ເຄແອນບີ ກຽມສິນຄ້າກວ່າ 50 ຊະນິດຈຳໜ່າຍ ພ້ອມຫຼຸດລາຄາໃນງານເຟີນີເຈີວຽງຈັນ

ເຄແອນບີ ໂຮງງານເຟີນີເຈີ ລະດັບແຖວໜ້າດ້ານຜະລິດຕະພັນໄມ້ຕອບສະໜອງຄວາມຕ້ອງການຂອງຕະຫຼາດ ພາຍໃນ ແລະຕ່າງປະເທດ ຂະນະນີ້ໄດ້ມີ ຄວາມພ້ອມແລ້ວ 100% ຈະນຳສິນຄ້າ ດີມີຄຸນນະພາບເໜືອລາຄາຈາກໂຮງ ງານຫຼາຍກວ່າ 50 ຊະນິດເຂົ້າຮ່ວມໃນງານວາງສະແດງສິນຄ້າເຟີນິເຈີວຽງຈັນ ໃນຕົ້ນເດືອນໜ້າ ຊຶ່ງຈະມີການຫຼຸດລາ ຄາໃຫ້ລູກຄ້າເປັນການພິເສດທີ່ບໍ່ເຄີຍມີມາກ່ອນ ທັງນີ້ກໍເພື່ອເປັນການສະເຫຼີມສະຫຼອງຄົບຮອບ 30 ປີຂອງການສ້າງຕັ້ງເຄແອນບີເຟີນິເຈີ.

ທ່ານ ກອງມາລາ ພົມມະໄລ ຮອງປະທານສະມາຄົມເຟີນິເຈີລາວທັງເປັນ ເຈົ້າຂອງໂຮງງານເຄແອນບີເຟີນີເຈີ ໃຫ້ສຳພາດຕໍ່ທີມຂ່າວໜັງສືພິມ ເສດຖະກິດ-ສັງຄົມວ່າ: ໂຮງງານເຄແອນບີເຟີນິເຈີ ສ້າງຕັ້ງຂຶ້ນປະມານ 30 ປີຜ່ານມາ (1987) ເບື້ອງຕົ້ນໂຮງງານປະກອບ ດ້ວຍນາຍຊ່າງພຽງແຕ່ 2 ຄົນ ກໍາມະກອນ 3 ຄົນ ແລະເຄື່ອງມືປະກອບດ້ວຍໂຕະຊອຍ 2 ແຮງມ້າ 2 ໂຕ, ກົບໄຟຟ້າ 3-4 ໜ່ວຍ ແລະໃນອີກ 5 ປີຕໍ່ມີ (1992) ໂຮງງານຈິ່ງຄ່ອຍໆເຕີບໂຕຂຶ້ນມາຈາກ ກຳມະກອນ ແລະຊ່າງ 4-5 ຄົນ ຈິ່ງເພີ່ມຂຶ້ນເປັນ 10-15 ຄົນ ຕະຫຼອດຮອດການຕະຫຼາດກໍຄ່ອຍໆເພີ່ມຂຶ້ນຕາມໆກັນ.

ປີ 2004 ທ່ານ ກອງມາລາ ພົມມະໄລ ກ່າວວ່າ: ດ້ວຍຄວາມກ້າຫານໃນການຕັດສິນໃຈ ຈິ່ງໄດ້ນຳເອົາສິນຄ້າ ຂອງຕົນໄປວາງສະແດງໃນງານສະແດງສິນຄ້າຂອງສະມາຄົມແມ່ຍິງນານາຊາດ (WTG) ຢູ່ເດີ່ນໂຮງຮຽນຊັບພະວິຊາຊັ້ນສູງ, ໂສກປ່າຫຼວງ, ໃນງານດັ່ງກ່າວເຄື່ອງສິນຄ້າຂອງໂຮງານເຄແອນບີ ເປັນທີ່ສົນໃຈຢ່າງຍິ່ງເປັນຕົ້ນ ແມ່ນຊາວຕ່າງຊາດທີ່ມາກໍເຮັດໃຫ້ລູກຄ້າເຂົ້າມາຊື້ຢູ່ໂຮງງານຫຼາຍຂຶ້ນຕາມລຳດັບຈິ່ງກາຍເປັນຈຸດເລີ່ມຕົ້ນຂອງໂຮງານພວກເຮົາຖືເອົາວຽກງານວາງສະແດງ ແລະຈຳໜ່າຍສິນຄ້າເປັນວຽກງານຕົ້ນຕໍໃນດ້ານການຕະຫຼາດ.

ປີ 2007 ພັກ-ລັດໄດ້ມີການດັດສົມ ໂຮງງານໃຫ້ຖືກຕ້ອງຕາມທິດທາງຂອງພັກ ແລະລັດໂຮງງານພວກເຮົາ ຈິ່ງໄດ້ຈົກທຶນສ່ວນຕົວປັບປຸງໂຮງງານ, ສະຖານທີ່ການຜະລິດ ພ້ອມສ້າງນາຍຊ່າງຊຳນານງານ ແລະກຳມະກອນໃຫ້ ຖືກຕ້ອງຕາມມາດຕະຖານທີ່ກະຊວງອຸດສາຫະກຳ ແລະການຄ້າວາງອອກ ລວມທັງເຄື່ອງຈັກກໍໃຫ້ທັນສະໄໝກວ່າແຕ່ກ່ອນ.

ຈາກຈຸດນີ້ເອງ ທ່ານເຈົ້າຂອງໂຮງງານເຄແອນບີເຟີນີເຈີເຫັນວ່າ: ໄດ້ເຮັດໃຫ້ຜະລິດຕະພັນຂອງໂຮງງານພວກ ເຮົາຖືເປັນທີ່ຕ້ອງການຂອງລູກຄ້າລະ ດັບສູງ ແລະສາມາດຈຳໜ່າຍພາຍໃນເອງ ແລະຕ່າງປະເທດອີກ, ພວກເຮົາສາມາດເອົາສິນຄ້າໄປວາງສະແດງຕ່າງປະເທດໄດ້ຫຼາຍຄັ້ງເຊັ່ນຢູ່ ສປ ຈີນ ແລະສິງກະໂປດັ່ງນີ້ເປັນຕົ້ນ.

ສ່ວນວຽກວາງສະແດງພາຍໃນປະກອບສ່ວນຫຼາຍໆຄັ້ງເຊັ່ນງານເຟີນີເຈີຈັດຮ່ວມກັບພະແນກການຄ້ານະຄອນ ຫຼວງ 3 ຄັ້ງ, ງານເມດອິນລາດ 3 ຄັ້ງ, ງານສະແດງສິນຄ້າຂອງສະມາຄົມເຟີນີເຈີລາວ 3 ຄັ້ງ ແລະຮ່ວມກັນກັບກົມສົ່ງເສີມ, ກະຊວງອຸດສາຫະກຳ ແລະການຄ້າ 2 ຄັ້ງ ແລະງານອື່ນໆຢ່າງຕໍ່ເນື່ອງລຽນຕິດ, ອັນໄດ້ສ້າງໃຫ້ຊື່ສຽງຂອງ ໂຮງງານເຄແອນບີເປັນທີ່ຮູ້ຈັກຂອງສັງຄົມໃນວົງກວ້າງ.

ມາຮອດປະຈຸບັນ ໂຮງງານສາມາດເຕີບໂຕມາຢູ່ໃນແຖວໜ້າດ້ານຜະລິດຕະພັນ, ຄວາມນິຍົມຂອງລູກຄ້າ ແລະມີສິນຄ້າຢູ່ໃນສາງທີ່ກຽມຂາຍຫຼາຍໆຕື້ກີບ ໂດຍປະຈຸບັນໂຮງງານມີນາຍຊ່າງ ແລະກຳມະກອນປະມານ 70-80 ຄົນ ສາມາດສ້າງວຽກເຮັດງານທຳ, ສ້າງລາຍໄດ້ແກ່ຊາວຜູ້ອອກແຮງງານໄດ້ເປັນຢ່າງດີທັງສາມາດສະກັດກັ້ນປາກົດການ ຫຍໍ້ທໍ້ທາງສັງຄົມນຳອີກ.

ສຳລັບງານສະແດງສິນຄ້າເຟີນີເຈີວຽງຈັນ ຄັ້ງທີ II ທີ່ຈະຈັດຂຶ້ນໃນລະຫວ່າງວັນທີ 1-9 ເມສາ 2017 ທີ່ສູນການຄ້າລາວໄອເຕັກ ນະຄອນຫຼວງວຽງຈັນ ໂຮງງານພວກເຮົາແມ່ນມີຄວາມກຽມຄວາມພ້ອມ 100% ຈະນຳເອົາສິນຄ້າ ໄດ້ມາດຕະຖານລາຄາເໝາະສົມອອກມາວາງຈຳໜ່າຍໃນງານ ແລະພິເສດຈະນຳເອົາສິນຄ້າຫຼາຍກວ່າ 50 ຊະນິດອອກວາງຈຳໜ່າຍ ແລະຈະຫຼຸດແກ່ລູກຄ້າປະຈຳ ແລະລູກທົ່ວໆໄປເປັນການພິເສດ ທັງນີ້ກໍເພື່ອສະຫຼອງ 30 ປີໃນການສ້າງຕັ້ງໂຮງງານອີກດ້ວຍ.

ຂະນະທີ່ໃນອະນາຄົດ ທ່ານ ກອງມາລາ ພົມມະໄລ ກ່າວຕື່ມວ່າ ແຜນງານຂອງໂຮງງານພວກເຮົາແມ່ນຈະເນັ້ນ ປັບປຸງຄວາມສາມາດການຜະລິດຂຶ້ນຕື່ມເປັນຕົ້ນແມ່ນເນັ້ນຄຸນນະພາບ ແລະການບໍລິການຫຼັງການຂາຍ, ການເຂົ້າຮ່ວມວາງສະແດງ ແລະໂຄສະນາດ້ານການຕະຫຼາດໃຫ້ເຂັ້ມຂຸ້ນຂຶ້ນອີກ, ຊອກຫາຫຸ້ນສ່ວນທາງທຸລະກິດດ້ານຕ່າງປະເທດຕື່ມ ເພື່ອໃຫ້ສາມາດລະບາຍສິນຄ້າອອກສູ່ສາກົນນັບມື້ນັບຫຼາຍຂຶ້ນໃນອະນາຄົດ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.