ອຸດົມໄຊ ຕິດຕາມປຸກເຮືອນໃໝ່ ໃຫ້ຜູ້ເຄາະຮ້າຍໄຟໄໝ້ບ້ານດອນຄໍາ

ທ່ານ ຄໍາພຽງ ຢາຈົງວາ ຮອງເຈົ້າແຂວງອຸດົມໄຊ ໄດ້ຕາງໜ້າໃຫ້ການນຳແຂວງລົງຢ້ຽມຢາມຖາມຂ່າວປະຊາຊົນບ້ານດອນຄຳ ເມືອງຮຸນ ທີ່ໄດ້ຮັບຜົນກະທົບຈາກເຫດການໄຟໄໝ້ເຮືອນຈຳນວນ 26 ຫຼັງ ເມື່ອຄັ້ງວັນທີ 11 ກຸມພາຜ່ານມາ ພ້ອມທັງກວດກາເບິ່ງຄວາມຄືບໜ້າກ່ຽວກັບການຈັດສັນ ແລະປຸກເຮືອນຄືນໃໝ່ໃຫ້ແກ່ຄອບຄົວຜູ້ໄດ້ຮັບຜົນກະທົບ ທັງນີ້ກໍເພື່ອໃຫ້ຂວັນກໍາລັງໃຈປະຊາຊົນໄດ້ສືບຕໍ່ເຄື່ອນໄຫວດຳລົງຊີວິດ, ປົວແປງເຮືອນຊານ ແລະກໍ່ສ້າງເສດຖະກິດ ຄອບຄົວໃຫ້ກັບຄືນສູ່ສະພາບປົກກະຕິໂດຍໄວ.

ການລົງເທື່ອນີ້ມີຂຶ້ນໃນວັນທີ 9 ມີນາຜ່ານມາ ຊຶ່ງໃຫ້ການຕ້ອນຮັບມີທ່ານ ບຸນຄົງ ຫຼ້າຈຽມພອນ ເຈົ້າເມືອງໆຮຸນ ພ້ອມປະຊາຊົນຜູ້ທີ່ໄດ້ຮັບຜົນກະທົບດັ່ງກ່າວ.

ຕາມການລາຍງານຂອງທ່ານເຈົ້າເມືອງ ແລະສຳຫຼວດເບິ່ງຕົວຈິງແລ້ວການຈັດສັນເນື້ອທີ່ດິນ ແລະການກໍ່ສ້າງ ເຮືອນຄືນໃໝ່ໃຫ້ແກ່ປະຊາຊົນມາຮອດ ປະຈຸບັນແມ່ນສຳເລັດຕາມລະດັບຄາດໝາຍທີ່ອຳນາດການປົກຄອງເມືອງ ວາງໄວ້ຄື: ປຸກສ້າງແຕ່ລະຫຼັງໃຫ້ແລ້ວ 80% ພໍໃຫ້ປະຊາຊົນມີບ່ອນຢູ່ອາໄສເນື່ອງຈາກວັດສະດຸການກໍ່ສ້າງມີຈຳກັດ   ໃນນັ້ນເຮືອນຫຼັງໜຶ່ງປະກອບມີກໍ່ຝາເຮືອນຂຶ້ນເຄິ່ງໜຶ່ງ, ມີຫ້ອງນໍ້າ ແລະໄຟຟ້າໃຊ້.

ສຳລັບວັດສະດຸການກໍ່ສ້າງ, ອຸປະກອນປຸກສ້າງເຮືອນຕ່າງໆແມ່ນໄດ້ຮັບການຊ່ວຍເຫຼືອຈາກຫຼາຍພາກສ່ວນນັບ ທັງການນຳພັກ-ລັດຂັ້ນແຂວງ, ເມືອງ, ນັກທຸລະກິດພໍ່ຄ້າ-ຊາວຂາຍສ່ວນແຮງງານຕັ້ງເຮືອນແມ່ນກໍາລັງຊາວໜຸ່ມຈາກພະແນກການ, ອົງການຈັດຕັ້ງມະຫາຊົນ, ຫ້ອງການ ແລະກອງພົນທະຫານຮາບທີ 3ໃຫ້ການຊ່ວຍເຫຼືອ.

ໂອກາດດັ່ງກ່າວທາງອຳນາດການປົກຄອງເມືອງ, ບ້ານ ແລະປະຊາຊົນຜູ້ທີ່ປະສົບເຄາະຮ້າຍຈາກເຫດການໄຟໄໝ້ ດັ່ງກ່າວ ກໍໄດ້ສະແດງຄວາມຂອບໃຈຕໍ່ກັບການນໍາແຂວງທີ່ລົງມາໃກ້ຊິດຕິດແທດ ແລະໃຫ້ການຊ່ວຍເຫຼືອໂດຍຕະ ຫຼອດມາ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.