ອີຣານ ສົ່ງ​ອອກ​ນໍ້າມັນ​ 2 ລ້ານ​ບາ​ເຣລຕໍ່​ມື້

ທາງ​ການ​ອີຣານ​ເປີດ​ເຜີຍ​ວ່າ ອີຣານສົ່ງ​ອອກ​​ນໍ້າມັນ ​ແລະ ​ແກ໊ສທຳ​ມະ​ຊາດ​ແຫຼວ 2 ລ້ານ​ບາ​ເຣລຕໍ່​ມື້ແລ້ວ ຫຼັງ​ຈາກ​ຫຼຸດ​ພົ້ນ​ອອກ​ຈາກ​ມາດ​ຕະການ​ລົງ​ໂທດ​ຂອງ​ນານາ​ຊາດ.

ຕາມ​ຂ່າວ​ຕ່າງປະ​ເທດ​ລາຍ​ງານ​ວ່າ ທ່ານ ບິ​ຈານ ຊານ​ກາ​ເນ ລັດຖະມົນຕີ​ວ່າການ​ກະຊວງ​ນໍ້າມັນ​ອີຣານ​ເປີດ​ເຜີຍ​ໃນ​ວັນ​ທີ 3 ​ເມສາ​ທີ່​ຜ່ານ​ມາ​ວ່າ ການ​ສົ່ງ​ອອກ​​ນໍ້າມັນ ​ແລະ ​ແກ໊ສທຳ​ມະ​ຊາດ​ແຫຼວ​ຂອງ​ອີຣານຂະນະ​ນີ້​ຫຼາຍ​ກວ່າ 2 ລ້ານ​ບາ​ເຣລຕໍ່​ມື້ ຫຼັງ​ຈາກ​ເພີ່ມ​ຂຶ້ນ​ຕື່ມ​ອີກ​ມື້​ລະ 250 ພັນ​ບາ​ເຣລນັບ​ຕັ້ງ​ແຕ່​ວັນ​ທີ 1 ມີນາ​ທີ່​ຜ່ານ​ມາ ຊຶ່ງ​ອີຣານ​ເພີ່ມ​ປະລິມານ​ການ​ສົ່ງ​ອອກ​​ນໍ້າມັນ​ເປັນ 2 ​ເທົ່າ ຫຼັງ​ຈາກ​ຂໍ້​ຕົກລົງ​ນິວ​ເຄລຍກັບ​ກຸ່ມ​ປະ​ເທດ​ມະຫາ​ອຳ​ນາດ​ໂລກ​ເລີ່​ມມີ​ຜົນ​ບັງຄັບ​ໃຊ້​ໃນ​ວັນ​ທີ 16 ມັງກອນ​ທີ່​ຜ່ານ​ມາ ​ແລະ ອີຣານຫຼຸດ​ພົ້ນ​ອອກ​ຈາກ​ການ​ລົງ​​ໂທດທາງ​ເສດ ຖະກິດ. ທາງການ​ອີຣານ​ເດີນ​ໜ້າ​ເພີ່ມ​ການ​ສົ່ງອອກ ​ເຖິງ​ແມ່ນ​ວ່າ​ຈະ​ມີ​ຄວາມ​ວິຕົກ​ທົ່ວ​ໂລກ​ກ່ຽວ​ກັບ​ປະລິມານ​ນ້ຳມັນ​ລົ້ນ​ຕະຫຼາດ ຊຶ່ງ​ເຮັດ​ໃຫ້ລາຄາ​ນໍ້າມັນ​ຫຼຸດ​ລົງ 40 ​ໂດ​ລາ​ສະຫະລັດ​ຕໍ່​ບາ​ເຣລ ຈາກກວ່າ 100 ​ໂດ​ລາ​ຕໍ່​ບາ​ເຣລ​ໃນ​ກາງ​ປີ 2014.

​ເຈົ້າ​ຊາຍ ​ໂມ​ຮຳ​ເໝັດ ບິນ​ຊັລມານ ຂອງ​ຊາ​ອຸ​ດິດອາຣັບບີ  ກ່າວ​ວ່າ ປະ​ເທດ​ຜູ້​ຜະລິດ​​ນໍ້າມັນ​ລາຍ​ໃຫຍ່​ອື່ນໆ​ລວມທັງ​ອີຣານ ຈະ​ຕ້ອງ​​ໂຈະ​ການ​ຜະລິດ​ເຊັ່ນ​ກັນ, ຄວາມ​ເຫັນ​ຂອງ​ເຈົ້າ​ຊາຍ​ໂມ​ຮຳ​ເໝັດ ສົ່ງ​ຜົນ​ເຮັດ​ໃຫ້​ລາຄາ​ນໍ້າມັນ​ໃນ​ຕະຫຼາດ​ໂລກ​ຕົກ​ຕໍ່າ ​ໂດ​ຍລາຄາ​ອ້າງ​ອິງ​​ນໍ້າມັນ​ດິບ​ເວສ ​ເທ​ກຊັສ ຂອງ​ອາ​ເມ​ລິ​ກາງ​ວດສົ່ງ​ມອບ​ເດືອນ​ພຶດສະ​ພາ​ປັບ​ຕົວ​ຫຼຸດ​ລົງ 1,55 ​ໂດ​ລາມາ​ຢູ່​ທີ່ 36,79 ​ໂດ​ລາ​ຕໍ່​ບາ​ເຣລ ຢູ່​ທີ່​ຕະຫຼາດ​ນິວຢອກ.

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.