ເຈົ້າເມືອງໂພນທອງຮຽກຮ້ອງທຸກຄົນໃຫ້ມີວິໄນ ຫາກໄປທ່ຽວເມືອງເກົ່າ

ກາຍເປັນທີ່ິຍົມສູງສຸດໃນປະຈຸບັນສໍາລັບແຫຼ່ງທ່ອງທ່ຽວພົ້ນນໍ້າຂອງຫາດເມືອງໂພນທອງ ຫຼື ຫາດເມືອງເກົ່າ ທີ່ສາມາດດຶງດູດນັກທ່ອງທ່ຽວໄດ້ຫຼາຍພັນຄົນໃນແຕ່ລະວັນ ຈົນເຮັດໃຫ້ບາງມື້ທີ່ເປັນເທສະການຜູ້ທີ່ໄປໃຫ້ບໍລິການຮ້ານອາຫານຕ່າງໆບໍ່ສາມາດຕອບສະໜອງໄດ້ດ້ານຂອງທ່ານເຈົ້າເມືອງ ກໍມີຮ້ອຍຍີ້ມເຫັນປະຊາຊົນມີລາຍຮັບດີແຕ່ມີຄວາມກັງວົນໃຈດ້ານຄວາມສະຫງົບປອດໄພ ຢໍ້າໃຫ້ບັນດາຜູ້ທີ່ໄປໃຫ້ບໍລິການ ແລະຜູ້ໄປທ່ຽວຫຼິ້ນ ຈົ່ງປະຕິບັດຕາມລະບຽບວິໄນຢ່າງເຄັ່ງຄັດ.

ແຫຼ່ງທ່ອງທ່ຽວພົ້ນນໍ້າຂອງຫາດ ເມືອງເກົ່າເມືອງໂພນທອງ ແຂວງຈໍາປາສັກ ຖືໄດ້ວ່າເປັນສະຖານທີ່ທ່ອງທ່ຽວທີ່ຍອດນິຍົມຂອງຊາວແຂວງຈໍາປາສັກໃນ ປະຈຸບັນຫາດດັ່ງກ່າວເມື່ອ 4-5 ປີຫຼັງ ຍັງບໍ່ທັນມີຜູ້ຄົນໄປທ່ຽວຫຼິ້ນຫຼາຍພໍປານໃດ, ແຕ່ພາຍຫຼັງທີ່ມີການໃຫ້ບໍລິການຮ້ານອາຫານ, ຕູບນັ່ງແລະເຄື່ອງຫຼິ້ນນໍ້າຕ່າງໆ.. ຜູ້ຄົນພາຍໃນເມືອງຈິ່ງພາກັນລົງຫຼິ້ນຫຼາຍຂຶ້ນ ແລະເມືອງຕ່າງໆພາຍໃນແຂວງກໍເລີ່ມໃຫ້ຄວາມສົນໃຈນັບມື້ຫຼາຍຂຶ້ນ, ປະຈຸບັນສາມາດເວົ້າໄດ້ວ່າ ສະຖານທີ່ທ່ອງທ່ຽວລະດູແລ້ງແຫ່ງນີ້ກາຍເປັນທີ່ສົນໃຈຂອງມວນຊົນລາວພາຍໃນແຂວງ ແລະຕ່າງ ແຂວງນໍາອີກ.

ທຸກວັນນີ້ຖ້າເປັນມື້ທໍາມະດາມີຜູ້ໄປທ່ຽວບໍ່ຫຼຸດ 3 ພັນຄົນ ມື້ທີ່ເປັນວັນສໍາຄັນງານເທສະການແມ່ນນັບແສນຄົນຂຶ້ນໄປຈົນເຮັດໃຫ້ຜູ້ທີ່ໃຫ້ບໍລິການອາຫານ ແລະການບໍລິການອື່ນໆ ບໍ່ສາມາດຕອບສະໜອງໄດ້ກັບຄວາມຕ້ອງການ, ໄປຄຽງຄູ່ກັບດ້ານດີທ່າແຮງດັ່ງກ່າວມັນກໍມີຄວາມສ່ຽງໃນດ້ານດວາມສະຫງົບປອດໄພເນື່ອງຈາກບັນດານັກທຸລະກິດຫົວໃສຈໍານວນບໍ່ໜ້ອຍມີແນວຄິດຢາກເຂົ້າໄປສໍາປະທານເພື່ອບໍລິຫານຈັດການໃຫ້ມີຄວາມຫຼາກຫຼາຍຂຶ້ນແຕ່ເມືອງໂພນທອງກໍຍັງໃຈແຂງເນື່ອງຈາກເປີດບໍລິການໄດ້ພຽງບາງລະດູການເທົ່ານັ້ນ.

ຢ່າງໃດຕໍ່ກັບບັນຫາດັ່ງກ່າວທ່ານ ຂັນຄໍາ ສຸລິວົງ ເຈົ້າເມືອງໆໂພນທອງ ແຂວງຈໍາປາສັກ, ໄດ້ເປີດເຜີຍຕໍ່ນັກຂ່າວ ໜັງສືພິມເສດຖະກິດ-ສັງຄົມ ປະຈໍາທ້ອງຖິ່ນໃຫ້ຮູ້ເມື່ອບໍ່ດົນມານີ້ວ່າ: ເພື່ອຮັບປະກັນຄວາມເປັນລະບຽບຈົບງາມ, ຄວາມສະຫງົບສຸກພາຍໃນຫາດເມືອງເກົ່າທາງອໍານາດການປົກຄອງເມືອງໄດ້ຮ່ວມກັນກັບກຸ່ມບ້ານເປົ້າໝາຍທີ່ເຂົ້າໃຫ້ບໍລິການທີ່ຫາດເມືອງເກົ່າຄື: ບ້ານທ່າຫຼວງ, ບ້ານໂພໄຊ ແລະບ້ານຫ້ວຍເພັດ, ປຶກສາຫາລື ແລະໄດ້ແຕ່ງຕັ້ງກຸ່ມໃຫ້ບໍລິການພາຍໃນຫາດຄື: ກຸ່ມຈັດສັນສະຖານທີ່ ຄ້າຂາຍ, ກຸ່ມຮັກສາຄວາມສະອາດ, ກຸ່ມຮັກສາຄວາມສະຫງົບປອດໄພ ແລະອື່ນໆ.

ພ້ອມດຽວກັນນີ້ກໍໄດ້ອອກປະກາດແຈ້ງ ການຂອງເຈົ້າເມືອງໆໂພນທອງກ່ຽວກັບການໃຫ້ບໍລິການ ແລະການເຂົ້າທ່ຽວຫຼີ້ນຫາດຄື: ຫ້າມບໍ່ໃຫ້ນັກຮຽນນັກສຶກ ສານຸ່ງຖືເຄື່ອງນຸ່ງຊຸດນັກຮຽນເຂົ້າໄປທ່ຽວພາຍໃນຫາດຢ່າງເດັດຂາດ, ຫ້າມບໍ່ໃຫ້ເຈົ້າຂອງຮ້ານເປີດບໍລິການໃຫ້ລູກຄ້າລົງຫຼິ້ນນໍາກາຍ 17:00 ໂມງແລງ ຢ່າງເດັດຂາດ ແລະໃຫ້ປິດຫາດພາຍໃນ 19:00 ໂມງ (ຍົກເວັ້ນເຈົ້າຂອງຮ້ານ), ພ້ອມດຽວກັນນີ້ກໍຫ້າມບໍ່ໃຫ້ຜູ້ທີ່ເຂົ້າໄປໃຊ້ບໍລິການລະເມີດກະທໍາໃນສີ່ງທີ່ຜິດກົດໝາຍຢ່າງເດັດຂາດ ແລະໃຫ້ທຸກຮ້ານ ຈົ່ງກໍານົດເຂດຫຼິ້ນນໍ້າຢ່າງຈະແຈ້ງ, ບໍ່ໃຫ້ອອກນອກເຖິງນໍ້າເລີກຈົນເກີນໄປດ້ວຍການປັກໝາຍເຂດດ້ວຍປຸມ ແລະສີ່ງເຕືອນໄພຕ່າງໆ ທັງນີ້ ກໍເພື່ອຮັບປະກັນຄວາມສະຫງົບ, ຄວາມປອດໄພ ແລະຫຼີກເວັ້ນຄວາມເສຍຫາຍທີ່ຈະຕາມມາ ໂດຍສະເພາະແມ່ນການຫຼິ້ນສົງການປີ ໃໝ່ລາວທີ່ຈະມາເຖີງນີ້.

ປະຈຸບັນຢູ່ຫາດເມືອງເກົ່າມີຜູ້ທີ່ໄປໃຫ້ບໍລິການທັງໝົດ 15 ຮ້ານ, ມີຫຼາຍກວ່າ 100 ກວ່າຕູບ ແລະມີ 3 ບ້ານ, 4 ຂົວຂ້າມ, ຄ່າຂ້າມຂົວໄມໄປຫາດເອກະພາບກັນເກັບ 3 ພັນກີບຕໍ່ຄົນ (ຜູ້ໃຫຍ່) ແລະຄ່າບໍລິການເຊົ່າຕຸບ 25 ພັນກີບ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.