຕົກຄ້າງ, ເຈືອປົນນໍາສິນຄ້າປະເພດພືດຜັກ ແລະ ສັດ ທີ່ນໍາເຂົ້າຈາກປະເທດເພື່ອນບ້ານ ແລະ ນໍາມາວິໄຈ, ມີອາຫານທະເລ, ປາມຶກ, ກຸ້ງ ແລະ ອື່ນໆ, ໃນນັ້ນ ມີຊີ້ນສ່ວນສັດທີ່ນໍາມາກວດແມ່ນ ລີ້ນໝູ, ເຄື່ອງໃນໄກ່ພັນ.

ຜ່ານການກວດກາ-ວິໄຈ ແມ່ນພົບສານ ຟໍມາລິນ ຕົກຄ້າງຢູ່ນໍາປາມຶກ ໃນຈໍານວນ 2 ກິໂລ, ເຊິ່ງເປັນອາຫານທີ່ນໍາເຂົ້າຈາກ ສສ ຫວຽດນາມ ແລະ ຊິ້ນສ່ວນສັດປະເພດລີ້ນໝູ ແມ່ນນໍາເຂົ້າຈາກປະເທດໄທ. ສໍາລັບການວິໄຈພືດຜັກ, ໝາກໄມ້ ທີ່ນໍາເຂົ້າຈາກພາຍໃນ ແລະ ປະເທດເພື່ອນບ້ານ ແມ່ນໄດ້ນໍາມາວິໄຈມີຢູ່ 11 ຊະນິດຄື: ຜັກບົວຫົວໃຫຍ່, ຜັກກາດດອກ, ຜັກກາດຫໍ່, ຜັກກະຫຼໍ່າປີ, ຜັກບົ່ວໃບ, ຜັກຊີ, ໝາກເຫຼັ່ນ, ໝາກນາວ, ໝາກສີດາ, ໝາກກ້ຽງ, ໝາກແອັບເປີ້ນ.

ຜ່ານການວິໄຈ ແມ່ນກວດພົບສານເຈືອປົນ ເກີນຄາດໝາຍທີ່ບໍ່ສາມາດບໍລິໂພກໄດ້ແມ່ນມີ: ໝາກເຫຼັ່ນ, ໝາກນາວ, ຜັກກາດຫໍ່ ແລະ ຜັກຊີ ເຊິ່ງໃຊ້ເວລາວິໄຈ 2 ຊົ່ວໂມງ ຈຶ່ງຮູ້ຜົນ ທັງເປັນສິນຄ້ານໍາເຂົ້າຈາກປະເທດໄທ ແລະ ຫວຽດນາມ. ພາຍຫຼັງທີ່ກວດພົບແລ້ວເຈົ້າໜ້າທີ່ ແລະ ພາກສ່ວນທີ່ກ່ຽວຂ້ອງ ແມ່ນໄດ້ເຮັດບົດບັນທຶກຕັກເຕືອນເຈົ້າຂອງຮ້ານ ແລະ ຖ້າມີການກວດພົບເທື່ອທີ 2 ແມ່ນຈະໄດ້ປັບໃໝຕາມມູນຄ່າຂອງສິນຄ້າ.

ເຊິ່ງສານດັ່ງກ່າວນີ້ໃຊ້ສໍາລັບດອງຊາກສົບບໍ່ໃຫ້ເນົ່າ ແລະ ຂ້າເຊື້ອໂລກ, ແຕ່ຫາກຄົນ-ສັດ ຫາຍໃຈເອົາ ຫຼື ກິນເຂົ້າໄປ ມັນຈະໄປທໍາລາຍລະບົບຫາຍໃຈ, ຕັບ, ໝາກໄຂ່ຫຼັງ ຫຼື ກໍ່ໃຫ້ເກີດເປັນໂລກມະເລັງ ເປັນຕຸ່ມເປື່ອຍຕາມຜິວໜັງ ແລະ ທໍາລາຍທຸກລະບົບໃນຮ່າງກາຍຂອງຄົນ ແລະ ສັດ. ສໍາລັບອາຫານທີ່ກວດພົບສານພິດ ເຈົ້າໜ້າທີ່ຈະໄດ້ນຳໄປທຳລາຍຖີ້ມ.

ໃນຂະນະທີ່ທ່ານ ນາງ ຄໍາພຽນ ພັນທະບູລີ ກໍ່ໄດ້ຮຽກຮ້ອງມາຍັງ ແມ່ຄ້າຊາວຂາຍ, ຜູ້ປະກອບການ ເປັນເຈົ້າການໃນການນໍາເອົາສິນຄ້າເຂົ້າມາວາງຂາຍ, ຖ້າເອົາສິນຄ້າປະເພດເຄື່ອງດອງ ແມ່ນໃຫ້ມີການກວດກາຢ່າງລະອຽດ ແລະ ຮຽກຮ້ອງມາຍັງພາກສ່ວນທີ່ກ່ຽວຂ້ອງເປັນເຈົ້າການເຝົ້າລະວັງການລັກລອບ, ຊຸກເຊື່ອງນໍາເຂົ້າສິນຄ້າທີ່ມີສານພິດເຈືອປົນ ພ້ອມທັງກ່າວເຕືອນໃຫ້ພໍ່ແມ່ປະຊາຊົນ ມີສະຕິລະວັງຕົວສູງໃນການຊື້ເຄື່ອງອຸປະໂພກ.

ຂໍ້ມູນ: ໜັງສືພິມສາລະວັນ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.