ອີ​ຊີ​ເອັມ​ອີ ເຊື່ອ​ມາດ­ຕະ­ຖານຄື​ຈຸດ​ຂາຍ​ທີ່​ຍາວ​ນານ

ການ​ພັດ­ທະ­ນາ, ຄວາມ​ກ້າວ­ໜ້າຂອງ​ເຕັກ​ໂນ​ໂລ​ຊີ ແລະ​ການ​ປ່ຽນ­ແປງ​ຂອງ​ຍຸກ​ສະ­ໄໝ​ໄດ້​ນຳ­ໄປສູ່​ການ​ແກ້ງ​ແຍ້ງ​ແຂ່ງ­ຂັນ​ທີ່​ຮຸນ​ແຮງ​ຂຶ້ນ​ໃນ​ເວ­ລາ​ດຽວ​ກັນ​ກໍ່​ເປັນ​ໂອ­ກາດ​ໃນ​ການ​ສ້າງ​ລາຍ​ຮັບ​ແກ່​ຫົວ­ໜ່ວຍ​ທຸ­ລະ​ກິດ​ໄດ້​ຫຼາຍ​ຂຶ້ນ​ເຊັ່ນ​ດຽວ​ກັນຕ່າງ​ແຕ່​ວ່າ​ແຕ່​ລະ​ບໍ­ລິ­ສັດ​ຈະ​ມີ​ມຸມ​ການ​ບໍ­ລິ­ຫານ​ໃນ​ຮູບ​ແບບ​ໃດ ເພື່ອ​ສ້າງຄວາມ​ໜ້າ​ເຊື່ອ​ຖື​ແກ່​ລູກ​ຄ້າ ຊຶ່ງ​ປະ­ເດັນ​ນີ້​ຜູ້­ອຳ­ນວຍ­ການ​ບໍ­ລິ­ສັດ ECME ເຊື່ອ​ວ່າ​ທຸ­ລະ​ກິດ​ຈະ​ຍືນ​ຍາວ​ໄດ້ ຂຶ້ນ​ຢູ່​ກັບ​ມາດ­ຕະ­ຖານ ແລະ​ການ​ບໍ­ລິ­ການ.

ທ່ານ​ນາງ ສີ​ຣິ​ພອນ ພັນ­ທະ​ວົງ ຜູ້­ອຳ­ນວຍ­ການ​ບໍ­ລິ­ສັດ​ວິ­ຊາ​ການ​ໄຟ­ຟ້າໂຍ­ທາ ແລະ​ກົນ​ຈັກ​ລາວ ຈຳ­ກັດ ຜູ້​ດຽວ (ECME) ໃຫ້​ສຳ­ພາດ​ກັບ​ທີມ​ຂ່າວ​ເສດ­ຖະ­ກິດ-ສັງ­ຄົມ​ວ່າ: ECME ເປັນ​ບໍ­ລິ­ສັດ​ໜຶ່ງ​ທີ່​ໃຫ້​ບໍ­ລິ­ການ​ຕິດ​ຕັ້ງ​ໄຟ­ຟ້າ​ແບບ​ຄົບ​ວົງ​ຈອນ ດ້ວຍ​ລະ­ບົບ​ມາດ­ຕະ­ຖານ​ສາ­ກົນ​ເປັນ­ຕົ້ນ​ແມ່ນ​ຕິດ​ຕັ້ງອຸ­ປະ­ກອນ​ໄຟ­ຟ້າ​ພາຍ​ໃນ​ອາ­ຄານ​ຫ້ອງການ, ອາ­ຄານ​ພາ­ນິດ, ທີ່­ຢູ່​ອາ­ໄສ ແລະ ໄຟ​ສຳ­ລັບ​ໂຮງ​ຈັກ​ໂຮງ­ງານ, ພ້ອມ​ນັ້ນ ຍັງ​ບໍ­ລິ­ການ​ຕິດ​ຕັ້ງ, ກໍ່­ສ້າງ​ຕາ​ຂ່າຍ​ໄຟຟ້າ​ເລີ່ມ​ຈາກ​ແຮງ​ສູງ​ຂະ­ໜາດ 22 ກິໂລ​ໂວນ (kv) ລົງ​ຫາ 0,4 ກິ​ໂລ​ໂວນ ນອກ­ຈາກ​ວຽກ​ຕິດ​ຕັ້ງ​ແລ້ວ​ທາງ​ບໍ​ລິສັດ​ຍັງ​ໃຫ້​ບໍ­ລິ­ການ​ບຳ­ລຸງ​ຮັກ­ສາ, ບໍ­ລິ­ການ​ຕິດ​ຕັ້ງ​ເຄື່ອງ​ວັດ­ແທກ ແລະ ຄວບ​ຄຸມ​ອັດ­ຕະ­ໂນ­ມັດ​ຢູ່​ໃນ​ລະ­ບົບ​ການຜະ­ລິດເຄື່ອງ​ດື່ມ​ຂອງ​ໂຮງ​ຈັກ​ໂຮງ­ງານ ຫຼື ອຸດ­ສາ­ຫະ­ກຳ​ຂະ­ໜາດ​ໃຫຍ່​ອີກ​ດ້ວຍ.

ທ່ານ​ຜູ້­ອຳ­ນວຍ­ການ​ກ່າວ​ວ່າ: ນັບແຕ່​ບໍ­ລິ­ສັດ​ໄດ້​ເປີດ​ບໍ­ລິ­ການ​ໃນ​ປີ 2010 ເປັນ­ຕົ້ນ​ມາ​ລູກ​ຄ້າ​ຂອງ​ບໍ­ລິ­ສັດ​ມີ​ຈຳນວນ​ເພີ່ມ​ຂຶ້ນ​ຕໍ່​ເນື່ອງ ​ນັບ​ແຕ່​ຫົວ­ໜ່ວຍຄົວ​ເຮືອນ​ຫາ​ບັນ­ດາ​ໂຄງ­ການ​ລົງ­ທຶນຂະ­ໜາດ​ໃຫຍ່​ເຖິງ​ແມ່ນ​ວ່າ​ບາງ​ປີ​ຈະ​ມີ ອັດ­ຕາ​ສ່ວນ​ຫຼຸດ​ລົງ​ແຕ່​ກໍ່​ເປັນ​ໄປ​ຕາມ​ກົນ​ໄກ​ທາງ​ເສດ­ຖະ­ກິດ​ໂດຍ​ລວມ​ຫາກຄວາມ​ເຊື່ອ​ໝັ້ນ​ຂອງ​ສັງ­ຄົມ​ຍັງ​ມີ​ຫຼາຍຂຶ້ນ​ເລື້ອຍ​ມາ ຍ້ອນ​ສັງ­ຄົມ​ສີ­ວິ­ໄລ​ປະ­ຊາຊົນ​ຮັ່ງ­ມີ​ຂຶ້ນ​ທຸກ​ຄົນ​ແມ່ນ​ຕ້ອງ­ການການ​ບໍ­ລິ­ການ​ທີ່​ເປັນ​ມື​ອາ­ຊີບ​ໄດ້​ມາດ ຕະ​ຖານ​ຕາມ​ລະ­ບົບ​ຂອງ​ສາ­ກົນ ທັງ​ນີ້ ຍ້ອນ​ບໍ­ລິ­ສັດ​ວິ­ຊາ​ການ​ໄຟ­ຟ້າ​ໂຍ­ທາ ແລະ ກົນ​ຈັກ​ລາວ​ໃຫ້​ຄວາມ​ສຳ­ຄັນ​ໃນ​ງານ​ສີມື ແລະ​ມາດ­ຕະ­ຖານ​ຂອງ​ອຸ­ປະ­ກອນ​ການ ຕິດ​ຕັ້ງ​ທີ່​ເຊື່ອ​ຖື​ໄດ້​ມີ​ສິນ­ຄ້າ​ບາງ​ຢ່າງ​ບໍ​ລິສັດ​ແມ່ນ​ສັ່ງ​ໂຮງ­ງານ​ຜະ­ລິດ​ມາ​ໃຫ້​ເປັນຍີ່­ຫໍ້​ຂອງ​ຕົນ​ເອງ​ທັງ​ໝົດ​ເຫຼົ່າ​ນີ້​ແມ່ນ​ເພື່ອຮັກ­ສາ​ຄວາມ​ໄວ້​ເນື້ອ​ເຊື່ອ​ໃຈ​ຂອງ​ສັງ­ຄົມ​ທີ່​ມີ​ຕໍ່​ບໍ­ລິ­ສັດ​ໃຫ້​ຄົງ​ຢູ່​ຕະ­ຫຼອດ​ໄປ ແລະ​ມີ​ການ​ແນະ­ນຳ​ຕໍ່​ຫຼາຍ​ຂຶ້ນ.

ດ້ວຍ​ຈິດ­ໃຈ​ທີ່​ຢຶດ​ໝັ້ນ​ໃນ​ຄຸນ​ນະ​ພາບຂອງ​ສິນ­ຄ້າ ແລະ​ບໍ­ລິ­ການ​ຈຶ່ງ​ເຮັດ​ໃຫ້​ຕະຫຼອດ​ໄລ­ຍະ​ການ​ດຳ­ເນີນ​ທຸ­ລະ​ກິດ​ຂອງ​ບໍ­ລິ­ສັດ​ໄດ້​ສ້າງ​ຄວາມ​ເຊື່ອ​ໝັ້ນ​ຈາກ​ລູກ ຄ້າ​ນັບ​ມື້​ຫຼາຍ​ຂຶ້ນ ແລະ​ສາ­ມາດ​ສ້າງ​ລາຍ ຮັບ​ທີ່​ເພີ່ມ​ຂຶ້ນ​ໃນ​ທຸກ​ປີ​ເປັນ­ຕົ້ນ​ໃນ​ປີ 2010-2013 ທຸ­ລະ​ກິດ​ເດີນ​ໜ້າ​ເຕັມ­ທີ່, ສ່ວນ​ປີ 2014 ຫຼຸດ​ລົງ 36,64% ທຽບໃສ່ 2013, ສຳ­ລັບປີ 2015 ກໍ​ຂຶ້ນ ເລັກ​ນ້ອຍ 1,25% ທຽບ­ໃສ່​ປີ 2014 ແລະ​ປີ​ກາຍ​ນີ້​ເພີ່ມ​ຂຶ້ນ 33,33% ທຽບໃສ່ 2015, ທ່ານ ນາງ​ສີ​ຣິ​ພອນ ພັນ­ທະ ວົງ​ສ ກ່າວ.

ທ່ານ​ກ່າວ​ຕື່ມ​ວ່າ: ປະ­ຈຸ​ບັນ​ບໍ­ລິ­ສັດກຳ­ລັງ​ດຳ­ເນີນ​ໂຄງ­ການ​ຕິດ​ຕັ້ງ​ອຸ­ປະກອນ​ໄຟ­ຟ້າ ແລະ​ບຳ­ລຸງ​ຮັກ­ສາ​ໄຟ­ຟ້າ​ຢູ່​ບໍ່ຄຳ​ພູ​ເບ້ຍສັນ­ຍາ​ຮອດ​ທ້າຍ​ປີ 2019 ການ​ຕິດ​ຕັ້ງ​ອຸ­ປະ­ກອນ​ໄຟ­ຟ້າ ແລະ​ບຳ­ລຸງຮັກ­ສາ​ໄຟ­ຟ້າ​ຢູ່​ບໍ່​ຄຳ​ເຊ​ໂປນ​ສັນ­ຍາ​ຮອດທ້າຍ​ປີ 2018, ໂຄງ­ການ​ສະ­ໜອງ ແລະ ຕິດ​ຕັ້ງ​ໝໍ້​ແປງ​ໄຟ­ຟ້າ ແລະ​ເດີນ​ສາຍ​ໃຕ້ດິນ​ທັງ​ສະ­ໜອງ ແລະ​ຕິດ​ຕັ້ງ​ໄຟ​ເຍືອງທາງ​ເພື່ອ​ຮັບ​ໃຊ້​ໂຮງ­ໝໍ​ມິດ­ຕະ­ພາບ 150 ຕຽງ, ໂຄງ­ການ​ສະ­ໜອງ, ຕິດ​ຕັ້ງ​ໝໍ້​ໄຟ ແລະ​ພັດ​ລົມ​ຢູ່​ໂຮງ­ໝໍ​ມະ­ໂຫ­ສົດ, ນອກນັ້ນ ​ຍັງ​ມີ​ໂຄງ­ການ​ກວດ­ກາ​ການ​ຕິດ​ຕັ້ງ ແລະ​ປັບ­ປຸງ​ລະ­ບົບ​ການ​ຕິດ​ຕັ້ງ​ອຸ­ປະ­ກອນໄຟ­ຟ້າ, ຕິດ​ຕັ້ງ​ກ້ອງ​ວົງ​ຈອນ​ປິດ​ຢູ່​ທີ່​ພັກອາ­ໄສ​ສ່ວນ​ບຸກ­ຄົນ​ລວມ​ທັງ​ສະ­ໜອງ​ອຸປະ­ກອນ ແລະ​ບໍ­ລິ­ການ​ໃຫ້​ລູກ​ຄ້າ​ທີ່­ຢູ່​ນະຄອນ​ຫຼວງ​ວຽງ​ຈັນ ເປັນ­ຕົ້ນ​ທົດ​ສອບຄວາມ​ປອດ​ໄພ​ອຸ­ປະ­ກອນ​ໄຟ­ຟ້າ​ຢູ່​ຫ້ອງ­ການ​ພູ​ເບ້ຍ​ວຽງ​ຈັນ, ສະ­ໜອງ​ການ​ບໍ­ລິ­ການ​ອື່ນໆ​ອີກ​ໃຫ້​ແກ່​ທະ­ນາ­ຄານ ແລະ ສະ­ຖານ­ທູດ​ອົງ​ການ­ຈັດ­ຕັ້ງ​ສາ­ກົນ​ຕື່ມ​ອີກ.

ທ່ານ​ຜູ້­ອຳ­ນວຍ­ການ​ຍອມ­ຮັບ​ວ່າ ທີ່ບໍ­ລິ­ສັດ​ສາ­ມາດ​ກ້າວ​ມາ​ເຖິງ​ຈຸດ​ນີ້ ​ໄດ້ຍ້ອນ​ມີ​ພະ­ນັກ­ງານ​ທີ່​ເປັນ​ມື​ອາ­ຊີບ​ຄອຍໃຫ້­ການ​ຊ່ວຍ­ເຫຼືອ​ຕະ­ຫຼອດ​ມາ ແລະ​ບໍ­ລິ­ສັດ​ເອງ​ກໍ່​ໃຫ້​ຄວາມ​ສຳ­ຄັນ​ກັບ​ການ​ພັດ­ທະ­ນາ​ສີ­ມື​ແຮງ​ງານ​ຂອງ​ວິ­ຊາ​ການ​ດ້ວຍ​ການ​ສົ່ງ​ໄປ​ຍົກ​ລະ­ດັບ​ທັງ​ພາຍ​ໃນ​ແລະ ຕ່າງ­ປະ­ເທດ​ບໍ່​ວ່າ​ຈະ​ເປັນ​ການ​ຝືກ​ໃນ​ວິຊາ​ຊີບ ຫຼື ທິດ​ສະ​ດີ​ດ້ານ​ຄວາມ​ຄິດ​ຕ່າງໆ ເນື່ອງ​ຈາກ ECME ເຊື່ອ​ໝັ້ນ​ວ່າ: ທຸ­ລະກິດ​ຈະ​ກ້າວ­ໜ້າ​ໄດ້​ຕ້ອງ​ມີ​ພະ­ນັກ­ງານ​ທີ່ຊຳ­ນານ, ບໍ­ລິ­ສັດ​ມີ​ຄວາມ​ແຕກ​ຕ່າງ​ທີ່ຄຸນ​ນະ​ພາບ, ການ​ບໍ­ລິ­ການ ແລະ​ຄວາມປອດ​ໄພ​ຈຸດ​ນີ້​ບໍ່​ສາ­ມາດ​ລະ­ເລີຍ​ໄດ້​ເພາະ​ຜົນ​ໄດ້​ທີ່​ຕາມ​ມາ​ຢູ່​ທີ່​ຜູ້​ຊົມ­ໃຊ້​ກໍ​ຄື​ລູກ​ຄ້າເຮົາ​ເອງ.

ໂດຍ: ພິມ​ພອນ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.