ອຸດົມໄຊ ທຳລາຍເຄື່ອງສຳອາງຕ້ອງຫ້າມ ມູນຄ່າກວ່າ 10 ລ້ານກີບ

ຜ່ານການລົງກວດກາຕົວຈີງຂອງຂະແໜງອາຫານ ແລະຢາ ພະແນກສາທາລະນະສຸກແຂວງອຸດົມໄຊ ຮ່ວມກັບພາກສ່ວນທີ່ກ່ຽວຂ້ອງ ໂດຍສະເພາະແມ່ນ ທີມງານເຄື່ອງສຳອາງ ຊຶ່ງປະກອບດ້ວຍຫ້ອງການສາທາລະນະສຸກເມືອງ, ພະແນກເຕັກໂນໂລຊີ, ພະແນກຕຳຫຼວດເສດຖະກິດ, ພະແນກອຸດສາຫະກຳການຄ້າ ໄດ້ລົງກວດກາສີນຄ້າຕົວຈິງໃນວັນທີ 29 ມີນາຜ່ານມານັ້ນ ຢູ່ໃນຕະຫຼາດເທສະບານເມືອງໄຊ ເຊັ່ນ: ຕະຫຼາດໜອງແມງດາ, ຕະຫຼາດອຸດົມຊັບ, ຕະຫຼາດບ້ານຖີ່ນ, ຊຸບເປີມາເກັດເຊີງຊ່າງ, ດູດູມາກ ແລະບັນດາຮ້ານຂາຍເຄື່ອງໃຫຍ່ໆ ໃນເທສະບານ, ໄດ້ພົບເຫັນຜະລິດຕະພັນເຄື່ອງສຳອາງຕ້ອງຫ້າມຈຳນວນ 86 ລາຍການມູນຄ່າ 10,3 ລ້ານກວ່າກີບ, ສີນຄ້າໝົດອາຍຸ ແລະບໍ່ມີສະຫຼາກຈຳນວນ 14 ລາຍການຄິດເປັນມູນຄ່າ 2,9 ລ້ານກວ່າກີບ, ລວມມູນຄ່າທັງໝົດ 13 ລ້ານກວ່າກີບ.

ທ່ານ ສົມມິດ ອ່ອນແກ້ວ ຂະແໜງອາຫານ ແລະຢາ ໃຫ້ສຳພາດວ່າ: ຈຸດປະສົງຂອງການລົງກວດກາ ແລະທຳ ລາຍເຄື່ອງສຳອາງທີ່ຕ້ອງຫ້າມ ແລະໝົດອາຍຸ ຄັ້ງນີ້ແມ່ນເພື່ອປ້ອງກັນຜູ້ຊົມໃຊ້ ໂດຍສະເພາະແມ່ນຄຣີມປຸງ ຫຼື ມີສານເຄມີເຈືອປົນນັ້ນຈະເຮັດໃຫ້ເກີດອັນຕະລາຍຮ້າຍແຮງຕາມມາ ຈິ່ງໄດ້ສ້າງບົດບັນທຶກກັບບັນດາພາກສ່ວນຕ່າງໆທີ່ໄດ້ນຳເອົາສີນຄ້າຕ້ອງຫ້າມເຂົ້າມາຂາຍ, ໂດຍອີງໃສ່ຂໍ້ກຳນົດວ່າດ້ວຍການຄຸ້ມຄອງຄຸນນະພາບຜະລິດຕະພັນເຄື່ອງສຳອາງ ແລະຂໍ້ຕົກລົງຂອງຫົວໜ້າພະແນກສາທາລະນະສຸກແຂວງວ່າດ້ວຍການແຕ່ງຕັ້ງທີມງານຜະລິດຕະພັນເຄື່ອງສຳອາງຕ້ອງຫ້າມ, ພ້ອມທັງໄດ້ຝາກເຖິງຜູ້ປະກອບການທີ່ຈະນຳເອົາສີນຄ້າເຂົ້າມາຂາຍໃຫ້ຄຳນຶງເຖິງຄວາມປວດໄພຂອງຜູ້ບໍລິໂພກ ແລະຄຸນນະພາບຂອງສີນຄ້ານັ້ນ ຖ້າຫາກວ່າບໍ່ໄດ້ຕາມທີ່ກຳນົດໄວ້ກໍ່ຈະຖຶກຢຶດ ແລະທຳລາຍຖິ້ມຕາມລະບຽບການ.

ພິທີທໍາລາຍເຄື່ອງສໍາອາງຄັ້ງນີ້ແມ່ນ ໄດ້ຈັດຂຶ້ນທີ່ສະໝາມຂີ້ເຫຍື້ອຫຼັກແປດ ໃນວັນທີ 31 ມີນາຜ່ານມາ ໂດຍມີພາກສ່ວນທີ່ກ່ຽວຂ້ອງເຂົ້າຮ່ວມ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.