ເກືອບ 20 ໂຄງການລັດລົງທຶນຢູ່ໄຊຍະປະຕິບັດຫຼ້າຊ້າ

 ໃນໄລຍະ 5 ເດືອນຕົ້ນປີ 2019 ນີ້ ພະແນກໂຍທາທິການ ແລະຂົນສົ່ງແຂວງໄຊຍະບູລີ ໄດ້ຮັບຜິດຊອບຕົວເລກແຜນການລົງທຶນຂອງລັດຕາມທີ່ສະພາອານຸມັດລວມມີທຶນສືບຕໍ່, ບ້ວງປົກກະຕິ, ພັດທະນາຊົນນະບົດ ແລະລືບລ້າງຄວາມທຸກຍາກ,ບ້ວງທຶນຈັດສັນພູມລໍາເນົາ ແລະ ບ່ອນທໍາມາຫາກິນຂອງປະຊາຊົນ, ບ້ວງທຶນພັດທະນາເມືອງ ໃໝ່ ແລະບ້ວງຊໍາລະໜີ້ສີນໄພພິບັດລວມທັງໝົດ 200 ໂຄງການ, ມູນຄ່າ 1,4 ພັນຕື້ກີບ.

ທ່ານ ແພງຊ້ອຍ ແພງເມືອງ ຫົວໜ້າພະແນກ ຍທຂ ແຂວງໄຊຍະບູລີ, ໄດ້ມີຄໍາ ເຫັນຕໍ່ກອງປະຊຸມຄົບຄະນະບໍລິຫານງານພັກແຂວງຄັ້ງທີ 13 ສະໄໝທີ VI ໃນວັນທີ 10 ມິຖຸນາຜ່ານມານີ້ວ່າ: ໃນນັ້ນມີ: ໂຄງການສາກົນທີ່ກະຊວງຄຸ້ມຄອງໂດຍກົງປະຕິບັດຢູ່ແຂວງລວມທັງສືບ ຕໍ່ປີ 2019 ມີ 10 ໂຄງການ, ສໍາເລັດແລ້ວ 2 ໂຄງການ ແລະພວມປະຕິບັດມີ 8 ໂຄງການ, ໂຄງການແຫຼ່ງທຶນຂອງກະຊວງ ຍທຂ ມອບໃຫ້ແຂວງຄຸ້ມຄອງຈັດຕັ້ງປະຕິບັດລວມທັງວຽກສໍາຫຼວດ-ອອກແບບ ແລະ ວຽກກໍ່ສ້າງທັງສືບຕໍ່ປີ 2019 ມີ 22 ໂຄງການ, ພວມປະຕິບັດ 9 ໂຄງການ ແລະ ໂຄງການສໍາຫຼວດ-ອອກ ແບບ, ກໍ່ສ້າງ ແລະສ້ອມແປງບ້ວງລັດຖະບານມອບໃຫ້ແຂວງປະຕິບັດທັງສືບຕໍ່ປີ 2019 ມີ 168 ໂຄງການ, ພວມປະຕິບັດ 76 ໂຄງການ.

  ໂຄງການລົງທຶນຂອງລັດທີ່ຫຼ້າຊ້າ, ໝົດກໍານົດຂອງສັນຍາຫຼືບໍ່ໄດ້ປະຕິບັດ ມີທັງໝົດ 18 ໂຄງການ, ໃນນັ້ນ: ໂຄງການລົງທຶນຂອງກະຊວງມອບໃຫ້ແຂວງປະຕິບັດມີ 2 ໂຄງການ, ທຶນຂອງແຂວງບ້ວງປົກກະຕິມີ 4 ໂຄງການ, ທຶນພັດທະນາຊົນນະບົດມີ 2 ໂຄງການ ແລະທຶນພັດທະນາທາງຫຼວງທ້ອງຖິ່ນໄຟຟ້າຫົງສາມີ 10 ໂຄງການ, ໃນຈໍານວນ 18 ໂຄງການນີ້: ມີໂຄງການຂໍຍົກເລີກສັນຍາ 1 ໂຄງການຄື: ໂຄງການກໍ່ສ້າງເສັ້ນທາງຄົກແອກ-ປາກຫ້ວຍຍາງ, ເທົ່າ ກັບ 32%, ມູນຄ່າຊໍາລະແລ້ວ 800 ລ້ານກີບ, ຫຼ້າຊ້າກວ່າສັນຍາ 36 ເດືອນ, ໂຄງການສະເໜີຂໍຕໍ່ສັນຍາ 13 ໂຄງການຄື: ໂຄງການກໍ່ສ້າງເສັ້ນທາງປູອັດສະຟານ, ເສີມບ່າທາງ, ຮ່ອງລະບາຍນໍ້າ ແລະທາງຍ່າງເສັ້ນທາງແຕ່ 3 ແຍກທາງເຂົ້າໂຮງໝໍແຂວງ-3 ແຍກຫາງເດີ່ນບິນ, ມູນຄ່າສັນຍາ 11,30 ຕື້ກີບ, ເສັ້ນທາງແຕ່ 4 ແຍກເດີ່ນກີລາຮົ່ມຂອງແຂວງ-3 ແຍກທາງເຂົ້າໂຮງໝໍ, ມູນຄ່າສັນຍາ 11,76 ຕື້ກີບ, ເສັ້ນທາງແຕ່ 3 ແຍກປໍ້ານໍ້າມັນບົວໃສ-4 ແຍກຫ້ອງວ່າການແຂວງ, ມູນຄ່າສັນຍາ 15,78 ຕື້ກີບ, ເສັ້ນທາງແຕ່ແຍກທາງຫຼວງແຫ່ງຊາດເລກ 4-3 ແຍກປໍ້ານໍ້າມັນບົວໃສ-4 ແຍກເດີ່ນກີລາຮົ່ມ, ມູນຄ່າສັນຍາ 18,24 ຕື້ກີບ, ເສັ້ນທາງແຕ່ 4 ແຍກຫ້ອງວ່າການແຂວງ-4 ແຍກພະແນກຍຸຕິທໍ, ມູນຄ່າສັນຍາ 17,80 ຕື້ກີບ ແລະ ໂຄງການຫຼ້າຊ້າຫຼືບໍ່ໄດ້ປະຕິ ບັດແຕ່ໄດ້ຕໍ່ສັນຍາແລ້ວມີ 4 ໂຄງການ, ມູນຄ່າສັນຍາ 244,23 ຕື້ກີບ.

  ທ່ານ ແພງຊ້ອຍ ແພງເມືອງ ຍັງໄດ້ກ່າວຕື່ມອີກວ່າ: ສໍາລັບວິທີການແກ້ໄຂໃນຕໍ່ໜ້າແມ່ນຈະໄດ້ສົມທົບກັບພະແນກການທີ່ກ່ຽວຂ້ອງຂອງແຂວງ, ເມືອງ ລົງຕິດຕາມ, ຊຸກຍູ້ໂຄງການທີ່ຫຼ້າຊ້າ, ໂຄງການທີ່ໝົດກໍານົດສັນຍາ ແລະບໍ່ໄດ້ປະຕິບັດໃຫ້ລົງມືຈັດຕັ້ງປະຕິບັດຕາມແຜນການທີ່ວາງໄວ້, ສໍາລັບໂຄງການຫຼ້າຊ້າ, ໝົດກໍານົດສັນຍາແມ່ນໃຫ້ເຈົ້າຂອງໂຄງການສົມທົບກັບພາກສ່ວນກ່ຽວຂ້ອງເອີ້ນບໍລິສັດມາເຮັດບົດບັນທຶກໃຫ້ລະອຽດ ແລະຫາວິທີຄົ້ນຄົ້ວແກ້ໄຂໂດຍໄວຕໍ່ກັບໂຄງການທີ່ບໍ່ໄດ້ຈັດຕັ້ງປະຕິບັດໃຫ້ໄດ້ລົງມືຈັດຕັງປະຕິບັດໃນປີນີ້ໝົດທຸກໂຄງການ.

ຜູ້ຂຽນ: ອຸ່ນເຮືອນ ໂພທິລັກ

ພາບ ແລະ ຂ່າວໂດຍ: ໜັງສືພິມເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.