ອາເມລິກາລົງທຶນໃນລາວຫຼາຍກວ່າ 40 ພັນຕື້ໂດລາ

ໃນໄລຍະຜ່ານມາລັດຖະບານສະຫະລັດອາເມລິກາ ໄດ້ໃຫ້ການສະໜັບສະໜູນ ແລະຊ່ວຍເຫຼືອ ສປປ ລາວ ຢ່າງຕໍ່ເນື່ອງເປັນຕົ້ນການລົງທຶນພັດທະນາພື້ນຖານໂຄງລ່າງ, ການຊ່ວຍເຫຼືອທາງດ້ານເຕັກນິກວິຊາການ ແລະອື່ນໆ ຊຶ່ງມີມູນຄ່າການລົງທຶນຢູ່ລາວໃນໄລຍະປີ 2011-2015 ບັນລຸເຖິງ 42.992 ຕື້ກວ່າໂດລາ ຊຶ່ງເຮັດໃຫ້ປະຈຸບັນອາເມລິກາຕິດອັນດັບທີ 10 ຂອງການລົງທຶນຕ່າງປະເທດຢູ່ລາວ.

ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະການຄ້າ ໄດ້ກ່າວໃນກອງປະຊຸມຄັ້ງປະຖົມມະລືກ ເພື່ອຈັດຕັ້ງປະຕິບັດຂອບສັນຍາວ່າດ້ວຍການຄ້າ ແລະການລົງທຶນລາວ-ອາເມລິກາວ່າ: ການພົວພັນລະຫວ່າງລາວ ແລະອາເມລິກາ ໃນໄລຍະຜ່ານມາ ໂດຍສະເພາະການພົວພັນດ້ານການຄ້າໄດ້ມີບາດກ້າວຂະຫຍາຍຕົວຢ່າງເປັນປົກກະຕິ, ຜ່ານມາ ໄດ້ມີການພົວພັນການຢ້ຽມຢາມການນຳລະດັບສູງຂອງສອງປະເທດ ນອກນີ້ ມູນຄ່າການຄ້າລະຫວ່າງລາວ-ອາເມລິກາໃນປີ 2005 ບັນລຸໄດ້ 14 ຕື້ກວ່າໂດລາ ແລະມາຮອດປີ 2016 ມູນຄ່າການຄ້າສາມາດບັນລຸໄດ້ 88 ຕື້ກວ່າໂດລາ ຊຶ່ງສະຫະລັດອາເມລິກາແມ່ນຕະຫຼາດສົ່ງອອກອັນດັບທີ 12 ແລະເປັນຕະຫຼາດນຳເຂົ້າອັນດັບທີ 10 ຂອງ ສປປ ລາວ, ໃນປີ 2005-2010 ການລົງທຶນອາເມ ລິກາຢູ່ລາວມີມູນຄ່າ 32.463 ຕື້ກວ່າໂດລາ ແລະໃນໄລຍະ 2011-2015 ການລົງທຶນບັນລຸໄດ້ມູນຄ່າ 42.992 ຕື້ກວ່າໂດລາ ຊຶ່ງເຮັດໃຫ້ໃນປະຈຸບັນສະຫະລັດອາເມລິກາ ຢູ່ໃນອັນດັບທີ 10 ຂອງການລົງທຶນໃນລາວ.

ກອງປະຊຸມຄັ້ງປະຖົມມະລຶກ ເພື່ອຈັດຕັ້ງປະຕິບັດຂອບສັນຍາວ່າດ້ວຍການຄ້າ ແລະການລົງທຶນລະຫວ່າງ ສປປ ລາວ-ສະຫະລັດອາເມລິກາ ໄດ້ຈັດຂຶ້ນໃນວັນທີ 22 ມີນາຜ່ານມາທີ່ກະຊວງອຸດສາຫະກຳ ແລະການຄ້າ ຊຶ່ງຄະນະຜູ້ແທນຝ່າຍລາວ ນຳໂດຍ ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະການຄ້າ, ຄະນະຜູ້ແທນຝ່າຍອາເມລິກາ ນຳໂດຍ ທ່ານ ນາງ ບາບາຣາ ເວເຊວ (Barbara Weisel) ຜູ້ຊ່ວຍຫ້ອງການຜູ້ຕາງໜ້າການຄ້າອາເມລິກາ, ມີຜູ້ຕາງໜ້າຈາກຂະແໜງການກ່ຽວຂ້ອງຂອງ ທັງສອງຝ່າຍເຂົ້າຮ່ວມ.

ກອງປະຊຸມຄັ້ງນີ້ແມ່ນເພື່ອຜັນຂະຫຍາຍການຈັດຕັ້ງປະຕິບັດຂອບສັນຍາວ່າດ້ວຍການຄ້າ ແລະການລົງທຶນລະຫວ່າງ ສປປ ລາວ ແລະສະຫະລັດອາເມລິກາທີ່ທັງສອງໄດ້ລົງນາມຮ່ວມກັນ ໃນກາງເດືອນກຸມພາປີຜ່ານມາ, ໂດຍສັນຍາດັ່ງກ່າວ ສ້າງຂຶ້ນເພື່ອເປັນເວທີ ປຶກສາຫາລືກ່ຽວກັບການສົ່ງເສີມດ້ານການຄ້າ ແລະການລົງທຶນ ນອກນັ້ນ ຍັງໄດ້ປຶກສາຫາລືຫຼາຍປະເດັນທີ່ທັງສອງ ຝ່າຍໃຫ້ຄວາມສົນໃຈ, ການປະຕິບັດພັນທະໃນຂອບອົງການການຄ້າໂລກ, ການຮ່ວມມືດ້ານການຄ້າ ແລະການລົງທຶນ, ການຊ່ວຍເຫຼືອທາງດ້ານເຕັກນິກວິຊາການ, ປັບປຸງບັນຍາກາດໃນການດຳເນີນທຸລະກິດໃນລາວ ແລະອຳນວຍຄວາມ ສະດວກໃນການສົ່ງສິນຄ້າຈາກ ສປປ ລາວ ໄປຍັງຕະຫຼາດສະຫະລັດອາເມລິກາ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.