ເຈາະ​ພຶດຕິ​ກຳ​ນັກ​ຊື້​ສິນຄ້າ​ອອນ​ລາຍ​ອາ​ຊຽນ

ປັດຈຸບັນ​ ຕະຫຼາດ​ອີ​ຄອມ​ເມີຊອາ​ຊຽນກຳລັງ​ມາ​ແຮງ​ໃນ​ເກືອບ​ທຸກໆ​ປະ​ເທດ ​ແຕ່​ບັນຫາ​ຄຸນ​ນະພາ​ບສິນຄ້າ ​ແລະ ການ​ບໍລິການ​ຍັງ​ເປັນ​ປະ​​ເດັນສໍາຄັນ ຂະນະ​ທີ່​ຜູ້​ບໍລິ​ໂພ​ກຍຸກ​ດິຈິ​ຕອນ​ນິຍົມ​ສະ​ແດງ​ຄວາມ​ຄິດ​ເຫັນ​ທາງ​ບວກ ​ແລະ ທາງລົບ​ໃນ​ສື່​ອອນ​ລາຍ ຊຶ່ງ​ຖື​ເປັນ​ຂໍ້​ມູນ​ສຳຄັນຂອງ​ຜູ້​ໃຫ້​ບໍລິການ​ໃນ​ຕະຫຼາດ​ອີ​ຄອມ​ເມີ​ຊຈະ​ຕ້ອງ​ຟັງ ​ແລະ ​ເຂົ້າ​ໃຈ​ເຖິງ​ຄວາມ​ຕ້ອງການ​ຂອງ​ຜູ້​ບໍລິ​ໂພ​ກ ​ເພື່ອ​ປັບປຸງ​ການ​ບໍລິ​ໂພ​ກ​ໃຫ້​ດີ​ຂຶ້ນ.

ດັ່ງ​ນັ້ນ “iPrice” ​ເວັບ​ໄຊ​ລວບ​ລວມຮ້ານ​ສິນຄ້າ​ອອນ​ລາຍ​ໃນ 7 ປະ​ເທດ​ອາ​ຊຽນ ​ໂດຍ​ວິ​ເຄາະ​ຈາກ 30.000 ຄວາມ​ຄິດ​ເຫັນ​ເທິງ​ເວັບ​ໄຊ Trusted Company ຊຶ່ງ​ເປັນ​​ແພ​ລດຟອມທີ່​ໃຫ້​ຜູ້​ບໍລິ​ໂພ​ກຂຽນຂໍ້ຄວາມວິຈານ​ຮ້ານ​ຄ້າ​ຕ່າງໆ​ລະຫວ່າງ​ວັນ​ທີ 1 ມັງກອນ​ປີ 2014 ​ເຖິງ 8 ກຸມພາ​ປີ 2017 ພົບ​ຂໍ້​ມູນ​ທີ່​ໜ້າ​ສົນ​ໃຈ​ໃນ 4 ປະ​ເທດ​ສະມາຊິກ​ອາ​ຊຽນ​ເຊັ່ນ: ສິງກະ​ໂປ, ຟິລິບ​ປິນ, ອິນ​ໂດ​ເນ​ເຊຍ ​ແລະ ມາ​ເລ​ເຊຍ.

ສິງກະ​ໂປ​ຖື​ວ່າ​ເປັນ​ປະ​ເທດ​ທີ່​ມີ​ສະຖຽນ​ລະ​ພາບ​ດ້ານ​ການ​ບໍລິການ​ອີ​ຄອມ​ເມີ​ຊຫຼາຍ​ທີ່​ສຸດ​ໃນ​ອາ​ຊຽນ ​ແຕ່​ເປັນ​ປະ​ເທດ​ທີ່ມີ​ການ​ໃຫ້​ຄວາມ​ຄິດ​ເຫັນ​ທາງ​ລົບ​ຫຼາຍ​ທີ່​ສຸດ. ​ໂດຍ​ທາງ​ເວັບ​ໄຊ​ວິ​ເຄາະ​ວ່າ ຄົນ​ສິງກະ​ໂປ​ຄາດ​ຫວັງ​ຕໍ່​ສິນຄ້າ ​ແລະ ບໍລິການ​ສູງ​ກວ່າ​ປະ​ເທດ​ອື່ນໆ​ໃນ​ອາ​ຊຽນ ​ເມື່ອ​ຄວາມ​ຄາດ​ຫວັງ​ບໍ່​ໄດ້​ຮັບ​ການ​ຕອບ​ສະໜອງ​ເທົ່າ​ທີ່​ຄວນ ​ໂດຍ​ຜົນ​ການ​ສຶກສາ​ພົບ​ວ່າ 29% ຂອງ​ຜູ້​ຊື້​ສິນຄ້າ​ອອນ​ລາຍ​ຄົນ​ສິງກະ​ໂປ​ມີ​ການ​ຂໍ​ເງິນ​ຄືນ​ຖ້າ​ຫາກ​ບໍ່ພໍ​ໃຈ​ຕໍ່​ສິນຄ້າ ​ແລະ ບໍລິການ ກົງກັນຂ້າມ ຖ້າ​ຫາກ​ສິນຄ້າ​ຫຼື​ບໍລິການ​ສາມາດ​ຕອບ​ສະໜອງ​ຄວາມ​ຕ້ອງການ​ໄດ້ ຄົນ​ສິງກະ​ໂປ​ຈະ​​ບອກ​ເລົ່າເລື່ອງ​ລາວ​ເຫຼົ່າ​ນີ້​ໃຫ້​ກັບ​ໝູ່​ເພື່ອນ ​ແລະ ຄອບຄົວຟັງ​ເປັນ​ສອງ​ເທົ່າ.

ນອກຈາກ​ນີ້ ​ໃນ​ພາບ​ລວມການ​ໃຫ້​ຄະ​ແນນ​ຕໍ່​ຮ້ານ​ຄ້າ​ອອນ​ລາຍ​ພົບ​ວ່າ ຄົນ​ສິງກະ​ໂປ​ໃຫ້​ຄະ​ແນນ​ສະ​ເລ່ຍພຽງ 2,9 ຄະ​​ແນນ ຈາກ​ຄະ​ແນນ​ເຕັມ  5 ຄະ​ແນນ ຕົວຢ່າງ​ທີ່​ຜ່ານ​ມາ ​ໃນ​ໄລຍະ​ວັນ​ຄຣິສະມາດ​ ນັກ​ຊື້​ສິງ​ກະ​ໂປກ​ວ່າ 51% ບໍ່ພໍ​ໃຈ​ກັບ​ຂອງ​ຂວັນທີ່​ສັ່ງ​ຊື້​ຜ່ານ​ອອນ​ລາຍ ​ເພາະ​ຄຸນ​ນະພາ​ບສິນຄ້າ​ບໍ່​ສອດຄ່ອງ​ກັບ​ຮູບ​ພາບສິນຄ້າ​ອອນ​ລາຍ.

ສຳ​ຫຼັບ​ຄົນ​ມຸສະ​ລິ​ມ​ໃນ​ອິນ​ໂດ​ເນ​ເຊຍ​ຖື​ວ່າ​ເປັນ​ເຊື້ອ​ຊາດ​ທີ່​ໃຈດີ, ​ໂດຍ​ຄົນ​ອິນ​ໂດ​ເນ​ເຊຍ​ບໍ່​ນິຍົມ​ຂຽນ​ຂໍ້ຄວາມ​ໃນ​ທາງ​ລົບ ​ແລະ ຍັງ​ໃຫ້​ຄະ​ແນນ​ຮ້ານ​ຄ້າ​ອອນ​ລາຍ​ສູງ​ເຖິງ 4,2 ຄະ​ແນນ ຈາກ​ຄະ​ແນນ​ເຕັມ5 ​ເຖິງ​ແມ່ນ​ວ່າ​ປີ​ທີ່​ຜ່ານ​ມາ​ຈະ​ພົບ​ວ່າ ມີ​ການ​ແຈ້ງ​ບັນຫາ​ກ່ຽວ​ກັບ​ການ​ໂກງ​ເງິນ​ຂອງ​ຮ້ານ​ຄ້າ​ອອນ​ລາຍ​ກວ່າ 104%.

ຟິລິບ​ປິນ ຖື​ເປັນ​ໜຶ່ງ​ໃນ​ຕະຫຼາດ​ອີ​ຄອມ​ເມີ​ຊທີ່​ໜ້າ​ສົນ​ໃຈ​ຫຼາຍ ດ້ວຍ​ອັດຕາ​ການ​ເຕີບ​ໂຕ​ປະມານ 17% ​ໃນ​ອີກ 5 ປີ​ຕໍ່ໜ້າ ຢ່າງ​ໃດ​ກໍ​ຕາມ ຮ້ານ​ຂາຍ​ສິນຄ້າ​ອອນ​ລາຍ​ໃນ​ຕະຫຼາດ​ຟິລິບ​ປິນຍັງ​ບໍ່​ສາມາດ​ຕອບ​ສະໜອງ​ຄວາມ​ຕ້ອງການ​ຂອງ​ຜູ້​ບໍລິ​ໂພ​ກ​ໄດ້ ຈາກ​ການ​ສຶກສາ​ພົບ​ວ່າ ຜູ້​ບໍລິ​ໂພ​ກ​ໃນ​ຕະຫຼາດ​ສ່ວນ​ຫຼາຍ​ໃຫ້​ຄວາມ​ເຫັນ​ໃນ​ທາງ​ລົບ 57% ຂອງ​ຜູ້​ບໍລິ​ໂພ​ກຊື້​ສິນຄ້າ​ອອນ​ລາຍ. ສ່ວນ​ໃຫຍ່​ເປັນຄວາມ​ບໍ່ພໍ​ໃຈ​ຕໍ່​ຜູ້​ໃຫ້​ບໍລິການ​ທ້ອງ​ຖິ່ນ​ຫຼາຍ​ກວ່າ​ບໍລິສັດ​ຕ່າງປະ​ເທດ ດັ່ງ​ນັ້ນ​ໜ້າ​ຈະ​ເປັນ​ໂອກາດ​ທີ່​ດີ​ສຳລັບ​ຜູ້​ໃຫ້​ບໍລິການ​ຮ້ານ​ຄ້າ​ອອນ​ລາຍ​ຕ່າງປະ​ເທດ​ທີ່​ຈະ​ເຂົ້າ​ມາ​ເຮັດ​ຕະຫຼາດ​ໃນ​ຟິລິບ​ປິນ​ເພື່ອ​ຕອບ​ສະໜອງ​ຄວາມ​ຕ້ອງການ​ຂອງ​ຜູ້​ບໍລິ​ໂພ​ກຫຼາຍ​ຂຶ້ນ.

ມາ​ເລ​ເຊຍ ​ໄດ້​ອານິສົງ​ຈາກ​ທີ່​ລັດຖະບານ​ພະຍາຍາມ​ຊຸກຍູ້ ​ແລະ ພັດທະນາ​ລະບົບ​ຂໍ້​ມູນ​ຂ່າວສານ​ຢ່າງ​ຈິງ​ໃຈ ສົ່ງຜົນ​ເຮັດ​ໃຫ້ປະຈຸ​ບັນ​ຄົນ​ມາ​ເລ​ເຊຍ​ປະມານ 23 ລ້ານ​ຄົນ​ຫຼື 74% ຂອງ​ປະຊາກອນ​ນິຍົມ​ຊື້​ສິນຄ້າ​ຜ່ານ​ທາງ​ອອນ​ລາຍ ສ່ວຍ​ໃຫຍ່​ເປັນ​ເຄື່ອງ​ໃຊ້​ໄຟຟ້າ ​ແລະ ອິ​ເລັກ​ໂຕ​ນິກ, ​ເສື້ອ​ຜ້າ, ​ອາຫານ​ ​ແລະ ​ເຄື່ອງ​ສຳອາງ.

ສຳລັບ​ປັດ​ໃຈ​ທີ່​ເລືອກ​ຊື້ສິນຄ້າ​ອອນ​ລາຍ​ຕົ້ນຕໍ​ຄື: ລາຄາ, ຄຸນ​ນະພາ​ບ, ຄວາມ​ຫຼາກ​ຫຼາຍ, ຕະຫຼອດຮອດ​ຄວາມ​ປອດ​ໄພ​ຂອງ​ລະບົບ​ຊຳລະ​ຄ່າ​ສິນຄ້າ ​ແລະ ຄວາມ​ວ່ອງ​ໄວ​ໃນ​ການ​ຂົນ​ສົ່ງ​ສິນຄ້າ, ກົນລະຍຸດ​ການ​ຕະຫຼາດ​ຈະ​ຊ່ວຍ​ເພີ່ມ​ຄວາມ​ໜ້າ​ສົນ​ໃຈ ​ແລະ ​ແຮງ​ຈູງ​ໃຈ​ໃຫ້​ເກີດ​ການ​ຊື້ ​ໂດຍ​ສະ​ເພາະ​ການ​ຈັດ​ກິ​ດຈະ​ກຳ​ສົ່ງ​ເສີມ​ການ​ຂາຍ, ຫຼຸດ ​ແລະ ​ແຖມ ທີ່​ຍັງ​ເປັນ​ຕົວ​ກະ​ຕຸ້ນ​ທີ່​ດີ ຮອງ​ຈາກ​ປັດ​ໄຈ​ລາຄາ.

ຢ່າງ​ໃດ​ກໍ​ຕາມ ນັກ​ຊື້​ອອນ​ລາຍ​ມາ​ເລ​ເຊຍ​ປະມານ 25% ຍັງ​ມີ​ມູນ​ມອງ​ດ້ານ​ລົບ​ຕໍ່​ຮ້ານ​ຄ້າ ​ແລະ ສິນຄ້າ​ອອນ​ລາຍ ທັງ​ມີ​ພືດ​ຕິ​ກຳ​ການສະ​ແດງ​ອອກ​ບໍ່ພໍ​ໃຈ​ຈົນ​ກວ່າ​ຈະ​ໄດ້​ຮັບ​ຄຳ​ຂໍ​ໂທດ​ຈາກ​ຮ້ານ​ຄ້າ​ໃນ​ກໍລະນີ​ທີ່​ສິນຄ້າ​ບໍ່​ເປັນ​ໄປ​ຕາມ​ທີ່​ຄາດ​ຫວັງ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.