ອົດສະຕາລີຊ່ວຍສ້າງຊັບພະຍາກອນມະນຸດ

ອົດສະຕາລີຊ່ວຍສ້າງຊັບພະຍາກອນມະນຸດ

ລັດຖະບານປະເທດອົດສະຕາລີ ຈະສືບຕໍ່ຊ່ວຍເຫຼືອລາວສ້າງຊັບພະຍາກອນມະນຸດທັງສຶກສາຢູ່ລາວ ແລະໃຫ້ທຶນໄປຮຽນຕໍ່ ພາຍຫຼັງທີ່ມີຄົນລາວ 1.200 ກວ່າຄົນທີ່ຈົບຈາກປະເທດດັ່ງກ່າວລ້ວນແຕ່ປະສົບຜົນສຳເລັດໃນໜ້າທີ່ວຽກງານ.

ຂ່າວແຈ້ງໃຫ້ຮູ້ວ່າ: ໃນວັນທີ 7 ກັນຍາ 2016 ລັດຖະບານແຫ່ງ ສປປ ລາວ ຊຶ່ງຕາງໜ້າໂດຍທ່ານ ພັນຄໍາ ວິພາວັນ ຮອງປະທານປະເທດ ແລະລັດຖະບານແຫ່ງປະເທດອົດສະຕາລີຕາງໜ້າໂດຍທ່ານ ມາຄອມ ເທີນບູ ນາຍົກລັດຖະມົນຕີ ໄດ້ຮ່ວມເປີດນໍາໃຊ້ຫ້ອງການສະຖາບັນ ລາວ-ອົດສະຕາລີ ແລະສູນສົ່ງເສີມພາສາຕ່າງປະເທດຄືນໃໝ່ ຊຶ່ງຕັ້ງຢູ່ບ້ານ ສີສະເກດ (ໜ້າຫໍພະແກ້ວ) ເມືອງຈັນທະບູລີ ນະຄອນຫຼວງວຽງຈັນ, ພາຍຫຼັງສໍາເລັດການບູລະນະສ້ອມແປງເມື່ອບໍ່ດົນມານີ້ ໂດຍໄດ້ຮັບທຶນຊ່ວຍເຫຼືອຈາກລັດຖະບານອົດສະຕາລີ.

ໂອກາດນີ້ ທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະກິລາກ່າວວ່າ: ໂຄງການບູລະນະຫ້ອງການດັ່ງກ່າວ ແມ່ນໄດ້ມີການປັບປຸງ ແລະສ້ອມແປງອາຄານເກົ່າແກ່ໃຫ້ມີໃບໜ້າໃໝ່, ມີມາດຕະຖານ ແລະສອດຄ່ອງກັບການພັດທະນາໃນໄລຍະໃໝ່, ສູນແຫ່ງນີ້ຈະມີບົດບາດສໍາຄັນໃນ ການພັດທະນາຊັບພະຍາກອນມະນຸດໃຫ້ແກ່ ສປປ ລາວ ໃນອະນາຄົດ ເພື່ອສ້າງຂີດຄວາມສາມາດໃຫ້ແກ່ພະນັກງານໃນລະດັບຜູ້ບໍລິຫານ ແລະລະດັບວິຊາການທີ່ຮັບຜິດຊອບດ້ານການວາງແຜນ ແລະການຄຸ້ມຄອງບໍລິຫານວຽກງານພັດທະນາຊັບພະຍາກອນມະນຸດ.

ໃນໄລຍະຜ່ານມາ ລັດຖະບານອົດ ສະຕາລີ ໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາຊັບພະຍາກອນມະນຸດແກ່ລາວ ໂດຍໄດ້ສະໜອງທຶນໃຫ້ນັກສຶກສາ, ຄູ, ອາຈານ ແລະພະນັກງານໄປຮຽນຕໍ່ທີ່ປະເທດອົດສະຕາລີໃນຫຼາຍສາຂາວິຊາ ເພື່ອປະກອບສ່ວນພັດທະນາ ສປປ ລາວ ຕະຫຼອດໄລຍະກວ່າ 50 ປີຜ່ານມາມີອະດີດນັກສຶກສາຂອງລາວຫຼາຍກວ່າ 1,2 ພັນຄົນ ທີ່ສໍາເລັດການສຶກສາຈາກປະເທດອົດສະຕາລີ, ປະຈຸບັນອະດີດນັກສຶກສາດັ່ງກ່າວ ສ່ວນໃຫຍ່ເປັນພະນັກງານອາວຸໂສທີ່ເຮັດວຽກສັງກັດຢູ່ພາກລັດ, ສ່ວນຫຼາຍເຮັດວຽກໃນຂະແໜງຄົ້ນຄວ້າ ແລະສິດສອນ, ອີກຈໍານວນໜຶ່ງກໍໄດ້ກາຍເປັນຜູ້ປະກອບການ ແລະນັກທຸລະກິດທີ່ປະສົບຜົນສໍາເລັດ.

ໂອກາດດຽວກັນ ທ່ານນາຍົກລັດຖະມົນຕີອົດສະຕາລີ ກໍໄດ້ເປັນກຽດມອບທຶນການສຶກສາທີ່ຈະໄປຮຽນຕໍ່ຢູ່ປະເທດອົດສະຕາລີຈໍານວນ 31 ທຶນ ໃນລະດັບປະລິນຍາເອກ 4 ທຶນ, ປະລິນຍາໂທ 25 ທຶນ ແລະຊັ້ນສູງ 2 ທຶນ, ໃນສາຂາວິສະວະກອນໄຟຟ້າແບບຍືນຍົງ, ການພັດທະນາຊຸມຊົນ, ການບັນຊີ, ເສດຖະສາດ, ວິທະຍາສາດສັງຄົມ ແລະອື່ນໆ.

ທີ່ມາ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.