ອາຫານທີ່ຊ່ວຍໃຫ້ອາລົມດີ

ປັດຈຸບັນຖືເປັນຍຸກແຫ່ງການແຂ່ງຂັນ ແລະເລັ່ງດ່ວນ ອັນເປັນໜຶ່ງໃນສາເຫດທີ່ກໍ່ໃຫ້ເກີດພາວະຄວາມຄຽດ ວິຕົກກັງວົນ  ແລະນຳໄປສູ່ພະຍາດຮ້າຍຕ່າງໆ ໂດຍສະເພາະແມ່ນພະຍາດຊຶມເສົ້າ ຮູ້ເຖິງອັນຕະລາຍຂອງການໃຊ້ຊີວິດແບບແກ້ງແຍ່ງແຂ່ງຂັນ ແລະຟ້າວຟັ່ງ ດັ່ງນີ້ແລ້ວເຮົາກໍມາຮູ້ຈັກກັບອາຫານທີ່ຊ່ວຍບຳບັດ ແລະກຳຈັດຄວາມເສົ້າ ຫຼື ອາຫານທີ່ເຮັດໃຫ້ອາລົມດີນັ້ນເອງ.

ປາ  ກ່ອນອື່ນເຮົາມາຮູ້ກ່ອນວ່າ ຄວາມຄຽດຈະສົ່ງຜົນໃຫ້ຮ່າງກາຍຫຼັ່ງສານຮໍໂມນຄວາມຕຶງຄຽດຊຶ່ງກະຕຸ້ນໃຫ້ຮ່າງກາຍເຮັດວຽກຫຼາຍກວ່າປົກກະຕິ ສົ່ງຜົນໃຫ້ອິດເມື່ອຍ ແລະຊຶມເສົ້າ ທັງນີ້ ການຮັບປະທານປາຊຶ່ງປະກອບມີກົດໄຂມັນໂອເມກາ 3 ທີ່ມີບົດບາດສຳຄັນຕໍ່ການເຮັດວຽກຂອງລະບົບສະໝອງຈະຊ່ວຍໃຫ້ສະໝອງເຮັດວຽກໄດ້ຢ່າງມີປະສິດທິພາບ ແລະຊ່ວຍໃຫ້ຂະບວນການທາງຄວາມຄິດ ແລະຮຽນຮູ້ດີຂຶ້ນ.

ໝາກໄມ້ ແລະຜັກ ເຊັ່ນ  ຜັກຕຳນິນ ບລ໋ອກໂຄລີ ໝາກແຄ້ງ ໝາກກ້ຽງ ໝາກນາວ ໝາກສີດາ ແລະໝາກຂາມປ້ອມ ປະກອບມີສານຊີໂຣໂທນິນຊຶ່ງເປັນສານຈາກທຳມະຊາດທີ່ຊ່ວຍຫຼຸດຄວາມຄຽດ ອີກທັງປະກອບມີວິຕາມິນ C ທີ່ຊ່ວຍຫຼຸດຮໍໂມນຄວາມຄຽດ ແລະເພີ່ມໃຫ້ລະບົບພູມຄຸ້ມກັນຂອງຮ່າງ ກາຍເຮັດວຽກໄດ້ດີຂຶ້ນ ໂດຍສະເພາະແມ່ນຊ່ວຍຫຼຸດລະດັບຂອງຮໍໂມນຄໍຕິຊອລຊຶ່ງເປັນຮໍໂມນທີ່ຖືກຂັບຖ່າຍອອກມາໃນຂະນະທີ່ຮ່າງກາຍມີຄວາມຄຽດ.

ນ້ຳນົມ  ເຊັ່ນ ນົມສົ້ມ (ໂຢເກີດ) ຊຶ່ງເປັນແຫຼ່ງອາຫານທີ່ມີສານແມັກນີຊຽມສູງ ການດື່ມນ້ຳ ນົມເປັນປະຈຳຈະຊ່ວຍໃຫ້ຮູ້ສຶກຜ່ອນຄາຍ ບັນເທົາຄວາມຮູ້ສຶກກົດດັນ ແລະຫຼຸດຜ່ອນຄວາມເຄັ່ງຕຶງຂອງລະບົບປະສາດທີ່ກໍ່ໃຫ້ເກີດຄວາມຄຽດ ພ້ອມນີ້ ກໍປະກອບມີທຣິບໂຕເຟນ (ກົດອະມີໂນຊະນິດໜຶ່ງທີ່ຈຳເປັນຕໍ່ສຸຂະພາບ ແລະເປັນກົດທີ່ຮ່າງກາຍບໍ່ສາມາດສ້າງຂຶ້ນເອງໄດ້) ໂດຍຈະຕ້ອງໄດ້ຮັບຈາກອາຫານຊະນິດອື່ນຊ່ຶງສະໝອງສາມາດນຳໄປໃຊ້ໄດ້ເມື່ອລວມກັບວິຕາມິນ B3 B6 ແລະແມັກນີ ຊຽມ.

ໄຂ່ ແລະຊີ້ນໄກ່  ເປັນແຫຼ່ງໂປຣຕີນ ແລະແຫຼ່ງໂພຊະນາການດີທີ່ສຸດ ເນື່ອງຈາກອຸດົມດ້ວຍກົດ ອະມີໂນ ແລະທຣິບໂຕເຟນ ຊ່ຶງເຮັດໜ້າທີ່ຊ່ວຍໃຫ້ຮ່າງກາຍຜ່ອນຄາຍ ສະຫງົບ ນອກນີ້ ຍັງມີສານເລຊິຕິນທີ່ມີປະໂຫຍດດ້ານການບຳລຸງສະໝອງ ຊ່ວຍໃຫ້ຮູ້ສຶກຜ່ອນຄາຍ-ປອດໂປ່ງ ທັງນີ້ ເລຊີຕິນໃນໄຂ່ແດງຈະຊ່ວຍຟື້ນຟູ ແລະບຳລຸງສະໝອງຈິ່ງກະຕຸ້ນຄວາມຄວາມສົດຊື່ນຕື່ນຕົວ ພ້ອມນີ້ ກໍມີວິຕາມິນ B ຊຶ່ງສາມາດຊ່ວຍຜ່ອນຄາຍຄວາມຄຽດ ບັນເທົາຄວາມອິດເມື່ອຍ ແລະຟື້ນຟູພະລະກຳລັງອີກດ້ວຍ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.