ຮຸ້ນ​ສ່ວນ​ຢາງ­ພາ­ລາ​ລາວ-ຫວຽດ ຄາດ​ຍອດ​ຂາຍປີ​ນີ້​ອາດ​ທະ­ລຸ 3 ຮ້ອຍ​ຕື້​ກວ່າ​ກີບ

ໄປ​ໄດ້​ງາມ​ສຳ­ລັບ​ທຸ­ລະ​ກິດ​ການສົ່ງ​ອອກ​ສີນ​ຄ້າ​ປາຍ​ແຫຼມ​ຢາງ­ພາ­ລາ ທີ່​ແຂວງ​ຈຳ­ປາ​ສັກ ຫຼັງ​ທີ່​ບໍ່​ລິ​ສັດ​ແຖວໜ້າ­ທີ່​ມາ​ລົງ­ທຶນ​ປູກ​ໄດ້​ເຜີຍ​ລາ­ຄາ ແລະ ການ​ສົ່ງ​ອອກ​ປີ​ແລ້ວ​ມີ​ບັນ­ຍາ­ກາດ​ດີ​ພໍ​ສົມຄວນ ເຮັດ​ໃຫ້​ບໍ­ລິ­ສັດ​ສາ­ມາດ​ມີ​ຜົນ​ກຳໄລ​ຂຶ້ນ ພ້ອມ​ຕັ້ງ​ເປົ້າ​ໝົດ​ປີ 2017 ຈະ​ມີ ລາຍ​ຮັບ​ຈາກ​ການ​ຂາຍ​ຢາງ​ປະ­ມານ 3 ຮ້ອຍ​ຕື້​ກວ່າ​ກີບ.

ບໍ­ລິ­ສັດ​ຮຸ້ນ​ສ່ວນ​ຢາງ­ພາ­ລາ​ລາວ-ຫວຽດ ແມ່ນ​ນັກ​ລົງ­ທຶນ​ຫວຽດ­ນາມ​ທີ່ ໄດ້​ເຂົ້າ​ມາ​ລົງ­ທຶນ​ປູກ​ຢາງ­ພາ­ລາ​ລາຍໃຫຍ່ຢູ່​ແຂວງ​ຈຳ­ປາ​ສັກ​ໃນ​ປີ 2005, ຊຶ່ງ​ມີ ເນື້ອ­ທີ່​ສຳ​ປະ­ທານ​ປູກ​ຢາງ​ທັງ​ໝົດ 10 ພັນ​ເຮັກ­ຕາ, ມີ​ພະ­ນັກ­ງານ​ກຳ­ມະ­ກອນ ທັງ​ໝົດ 2.670 ຄົນ, ໃນ​ນັ້ນ​ມີ​ຄົນ​ຫວຽດນາມ 300 ຄົນ, ບໍ­ລິ­ສັດ​ມີ 4 ນິ­ຄົມ, ມີ ໂຮງ­ງານ​ປຸງ​ແຕ່ງ​ຢາງ­ພາ­ລາ 1 ແຫ່ງ, ປະ­ຈຸ​ບັນ​ເນື້ອ­ທີ່ໆ​ສາ­ມາດ​ຂິດ​ຢາງ​ໄດ້ 9 ພັນ​ກວ່າ​ເຮັກ­ຕາ.

ທ່ານ ໂງ ກວຽນ ປະ­ທານ​ບໍ­ລິ­ສັດ​ຮຸ້ນສ່ວນ​ຢາງ­ພາ­ລາ​ລາວ-ຫວຽດ ເມືອງ​ປາກເຊ ແຂວງ​ຈຳ­ປາ​ສັກ, ໄດ້​ໃຫ້​ສຳ­ພາດ​ຕໍ່ນັກ​ຂ່າວ​ໜັງ­ສື­ພິມ​ເສດ­ຖະ­ກິດ-ສັງ­ຄົມ​ປະຈຳ​ແຂວງ​ເມື່ອ​ບໍ່​ດົນ​ມາ​ນີ້​ໃຫ້​ຮູ້​ວ່າ: ໃນ 2-3 ປີ­ຜ່ານ­ມາ​ແມ່​່ນ​ເປັນ​ປີ​ທີ່​ເຕັມ​ໄປ​ດ້ວຍຄວາມ​ທ້າ​ທາຍ​ຫຼາຍ​ຢ່າງ ທັງ​ມີ​ຜົນ​ກະທົບ​ຈາກ​ວິ​ກິດ​ການ​ທາງ​ດ້ານ​ການ​ເງິນ, ຜົນ​ສະ­ທ້ອນ​ຈາກ​ເສດ­ຖະ­ກິດ​ໂລກ ແລະ ລາ­ຄາ​ມີ​ການ​ປ່ຽນ­ແປງ​ຕະ­ຫຼອດ, ຊຶ່ງ​ມີບາງ​ເດືອນ​ລາ­ຄາ​ຢາງ​ກໍ​ຕົກ­ຕ່ຳ​ກວ່າ​ຕົ້ນທຶນ​ການ​ຜະ­ລິດ, ແນວ­ໃດ​ກໍ​ດີ​ຍ້ອນ​ການນຳ​ບໍ­ລິ­ສັດ​ກັບ​ພະ­ນັກ­ງານ​ໄດ້​ພ້ອມ­ພຽງ​ກັນ​ອອກ­ແຮງ​ສູ້​ຊົນ ເຮັດ​ໃຫ້​ບໍ­ລິ­ສັດ​ສາ­ມາດ​ປະ­ຕິ­ບັດ​ໄດ້​ຕາມ​ແຜນ­ການ ແລະ ສຳ­ເລັດ​ຕາມ​ລະ­ດັບ​ຄາດ­ໝາຍ.

ປະ­ຈຸ​ບັນ ​ໂຮງ­ງານ​ຜະ­ລິດ​ຢາງ­ພາ­ລາຂອງ​ບໍ­ລິ­ສັດສາ­ມາດ​ຜະ­ລິດ​ຢາງ­ພາ­ລາ ໄດ້​ຄຸນ​ນະ​ພາບ​ຫຼາຍ​ເກດ​ຕາມ​ມາດ­ຖານ​ທີ່ກຳ­ນົດ​ໄວ້, ການ​ຜະ­ລິດ​ນັບ​ມື້​ຍົກ​ສູງ​ຄຸນນະ​ພາບ​ທີ່​ໄດ້​ສົ່ງ​ໄປ​ຂາຍ​ຫຼາຍ​ປະ­ເທດ, ແຕ່​ກໍ​ບໍ່​ທັນ​ມີ​ການ​ຕຳ​ໜິ​ຕິ​ຊົມ​ຈາກ​ລູກ​ຄ້າກ່ຽວ​ກັບ​ຄຸນ​ນະ​ພາບ, ຊຶ່ງ​ໂດຍ​ລວມ​ແລ້ວ ການ​ປຸງ​ແຕ່ງ ແລະ​ການ​ສົ່ງ​ອອກ​ໄດ້​ປະສົບ​ຜົນ­ສຳ­ເລັດ​ຕາມ​ຄາດ­ໝາຍ ຄື​ໃນ​ປີ 2016 ທີ່​ຜ່ານ​ມາ​ສາ­ມາດ​ຜະ­ລິດ​ຢາງ ແລະ​ສົ່ງ​ອອກ​ໄດ້​ທັງ​ໝົດ 15.092 ໂຕນ, ສາ­ມາດ​ມີ​ລາຍ​ຮັບ​ຈາກ​ການ​ຂາຍ​ຢາງ ທັງ​ໝົດ 23 ລ້ານ​ກວ່າ​ໂດ​ລາ​ສະ­ຫະ­ລັດ ຫຼື ປະ­ມານ 184 ຮ້ອຍ​ຕື້​ກວ່າ​ກີບ.

ທ່ານ​ໃຫ້​ຮູ້​ຕື່ມ​ວ່າ: ສຳ­ລັບ​ສົກ​ປີ 2017 ນີ້​ບໍ­ລິ­ສັດ​ມີ​ເນື້ອ­ທີ່​ສາ­ມາດ​ຂີດຢາງ​ໄດ້​ທັງ​ໝົດ 9400 ເຮັກ­ຕາ, ຄາດວ່າ​ຈະ​ສູ້​ຊົນ​ຜະ­ລິດ ແລະ​ປຸງ​ແຕ່ງ​ຢາງ​ພາລາ​ໃຫ້​ໄດ້ 15.500 ໂຕນ ແລະ​ຖ້າ­ວ່າ​ລາ­ຄາ​ຢາງ­ພາ­ລາ​ຍັງ​ສູງ​ຂຶ້ນ​ຄື​ໃນ​ປະ­ຈຸ​ບັນ​ນີ້ ບໍ­ລິ­ສັດ​ຈະ​ມີ​ລາຍ​ຮັບ​ຈາກ​ການ​ຂາຍ​ຢາງ​ທັງ​ໝົດ 38 ລ້ານ​ກວ່າ​ໂດ​ລາ​ສະ­ຫະ­ລັດ ຫຼື ປະ­ມານ 304 ຮ້ອຍ​ຕື້​ກວ່າ​ກີບ ແລະ ບໍ­ລິ­ສັດ​ກໍ່​ຈະ​ມີ​ຜົນ​ກຳ­ໄລ​ປະ­ມານ 4 ລ້ານ ກວ່າ​ໂດ​ລາ​ສະ­ຫະ­ລັດ ປະ­ມານ 32 ຕື້ ກວ່າ​ກີບ.

ໂດຍ: ໂພ­ທິ​ຣາ​ຊ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.