ເຈົ້າແຂວງໄຊຍະບູລີລົງຊຸກຍູ້ໂຄງການປູກເຂົ້າ

ວັນທີ 18 ເມສາ ທ່ານ ພົງສະຫວັນ ສິດທິວົງ ເຈົ້າແຂວງໄຊຍະບູລີໄດ້ຢ້ຽມຢາມ ແລະຊຸກຍູ້ໂຄງການສົ່ງເສີມການປູກເຂົ້າຄຸນນະພາບ ໂດຍນຳໃຊ້ເຕັກໂນໂລຊີທັນສະໄໝເຂົ້າໃນການຜະລິດ ທີ່ສູນທົດລອງບ້ານນາໂສມ ເມືອງພຽງ ໂດຍການຕ້ອນຮັບ ແລະນຳພາເບິ່ງສູນ ທົດລອງດັ່ງກ່າວໂດຍ: ທ່ານ ສົມຫວັງ ແກ້ວວິໄລສັກ ເຈົ້າເມືອງໆພຽງ.

ກ່ອນອື່ນທ່ານເຈົ້າແຂວງໄດ້ຮັບຝັງການອະທິບາຍກ່ຽວກັບເຕັກນິກ, ຂັ້ນຕອນໃນການບົວລະບັດຮັກສາເຂົ້າຄຸນນະພາບຈາກບໍລິສັດກ້າວໜ້າລາວໂຄງການສົ່ງເສີມການປູກເຂົ້າຄຸນນະພາບ ໂດຍນໍາໃຊ້ເຕັກໂນໂລຊີທັນສະໄໝເປັນໂຄງການປູກເຂົ້າທົດລອງໃນເນື້ອທີ່ 25 ເຮັກຕາ, ໃນນີ້ໄດ້ປູກເຂົ້າຈ້າວພັນຫອມມະລິຈີນ ແລະປູກເຂົ້າໜຽວພັນເຊ ປັ້ງໄຟປະຈຸບັນແມ່ນຂັ້ນຕອນການບົວລະບັດຮັກສາ, ການໃສ່ຝຸ່ນວິທະຍາສາດ ເຊິ່ງສະກັດຈາກທໍາມະຊາດ ໂດຍນໍາໃຊ້ອຸປະກອນທີ່ທັນສະໄໝ, ຝຸ່ນດັ່ງກ່າວ ເປັນຢາບໍາລຸງຊ່ວຍໃຫ້ຕົ້ນເຂົ້າເພີ່ມປະລິມານຂອງເຂົ້າໄດ້ 30%, ສະເລ່ຍສະມັດຖະພາບເຂົ້າແມ່ນຈະໃຫ້ໄດ້ 3,5-4 ໂຕນຕໍ່ເຮັກຕາ ແລະຄາດກະວ່າຈະໄດ້ເກັບກ່ຽວຜົນຜະລິດໃນກາງເດືອນພືດສະພານີ້.

ຈາກນັ້ນທ່ານເຈົ້າແຂວງກໍ່ໄດ້ກ່າວຄໍາຍ້ອງຍໍຕໍ່ບໍລິສັດທີ່ໄດ້ເລືອກເອົາເມືອງພຽງແຂວງໄຊຍະບູລີ ເປັນສູນທົດລອງປູກເຂົ້າໂດຍເຕັກໂນໂລຊີໃໝ່ ແລະຫວັງຢ່າງຍິ່ງວ່າຖ້າໂຄງການໄດ້ຮັບຜົນສໍາເລັດແລ້ວຄົງຈະໄດ້ຮັບການຜັນຂະຫຍາຍເຕັກນິກວິທີການ, ຂັ້ນຕອນໃຫ້ປະຊາຊົນແຕ່ລະທ້ອງຖິ່ນນໍາໄປຈັດຕັ້ງປະຕິບັດເພື່ອໃຫ້ປະລິມານຂອງເຂົ້າໄດ້ຫຼາຍຂຶ້ນກ່ວາເກົ່າ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.