ອິດ​ຊຸ​ບະ​ແດ​ຣີ່​ຟາມ​ຈະ​ຈົກກວ່າ​ພັນ​ຕື້ ສ້າງ​ຟາມ​ລ້ຽງ​ງົວ​ນົມ

ບໍ­ລິ­ສັດ​ອິດ​ຊູ​ບະ​ແດ​ຣີ່​ຟາມ​ຈຳ­ກັດ ປະ­ເທດ​ໄທ ຕັດສິນ​ໃຈ​ຈະ​ຈົກ​ເງິນ 156 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 1,24 ພັນ​ຕື້​ກີບ ເຂົ້າ​ໃນ​ການ​ພັດ­ທະ­ນາ​ໂຄງ­ການ​ລ້ຽງ​ງົວນົມ​ໜອງ​ຫຼົ່ມ ແລະ​ແຄ້ມ​ປິ້ງຢູ່​ເຂດ​ບ້ານ​ທາດ​ອີງ​ຮັງ ເມືອງ​ໄກ­ສອນພົມ­ວິ­ຫານ​ແຂວງ​ສະ­ຫວັນ​ນະ​ເຂດ  ຊຶ່ງພາຍ­ຫຼັງ​ທີ່​ໄດ້​ມີ​ການ​ສຳ​ຫຼວດ ແລະ​ສຶກສາ​ຄວາມ​ເປັນ​ໄປ​ໄດ້​ແຕ່​ທ້າຍ​ເດືອນ​ມັງກອນ​ເປັນ­ຕົ້ນ​ມາ.

ຈາກ​ການ​ສຳ​ຫຼວດ ແລະ​ສຶກ​ສາ​ພົບວ່າ: ເປັນ​ໂຄງ­ການ​ທີ່​ມີ​ປະ­ໂຫຍດ ເພື່ອ​ປະກອບ​ສ່ວນ​ເຂົ້າ​ໃນ​ການ​ພັດ­ທະ­ນາ​ເສດຖະ​ກິດ-ສັງ­ຄົມ​ຂອງ​ແຂວງ ກໍ​ຄື​ເມືອງ​ໄກສອນພົມ­ວິ­ຫານ ແລະ​ປະ­ຊາ­ຊົນ​ບ້ານ ທາດ​ອີງ​ຮັງ​ຕາມ​ແນວ­ທາງ​ນະ­ໂຍ­ບາຍຂອງ​ພັກ ແລະ​ລັດ ໂດຍ​ທາງ​ອຳ­ນາດ​ການປົກ­ຄອງ​ແຂວງ​ເຫັນ​ດີ​ໃຫ້​ບໍ­ລິ­ສັດ​ດັ່ງ­ກ່າວ​ສຳ​ປະ­ທານ​ເນື້ອ­ທີ່​ດິນ​ລັດ​ເພື່ອ​ນຳ​ໃຊ້​ເຂົ້າ​ໃນ​ໂຄງ­ການ​ຈຳ­ນວນ 95 ເຮັກ­ຕາ ໃນ​ນີ້​ທາງ​ບໍ­ລິ­ສັດ​ໄດ້​ວາງ­ເງິນ​ມັດ​ຈຳ​ແລ້ວ​ຈຳ­ນວນ 30 ພັນ​ໂດ​ລາ​ສະ­ຫະ­ລັດ.

ຊຶ່ງ​ການ​ອະ­ນຸ­ຍາດ​ດັ່ງ­ກ່າວ​ໄດ້​ມີ​ພິ­ທີ ເຊັນ​ສັນ­ຍາ​ຂຶ້ນ ໃນ​ວັນ​ທີ 23 ມີ­ນາ 2017 ທີ່​ຫ້ອງ​ປະ­ຊຸມ​ພະ​ແນກ​ແຜນ­ການ ແລະ ການ​ລົງ­ທຶນ​ແຂວງ​ສະ­ຫວັນ​ນະ​ເຂດ ລະຫວ່າງ ທ່ານ ພູ​ຂົງ ນາມ​ມະ​ຈັກ​ຫົວ­ໜ້າ​ຫ້ອງ​ວ່າ­ການ​ປົກ­ຄອງ​ແຂວງ, ທ່ານ ຄຳລຸຍ ຍາດ­ຕິ​ວົງ ຫົວ­ໜ້າ​ພະ​ແນກ​ກະ­ສິ­ກຳ ແລະ​ປ່າ­ໄມ້​ແຂວງ, ທ່ານ ຄຳ​ກອງ ໄຊປັນ­ຍາ ຮອງ​ຫົວ­ໜ້າ​ພະ​ແນກ​ແຜນ­ການ ແລະ​ການ​ລົງ­ທຶນ​ແຂວງ, ທ່ານ ບຸນ​ຍູ້ ທຳມະ​ວົງ ເຈົ້າ­ເມືອງ​ໄກ­ສອນ ພົມ­ວິ­ຫານ ກັບທ່ານ ຊານ​ໄຊ ຈະ­ຕຸ­ລະ​ພາ­ກອນ ປະ­ທານ​ບໍ­ລິ­ສັດ​ອິດ​ຊູ​ບະ​ແດ​ຮີ່​ຟາມ​ຈຳ­ກັດ, ທ່ານ​ນາງ ທັດ​ດາວ ຈະ­ຕຸ­ລະ​ພາ­ກອນ ຄະນະ​ກຳ­ມະ­ການ​ບໍ­ລິ­ສັດ​ແດ​ຣີ່​ຟາມ​ຈຳ­ກັດ ໂດຍ​ເຂົ້າ​ຮ່ວມ​ເປັນ​ພະ­ຍານ​ມີ​ທ່ານ ທ່ອນ ແກ້ວ ພຸດ​ທະ​ໄກ​ຍະ​ລາດ ຮອງ​ເຈົ້າ­ແຂວງສະ­ຫວັນ​ນະ​ເຂດ, ຈາກ​ນີ້​ກໍ​ມີ​ຫົວ­ໜ້າ​ພະ ແນກ​ການ, ຮອງ​ພະ­ແນກ­ການ​ພາກ­ສ່ວນທີ່​ກ່ຽວ­ຂ້ອງ ແລະ​ອຳ­ນາດ​ການ​ປົກ­ຄອງ​ທ້ອງ­ຖິ່ນ​ເຂົ້າ​ຮ່ວມ.

ທ່ານ ນາງ ທັດ​ດາວ ຈະ­ຕຸ­ລະ​ພາກອນ ໃຫ້​ສຳ­ພາດ​ວ່າ: ດ້ວຍ​ແນວ​ຄິດການ​ເຮັດ​ໂຄງ­ການ​ນົມ​ໂຮງ­ຮຽນ​ສຳ­ລັບເດັກ­ນ້ອຍ​ຄົນ​ລາວ​ແມ່ນ​ຖືກ​ຈຸດ​ປະ­ກາຍ ຈາກ​ການ​ຄົ້ນ​ພົບ​ຂໍ້​ມູນ​ດ້ານ​ສຸ­ຂະ­ພາບ​ວ່າ​ປະ­ຊາ­ກອນ​ໂລກ​ບໍ­ລິ­ໂພກ​ນົມ​ສະ­ເລ່ຍ 22 ລິດ​ຕໍ່​ຄົນ​ໃນ​ຂະ­ນະ​ທີ່​ພູ­ມີ­ພາກ​ອາ​ຊຽນ ກໍ​ຄື​ປະ­ເທດ​ສິງ­ກະ­ໂປ​ມີ​ອັດ­ຕາ​ການ​ບໍ​ລິໂພກ​ນົມ 20 ລິດ​ຕໍ່​ຄົນ​ຕໍ່​ປີ ແຕ່​ບໍ່​ມີ​ຂໍ້​ມູນຂອງ ສປປ ລາວ ແລະ​ປາ­ກົດ​ວ່າ­ການ​ຈະເລີນ​ເຕີບ​ໂຕ​ໂດຍ​ວັດ­ແທກ​ຈາກ​ຄວາມສູງ​ຂອງ​ເດັກ​ຂອງ​ປະ­ເທດ​ເຮົາ​ຢູ່​ໃນ​ອັດຕາ​ທີ່​ຕ່ຳ ຊຶ່ງ​ນົມ​ເປັນ​ອາ­ຫານ​ທີ່​ມີ​ຄຸນ­ຄ່າທາງ​ໂພ­ຊະ​ນາ​ການ ແລະ​ມີ​ຜົນ​ຕໍ່​ການ​ຈະ ເລີນ​ເຕີບ​ໂຕ​ຂອງ​ເດັກ ຈິ່ງ​ເປັນ​ແຮງ​ບັນດານ​ໃຈ​ໃຫ້​ບໍ­ລິ­ສັດ​ຄິດ​ລິ​ເລີ່ມ​ໂຄງ­ການນົມ​ໂຮງ­ຮຽນ ເພື່ອ​ໃຫ້​ເດັກ­ນ້ອຍ​ໃນ​ລາວ.

ສຳ­ລັບ​ແຜນ­ການ​ຂອງ​ການ​ຮ່ວມ​ມືນອກ­ຈາກ​ຈະ​ມີ​ໂຮງ­ງານ​ນົມ, ການ​ລ້ຽງງົວ​ນົມ ແລະ​ຍັງ​ມີ​ການ​ວາງ​ແຜນ​ເຮັດນາ​ໃນ​ຮົ່ມ​ລ້ຽງ​ງົວ​ນົມ ເພື່ອ​ເປັນ​ສູນ​ຝຶກອົບ­ຮົມ ແລະ​ຖ່າຍ​ທອດ​ເຕັກ​ໂນ​ໂລ​ຊີ​ໃນການ​ລ້ຽງ​ງົວ​ນົມ​ໃຫ້​ແກ່​ປະ­ຊາ­ຊົນ​ຜູ້​ສົນໃຈ​ເຂົ້າ​ຮ່ວມ​ໃນ​ໂຄງ­ການ, ການ​ຕັ້ງ​ສູນຈຳ­ໜ່າຍ ແລະ​ສະ­ແດງ​ສິນ­ຄ້າ​ເຂດ​ຊຸມຊົນ​ການ​ຈັດ​ສັນ​ແຄ້ມ​ປີ້ງ ເພື່ອ​ເປັນ​ແຫຼ່ງທ່ອງ​ທ່ຽວ​ພາຍ​ໃນ​ແຂວງ​ສະ­ຫວັນ​ນະເຂດ ແມ່ນ​ເປັນ​ການ​ສ້າງ​ລາຍ​ຮັບ​ໃຫ້​ແກ່ປະ­ຊາ­ຊົນ ນອກ­ຈາກ​ນີ້​ ທາງ​ໂຄງ­ການ​ກໍ່​ຄື​ບໍ­ລິ­ສັດ​ຍັງ​ເປັນ​ສ່ວນ​ໜຶ່ງ​ຂອງ​ຊຸມ​ຊົນ ເຊິ່ງ​ຈະ​ພ້ອມ​ກັນ​ຢູ່​ຈະ​ສ້າງ​ກິດ­ຈະ­ກຳ ເພື່ອ​ສັງ­ຄົມ ແລະ​ຊຸມ​ຊົນ ຊຶ່ງ​ຈະ​ໄດ້​ປະກອບ​ສ່ວນ​ກັບ​ຊຸມ​ຊົນ​ຕະ­ຫຼອດ​ໄປ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.