ເຂື່ອນເຊປຽນ-ເຊນໍ້ານ້ອຍ ເລັ່ງສ້າງໄປແລ້ວກວ່າ 60%

ໂຄງການກໍ່ສ້າງເຂື່ອນໄຟຟ້າເຊປຽນ-ເຊນ້ຳນ້ອຍ ຕັ້ງຢູ່ແຂວງຈຳປາສັກ ແລະ ແຂວງອັດຕະປື ທີ່ຄາດວ່າຈະໃຫ້ເລີ່ມເດີນເຄື່ອງຜະລິດກະແສໄຟອອກຈຳໜ່າຍໃນກາງປີ 2019, ມາຮອດປະຈຸບັນ ຄວາມຄືບໜ້າໂດຍລວມຂອງໂຄງການແມ່ນສຳເລັດແລ້ວຫຼາຍກວ່າ 60%.

ທ່ານ ສີລິໄຊ ອຸຍຸວັດ ຫົວໜ້າໂຄງການກໍ່ສ້າງເຂື່ອນເຊ ປ່ຽນ-ເຊນ້ຳນ້ອຍໃຫ້ສຳພາດໃນໂອກາດທີ່ຄະນະຜູ້ແທນ ຈາກປະເທດໄທ ແລະສື່ມວນຊົນລາວເດີນທາງມາຢ້ຽມຢາມຫວ່າງບໍ່ດົນມານີ້ວ່າ: ໂຄງການກໍ່ສ້າງເຂື່ອນເຊປຽນ-ເຊນ້ຳນ້ອຍເປັນໂຄງການໜຶ່ງທີ່ຕັ້ງຢູ່ ແຂວງຈຳປາສັກ ແລະແຂວງອັດຕະປື, ທີ່ມີກຳລັງການຜະລິດ 410 ເມກາວັດ, ລວມມູນຄ່າການກໍ່ສ້າງທັງໝົດປະມານ 58,2 ລ້ານໂດລາ ຊຶ່ງໄດ້ດຳເນີນການກໍ່ສ້າງມາໄດ້ 3 ປີກວ່າແລ້ວ ໂດຍກຳລັງການຜະລິດຈະໄດ້ແບ່ງອອກເປັນ 4 ພາກ, ໃນນີ້ 3 ພາກ, ພາກລະ 124 ເມກາວັດ, ພາຍຫຼັງສ້າງສຳເລັດຈະສົ່ງຂາຍໃຫ້ໄຟ ຟ້າຝ່າຍຜະລິດແຫ່ງປະເທດໄທ, ສ່ວນອີກ 1 ພາກ ຂະໜາດ 42 ເມກາວັດຈະຂາຍໃຫ້ໄຟຟ້າລາວເພື່ອຈຳໜ່າຍພາຍໃນ, ສຳລັບການກໍ່ສ້າງໂດຍລວມມາຮອດ ປະຈຸບັນມີຄວາມຄືບໜ້າ 65%, ໃນນີ້ ໂຕເຂື່ອນສຳເລັດແລ້ວ 90%, ຄາດໃນເດືອນກຸມພາ 2017 ຈະເລີ່ມເກັບກັກນ້ຳ, ສ່ວນການກໍ່ສ້າງອຸມົງ ແລະໂຮງໄຟຟ້າ ແມ່ນຍັງຈະສືບຕໍ່ເຮັດຈົນເຖິງເດືອນສິງຫາ 2018 ໃຫ້ສຳເລັດ ແລະເລີ່ມທົດ ລອງຜະລິດເພື່ອທັນຜະລິດອອກຈຳ ໜ່າຍເປັນທາງການໃນເດືອນກຸມພາ 2019.

ໝາຍຄວາມວ່າຍັງເວລາພຽງ 2 ປີ ການກໍ່ສ້າງຕ້ອງໃຫ້ສຳເລັດ, ບໍລິສັດ ຈິ່ງຕ້ອງສຸມໃສ່ບັນດາໜ້າວຽກທີ່ເຫັນວ່າ ຍັງມີຄວາມຫຼ້າຊ້າໃຫ້ໄດ້ຮັບການຂັບເຄື່ອນໄປດ້ວຍຜົນສຳເລັດຕົ້ນຕໍແມ່ນ ໂຮງໄຟຟ້າ ແລະການກໍ່ສ້າງອຸມົງ ແລະອ່າງເກັບກັກນ້ຳຈຳນວນ 3 ຈຸດຄື: ສ້າງປະຕູນ້ຳແຕ່ຈຸດຫ້ວຍໝາກຈັນ ເພື່ອເກັບກັກນ້ຳ ແລະຍົກຍ້າຍລະດັບນ້ຳຜັນໄປຫາ ເຂື່ອນເຊປຽນ ຊຶ່ງເປັນອ່າງເກັບນ້ຳທີ່ມີຂະໜາດບັນຈຸ 24 ລ້ານແມັດກ້ອນ ແລະຈາກເຂື່ອນເຊປ່ຽນກໍຈະມີທໍ່ສົ່ງຜ່ານອຸມົງ ເພື່ອຜັນນ້ຳລົງສູ່ເຂື່ອນເຊນ້ຳນ້ອຍສາມາດບັນຈຸໄດ້ 1.000 ກວ່າລ້ານແມັດກ້ອນ ໂດຍຈະສົ່ງຕໍ່ຜ່ານອຸມົງລົງຫາໂຮງໄຟຟ້າທີ່ຕັ້ງຢູ່ແຂວງອັດຕະປື ຊຶ່ງມີລະດັບຄວາມສູງຂອງເຂື່ອນເຊນ້ຳນ້ອຍຫາລົງໂຮງໄຟຟ້າ 660 ແມັດທີ່ ເໝາະສຳລັບການຜະລິດກະແສໄຟຟ້າ ນອກນັ້ນ ນ້ຳທີ່ຜ່ານເຄື່ອງປັ່ນໄຟແລ້ວແມ່ນຈະປ່ອຍລົງສູ່ແມ່ນ້ຳເຊກອງ, ສ່ວນໃນເຂື່ອນເຊນ້ຳນ້ອຍແມ່ນມີປະຕູປ່ອຍນ້ຳໃຫ້ປະຊາຊົນໄດ້ຊົມໃຊ້ເປັນປົກກະຕິຄືກັບຕອນທີ່ຍັງບໍ່ທັນໄດ້ສ້າງເຂື່ອນ.

ສຳລັບປະຊາຊົນທີ່ຢູ່ເໜືອລະດັບນ້ຳ ແມ່ນໄດ້ຮັບການຍົກຍ້າຍ ແລະເວັນຄືນ ທັງຊັບສິນ, ທີ່ດິນ ແລະສິ່ງປຸງສ້າງຕ່າງໆ ຊຶ່ງລວມທັງໝົດມີ 9 ບ້ານ ທີ່ໄດ້ຮັບຜົນກະທົບ 100% ແມ່ນປະຊາຊົນ ແຂວງຈຳປາສັກ ພ້ອມດຽວກັນນັ້ນທາງບໍລິສັດ ກໍໄດ້ສ້າງບ້ານຈັດສັນໃຫ້ຜູ້ໄດ້ຮັບຜົນກະທົບເປັນແຕ່ລະຄອບຄົວເປັນຕົ້ນເຮືອນ, ພື້ນທີ່ທຳການຜະລິດປະມານ 1,1 ເຮັກຕາ, ພ້ອມທັງສ້າງໂຮງຮຽນ, ສຸກສາລາ, ຕະຫຼາດ ແລະອື່ນໆໃນບ້ານທີ່ຍົກຍ້າຍ ໄປໃໝ່.

ໃນຂໍ້ມູນຍັງໃຫ້ຮູ້ອີກວ່າ: ໂຄງການໂຮງໄຟຟ້າພະລັງນ້ຳເຊປຽນ-ເຊນ້ຳນ້ອຍເປັນໂຄງການຜະລິດໄຟຟ້າຈາກພະລັງນ້ຳທີ່ຢູ່ພາຍໃຕ້ການຮ່ວມມືໃນການພັດທະນາພະລັງງານໄຟຟ້າລະຫວ່າງລັດຖະບານແຫ່ງ ສປປ ລາວ ແລະລາຊະ ອານາຈັກໄທ ກະແສໄຟຟ້າທີ່ຜະລິດໄດ້ ເກືອບທັງໝົດຂອງໂຄງການຈະຂາຍໃຫ້ກັບ ກຟຜ ເພື່ອຮອງຮັບຄວາມຕ້ອງການໃຊ້ໄຟຟ້າໃນປະເທດໄທເປັນໄລຍະເວລາ 27 ປີໂດຍເຊື່ອມຕໍ່ກັບລະບົບສາຍສົ່ງຂອງ ກຟຜ ທີ່ແຂວງອຸບົນຣາດຊະທານີ, ໂຄງການດັ່ງກ່າວຈະມີບໍລິສັດຜະລິດ ໄຟຟ້າຣາຊບູລີໂຮນດິ້ງຈຳກັດ (ມະຫາຊົນ) ຖືຮຸ້ນ 25%, SKກໍ່ສ້າງ ແລະຂົວທາງຈຳກັດ, SK Engineering and Construction Co.,Ltd ຖືຮຸ້ນ 26%, ກຸ່ມບໍລິສັດ ກຸ່ມບໍລິສັດ ເຂື່ອນໄຟຟ້າ ສ.ເກົາຫຼີ ຫຼື Korea Western power ຖືຮຸ້ນ 25% ແລະລັດວິສາຫະກິດຖືຮຸ້ນ ລາວຖືຮຸ້ນ 24%.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.