ຮອງ​ນາ­ຍົກໃຫ້ ຮສສ ເພີ່ມ​ຄວາມ​ເອົາ­ໃຈ­ໃສ່ການ​ຄຸ້ມ​ຄອງ​ແຮງ​ງານ

ແນ­ໃສ່​ແກ້​ໄຂ​ບັນ­ຫາ​ແຮງ​ງານຕ່າງ­ປະ­ເທດ​ທີ່​ມາ​ເຄື່ອນ​ໄຫວ​ບໍ່​ຖືກ­ຕ້ອງຢູ່​ໃນ​ຂອບ​ເຂດ​ທົ່ວ​ປະ­ເທດ​ທີ່​ຊ້ຳ​ເຮື້ອ​ມາຫຼາຍ​ປີ​ໃຫ້​ເຂົ້າ​ສູ່​ລະ­ບົບ​ທ່ານ​ຮອງ​ນາຍົກ​ລັດ­ຖະ­ມົນ­ຕີ​ໄດ້​ເນັ້ນ​ໜັກ​ໃຫ້​ກະ­ຊວງ ແຮງ​ງານ ແລະ​ສະ­ຫວັດ­ດີ​ການ​ສັງ­ຄົມ (ຮສສ) ຕ້ອງ​ເພີ່ມ​ທະ­ວີ​ຄວາມ​ເອົາ­ໃຈ­ໃສ່​ຕໍ່​ວຽກ​ງານ​ການ​ຄຸ້ມ​ຄອງ​ແຮງ​ງານດ້ວຍ​ລະ­ບຽບ​ກົດ­ໝາຍ​ທັງ​ໃຫ້​ກຳ​ໄດ້ແນວ­ທາງ​ການ​ຕ່າງ­ປະ­ເທດ​ຂອງ​ລາວ.

ຮອງ​ນາ­ຍົກໃຫ້ ຮສສ ເພີ່ມ​ຄວາມ​ເອົາ­ໃຈ­ໃສ່ການ​ຄຸ້ມ​ຄອງ​ແຮງ​ງານ

ທ່ານ ຄຳ​ແພງ ໄຊ​ສົມ​ແພງ ລັດ​ຖະມົນ­ຕີ​ກະ­ຊວງ ຮສສ ໄດ້​ລາຍ​ງານ​ໂອ­ກາດ​ຕ້ອນ­ຮັບ​ທ່ານ​ຮອງລັດ­ຖະ­ມົນ­ຕີ​ກອງ​ປະ­ຊຸມ​ສະ­ຫຼຸບ​ຖອດ ຖອນ​ບົດ­ຮຽນ​ຈາກ​ການ­ຈັດ­ຕັ້ງ​ປະ ຕິ​ບັດ​ການ​ຂຶ້ນ​ທະ­ບຽນ ແລະ​ອອກ​ບັດ​ອະນຸ​ຍາດ​ເຄື່ອນ​ໄຫວ​ຊົ່ວ­ຄາວ​ໃຫ້​ແກ່​ຄົນຕ່າງ­ປະ­ເທດ​ທີ່​ເຄື່ອນ​ໄຫວ​ຍັງ​ບໍ່​ຖືກຕ້ອງ​ຢູ່​ໃນ​ຂອບ​ເຂດ​ທົ່ວ​ປະ­ເທດ ຊຶ່ງ​ຈັດຂຶ້ນ​ໃນ​ວັນ​ທີ 14 ມີ­ນາ 2017 ທີ່​ສູນ​ຝຶກອົບ­ຮົມ ແລະ​ການ​ຮ່ວມ​ສາ­ກົນ (ITCT) ວ່າ:ການ​ຂຶ້ນ​ທະ­ບຽນ ແລະ​ອອກ​ບັດ​ອະ­ນຸຍາດ​ເຄື່ອນ​ໄຫວ​ຊົ່ວ­ຄາວ​ໃຫ້​ແກ່​ຄົນ​ຕ່າງປະ­ເທດ​ທີ່​ຍັງ​ເຄື່ອນ​ໄຫວ​ບໍ່​ຖືກ­ຕ້ອງ​ຢູ່ ສປປ ລາວ ຕາມ​ຄຳ​ສັ່ງ ເລກ​ທີ 62/ນຍ ຂອງ​ນາ­ຍົກ­ລັດ­ຖະ­ມົນ­ຕີ​ແມ່ນ​ເພື່ອ​ຫັນເອົາ​ຄົນ​ຕ່າງ­ປະ­ເທດ​ທີ່​ເຄື່ອນ​ໄຫວ​ບໍ່​ຖືກຕ້ອງ​ເຂົ້າ​ສູ່​ກົດ­ໝາຍ ແລະ​ລະ­ບຽບ​ການຂອງ​ປະ­ເທດ ໂດຍ​ຈັດ​ຕັ້ງ​ການ​ຂຶ້ນ​ທະບຽນ ແລະ​ອອກ​ບັດ​ອະ­ນຸ­ຍາດ​ເຄື່ອນ​ໄຫວຊົ່ວ­ຄາວ​ໃຫ້​ເຂົາ­ເຈົ້າ ຊຶ່ງ​ເປັນ​ການ​ປັບ​ສະຖາ­ນະ​ພາບ​ໃຫ້​ເຄື່ອນ​ໄຫວ​ໄດ້​ຕາມ​ກົດໝາຍ ແລະ​ມີ​ເວ­ລາ​ກະ­ກຽມ​ຕົນ​ເອງ​ໃນການ​ຢຸດ​ການ­ເຄື່ອນ­ໄຫວ​ທີ່​ບໍ່​ຖືກ­ຕ້ອງ, ທັງ​ເປັນ​ການ​ແກ້​ໄຂ​ບັນ­ຫາ​ຢ່າງ​ມີ​ຄວາມກະ­ທັດ​ຮັດ ແລະ​ເຮັດ​ໃຫ້​ການ­ເຄື່ອນ­ໄຫວມີ​ປະ­ສິດ­ທິ­ພາບ, ມີ​ລັກ­ສະ­ນະ​ຍືນ​ຍົງ, ສາມາດ​ເກັບ​ກຳ​ສະ­ຖິ­ຕິ​ຂອງ​ຄົນ​ຕ່າງ​ປະ ເທດ​ທີ່​ເຄື່ອນ​ໄຫວ​ຢູ່​ພາຍ​ໃນ ແລະ​ສະດວກ​ໃນ​ການ​ຕິດ­ຕາມ​ກວດ­ກາ, ການປະ­ຕິ­ບັດ​ມາດ​ຕະ­ການ​ຕໍ່​ຄົນ​ຕ່າງ­ປະ­ເທດ​ທີ່​ເຄື່ອນ​ໄຫວ​ບໍ່​ຖືກ­ຕ້ອງ ແລະ​ຕໍ່​ພົນ​ລະເມືອງ​ລາວ​ທີ່​ມີ​ສ່ວນ​ກ່ຽວ­ຂ້ອງ​ກັບ​ການເຄື່ອນ​ໄຫວ​ແບບ​ບໍ່​ຖືກ­ຕ້ອງ​ຂອງ​ຄົນ​ຕ່າງ­ປະ­ເທດ.

ໃນ​ໂອ­ກາດ​ດັ່ງ­ກ່າວ ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ຍັງໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ການ​ຈັດຕັ້ງ​ປະ­ຕິ­ບັດ​ຕາມ​ຄຳ​ສັ່ງ​ຂອງ​ນາ­ຍົກ​ລັດ ຖະ​ມົນ­ຕີ ແລະ​ເຫັນ​ວ່າ​ໄລ­ຍະ​ຜ່ານ​ມາ​ທາງກະ­ຊວງ ຮສສ ສາ­ມາດ​ປະ­ຕິ­ບັດ​ໄດ້​ດີ​ສົມຄວນ, ແຕ່​ເພື່ອ​ເຮັດ​ໃຫ້­ການ​ປະ­ຕິ­ບັດ​ມີຄວາມ​ຮັດ­ກຸມ​ຫຼາຍ​ຂຶ້ນ​ພາກ­ສ່ວນ​ທີ່​ກ່ຽວຂ້ອງ​ຕ້ອງ​ເພີ່ມ​ທະ­ວີ​ຄວາມ​ເອົາ­ໃຈ­ໃສ່​ຕໍ່  ກັບ​ວຽກ​ງານ​ການ​ຄຸ້ມ​ຄອງ​ແຮງ​ງານ ແລະ​ຄົນ​ຕ່າງ­ປະ­ເທດ​ໃນ​ບາງ​ບັນ­ຫາ ເຊັ່ນ ກຳ​ແໜ້ນ​ແນວ­ທາງ​ຂອງ​ພັກ​ຕໍ່​ວຽກ ງານ​ການ​ຕ່າງ­ປະ­ເທດ​ໃນ​ສະ­ພາບ ແລະ ເງື່ອນ­ໄຂ​ແຫ່ງ​ການ​ເຊື່ອມ​ໂຍງ​ກັບ​ພາກພື້ນ ແລະ​ສາ­ກົນ, ທຸກ​ການ​ປະ­ຕິ­ບັດ​ຕໍ່​ຄົນຕ່າງ­ປະ­ເທດ​ຕ້ອງ​ເອົາ­ໃຈ­ໃສ່​ເລື່ອງ​ມາດຕະ​ຖານ​ສາ­ກົນ, ເລື່ອງ​ກົດ­ໝາຍ ແລະ ລະ­ບຽບ​ການ​ທີ່​ກຳ­ນົດ​ໄວ້, ຕ້ອງ​ກຽມ​ຄຳຕອບ​ໃຫ້​ລະ­ອຽດ ແລະ​ເປັນ​ເອ­ກະ​ພາບ ເພື່ອ​ຊີ້​ແຈງ​ໃນ​ເວ­ທີ​ສາ­ກົນ​ຕ່າງໆ​ໃນ​ກໍລະ​ນີ​ຫາກ​ມີ​ການ​ຊັກ​ຖາມ, ພ້ອມ​ກັນ​ນັ້ນ ອົງ­ການ​ປົກ­ຄອງ​ແຕ່​ລະ​ທ້ອງ­ຖິ່ນ​ທຸກຂັ້ນ​ຕ້ອງ​ສຶກ​ສາ​ອົບ­ຮົມ, ຊີ້​ນຳ​ຢ່າງ​ເອົາໃຈ​ໃສ່​ຕໍ່​ພະ­ນັກ­ງານ​ລັດ­ຖະ­ກອນເຈົ້າ​ໜ້າທີ່​ທີ່​ກ່ຽວ­ຂ້ອງ​ຂອງ​ລັດ, ນັກ­ທຸ­ລະ­ກິດ, ພໍ່­ຄ້າ​ຊາວ​ຂາຍ ແລະ​ພໍ່​ແມ່​ປະ­ຊາ­ຊົນ​ໃຫ້ເຫັນ­ແກ່​ຜົນ​ປະ­ໂຫຍດ​ລວມ​ຂອງ​ຊາດ ເປັນ​ຫຼັກ​ບໍ່​ປິດ​ບັງ​ເຊື່ອງ­ອຳ​ບໍ່​ອຳ­ນວຍຄວາມ​ສະ­ດວກ​ຢ່າງ​ເດັດ­ຂາດ​ຕໍ່​ຄົນ​ຕ່າງປະ­ເທດ​ທີ່​ເຄື່ອນ​ໄຫວ​ບໍ່​ຖືກ­ຕ້ອງ​ຢູ່​ລາວ.

ນອກ​ນັ້ນ​ໃຫ້​ເອົາ­ໃຈ­ໃສ່​ຕື່ມ​ໃນ​ການຄຸ້ມ​ຄອງ​ກວດ­ກາ​ການ​ນຳ​ໃຊ້​ແຮງ​ງານຕ່າງ­ປະ­ເທດ​ຢູ່​ບັນ­ດາ​ໂຄງ­ການ​ຂະ­ໜາດໃຫຍ່​ທີ່​ມີ​ເວ­ລາ​ກຳ­ນົດ​ລວມ​ທັງ​ເຂດ​ເສດຖະ​ກິດ​ພິ­ເສດ ແລະ​ເຂດ​ເສດ­ຖະ­ກິດ​ສະເພາະ​ທີ່​ມີ​ການ​ນຳ​ໃຊ້​ຄົນ​ຕ່າງ­ປະ­ເທດ ເຮັດ​ວຽກ​ເປັນ​ຈຳ­ນວນ​ຫຼາຍ ໂດຍ​ສົມ­ທົບກັບ​ພາກ­ສ່ວນ​ທີ່​ເປັນ​ເຈົ້າ​ຂອງ​ໂຄງ­ການ, ສຳ­ລັບ​ດ້ານ​ນິ­ຕິ​ກຳ​ແມ່ນ​ໃຫ້​ເບິ່ງ​ຄືນ​ອັນໃດ​ທີ່​ມັນ​ສອດ­ຄ່ອງ​ຕ້ອງ​ຮີບ​ຮ້ອນ​ປັບ­ປຸງ ແລະ​ແກ້​ໄຂເພື່ອ​ເຮັດ​ໃຫ້​ການ­ຈັດ­ຕັ້ງ​ປະ­ຕິບັດ​ວຽກ​ງານ​ດັ່ງ­ກ່າວ​ໃນ​ສະ­ເພາະ​ໜ້າ ແລະ​ຍາວ​ນານ​ມີ​ປະ­ສິດ­ທິ­ພາບ, ປະ​ສິດ­ທິຜົນ​ສູງ​ສຸດ, ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ກ່າວ​ຕື່ມ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.