ເຈົ້າ­ແຂວງ​ຊຽງ​ຂວາງ​ລົງ​ຕິດ­ຕາມ​ໂຄງ­ການ​ກໍ່­ສ້າງ​ສາຍ​ສົ່ງ 500 KV

ໃນ​ວັນ​ທີ 25 ເມ­ສາ​ຜ່ານ​ມາ ທ່ານ ສົມ​ກົດ ມັງ​ໜໍ່​ເມກ ເຈົ້າ­ແຂວງຊຽງ​ຂວາງ, ມີ​ເຈົ້າ­ເມືອງໆ​ຜາ​ໄຊ ພ້ອມດ້ວຍ​ບັນ­ດາ​ພາກ­ສ່ວນ​ທີ່​ກ່ຽວ­ຂ້ອງ​ໄດ້ລົງ​ຢ້ຽມ­ຢາມ ແລະ​ຕິດ­ຕາມ​ຄວາມ​ຄືບໜ້າ​ໂຄງ­ການ​ກໍ່­ສ້າງ​ສາຍ​ສົ່ງ 500 ກິ​ໂລໂວນ (KV) ຢູ່​ທີ່​ບ້ານ​ນາ​ຮຸງ​ໜອງຫອຍ ເມືອງ​ຜາ​ໄຊ ແຂວງ​ຊຽງ​ຂວາງ ພາຍ­ຫຼັງ​ທີ່​ໄດ້​ເລີ່ມ​ລົງ­ມື​ກໍ່­ສ້າງ​ມາ​ແຕ່ເດືອນ​ກຸມ­ພາ​ຜ່ານ​ມາ.

ໂຄງ­ການ​ດັ່ງ­ກ່າວ​ນີ້ ຮັບ​ເໝົາ​ກໍ່­ສ້າງໂດຍ​ກຸ່ມ​ບໍ­ລິ­ສັດ​ສາ­ກົນ​ດ້ານ​ນ້ຳ ແລະ​ເອ​ເລັກ​ໂຕຣ​ນິກ (CHINA INTERNATIONAL WATER & ELECTRIC Group) ຫຼື CWE ຄາດ­ໝາຍ​ໃຫ້​ສຳເລັດ​ພາຍ​ໃນ 4 ປີ ດ້ວຍ​ມູນ​ຄ່າ​ການ​ກໍ່ສ້າງ​ສະ­ເພາະ​ຢູ່​ແຂວງ​ຊຽງ​ຂວາງ​ແມ່ນ   150 ກວ່າ​ລ້ານ​ໂດ​ລາ​ສະ­ຫະ­ລັດ ຊຶ່ງ​ໂຄງ­ການ​ນີ້​ແມ່ນ​ໄດ້​ກວມ​ເອົາ 4 ແຂວງ ຄື: ແຂວງ​ຊຽງ​ຂວາງ, ໄຊ​ສົມ­ບູນ, ແຂວງ​ວຽງ​ຈັນ ແລະ​ນະ­ຄອນ­ຫຼວງ​ວຽງ​ຈັນ ລວມ​ມູນ​ຄ່າ​ທັງ​ໝົດ 3 ແຂວງ 1 ນະ­ຄອນ­ຫຼວງ 622,8 ລ້ານ​ໂດ​ລາ​ສະ­ຫະ­ລັດ.

ໂຄງ­ການ​ຈະ​ໄດ້​ກໍ່­ສ້າງ​ສາຍ​ສົ່ງ 500KV ວົງ​ຈອນ​ຄູ່​ສະ­ຖາ­ນີ​ບ້ານ​ນາ​ຮຸງ ໜອງ​ຫອຍ​ຫາ​ສະ­ຖາ­ນີ​ດານ​ຊີ ເມືອງ​ນາຊາຍ​ທອງ ນະ­ຄອນ­ຫຼວງ​ວຽງ​ຈັນ ມີ​ຄວາມຍາວ 210 ກິ­ໂລ­ແມັດ, ການ​ກໍ່­ສ້າງ​ສາຍສົ່ງ 230 KV ວົງ​ຈອນ​ຄູ່​ສະ­ຖາ­ນີ​ດານຊີ​ຫາ​ສະ­ຖາ­ນີ​ນາ​ຊາຍ​ທອງ ມີ​ຄວາມ​ຍາວ 8,5 ກິ­ໂລ­ແມັດ, ໄດ້​ກໍ່­ສ້າງ​ເຮືອນ​ພັກ​ພະ­ນັກ­ງານ​ສຳ­ເລັດ​ແລ້ວ 55%, ວຽກ​ຕັດ ແລະ​ອັດ​ແໜ້ນ​ດິນ​ສະ­ຖາ­ນີ​ນາ​ຮຸງ​ໜອງຫອຍ​ສຳ­ເລັດ 60%, ວຽກ​ກໍ່­ສ້າງ​ສາຍ​ສົ່ງ 500KV ເມືອງ​ຜາ​ໄຊ​ສຳ­ເລັດ 11,67% ໂດຍ​ແມ່ນ​ລັດ​ວິ​ສາ​ຫະ​ກິດ​ໄຟ­ຟ້າ​ລາວ ເປັນ​ເຈົ້າ​ຂອງ​ໂຄງ­ການ.

ໂດຍ: ບຸນ​ມີ ແສງ​ທຸມ​ມີ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.